Mewari 2010-2017 NLCI; Non-Drama (NT)

Mewari 2010-2017 NLCI; Drama (NT)

वाँ दनाँ में बतिस्मा देबावालो यहुन्नो यहूदियाँ परदेस का हुन्ना काँकड़ में आयो, अन परच्यार करबा लागो, “पापऊँ मन फेरो, काँके हरग को राज आबावाळो हे।” यो यहुन्नो वोईस हो जिंका वाते परमेसर का आड़ीऊँ बोलबावाळे यसाया बताते तके क्यो हो के,
“हुन्ना काँकड़ में एक बोलबावाळा को हाको हुणारियो हो के,
‘परबू को गेलो त्यार करो
अन वींकी हड़क हुदी करो।’”
यहुन्नो का गाबा ऊँट की ऊन का बण्या तका हा अन वणी कमर में खालड़ा को कमरपट्यो बांद मेल्यो हो। टिड़्या अन हुन्ना काकड़ को हेंत वींको खाणो हो। तद्याँ यरूसलेम अन हाराई यहूदियाँ का मनक अन यरदन नंदी का अड़े-भड़े का मनक वींका नके आन अगेटा व्या। वाँकाणी आपणाँ पापाँ ने मान्याँ अन यरदन नंदी में यहुन्ने आपणाँ हाताऊँ वाँने बतिस्मो दिदो।
जद्याँ यहुन्ने यो देक्यो के, नरई फरीसी अन सदुकी वाँका नके बतिस्मो लेबा ने आरिया हे तो वणी वाँकाऊँ क्यो, “ओ, हाँप का बच्या। थाँने कणी हेंचेत कर दिदा हे के, थाँ परमेसर की आबावाळी रीसऊँ बंच निकळो? थाँने ईं बात को परमाण देणो पड़ी के, हाचेई थाँका मन बदल्या हे के कोयने। अन आपणाँ-आपणाँ मन में यो ने होचो के, ‘आपीं अबराम का बंसज हा’ काँके, मूँ थाँकाणी केवूँ हूँ के, परमेसर अबराम का वाते अणा भाटाऊँ भी बाळक पेदा कर सके हे। अबे रूँकड़ा की जड़ा में कराड़ो मेल दिदो ग्यो हे अन ज्यो हव फल ने देवे हे वाँने काट दिदा जाई। मूँ तो थाँने मन फेरबा का वाते पाणीऊँ बतिस्मो दूँ हूँ पण वीं ज्यो मारा केड़े आबावाळो हे, वो माराऊँ भी हेलो मोटो हे। मूँ तो वाँका पगरख्याँ का कसणा खोलबा के जोगो भी ने हूँ। वो थाँने पुवितर आत्मा अन वादीऊँ बतिस्मो देई। वींका हाताँ में वींको हुपड़ो हे जणीऊँ वो धानऊँ हुंकला ने अलग करी अन आपणाँ खेत मेंऊँ होजा किदो तका गव भेळा करन, कोठा में भरी अन हुंकला ने वीं वादी में बाळी, ज्याँ कदी ने बजे हे।”


वीं टेम ईसू गलीलऊँ चालन यरदन नंदी का कनारे यहुन्ना का नके बतिस्मो लेबा ने आया। पण यहुन्ने ईसू ने रोकता तके क्यो के, “मने तो खुद थाँराऊँ बतिस्मो लेबा की जरूत हे, तो पछे थूँ मारा नके काँ आयो हे?”
ईसू वींने क्यो, “अबाणू तो अस्यानीस वेबा दे। माने ज्यो परमेसर छावे हे वींने पूरो करबा का वाते योईस करणो हे।” तद्याँ यहुन्ने वींकी बात मान लिदी।
अन तद्याँ ईसू बतिस्मो लिदो अन जस्यानी वो पाणीऊँ बारणे आयो तो आकास खुलग्यो अन वणी परमेसर की आत्माने एक परेवड़ा का जस्यान रेटे उतरती अन आपणाँ माता पे आती देकी। तद्याँ आ आकासवाणी वी के, “यो मारो लाड़लो पूत हे, जणीऊँ मूँ घणो राजी हूँ।”

Ascolta मत्ती 3