Bible text: Luvale © Bible Society of Zambia, 2017 www.biblesociety-zambia.org/ Recording of the New Testament ℗ Hosanna, 2022

Luvale - 2017 BSZ (NT) Drama

Jino chiwanyino chaJimbolo jakuzeneka Chimbalwila chapwile nakupandama, chize vavuluka ngwavo chiwanyino chaKuzomboka.
Kaha vapilishitu vavalemu navaka-kusoneka vatondelenga mwakumujihila, oloze vevwile woma wavatu.
Kaha Satana engilile muli Yuta, uze vavulukilenga ngwavo Isakalyote, umwe wavaze likumi navavali (12).
Kaha ayile, nakushimutwila navapilishitu vavalemu navakulwane javaka-kulama Tembele mwakumuhanyina kumavoko avo.
Kaha vawahililile, valivwasanyine nenyi kumuhana jimbongo.
Etavile, kaha atondelenga awane hakumuhanyina kumavoko avo chakuzeneka lizavu lyavatu kupwako.


Jino likumbi lyachiwanyino chaJimbolo jakuzeneka Chimbalwila lyahetele. Haze hapwa kuvanga vajihe mwanamukoko wachiwanyino chaKuzomboka.
Yesu atumine Petulu naYowano ngwenyi, Yenu mukalongese kulya chachiwanyino chaKuzomboka, mangana tukalye.
Vakiko vamuhulishile ngwavo, Kulihi unasake tukachilongeseleko?
Ikiye avambile ngwenyi, Talenu, omu namukengila munganda, navakamihumangana kuli lunga námbate mulondo wameya. Kamukavangizenu namuze muzuvo mwakengila.
Kaha kahulisenu mwenya oyo zuvo ngwenu, Muka-kunangula nahulisa ngwenyi, Unangulongesela mulihi mwakushikila ngulilemo chiwanyino chaKuzomboka natumbaji twami?
Ikiye mwakamilweza kapete wamunene wahelu muze muli vyosena vyakuswa lyehi. Katulongeselenu chiwanyino muze.
Kaha vayile, vawanyine ngana muze avalwezele, kaha valongesele chiwanyino chaKuzomboka.
Omu lwola lwahetele, Yesu asendavalile kumesa navaze vaposetolo hamwe.
Avambile ngwenyi, Ngunafwila chikuma kulya nenu echi chiwanyino chaKuzomboka shimbu kanda ngumone makava akutwala kukufwa.
Mwomwo nangumilweza ngwami, kangweshi kukachilya chekako, palanga nomu navakachitesamo muwangana waKalunga.
Kaha anonele lupasa, omu asakwililile, avalwezele ngwenyi, Lutambulenu nakuliselasela,
mwomwo nangumilweza ngwami, Kufuma oholili kangweshi kunwa vyakumihako yamuvinyoko, palanga nakukwiza chawangana waKalunga.

Kaha anonele mbolo, omu asakwililile ayipuzwile nakuvahanayo, ngwenyi, Ou mujimba wami vánasuula hali enu. Kalingenunga ngana mukangwanukilengaho.
Kaha chochimwe nalupasa nawa, hakukumisa kulya chiwanyino chaKuzomboka, avalwezele ngwenyi, Lupasa olu lukiko chilongeselo-chalushiko-lwaKalunga chachihya chamumanyinga ami, náwambweka hali enu.

Oloze talenu, livoko lyayou mwanguhana kumavoko avaka-kole lili kumesa nayami.
Mwomwo Mwanamutu mwaya ngana omu vachitongola lyehi, oloze luvinda lwenyi mutu ou mwamuhana kumavoko avaka-kole!
Kaha vakiko vaputukile kulipula jipami vawane minavo muka nambe kulinga chuma kana.


Mukachi kavo mwakatukile jipami vawane ou vatela kumona ngwavo ahambakana vakwavo vosena ulemu.
Oloze Ikiye avalwezele ngwenyi, Vamyangana javaka-mafuchi vayula vatu javo, kaha ava vene vaka-kuyula, valyamba ngwavo tuvaka-kuvakafwa.
Oloze muli enu, kanda chikapwa ngochoko. Ou ahambakana vakwavo vosena ulemu mukachi kenu, alilingise nge omu apwa kanyike, kaha twamina alilingise nge omu apwa muka-kuzachila vakwavo.
Mwomwo, iya apwa wamulemu, ou eji kusendavalanga kumesa tahi, nyi ou eji kuzachilanga vakwavo? Kumana keshi ou eji kusendavalanga kumesako? Oloze, Ami nguli mukachi kenu mwamuka-kumizachila.
Enu yenu munemana ki-i nayami muvyeseko vyami,
kaha Ami ngunamihane wangana, ngana omu anguhanyinewo Tata,
mangana mukapwenga nakulya nakunwa kumesa yami muwangana wami, nakutwama hamatanda awangana nakuyula miyachi yavaIsalele likumi nayivali.


Ove Shimona, ove Shimona, ivwa! Satana nalombo ngwenyi amyeseke hakuminyungulula nge wunga wa tiliku .
Oloze Ami ngunakulembelako kuli Kalunga mangana kufwelela chove chizeneke kukuma. Kaha ove, omu naukahiluka, kazamikisenga vandumbwove.
Petulu amwambile ngwenyi, Ove Mwata, ngunalizánge kuya nayove nakukamenga nakukufwa.
Yesu ambile ngwenyi, Ove Petulu, nangukulweza ngwami, Lelo vene shimbu kanda ndemba asanyike, naukana katatu ngwove kawangutachikizako.

Kaha avahulishile ngwenyi, Haze ngwamitumine chakuzeneka chikwama nachola namendelo, mwakalikijile numba? Vamukumbulwile ngwavo, Nduma.
Avambile ngwenyi, Oloze oholili ou ali nachikwama ambate, kaha nachola nawa ngocho, kaha ou nazeneka poko yamukwale alanjise chikovelo chenyi chachisuku akalande.
Mwomwo nangumilweza ngwami, Awa Mazu-vasoneka-ajila, kuvanga vawatesemo muli Ami, akwamba ngwavo,
Kaha vamulavilile hamwe navaka-kuzombwojoka jishimbi,
mwomwo mazu aze akunguvuluka vali nakuwatesamo.
Vakiko vamwambile ngwavo, Ove Mwata, tala, jipoko jamikwale jivali eji. Kaha avambile ngwenyi, Echenu ovyo.


Kaha alovokele, ayile kupili ya Milive ngana muze alingilenga, kaha tumbaji twenyi vamukavile.
Omu ahetele kuze avambile ngwenyi, Lombenu kuchina namwingila mukumyeseka.
Kaha avasosolokele kafwe katunda kakuwilila lilolwa lyakwasa, kaha afukamine nakulomba
ngwenyi, Ove Tata, nge unasake, ngufumise olu lupasa. Chipwe ngocho, keshi munayi muchima wamiko, oloze chilingiwe munayi muchima wove.
[Jino kwasolokele kangelo kufuma mwilu nakumuzamikisa.
Hakulyonyinga chikuma mumuchima, alombele nakutwalililaho, kaha mavule enyi alumukile kupwa nge mamata amanyinga nakusotokela hamavu.]
Omu akatukile kufuma kukulomba, ahilukile kuli tumbaji twenyi, kuvawana vali mutulo mwomwo vazeyele hakulishona.
Avambile ngwenyi, Mwomwo ika munasavalila tulo? Hindukenu, lombenu kuchina namwingila mukumyeseka.


Shimbu Yesu apwile nakuhanjika, vakasumukile, lizavu lyavatu lineza nauze vavuluka ngwavo Yuta, umwe wavaze likumi navavali (12), natetekelako. Apandamine kuli Yesu nakumusweswenya.
Oloze Yesu amwambile ngwenyi, Ove Yuta, kumana nauhana Mwanamutu kumavoko avaka-kole hakumusweswenya?
Omu vaze vajingilikile Yesu vamwene vize vyasakile kusoloka, vamuhulishile ngwavo, Ove Mwata, tulwe navo najipoko jamikwale tahi?
Kaha umwe wavo omu asakile ngwenyi atape ndungo yakapilishitu wakulitulaho, amuvatwile litwitwi lyachilyo.
Oloze Yesu ambile ngwenyi, Echenu, ndombo chiku! Kaha akwachile haze lyapwile litwitwi lyenyi nakumuhindula.
Jino Yesu ambile vapilishitu vavalemu navakulwane javaka-kulama Tembele navakulwane javaYuleya, vaze vamulukukile ngwenyi, Munangulukuka najipoko jamikwale najingungulu nge nguchihwanga?!
Omu ngunapunga nayenu mu Tembele hakumbi hakumbi kamwolwele mavoko hali Amiko. Oloze olu lukiko lwola lwenu, hingolo jamilima.


Kaha vamukwachile, vamutwalile nakumwingisa muzuvo yakapilishitu wakulitulaho, oloze Petulu apwile nakukavangiza hahasuku.
Omu vawikile kakahya hakachi kachipango, vatwamine hamwe, kaha Petulu apwile mukachi kavo.
Kaha kwapwile ndungo wamwanapwevo amumwene natwame kuze kukakahya, amushishikile nakumwamba ngwenyi, Nayou nawa apwanga nenyi.
Oloze ikiye akanyine ngwenyi, Ove pwevo, kangwamwijivako.
Kaha omu hashimbwile chachindende, weka nawa amumwene, amwambile ngwenyi, Nayove nawa wapwa umwe wavo. Oloze Petulu amwambile ngwenyi, Ove lunga, keshi yamiko.
Omu mwahichile kafwe lwola lumwe, naweka nawa ahanjikile nangolo ngwenyi, mwamuchano vene, nayou nawa apwanga nenyi, mwomwo naikiye nawa muka-Ngalileya.
Oloze Petulu amwambile ngwenyi, Ove lunga, kangwejivile ovyo uli nakuhanjikako. Kaha shimbu apwile nakuhanjika, hahaze vene ndemba asanyikile.
Kaha Mwata asetulukile nakushishika Petulu. Petulu himwanuka mazu áhanjikile Mwata ngwenyi, Lelo, shimbu kanda ndemba asanyike, naungukana katatu.
Kaha alovokele haweluka nakulila nakulyonyinga.


Jino vaze malunga vákwachile Yesu, vapwile nakumuhenda oku vali nakumuveta.
Vamukashile hameso nakumwamba ngwavo, Polofweta! Iya nakuvete?
Kaha vahanjikile vikwavo vyavivulu vyakumusaula.


Hakututuka chalikumbi, vakulwane javaYuleya vakungulukile hamwe navapilishitu vavalemu navaka-kusoneka, kaha vamutwalile kuzango yavaYuleya. Vamwambile ngwavo,
Nge Ove yove Kulishitu, tulweze. Oloze avambile ngwenyi, Chipwe nangumilweza, kamweshi kuchifwelelako,
kaha numba nge nangumihulisa, kamweshi kungukumbululako.
Oloze kufuma kulelo
Mwanamutu mwatwamanga kulivoko lyaKalunga lyachilyo lyangolo.
Kaha vosena vamuhulishile ngwavo, Kumana, Ove yove MwanaKalunga tahi? Ikiye avambile ngwenyi, Mwomwo vene munambe, YAMI vene NGWAPWA.
Kaha vakiko vambile ngwavo, Nyi ika natutondela unjiho weka? Mwomwo tunawivu etu vavene mukanwa kenyi.

Ascolta Luka 22