If you have would like a copy of this version please contact info@davarpartners.org

Kulvi New Testament, CC-BY-SA-4.0, The Love Fellowship (Text) Kulvi New Testament Audio Bible, CC-BY-SA-4.0, Davar Partners International, 2022 (Audio)

Kulvi New Testament

This work is licensed under Creative Commons Attribution-ShareAlike 4.0 License.

यीशु एक रोज़ मन्दिरा न परमेश्वरै रै बारै खुशी रा समाद दसदै लागै ती, ता मुख्यपुरोहिते, शास्त्री होर स्याणै यहूदी तिन्हां हागै आऐ। ते यीशु न पुछदै लागै, “तू आसाबै ऐसा गैल दस, कि तू इन्हां कोम कुणी हका सैंघै केरा सा, ऐ सैभ किछ़ केरनै रा हक तौभै कुणिऐ धिना?”
यीशुऐ तिन्हां बै ज़वाब धिना, “हांऊँ बी तुसा न एक स्वाल पुछा सा पैहलै मुँभै तेई स्वाला रा ज़वाब दसा, यूहन्ना बै बपतिस्मा देणै रा हक स्वर्गा न मिलू ती कि मांहणु न?” यीशु री ऐ गैल शुणिया ते आपु न सोच-विचार केरदै लागै, “अगर आसै बोला सी कि परमेश्वरा न मिलू तै ऐई आसा ऐ बोलणा कि तुसै तेइरा विश्वास किबै नी केरदै? होर अगर आसै बोलू, कि मांहणु री धिरै न, ता लोका आसा पैंधै पात्थरै बाहणी किबैकि ते यूहन्ना बै सच़िऐ भविष्यवाणी केरनु आल़ा मना ती।” तैबै तिन्हैं यीशु बै ज़वाब धिना, “आसै नी ज़ाणदै, कि सौ कुणी धिरै न सा।” यीशुऐ बी तिन्हां बै बोलू, “ज़ाआत् हांऊँ बी तुसाबै नी दसदा कि हांऊँ इन्हां कोमा कुणी हका सैंघै केरा सा।”

तैबै यीशु लोका बै एक कथा दैसदै लागै, “एकी मांहणुऐ अँगूरा रा बगीच़ा लाऊ, होर किसाना बै ठेके पैंधै देईया प्रदेशा बै नौठा। ज़ैबै अँगूरा बै कठा केरनै रा बौगत आऊ ता किसानै आपणा एक नोकर तिन्हां अँगूरा रा हिस्सा मुँगणै री तैंईंयैं भेज़ू पर तिन्हैं सौ नोकर मारी पिटिया खाली हौथ वापस भेज़ू। तैबै तेई मांहणुऐ आपणा दुजा नोकर भेज़ू पर तिन्हैं सौ बी मारी पिटिया खाली हौथ वापस भेज़ू। किछ़ रोज़ा बाद तेई मांहणुऐ आपणा एक होर नोकर भेज़ू कि सौ ज़ाइआ मालका रा हिस्सा आंणला पर तिन्हैं सौ बी घायल केरिया वापस भेज़ू। तैबै सौ अँगूरा रै बगीच़ै रा मालक सोच़दा लागा कि ऐबै हांऊँ कि केरनु? मूँ ऐबै आपणा प्यारा बेटा भेज़णा, शायद ते ऐईरी आदर केरलै। पर ते ठेकैदार तेई रै बेटै बै हेरिया ऐण्ढा बोलदै लागै, ‘हेरा ऐ ता ऐई बगीच़ै रा वारिस सा; एज़ा आसा ऐ मारना होर आसा वारिस होंणा।’ तैबै तिन्हैं सौ मालका रा शोहरू शगीटिया तेई अँगूरा रै बगीच़ै न बाहरै नेऊ होर मकाऊ। यीशुऐ बोलू, तुसै कि सोच़ा सी, ऐबै तेई बगीच़ै रै मालका तिन्हां सैंघै कि केरना? ऐबै तेई मालका ऐणा होर ते ठेकैदार मकाणै होर ठेका छ़ुड़ाइया होरी बै देणा।” तैबै शुणनु आऐ लोकै बोलू, “ओ परमेश्वरा ऐण्ढा कैदी नी लोड़ी हुआ।” यीशुऐ तिन्हां धिराबै हेरिया बोलू, “पवित्र शास्त्रा न ऐ कि लिखू सा: कि
‘ज़ुणी पात्थरा बै राज़मिस्त्रिऐ नक्कमा बोलू ती,
सौहै पात्थर ऐबै कुणै रा पात्थर बैणू।’
ज़ुण कोई ऐई पात्थरा पैंधै पौड़ला तेई रै टुकड़ै-टुकड़ै होंणै होर ज़ुणी पैंधै ऐ पात्थर औल़ला तेई पिठै सांही पिशिणा।”

मुख्यपुरोहिता होर शास्त्रियै ज़ैबै ऐ उदाहरण शुणू ता ते यीशु बै ढौकणा चाहा ती, किबैकि तिन्हां बै पता लागा कि ज़ो गैला प्रभु यीशु केरदै लागै सी ते तिन्हरै बारै न सी पर ते लोका न डौरा ती; होर तेइबै छ़ौड़िआ नौठै। तैबै ते यीशु बै ढौकणै रा मौका तोपदै लागै, होर तिन्हैं आपणै जासूस यीशु हागै भेज़ै, ताकि ते यीशु बै तेइरी गैला न फ़सालै होर तेइरी शिकायत रोमी सरकारै रै शासका हागै केरलै ताकि सौ प्रभु यीशु बै ढौकिया जेला न पाला। तिन्हैं यीशु बै बोलू, “ओ गुरू, आसै जाँणा सी कि तुसै ठीक-ठीक बोला सी, होर सिखा सी होर कौसी री तरफदारी नी केरदै। परमेश्वर रै बारै न सच़ी शिक्षा देआ सा। आसाबै दैसा कि महाराज़ै बै कर देणा सही सा कि नी?” यीशुऐ तिन्हरी च़लाकी ज़ाणी होर तिन्हां न एक च़ाँदी रा एक सिक्का मुँगू, होर पूछू “एथा पैंधै कौसरा नाँ होर फोटू सा?” तिन्हें बोलू, “महाराज़ै रा।” तेइयै तिन्हां बै बोलू, “ज़ो महाराज़ै रा सा, सौ महाराज़ै बै देआ होर ज़ो परमेश्वरा रा सा, सौ परमेश्वरा बै दैआत्।” ते लोका रै सामनै तेसा गैला बै ढौकी नी सकै, बल्कि ते तेइरै ज़वाब शुणिया हैरान हुऐ होर चुप रौहै।
तैबै किछ़ सदूकी ज़ो बोला सी, कि मूँऐंदै रा ज़िन्दै होंणा नी ऑथि, तौखै एज़िया पुछदै लागै। “ओ गुरू जी, मूसै आसाबै ऐ विधि दसी, सा कि अगर कोई मांहणु मौरला होर तेइरी लाड़ी ज़िंदी सा पर तेइरी कोई लुआद नी होली ता तेइरा भाई तेसा विधवा सैंघै ब्याह केरिया तेसा सैंघै लुआद पैदा केरला होर पहला बच्च़ा तेइरै भाई रा वारिस होंणा। ऐण्ढै सौत भाई ती। सैभी न बैड़ै भाई रा ब्याह हुआ होर बगैर लुआदी रै मूँआ। तैबै तेइरै होछ़ै भाइयै तेसा विधवा सैंघै ब्याह केरू होर सौ भी बगैर लुआदी रै मूँआ। एकी न बाद एक, एकी न बाद एक ऐण्ढै तैरहै तिन्हैं सौत भाइयै तेसा विधवा सैंघै ब्याह केरू पर ते सैभै बगैर लुआदी रै मूँऐ। किछ़ बौगता बाद सौ विधवा भी मूँई। ऐबै आसाबै ऐसा गैल दसा कि ज़ैबै ते सारै भी ज़िन्दै होलै ता सौ कौसरी लाड़ी होली? ज़िन्दै होंणै पैंधै सौ तिन्हां मौंझ़ै आसाबै दैसा कि सौ बेटड़ी कौसरी लाड़ी होंणी, किबैकि तिन्हैं सौतै भाइयै सौ आपणी लाड़ी रखी ती?”
तैबै यीशुऐ तिन्हां बै बोलू, “ब्याह शादी ता ऐसा धौरती पैंधलै मांहणु री तैंईंयैं सा। पर तेई बौगतै ज़ो मूँऐंदै न ज़िन्दै होलै तिन्हां न कोई शादी-ब्याह नी होंणा होर न कोई तौखै ब्याह न देईणा। न तिन्हां मौरना किबैकि तिन्हां स्वर्गदूता सांही होंणा। दोबारा ज़िन्दै होंणै सैंघै ते परमेश्वरै रै बेटै सी। मूँऐंदै रै ज़िन्दै होंणै री गैला मूसै रै बिधाना न लिखी सा तेइयै बोलू, ‘प्रभु अब्राहमा रा, इसहाकै रा होर याकूबा रा परमेश्वर सा’ परमेश्वर मूँऐंदै रा नी पर ज़िन्दै मांहणु रा परमेश्वर सा। परमेश्वरा सामनै सैभ मांहणु ज़िन्दै सी।” किछ़ यहूदी शास्त्रियै बोलू, “गुरू जी तुसै सही बोलू।” तेथा न बाद कोई बी मांहणुऐ प्रभु यीशु न स्वाल पुछ़णै री हिम्मत नी केरी।

यीशुऐ तिन्हां न पुछ़ू, “मसीह बै दाऊदा रा बेटा किबै बोला सी? किबैकि भजन संहिता री कताबा न दाऊदै आपु बोलू,
‘प्रभुऐ मेरै प्रभु बै बोलू,
मेरी दैहिणी धिरै बेश,
ज़ैबै तेंई हांऊँ तेरै दुश्मना बै तेरी ज़ौघा हेठै नी केरनु।’
अगर दाऊद मसीहा बै प्रभु बोला सा; ता मसीह दाऊदै री औलाद कैण्ढै होई सका सा?”
ज़ैबै लोका इन्हां गैला बै शुणदै लागै ती तैबै यीशुऐ आपणै च़ेले बै बोलू, “इन्हां शास्त्री लौका न साबधान रौहा, ज़ुण लोमे झिकड़ै लाईया घुमा सी। होर बजारा न नमस्कार, होर आराधनालय न खास-खास ज़ैगा होर धामा न भी खास-खास ज़ैगा तौपा सी। ते बड़ी बैशर्मी सैंघै विधवै रै घौरा बै लूटा सी होर रिहाणै री तैंईंयैं बड़ी लोमी-लोमी प्रार्थना केरा सी। ऐसा बजहा न तिन्हां बै ज़ादा सज़ा मिलणी।”

Ascolta लूका 20