Yakkha 2023 WBT/NEBS  (NT) Drama

निङ्‌वाफुमागा उच्‍या खिरिस्‍ट येसुगा नुसाला खाॽला सुरु लेङ्‌मेहा॥ निङ्‌वाफुमाभाङ् चेक्‍खुबा यासाइयागा छेप्‍तापपे खाॽला छेप्‍तामा,
“सो, न्‍दा हाक्‍निङ् ओन्‍दाङ् आका सालेन खेम्‍मेखुबा पाक्‍स्‍वाङ्,
उङा ङ्‌गा लाम्‍बु त्‍यार चोग्‍वाना॥”
“खेप्‍सानुम, इसा चा मेॽनिङ्‌ना सुन्‍नेना ठोङ्‌बे एको याॽमि माडा सेम्‍लाङा खाॽला कामासिम्‍मे,
‘हाङ्‌बा तामाना लाम्‍बु तोयानुम,
न्‍हाङा उङ् लाम्‍माहा लाम्‍बुचि सिधा चोगानुम्‍चिम॥’”
युहान्‍ना याॽमिचि बाप्‍तिस्‍मा पिसाङ् इसा चा मेॽनिङ्‌ना सुन्‍नेना ठोङ्‌बे ताया॥ उङा याॽमिचि खाॽला लुसाङ् पार्चार चोगुचि, “न्‍निङ्‌दा पास्‍चाताप चोगिघोङ् पाप चोक्‍मा लेप्‍तिॽयानुम न्‍हाङ् बाप्‍तिस्‍मा लियाचोगानुम, ङ्‌खोङ् निङ्‌वाफुमाङा न्‍निङ्‌गा पाप छेमा चोक्‍तुबिइवाघा॥” याहुदिया लिङ्‌खाम नुङ् यारुसालेम साहारबेॽहा घाक याॽमिचि युहान्‍नागाबे न्‍दाया, न्‍हाङा पाप पाहाङ् पास्‍चाताप चोक्‍खुबाचि घाक उङा यार्दान होङ्‌माबे बाप्‍तिस्‍मा पिचि॥ युहान्‍नागा वाॽमाहा तेफेन च्‍हेन ओओक्‍का उमुङ्‌गा फायाना तेक नुङ् काम्‍बोरबे ह्‌वारिक्‍का पेटि साया॥ उका चाम्‍योङ्‌बा च्‍हेन सालाहा नुङ् पुङ्‌दाबेॽहा थाङ्‌सुगा उवा साया॥ उङा याॽमिचि खाॽला लुचि, “का हाक्‍निङ् हेक्‍साङ् एको ताये, उङ् का हाक्‍निङ् साक्‍तिसालिना॥ का गो उका उलाङ्‌खोप्‍का उनाम फुङ्‌मा चा न्‍थेन्‍सिमेॽङान्‍ना॥ का न्‍निङ्‌दा माङ्‌च्‍वाङा बाप्‍तिस्‍मा पिन्‍नुङ्‌नेनिन, ङ्‌खाॽनिङ्‌गो उङा न्‍निङ्‌दा पाबित्‍तारा आत्‍माङा बाप्‍तिस्‍मा पिइवाघा॥”


युहान्‍नाङा खाॽला पार्चार चोक्‍मास्‍यानिङ् येसु गालिल लिङ्‌खामगा नासारात साहारभाङ् ताया, न्‍हाङा उङा चा युहान्‍नाभाङ् यार्दान होङ्‌माबे बाप्‍तिस्‍मा लियाचोगु॥ माङ्‌च्‍वाभाङ् पाखा लोन्‍दाना सोलोक येसुङा वालोक होसाना नुङ् पाबित्‍तारा आत्‍मा ढुकुवागा रुप्‍पे उङ् छोङ्‌बे उङ्‌मास्‍याना निसु॥ न्‍हाङा वालोकपाहाङ् एको खाॽलाना सेम्‍ला ताया, “न्‍दा आलुङ्‌मा तुक्‍नेन्‍ना आच्‍यागान, का न्‍दानुङ् प्‍याक चोन्‍दास्‍यामाङ्‌ना॥”
न्‍हाङ् सोलोक पाबित्‍तारा आत्‍माङा येसु इसा चा मेॽनिङ्‌ना सुन्‍नेना ठोङ्‌बे खेतु॥ न्‍नाबे उङ् साइतानङा नाखेङ् लेन सोम्‍मा पापपे आमेॽमागा जाच चोगु॥ न्‍नाबे उङ् पुङ्‌दाबेॽहा पोसुचिनुङ् वाया न्‍हाङा वालोक्‍दुतचि न्‍दायाहोङ् उका सेवा न्‍जोगु॥


युहान्‍ना छेक्‍पाङ्‌बे न्‍छेक्‍तुक्‍सानिङ् निङ्‌वाफुमागा राज्‍यागा उतुम्‍बे नुसाला खेम्‍मेसाङ् येसु गालिलबे तायाब्‍या॥ उङा लुचि, “हाकु सामाया पुरा लेक्‍सामा, निङ्‌वाफुमागा राज्‍या न्‍निङ्‌युम्‍बे तायामाना॥ हाकु पास्‍चाताप चोगिघोङ् पाप चोक्‍मा लेप्‍तिॽयानुम न्‍हाङा नुसालाबे बिस्‍वास चोगानुम॥”
येसु गालिल तालगा उलाप्‍पे कोॽमास्‍यानिङ् उङा सिमोन नुङ् उका उनुन्‍छा आन्‍दिरियास जाल लेप्‍मास्‍याचिहा निसुचि॥ इजाङ्‌बाङ्‌निङ् ङ्‌खाचि नासा लाप्‍खुबा सायाचि॥ न्‍हाङ् येसुङा ङ्‌खाचि लुचि, “कानुङ् लामाचि, खिङ् सोम्‍मा न्‍जिङ्‌दा नासा लाप्‍खुबा सायाचिगा, ङ्‌खाॽनिङ्‌गो हाकु का याॽमिचि काबे ताखुबा चोङ्‌मेॽनेन्‍चिन्‍हा॥” ङ्‌खाचिङा येसुगा चेॽया खेप्‍साचुहोङ् सोलोक उङ्‌चि जाल नाॽयाचुचिहोङ् येसुगा हेक्‍साङ् लाचोगाचि॥
न्‍हाङा मियोरोक खेॽमास्‍यानिङ् उङा जाब्‍दियागा हिप्‍पाङ् उच्‍याचि याकुब नुङ् युहान्‍ना डुङ्‌गाबे युङाचिहोङ् जाल थुॽमास्‍याचिहा निसुचि॥
येसुङा ङ्‌खाचि चा निसुचिहोङ् सोलोक काचि, न्‍हाङा ङ्‌खाचिङा उङ्‌चि पा जाब्‍दिया डुङ्‌गाबे काम चोक्‍खुबाचिनुङ् नाॽयाचुहोङ् येसुगा हेक्‍साङ् लाचोगाचि॥


येसु उका चेलाचिनुङ् काफार्नाहुम साहारबे ख्‍या, न्‍हाङ् सोलोक आराम चोक्‍माना लेनबे याहुदि छुम्‍पाङ्‌बे उयाहोङ् उङा चिन्‍मा तारोक्‍तुचि॥ येसुङा चिन्‍दुचिहा चेॽया ङ्‌खेप्‍सुहोङ् याॽमिचि आच्‍चाम्‍मा ङ्‌ङेता इजाङ्‌बाङ्‌निङ् उङा धार्मासाप्‍ला चिन्‍खुबाचि लोॽवा मेन्‍ना, ङ्‌खाॽनिङ्‌गो माडा चोक्‍तोकनुङ् चिन्‍दुचि॥
ङ्‌खिङ्‌बेलाक्‍माङ् न्‍नाबे एको इसिॽना मुइङा याक्‍सुना याॽमि चा वाया॥ न्‍ना खाॽला कासाङ् ओक्‍ता, “ओ नासारातपेॽना येसु, न्‍दा कानिङ् इ चोघेक्‍साघा? इना न्‍दा कानिङ् नास चोक्‍से तायागाना ओम? न्‍दा निङ्‌वाफुमाङा पाक्‍सागाना पाबित्‍तारा पार्चाराक्‍कान भोङ् का चिनातोङ्‌मेॽनेन्‍ना॥”
ङ्‌खाॽनिङ्‌गो येसुङा न्‍ना खाॽला लुसाङ् थिन्‍दु, “स्‍वाक वाया, न्‍हाङ् ना याॽमिभाङ् लोन्‍दाखेब्‍या!” ङ्‌खिङ्‌बेलामाङ् न्‍ना इसिॽना मुइङा न्‍ना याॽमि हुच्‍चेरेप-वाच्‍चेरेप चेप्‍तु न्‍हाङ् माडा सेम्‍लाङा ओक्‍साङ् लोन्‍दाख्‍या॥
खा निखुबा घाक याॽमिचि आच्‍चाम्‍मा एसाङ् खाॽला कामा न्‍दारोक्‍तु, “मेन्‍ना, खा इले लेक्‍साहाबा? खा गो ओछोङा खाले चेॽयाले राइछो! ना याॽमिङा गो चोक्‍तोकनुङ् इसिॽहा मुइचि चा आग्‍गे पिवाचि न्‍हाङ् ङ्‌खाचिङा उका चेॽया ङ्‌येन्‍वाहा॥” न्‍हाङ् ङ्‌खिङ्‌बेला नाहाङ्‌तोमाङ् गालिल लिङ्‌खाम भोरि येसुङा चोगुहा कामगा उतुम्‍बे चेॽया हिसा॥


न्‍हाङा येसु सोलोक छुम्‍पाङ्‌भाङ् लोन्‍दाहोङ् हेॽने चा मेङ्‌खेॽले सिमोन नुङ् आन्‍दिरियासका पाङ्‌पोटि ख्‍या॥ उङ्‌नुङ् याकुब नुङ् युहान्‍ना चा ख्‍याचि॥ ङ्‌खिङ्‌बेला सिमोनगा उनाम्‍मा जोरोङा नेथाम लाबाब्‍यामासा, खा चेॽया येसु तायाब्‍याहोङ् सोलोक पाङ्‌बेॽहा याॽमिचिङा उङ् ङ्‌खेम्‍मेतु॥ येसुङा तुखामाङ्‌गा उयुम्‍बे ख्‍याहोङ् उमुकपे लाबुहोङ् पोगु न्‍हाङ् उङ् जोरोङा नाओ॥ न्‍हाङा पोगाहोङ् येसु नुङ् उका चेलाचि तुमा तारोक्‍तुचि॥
न्‍ना नाॽमासेक नाम आयाहोङ् याॽमिचिङा घाक तुखाबाङ्‌चि, इसिॽहा मुइङा याक्‍सुचिहा याॽमिचि येसुगाबे न्‍दाचि॥ न्‍हाङ् साहारबेॽहा घाक याॽमिचि पाङ्‌गा चारामबे न्‍छुप्‍सा॥ येसुङा न्‍नाबे प्‍याक खाले तुखाबाङ्‌चि नुमेतुचि न्‍हाङ् प्‍याक इसिॽहा मुइचि लोन्‍धाक्‍सुचि॥ येसु इसा ओमभोङ् ङ्‌खा इसिॽहा मुइचिङा चा था वाया, न्‍हाङामाङ् उङा ङ्‌खाचि चेक्‍मायि म्‍बिन्‍चिन॥


हेक्‍साङ्‌ना लेन भेनिक ओम लेङ्‌मा हाक्‍निङ् ओन्‍दाङ् येसु पोगाहोङ् इसा चा मेॽनिङ्‌ना ठोङ्‌बे ख्‍याहोङ् पार्थाना चोक्‍मा तारोक्‍तु॥ ङ्‌खाॽनिङ्‌गो सिमोन नुङ् उङ्‌नुङ् ङ्‌वायाहाचि येसु योक्‍साङ् ङ्‌ख्‍या॥ ङ्‌खाचिङा न्‍दुप्‍सुहोङ् खाॽला न्‍लु, “घाकङा न्‍दा ङ्‌योक्‍मा न्‍सिमेकाना॥”
खा खेप्‍सुहोङ् येसुङा ङ्‌खाचि लुचि, “आबानि, कानिङ् यो-खेहा तेनचिबे खेइ॥ ङ्‌खा तेनचिबे चा नुसाला खेम्‍मेॽमाहाचि, इजाङ्‌बाङ्‌निङ् का खा कामगा लागिमाङ् तायाङ्‌ना ओम॥” न्‍हाङा येसु याहुदि छुम्‍पाङ्‌चिबे चिन्‍साङ् नुङ् इसिॽहा मुइचि लोन्‍नाहाङ्‌साङ् गालिल लिङ्‌खाम भोरि कोता॥


एको कोरङा याक्‍सुना याॽमि येसुगाबे ताया न्‍हाङ् लाङ्‌छुकपे युङाहोङ् खाॽला लु, “हाङ्‌बाङा मितागाभोङ् का सुद्‌दा चोक्‍मा यामेङ्‌गाना॥”
खा चेॽया खेप्‍सुहोङ् येसुङा दाया चोगुहोङ् उङ् छोङ्‌बे उमुक युङ्‌साङ् खाॽला लु, “का मिमेङ्, न्‍दा सुद्‌दा लेङ्‌गानि॥” ङ्‌खिङ्‌बेलाक्‍माङ् न्‍ना याॽमिगा कोर मासाब्‍या, न्‍हाङ् उङ् नुया॥ नुयाहोङ् सोलोक येसुङा न्‍ना याॽमि खाॽलाना आग्‍गे पिहोङ् पाक्‍साहाक्‍सु, “सो, खा चेॽया इसा चा ङ्‌योक्‍मेतुन्‍चिन, ङ्‌खाॽनिङ्‌गो न्‍दा आफाइ ख्‍याघोङ् हाङ्‌खुबा सोॽमेतु॥ न्‍हाङ् याॽमिचि न्‍दा सुद्‌दा लेक्‍सागाना चेॽयागा पार्मान पिॽमागा लागि मोसाङा आग्‍गे पिइघा लोॽवा बोलि तिसु॥”
ङ्‌खाॽनिङ्‌गो न्‍ना याॽमि न्‍नाभाङ् लोन्‍दाख्‍याहोङ् ङ्‌खा चेॽया घाक याॽमिचि योक्‍मेतुचि॥ न्‍हाङामाङ् येसु साहारचिबे याॽमिचिङा न्‍निसुनुङ् खेॽमा ङ्‌यासान॥ न्‍हाङ् उङ् इसा चा मेॽनिङ्‌हा ठोङ्‌चिबे वासे ख्‍या॥ ङ्‌खाॽनिङ्‌गो न्‍नाबे चा याॽमिचि घाक ठोङ्‌भाङ् न्‍दाया॥

Ascolta मार्कुस 1