LUK KEPACHINI
KEPACHINI
Baibel hastro along ketok ateng Arnam amethang mamat monit nangcheparjansi Jisu Khristo pirthe nanghachelo pu alam ladak Luk ketok a-Birta Keme aloh along tok paklangdaklo. Alangli pirthe kehache alamjir, alangli pirthe dotik an akaprek kaprek akeso kepame, kematha un-epin akemanghumeme akam kethe hei hei keklem, alangli tipit pen kethur lapen monit atum angno kecheklangthu, hi-i atum aphan kephlung, lapen alangliphan puthot sining angsong kepon alam hei hei pen alanglike inut Arnam a-Sopo binonglo pu alam chini-un.
Jisuke Israel atum aphan lapen kadokave amonit aphan kepajok abanglo pusi ladak paklanglo. Keduk-keboi atum aphan Birta Keme kethan kepachethangjisi Hemphu Akarjong Jisu aphan phalo. Lasi ason ason akenang kedo amonit atum aphansi labangso abirta keme aloh ketok parap damlo. Jisu aphan kekroikre, mate alangli lam kekroikre atum anke akepherememe akesung pho nangji, lapen kekroi atum anke kejut un-e achethe longsi kejut un-epin akerengme longji lapen alangli puthot vangthusi kekroi atum an aphan pangrumpetji pu alamta ladak paklanglo.
Arnam monit apap hei hei kediya alam, kardom akenangsot alam, Karjong Kangthir alam, monit atum ahokpet a-ot adur pen kedo kethak nangji alam, lapen pirthe athak Khristo Arat kepachanji aphan keklem nangji akam hei hei, lapen kaprek kaprek alamlir pen monit atum aphan Jisu kethan-kepare alamta labangso abirta keme aloh along paklanglo. Labangso aloh ketok lake Khristo Aphi 60-70 aningkan malom, lapen ketok abangke Luk amethang amat.
Athepi Alamthe Hei Hei
Kepachini 1.1-4
Jisu lapen Jon Baptist pirthe kehache lapen halatum osomar arta ahut alamjir 1.5—2.52
Jon Baptist kam keklem 3.1-20
Jisu Baptisom ke-en lapen sat kepho 3.21—4.13
Jisu Galili alongri angbong kam keklem 4.14—9.50
Galili pen Jerusalem kedam 9.51—19.27
Kejut ahithi arui ahut Jisu keduk kesung kephonang lapen thengparpan athak kethi 19.28—23.56
Jisu kethi pen kethurthu, monit atum angno kecheklangdam lapen sining angsong kedam 24.1-53
Valið núna:
LUK KEPACHINI: KARBIBSI
Áherslumerki
Deildu
Afrita
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.