Kalmyk-Oirat - 2002 IBT-R (NT) Drama

Тиигхд Исусиг эрлг сөртхә гиһәд Әрүн Сәкүсн көдәд дахулҗ авч ирв. Дөчн өдр сө уга Исус мацг бәрв, сүүлднь Исусин геснь өлсв. Тегәд эрлг Терүн тал өөрдҗ ирәд:
– Кемр Чи Бурхна Көвүн болхла, эн чолуд өдмг болтха гиһәд кел, – гив.
– «Һанцхн өдмгәр күн бийән цадхаҗ хаңһашго, зуг Бурхнас һарсн үгәр күн цадхлң болх», гиһәд бичәтә, – гиҗ Исус хәрүднь келв.
Тер дарунь эрлг Исусиг Ерусалим балһснд авч ирәд, һол сүмин ора деер тәвнә.
– Кемр Чи, Бурхна Көвүн болхла, эн ора деерәс дорагшан һәрәдәд «Бурхн Эврәннь элчнртән Чамаг әрвләд хәләтхә гиҗ зәрлг болх. Тедн Чамаг һар деерән авад теврәд йовх, тегәд көлчнь чолунд төрүц цокгдшго», гиҗ бичәтә, – гиһәд эрлг келв.
– «Эврәннь Деед Эзн Бурхан бичә сөрәд бә» гиҗ бас бичәтәлм, – гиһәд Исус келв.
Дәкәд эрлг йир өндр уул деер Исусиг күргәд, делкән цуг орн-нутгудыг, теднә байн зөөриг үзүлнә.
– Кемр нанд сөгдхләчн, цуг эн тоотыг Чамд өгнәв, – гиҗ эрлг келв.
– Йов цааран Нанас, эрлг! «Эврәннь Деед Эзн Бурхндан сөгд, һанцхн Бурхндан цергл» гиҗ бичәтә, – гиһәд Исус хәрү өгв.
Тиигхлә эрлг Исусиг үлдәһәд цааран йовҗ одна. Тер дарунь Бурхна элчнр ирәд, Исуст дөң болв.

Йоханыг түүрмд суулһсинь соңсад, Исус Һалильяд ирнә. «Зебулунин һазр Напталин һазр, нуурин өөр бәәдг Йордана цаадк һазр, буру номта улсин Һалилья! Харңһуд бәәдг улс алдр герл үзҗ. Үклин сүүдрт бәәдг улст герл тусҗ гилвкв», – гиҗ Эшья әәлдәчәр дамҗулад келсн үг бүттхә гиҗ Исус Назаретиг үлдәһәд, Һалильян өөр Зебулунин болн Напталин һазрт бәәдг Капернамд бәәршлнә.
Тер цагас авн Исус:
– Теңгрин йосн өөрдв, тер учрар килнцтә җирһлән үлдәтн, – гиҗ Бурхна ном тархаһад зәңглдг болв.

Һалилья нуурин өөр йовҗ йовад, ах-дү хойриг Пётр гидг нертә Шимониг болн терүнә дү Андрейиг Исус үзв. Эдн заһсчнр болад, нуурт гөлм хайҗаҗ.
– Намаг дахад йовтн. Әмтиг дуудҗ мөңк җирһлд орулдг таднд Би дасхнав, – гиҗ Исус теднд келв.
Тедн тер дарунь гөлмән хайчкад, Исусиг дахад йовцхав. Цааран йовҗ йовад, талдан ах-дү хойриг, Зебедана көвүдиг Яковиг болн Йоханыг, теднә эцктәһән Зебедала хамдан оңһц дотр гөлмән ясҗахинь Исус үзәд, тедниг бас дуудв. Ах-дү хойр эцкән, оңһцан тер дарунь үлдәчкәд, Исусиг дахад йовцхав.

Исус цуг Һалильяр эргҗ йовв, хурлмудт Теңгрин йосна туск Сән Зәңг дасхҗ цәәлһв, әмтн дунд ямаран чигн гемтәһинь, чинәһән алдсинь эдгәв. Цуг Сирий һазрар Исусин тускар зәңг тарв; Терүн тал чинәһән алдсн, олн зүсн гемтә, харһцдг, тәкрсн һарта, көлтә, хар сәкүснд эзлгдсн әмтиг авч ирцхәв. Исус цугтаһинь эдгәв. Һалильяс болн Декаполас, Ерусалимас болн Йудьяс, Йордана цань бәәх һазрас чигн олн әмтн Исусиг дахҗ ирцхәв.

Ascolta Матай 4