Yakkha 2023 WBT/NEBS  (NT) Drama

इलेन एकोहिप्‍पाङ् फारिसि नुङ् सादुकिचि येसु वायानाबे न्‍दायाहोङ् येसु चेॽयाबे आन्‍सिमेॽमागा खाॽला न्‍लु, “न्‍दा वालोकपाहाङ् तायागाना ओम्‍गानभोङ्, वालोकपाहाङ् एको चिङ्‌गो सोॽमेता॥”
ङ्‌खाॽनिङ्‌गो येसुङा पोलोवा पिचि, “नाम आमाना बेलाक्‍पे न्‍निङ्‌दा ताङ्‌खेङ्‌पोटि स्‍वाम्‍घोङ् काइवागा ‘वान्‍दिक्‍ङा नाम फेम्‍मेॽना, इजाङ्‌बाङ्‌निङ् हेन ताङ्‌खेङ् फाम लेक्‍सामाना॥’ न्‍हाङा भेनिक च्‍हेन काइवागा ‘हेन वासिक तामेॽना, इजाङ्‌बाङ्‌निङ् ताङ्‌खेङ् फाम लेक्‍सामा न्‍हाङ् खिम्‍फुरुम्‍माङा मोप्‍तुक्‍सुना॥’ खाॽला न्‍निङ्‌दा ताङ्‌खेङ् स्‍वाम्‍घोङ् हेन लेन इमिन्‍ना लेङ्‌मेॽना बाङ्‌ना चेॽया था तोक्‍मा यास्‍वाम्‍गा, ङ्‌खाॽनिङ्‌गो लेङ्‌मासिमेहा चिङ्‌गोगा उतुम्‍बे च्‍हेन न्‍निङ्‌दा ङ्‌ङास्‍वाम्‍गान! हेन्‍सेन्‍हा इसिॽहा नुङ् बिस्‍वास लेप्‍निखुबा पुस्‍तागा याॽमिचिङा चिङ्‌गो सोॽमा ङ्‌योग्‍वा! ङ्‌खाॽनिङ्‌गो ङ्‌खाचिङा निङ्‌वाफुमाभाङ् चेक्‍खुबा योनागा चिङ्‌गो हाक्‍निङ् हेकोहा इहाचा निमा न्‍दोक्‍त्‍वानिन्‍हा॥” न्‍हाङा ङ्‌खाचि नाओचिहोङ् येसु न्‍नाभाङ् ख्‍या॥


येसुगा चेलाचि तालगा योप्‍पारिक न्‍दासुनिङ् उङ्‌चिङा चालेप्‍पा खेॽमा म्‍मुन्‍दिहा चेॽया था न्‍दोक्‍तु॥ येसुङा ङ्‌खाचि लुचि, “खेप्‍सानुम, न्‍निङ्‌दा फारिसि नुङ् सादुकिचिगा खामिरभाङ् माङ्‌दु वायानि॥” न्‍हाङ् चेलाचि उङ्‌चि-उङ्‌चि खाॽला कामा न्‍दारोक्‍तु, “कानिङ् चालेप्‍पा ङ्‌ङाप्‍तान्‍होङ् उङा खाॽला लुयाहा ओम॥”
ङ्‌खा चेलाचि खाॽला ङ्‌गायाहा था तोक्‍तुहोङ् येसुङा लुचि, “ओ बिस्‍वास माॽनिङ्‌हा याॽमिचि! न्‍निङ्‌दानुङ् चालेप्‍पा मान्‍हाभोङ् इजाङ् न्‍निङ्‌दा लुखुसा चामासिइवाघा? हाकुचा न्‍निङ्‌दा ङ्‌ङास्‍वाम्‍गान्‍हा? फा ओटा चालेप्‍पा फा माहोम्‍बोक याॽमिचि चामेतुङ्‌चिङ्‌निङ् न्‍निङ्‌दा ङोन्‍दाहा इखिङ् डालो कोबुक्‍साम्‍घा? इना ङ्‌खा चेॽया मुन्‍दिम्‍घा? न्‍हाङा ला ओटा चालेप्‍पा ना माहोम्‍बोक चामेतुङ्‌चिङ्‌निङ् ङोन्‍दाहा इखिङ् डालो छुप्‍सुक्‍साम्‍घा? इना ङ्‌खा चा मुन्‍दिम्‍घा? इमिन्‍ना हाकुचा ङ्‌ङास्‍वाम्‍गान्‍हा! का न्‍निङ्‌दा चालेप्‍पागा उतुम्‍बे लुॽनेनिन्‍हा मेन्‍ना॥ का गो फारिसि नुङ् सादुकिचिगा खामिरभाङ् थाङ्‌थाङ् वायानि ले लुॽनेनिन्‍हा ओम!” न्‍हाङ् चेलाचिङा “कानिङ् चालेप्‍पाबे एम्‍माहा खामिरभाङ् मेन्‍ना, ङ्‌खाॽनिङ्‌गो फारिसि नुङ् सादुकिचिङा न्‍जिन्‍दुचिहा चेॽयाभाङ् जोगाचोगानि” लुयाहा ओमभोङ् ङ्‌ङासु॥


येसु काइसारिया-फिलिप्‍पिगा लिङ्‌खामबे तासु॥ न्‍नाबे उङा उका चेलाचि छिम्‍दुचि, “याॽमिचिङा याॽमिगा उच्‍या इसा ओमभोङ् लुम्‍मेहा?”
उका चेलाचिङा न्‍लु, “इखिङ्‌ङा बाप्‍तिस्‍मा पिखुबा युहान्‍ना ओम न्‍लुमेका, इखिङ्‌ङा एलिया, न्‍हाङ् इखिङ्‌ङा च्‍हेन यार्मिया कि निङ्‌वाफुमाभाङ् चेक्‍खुबाचिबे एको ओम न्‍लुमेकाना॥”
येसुङा लुचि, “न्‍हाङ् न्‍निङ्‌दा च्‍हेन का इसा ओम लुमेकाहा?”
सिमोन पात्‍तुरुसङा पोलोवा पि, “न्‍दा हिङ्‌गिलिक्‍ना निङ्‌वाफुमागा उच्‍या खिरिस्‍टकान॥”
येसुङा लु, “ओ योनागा उच्‍या सिमोन, न्‍दा इखिङ् प्‍याक आसिक तोक्‍खुबागान! खा चेॽया न्‍दा याॽमिभाङ् खेप्‍सुघोङ् कायागाना मेन्‍ना, ङ्‌खाॽनिङ्‌गो वालोकपे वाखुबा निङ्‌वाफुमा आप्‍पाङा माङ् न्‍दा सोॽमेताघा ओम॥ का न्‍दा लुमेॽनेन, न्‍दा पात्‍तुरुसकान॥ का आका छुम्‍वाङ् ना लुङ्‌खाक छोङ्‌बे चोग्‍वाङ्, न्‍हाङा नाराक्‍का साक्‍तिङा न्‍ना हेन्‍चामा ङ्‌यास्‍वान्‍ना॥ वालोक राज्‍यागा वालाम्‍बुङ् होमाहा साचोचि का ङ्‌गा म्‍मुकपे पिमेॽनेन्‍हा॥ न्‍दा ना ताम्‍दाङ्‌फुमाबे इहा थुन्‍द्‌वागा, ङ्‌खा वालोकपे चा थुम्‍मे न्‍हाङ् न्‍दा ना ताम्‍दाङ्‌फुमाबे इहा फुक्‍स्‍वागा, ङ्‌खा वालोकपे चा फुङ्‌मेहा॥” न्‍हाङ् येसुङा “का खिरिस्‍ट ओम्‍ङान बाङ्‌ना चेॽया इसा चा न्‍लुयानुम्‍चिम्‍निन” भोङ् आग्‍गे पिचि॥


न्‍नाबेलाक नाहाङ्‌तोमाङ् येसुङा उका चेलाचि उङ् सिमाना चेॽयागा उतुम्‍बे लुॽमा तारोक्‍तुचि॥ उङा खाॽला लुचि, “का यारुसालेम खेमेङ्‌होङ् हाङ्‌गुम्‍बाचि, खाङ्‌खाङ् हाङ्‌खुबाचि नुङ् धार्मासाप्‍ला चिन्‍खुबाचिभाङ् प्‍याक तुखि आङ्‌मा पोराचोङ्‌मे, न्‍हाङा आखेरिबे का सिमे, ङ्‌खाॽनिङ्‌गो का सुम्‍ना लेन स्‍याङ्‌नाभाङ् हिङ्‌गिलिक लेङ्‌मेङ्‌ना॥”
पात्‍तुरुसङा खा चेॽया खेप्‍सुहोङ् येसु योखाॽला खेतुहोङ् खाॽला लुसाङ् थिन्‍दु, “निङ्‌वाफुमाङा खाॽला लेङ्‌मा म्‍बिन्‍नि॥ हाङ्‌बा, खाॽला गो न्‍दाबे लेङ्‌मायि न्‍लेङ्‌मेन्‍हा॥”
ङ्‌खाॽनिङ्‌गो येसु पात्‍तुरुस पोटि हिक्‍साहोङ् लु, “ओ साइतान, आयुम्‍भाङ् खेब्‍या, न्‍दा आका लाम्‍बुबे लुङ्‌सिॽमाना लुङ्‌खाक युङ्‌मा योग्‍वागा! इजाङ्‌बाङ्‌निङ् न्‍दा निङ्‌वाफुमागा चेॽयाबे मेन्‍ना, ङ्‌खाॽनिङ्‌गो याॽमिचिगा चेॽयाबे न्‍निङ्‌वा पिवागा॥”


न्‍हाङ् येसुङा उका चेलाचि लुचि, “सोयानुम, आका लागि उङ् आफाइ मुॽनिखुबा न्‍हाङ् उका कुरुस आफाइ ख्‍वाहोङ् आका हेक्‍साङ् लाचोक्‍खुबा याॽमि से आका चेला लेङ्‌मा यामेॽना॥ इजाङ्‌बाङ्‌निङ् इसाङा उका हिङ्‌लुङ् आका लागि पिवा, न्‍नाङा मेन्‍सिमाना हिङ्‌लुङ् तोक्‍त्‍वा, ङ्‌खाॽनिङ्‌गो इसाङा उङ् आफाइ हिङ्‌मेॽमा योग्‍वा न्‍नाङा मासिॽवा॥ याॽमिङा घाक कायुङ्‌लेनमाङ् उमुकपे ताभोङ्‌चा, उका हिङ्‌लुङ् च्‍हेन मासिभोङ् उङ् इना फाइदा लेक्‍साना? उका मासिना आत्‍मा फेरि इङा लासुरावाना? इजाङ्‌बाङ्‌निङ् याॽमिगा उच्‍या पागा माहिमाबे वालोक्‍दुतचिनुङ् तामे, न्‍हाङ् उङा घाक याॽमिचि उङ्‌चि काम आन्‍सारगा इनाम पिवाचिहा॥ जेप्‍पा का न्‍निङ्‌दा लुमेॽनेनिन, नाबे ङ्‌येबानेसाहा याॽमिचि माध्‍येबे इखिङ्‌ङा याॽमिगा उच्‍या उका राज्‍याबे तायाना मेनिले सोम्‍मा न्‍सिमेनिन्‍हा॥”

Ascolta मात्‍ति 16