If you have would like a copy of this version please contact info@davaraudiobibles.org

Limbu Old Testament

कर निङ्‌वाॽफुमाङ्‌ङिल्‍ले़ वालाधाओ के़याक्‍पा नुहन् नु के़रे़क् ताम्‍भुङ् थक्‍साहाॽ हे़क्‍क्‍याङ् हिम्‍थक्‍साहाॽ निङ्‌वाॽ इःत्तुसि, हे़क्‍क्‍याङ् खुने़ॽ इक्‍सादिङ् खाम्‍बेःक्‍मो सुरित् केजङ् हुरे़र याःन्‍दु, हे़क्‍क्‍याङ् च्‍वाःत्तिन् चबे़र पे॥ मुहिःक्‍सो खाहिःक्‍सोओबा वबुन्‍हाॽ चिबे़लासे़ हे़क्‍क्‍याङ् ताङ्‌साक्‍पोबा वहित्‍ले़न् लाम्‍धेःप्‍पाहाॽ सुबे़ हे़क्‍क्‍याङ् वहित् थामा नाॽरे़॥ हे़क्‍क्‍याङ् इक्‍सादिङ् खाम्‍बेःक्‍मो च्‍वाःत्तिन् थिक्‌याःन्‍धक् चबे़र पे॥ किप् थिक्‍काङ् ङाबोङ् ये़न् एगाङ् च्‍वाःत्तिन् युमे़॥ नुसिगेक्‍पा लाःल्‍ले़ थिबोङ्‌ङाङ् नुसि ये़न्‍नो वालाधान् आरारातबा कोःक्‍माहाॽओ नाःम्‍सिङ्॥ थिबोङ् ला थारिक् च्‍वाःत्तिन् थिक्‌याःन्‍धक् चबे़र पे॥ थिबोङ् ला के़रे़बा थिक्‍सिगेक्‍पा ये़न्‍नो कोःक्‍माहाॽरे़ कुसम्‍हाॽ निधाबे़॥
लिबोङ् ये़न् एगाङ् नुहःल्‍ले़ चोगुबा वालाधाओबा पेधाःप्‍पिन् खुने़ॽ हन्‍दु॥ हे़क्‍क्‍याङ् लत्‍छा काःक्‌वाधिक् फे़सुदेसु, हे़क्‍क्‍याङ् खाम्‍बेःक्‍मोबा च्‍वाःत्तिन् मे़न्‍जप्‍पे थारिक् खे़न् काःक्‌वान् ना नु कत्‍ना पे़रे़र वये़॥ खे़ब्‍याङ् नुहःल्‍ले़ खाम्‍बेःक्‍मो च्‍वाःत्तिन् युमे़बि फाआङ् लत्‍छा पुत्तुःक्‍के थिक्‍काङ् फे़सुदेसु॥ खे़न् पुत्तुःक्‍केःल्‍ले़ लाङ् तोॽमादे़न् मे़घोसुन्‍नाङ् खे़न् खुने़ॽओए वालाधाओ नुःक्‍खे़द्‌ये़, थेआङ्‌भे़ल्‍ले़ खाम्‍बेःक्‍मो आल्‍लसाङ् च्‍वाःत् ने़स्‍से़॥ खे़ब्‍याङ् नुहःल्‍ले़ कुहुक्‍किन् सन्‍छुआङ् खे़न् पुत्तुःक्‍केन् ते़म्‍सुआङ् खुने़ॽनु वालाधाओ केःत्तु॥ हे़क्‍क्‍याङ् याम्‍मो नुसि ये़न् हाङ्‌घुआङ् खुने़ॽ खे़न् पुत्तुःक्‍केन् वालाधाओलाम् फे़सुदेसु॥ खे़न् पुत्तुःक्‍केन् युःन्‍छिक् खुने़ॽओ नुःक्‍खे़द्‌ये़॥ खे़ल्‍ले़ कुम्‍ब्राओ खारक् तुप्‍मनाबा पे़ःङ्‌वालिःत्‍छेल्‍ले़ कुभे़क्‌वाधिक् फिःत्तुआङ् पत्‍छे़॥ खे़ब्‍याङ् च्‍वाःत्तिन् खाम्‍बेःक्‍मो युमे़रत्‍छ के़लॽबा नुहःल्‍ले़ निङ्‌वाॽ खोसु॥ खे़ब्‍याङ् खुने़ॽ वेॽ नुसि ये़न् हाङ्‌घुआङ् खे़न् पुत्तुःक्‍केन् याम्‍मो फे़सुदेसु, कर कन्‍छुमो खे़न् खुने़ॽओ मे़नुःक्‍खे़न् मे़द्‌ये़ने़न्॥
नुहन् किप् तुक्‍सिआङ् तङ्‌बेधिक् के़रे़बा थिक्‍सिगेक्‍पा लाःल्‍ले़ थिक्‍सिगेक्‍पा ये़न्‍नो इक्‍सादिङ् खाम्‍बेःक्‍मोलाम् च्‍वाःत्तिन् चबे़, हे़क्‍क्‍याङ् नुहःल्‍ले़ वालाधाओबा खाम्‍बुन् हन्‍दुआङ् ओमे़त्तुल्‍ले़ खाम्‍बेःक्‍मे़न् से़ङ्‌से़ङ्‌बा निसु॥ हे़क्‍क्‍याङ् निसिगेक्‍पा लाःल्‍ले़ निबोङ्‌ङाङ् नुसिगेक्‍पा ये़न्‍नो खाम्‍बेःक्‍मे़न् के़रे़क् हेरे़॥
खे़ब्‍याङ् निङ्‌वाॽफुमाङ्‌ङिल्‍ले़ नुहन् मे़त्तु, “खे़ने़ॽ, मे़ल्‍लिङ्‌गे़न् के़मेःत्तिन्, के़स्‍साहाॽ हे़क्‍क्‍याङ् के़म्‍बाङ्‌लिहाॽ वालाधाओलाम् लःन्‍दे़म्‍मे़ॽ॥ खे़ने़ॽनु के़वाॽबा कुसक्‍मा के़याक्‍पा के़रे़क्—थक्‍साहाॽ, हे़क्‍क्‍याङ् पुसाहाॽ, खे़ब्‍याङ् के़उःङ्‌सिङ्‌बा थक्‍साहाॽ के़रे़क् लाःक्‍कात् लःत्ते़से़ॽ, हे़क्‍क्‍याङ् खे़ङ्‌हाॽ इक्‍सादिङ् खाम्‍बेःक्‍मो मे़बोन् मे़धे़ॽआङ् यरिक् मे़बोङ्‌ल मे़बेःक्‍ल॥”
खे़ब्‍याङ् नुहन्, मे़ल्‍लिङ्‌गे़न् कुमेःत्तिन्, कुस्‍साहाॽ, हे़क्‍क्‍याङ् कुम्‍बाङ्‌लिहाॽ वालाधाओलाम् मे़लःन्‍दे़॥ हे़क्‍क्‍याङ् इक्‍साङिङ् खाम्‍बेःक्‍मो के़वाॽबा के़रे़क् परिक्‍पा कुलिःन्‍बा थक्‍साहाॽ, के़उःङ्‌सिङ्‌बा के़सःन्‍छिङ्‌बा थक्‍साहाॽ, पुसाहाॽ वालाधाओलाम् मे़लःन्‍दे़॥

हे़क्‍क्‍याङ् नुहःल्‍ले़ यहवे दाङ्‌बाल्‍ले़ कुलागि लत्‍छा ले़त्ति तोःम्‍मादे़न्‍धिक् चोगुआङ् के़रे़क् परिक्‍पा सुत्‍थो थक्‍सा नु सुत्‍थो पुसाहाॽओलाम् मिधिङ्‌मनाबादेमनाबा सिदुङ्‌जभा ले़त्ति तोःन्‍दु॥ यहवे दाङ्‌बाल्‍ले़ खे़न् कुनाम्‍गे़नुॽबा सिदुङ्‌जभा मिःक्‍खुॽइन् नाम्‍सुआङ् कुनिङ्‌वाॽओ पाःत्तु, “मे़न्‍छाम् याप्‍मिःल्‍ले़ कुनिङ्‌वाॽओबा पाःन्‍हाॽ खुने़ॽ चुःक्‍काङ्‌धोसा ताप्‍फे़ःम्‍बा चोक्, हे़क्‍केसाङ् ताप्‍फे़ःम्‍बा मे़न्‍छाम् याप्‍मिःल्‍ले़ चोगुल्‍ले़ आङ्‌गाॽ याम्‍मो आभे़ल्‍ले़आङ् इक्‍सादिङ् खाम्‍बेःक्‍मान् साक्‍मुरा मे़मे़त्तान्॥ आल्‍लो चोगुङ्‌बा कुइसिक् के़रे़क् थक्‍सापुसाहाॽ याम्‍मो आभे़ल्‍ले़आङ् मे़मे़ङ्‌ङासिङिन्॥
“इक्‍सादिङ् खाम्‍बेःक्‍मान् ने़र थारिक्
याॽरिम्‍बा ले़प्‍मा नु कुजा सुम्‍मा ये़म्,
सेःम्‍मा नु कोमा, हाङ्‌वामा नु चुङ्‌जिःक्‍मा,
हे़क्‍क्‍याङ् ले़न्‍दिक् नु से़न्‍दिक् आभे़ल्‍ले़आङ् मे़नुप्‍ने़ल्‍लो॥”

Ascolta तोलिङ्‌सोमु 8