I Versetti Biblici più popolari da Mateusi 10

Condividi

E'i jẽ Jesu wemimono rã kõ pè: – Peenu rã'ĩ esa. Iwasuaytà peupe nivoi mãe kõ pytery pè poromono remẽ, e'i. Ãwitõ kaneiru jamono jawarà ojãrõ mãe kõ gyty remẽ, ojãrõ kuwa kaneiru rè jawarà. Ãwĩvotà penereko kupa, e'i. Ajawyi kee tapeiko ipyterà kõ rupi peiko remẽ. Tapemoa'u jẽ ikõ peiko nẽ. Tapetekokuwavay ikõ peiko nẽ. Ivo ikõ tapeiko jẽ ipytery kõ rupi nẽ. Sãtãmy tè ikõ peiko nẽ, e'i.

– Ava mõ sõ pejukatà erewarà mõ remẽ, ikatu jẽtà peupe. Janejare'e pyri tè ajaire peiko jẽtà. Mãerã tè peiko karuarutà ipyri, e'i. Ajamã'ẽ pejisyrytà sõ peikoa rã wyi remẽ, ãmẽ sõsi nikatu'ãi peupe. Napeiko karuaru'ãi Janejare'e pyri ãmẽ, e'i.

– Tapekyje e'ã ikõ poromoai mãe kõ wyi nẽ, a'e pejẽ. “Ejukatà maevo kupa”, tapejẽ e'ã. Janejuka sõ kupa remẽ, janepirà tè ojukatà kupa. Nojuka kuwa'ãi jane 'ãg kupa. Janepy'a pewarà nojuka kuwa'ãi teve kupa. Pejuka paire manyvo ne'i'ãi penereko ai kupa ky'y. Janejare'e kõrijõ tè jane'ãg ojuka kuwa imonooka jimomorijau wasua rena kyty, janepirà revejẽ, e'i. Ajawyi Janejare'e kõrijõ tè tapemomojy, a'e pejẽ, e'i Jesu.

– Ãmẽ ava mõ sõ opota pejuka eayvu rupi peiko rewarà mõ remẽ, tapekyje e'ã iwyi. Tapenearai e'ã eayvu wyi. Tapeity e'ã eayvu. Penerekoa rã tapeity e'ã teve. Peity sõ remẽ, ni'ei eremĩgwai rõmõ peiko, e'i.

E'i jẽ Jesu: – Ajawyi kee a'e pejẽ. Tapejinõsĩ e'ã ikõ ewyi peiko nẽ! Ava mõ nosĩ, “Jesu koty rewarà tè ije”, javo jane kõ rovake remẽ, ije ve, “Aje, ekoty rewarà tè ãwĩ”, a'e tary ve Papa pè yva pè ãmẽ, e'i. Ãwĩvo ve ava mõ, “Erõvijã rõwã Jesu”, e'i sõ jane kõ rovake remẽ, “Eremĩgwai rõwã ãwĩ”, a'e tary ve Papa pè yva pè ãmẽ, e'i Jesu.

– Kee tapeiko peo remẽ. Itekorã mãe kõ tapemokatu [Janejare'e kasia rupi]. Ãmõ, omãnõ mãe kõ tapemomoera imopõ'ã, e'i. Ãmõ, ipisĩsĩma mãe kõ tapemokatu teve, e'i. Ãmõ, ãjãg kõ tapemoẽ ojimoemija ee mãe kõ wyi, e'i. Tepy e'ãte a'evo tapeiko, e'i. Ãwitõ tepy e'ãte Janejare'e penereko katu, ãwĩvo ve, e'i.

Tysi tõ jane ky'y! Janere ywesõ Janejare'e oja'a kãpĩnà kõ wyi ipi. [Janerauvay wyi a'evo oja'a janere.] Janekuwa katuay ipi. Janeapira mosa'ãga kõ ve tesõ okuwa. Omoirõ irõma katu oja'a ee. Ajawyi tapekyje e'ã [poromomorijau mãe kõ wyi] ipi, Janejare'e okãte'ã pene rewarà mõ, e'i Jesu.

Jesu e'i jẽ: – Maevo kee pejẽ tite: “Jesu si poromojimoryokatà, ãwisõ pirujẽ ãmõ e'y e'yiwarà kõ tojimory ojee ky'y”, pejẽ tite ije. A'evoa rõmõ rõwã ajo. Ijai jẽtà kupa. Ojimoai ywete jẽtà kupa. Ojikõ'õ jẽtà ojee iko kupa. Age'e ywesõ si a'evotà, avãema rewarà mõ.