 If you would like a copy of this version please contact info@davaraudiobibles.org

Text: Noiri New Testament, CC-BY-SA-4.0, The Love Fellowship. Audio: Noiri New Testament, CC-BY-SA-4.0, Davar Partners International, The Love Fellowship, 2023

Noiri New Testament

Noiri (नोयरी) Bible by The Love Fellowship is licensed under Creative Commons Attribution-ShareAlike 4.0 License.

ई गोठीई फासाडी येशु गलील में फिरयु यहुदी तियाहा मारुह कोअता पालते फिरते ओते, कोईत तियाहा यहुदीयामेहे फीरीईआ इच्छा नाह उवी. यहुदी काहाके याचा मांडवाचा तीवारे जागे आवयू ओतु. त्यापोत तियाआ पाहीही तियाहा कोयु, ईहिरोत यहूदिया मेहे जा काहाके जे नोवलोकाम तू कोअतलो ते ताआ शिष्य तिहीभी पालनारू. काहाके एहेलू कोडूच ने ओय जो प्रसिद्ध ओवुहू इच्छितो पण गुप्तपणे काम कोअनारू ताहा तू ओ काम कोअतलो ताहा स्वतः जाहा ला जगात प्रकट को. काहाके तियाआ पाही पण तियापो कोईत विश्वास निमिले. तेहलाम येशु तियाहा कोयु, माआ वेल फासी आवयी नाहा पण तुमा कोअता आखी वेल होय. जर जग तुमाआ द्वेष कोईत नाहा पण ते माआ द्वेष कोअता काहाके आय तियाआ विरोधाम साक्ष आपोहो का त्याआं काम वाईट होय. तुमु तीवारोमे जा; आय ओमे आव सनात जात नाहा काहाके फासी पर्यंत माआ वेल पुरो ओवयू नाहा. तो तियाहा याआ गोठी कोत गालीलामुज रोत गोल्यो.

पण जांहा तियाआ पाही तीवारोमे निहित गोये तेहलाम तो स्वतःपण उघडपणे नाहा पण जेहेकाय गुप्तपणे गोल्यो. यहुदी तीवारोमे ओ कोत होदहू लागाडीत, “तो का होय?” अने माहुमो गुपचुप जास्तीज गोठी ओवल्यु; कोडु कोयु ओते, “तो हाजू माहुहू होय. तेबी पण यहुदी पिकेवाही ते तियाआ विषयी उघडपणे गोगीत निमिले.”

जाहा तीवारोओ आर्धोज दीही निहित गोये; ताहा येशु मंदिरोम जात हिकवोन आपुहू लाग्यू. तेहलाम यहुदीयाआ चक्कित ओतगोयु कोयु, “ईये हिकल्ये नाहा तेबी ज्ञान कारोत आव्ये?” येशु तियाहा उत्तर आप्लु, “माआ हिकवन माआ नाहा, पण माहु मोकलिनाराआ होय” जर कोडु तियाआ इच्चेप सालीला इच्छा कोअत्लू, ताहा तो आव हिकवोणीही होमजीत जानारू का ओ परमेश्वारापोरोत होय किंवा मापोरोत कोयु होय. जो खुद्पोरोन किबी कोत्लू तो आपाज पालत्लू; पण जो आपाआ मोकलिनास्थाआ गौरव पाल्हू इच्छितो तोज खोरो होय अने तीयाम अधर्म नाहा. नाहाकोत मुसाई तुमामे नियम आप्लु निमिले? तेबी पण तुमामे केते जोओ नियम शास्रापो चालते नाहा तुमु काहा माहु माईत टाकिलाकोअता मागतले? माहु उत्तर आप्लु, तामेहे दुष्टात्मा होय, कोडू ताहु माईत टाकिलाकोअता मांगत्लू? आय एक काम कोल्यु, अने तुमु आखे आश्चर्य कोअता. त्याकोईत मुस्साने तुमामे सुंताआ आज्ञा आप्यी होय (ती मुस्साकडून नाहा पण आगला डायापरोत आवल्यी होय), अने तुमु शब्बाथआ तेदीही सुंता कोअता. म्हणजे मोशे सुंता आज्ञा टालुहू नाहाकोईत ताहा तुमु मापो काहा त्यापोत रागाकोहे होय का शब्बाथआ तेदीही आय होमला माहुंहु हाजो कोल्यु? “सोब पालहु न्याय कोहू नाहा ताहा खरोज न्याय को.”

तेहलाम केते यरुशलेमोमे रोणारे कोहू लागाडीत, “नाहाकोत ओतो नाहा नाहाकोत ज्याहा माईत टाकिलाआ प्रयत्न कोहू रोल्या होय?” पोन पाला, तो ताहा उघडपणे गोगत्लू अने तियाहा कोडु किबी कोयु नाहा, नाहाकोत सरदारांही खरोज होमजीत लेधलो होय का ओच ख्रिस्त होय? याहा ताहा आमाहा ओलखीत्लू का ओ कोडू कावालू होय; पण ख्रिस्त जांहा आविलो तेहलाम कोडोबी मालुम नेशेय का तो कोडू कावालू होय. तेहलाम येशु लेतजा मंदिरोम हिकवन आपित आवाज माईत कोयु, “तुमु माहु ओलखीत अने ओ पण मालुम होय का आय कोरात होय आयताहा स्वतः आवयू नाहा पण माहु मोकलीनारू खोरो होयत्याहा तुमु उलखित्लू नाहा.” आय तियाहा ओलखीत्लू काहाके आय त्यापोरोत होय अने तीयेज माहु मोक्ल्यीत होय. योपो तिये तियाहा तोईला प्रयत्न कोअयु तेबी कोडूच तियापो आथे टाकुहू शकला नाहा काहाके तियाआ वेल फासी आवयी नाहाओती. तेबी पण गर्दीमेहे केते माहुहु तियापो विश्वास कोअयु अने कोहू लागाडीत, “ख्रिस्त जांहा आविलो ताहा नाहाकोत यांपोरोत जाखो आश्चर्य काम देखाडीही जे इये देखाडीलाआ?”

परुश्याही मांहोहो तीया विषयाम निकाईत-निकाईत गोठी कोअत्लू तेहलाम होमल्यु; अने मुख्य याजक अने पारुश्यानी तियाहा तोओला कोता शिपाई मोकल्यीत. यापो येशु कोयु, “आय थोडो टायमोपो रोत फासी तुमाआरी होय फासाडी माहु मोकलीनाराही आय निहित जानारू” तुमु माहु होद्ही पण आय जोडनारू नाहा; अने जीही आय होय तीइही तुमु आवहू शकत नाहा. यापो यहुद्यांनी आपसामेहे कोयु, ओ का जानारू का तियाहा आमाहा होदहू सेकेहे नाहा? नाहाकोत तो तियापो जानारू काजे युनानी माय तितर बितर ओतगोयु रोत्ले, अने यूनानीआ पण हिकवन आपी? ए कोडली गोठी होय का ती जीआ कोल्यी का तुमु माहु होद्ही पण आय तुमामे जोडनारू नाहा; अने आय जीही होय तीइही तुमु आवहू शकत नाहा.

तीवारो शेवटच्या तेदीही जो मुख्य दीही होय येशु उबु रोला अने हादीत कोयु, जर कोडु तोर्ह्यु होय ताहा मा आहने आव अने पिवा; जो मापो विश्वास कोअनारू होय जेहलो पवित्र शास्त्रात होय तियाआ मोनामेरोत जीवनाआ खाडी वोहीत नीही; तिये ओ वचन पवित्र आत्माआ विषयी कोयु, ज्याहा तियापो विश्वास कोअनारापो उतरीही ओते; काहाके आत्माआ ओमेजा उतरीलो ने ओतू काहाके येशु फासी पण आपाआ गौरवात पुगीतगोयू ने ओतू. तेहलाम गर्दीमेहे केते जानोतांहि याआ गोठी होमलित कोयु, “खरोज ओ तोज भविष्यवक्ता होय,” दिहराहा कोयु, “ओ ख्रिस्त होय” पण केताहा कोयु, “काहा? की ख्रिस्त गालीलोमरोत आविलो?” की पवित्र शास्त्रात ओ आव्ये नाहा का ख्रिस्त दाविदाआ कुलोमरोत अने बेथलेहेम गावोमेरोत आविलो जीही दावीद रोत ओतु? कोईत त्यापोत माहुंमे फुट पोडीत गोयी. तीयामरोत केते जोओ तियाहा तोईला प्रयत्न कोईत ओते, पोन कोडूच तियापो आथे टाक्यू नाहा तेहलाम शिपाया मुख्य याजक अने परुसी जागे फिरीत आव्ये तिये तियाहा कोयु, तुमु तियाहा काहा घेऊन आव्ये नाहा?

शिपायाआ उत्तर आप्लु, “कोडलाज माहुंऊ खोरोज एहलो गोठी कोअल्यो नाहा” पारुश्यानी तियाहा उत्तर आप्लु, की तुमु पण भार्मावून गोये होय की? की सरदार अने पारुश्यामरोत कोडु तियापो विश्वास कोअयु होय? पोन ऐ मांहे ज्याहा नियामशास्त्र मालुम नाहा शापित होय. नीकुदेमुस जो पेल्लु त्याजागे आवयू ओतु अने त्यामेथुं होमला ओतु तियाहा कोयु, “की आमाहा नियमशास्त्र कोडनीबि माअहुहू जोपोरोत पहीले तियाआ होमलित होमजीत लेत नाहा का तो नाहाकोत कोईत होय दोषी ठरविहो?” तिये तियाहा उत्तर आप्लु, “की तू पण गालीलाचा होय? होद अने पाला, का गालीलोमरोत कोडु भविष्यवक्ता प्रकट उवे नाहा नाहाकोत.” तेहलाम आखे आप आपाआ कोआ निहित गोये.

Ascolta युहन्ना 7