JON 5
5
Langbi Akung Keso Kepame
1Labangso aphi Jisu Jihudi atum achojun Ameipi along kedunjisi Jerusalem arludamlo. 2Jerusalem arongsopi along Biresak Ajakan adung isi alangbi dolo. Ibri alam penke labangso alangbi aphan Bethesda pusi pulo. Labangso alangbi akung mandu humpho dolo. 3Halabangso amandu along keso kepangji ake-ongpi atum, atheke amek kave, akeng ketekok lapen thi-klak akeso atum tiruisi dolo.#Akaprek a-Baibel hastro barim along ke la aber ketok alamta ketok do. Ketok lapu helo, 3b Halatum lang keplikplak aphansi chonghongphrong-lo. 4Pima ahut pen ahut Arnam apherangke inut halabangso alangbi along nangsunsi lang pavuivai titilo. Lang kepavuivai aphijong langbi along kesun paphrangcheng abang ke ajat akeso setta medet titilo.#Ajehak ahastro along ke angdengso 3 pen 4 pacheroppet. 5Hadak ningkan thomkep ra nerkep keso kepangji amonit dolo. 6Jisu alangliphan hadak ijoi thek-long-lo. Labangso amonit keso kepangji lapu-an aningkan dolo pu Jisu chinilo. Lasi alangli labangso amonit aphan arjulo, “Nangli kemedetji nangning hangma?”
7Keso kepangji abang alangliphan thakdunsi pulo, “Hemphu, lang kepavuivai ahut neliphan langbi along nekepasunji abang inutta ave. Neli kesunji kebor-i ahut anut kaprek atum hadak sun paphrang munak titi.”
8Jisu alangliphan pulo, “Thurnon, nangli tarthui cheponra kengkam chejornon.” 9Halabangso amonit akeso hala mamat medet-lo. Lapen alangli atarthui cheponsi kengkam chejorlo.
Halabangso arni ke Sabbath arnilo. 10Lasi Jihudi atum angbong keja atum hala keso kemedet abang aphan pulo. “Pini ke Sabbath arni, tarthui kepon ke kertang-lo.”#Nehe 13.19; Jer 17.21
11Alangli thakdunsi pulo, “Neliphan keso kepame amonitsi neliphan, tarthui cheponra kengkam chejornon, pu nepulo.”
12Halatum alangliphan arjulo, “Komat amonitsi nangliphan, Tarthui cheponra kengkam chejornon, pu nangkepulo?”
13Bonta keso kemedet abang ke Jisu aphan chinine. Pima halabangso adim monit do-olo, lapen Jisu armu anglum damjuilo.
14Aphi Jisu alangliphan Kardom-hemthepi along longdamsi alangliphan pulo, “Mathanon, nonke nangli metang-lo. Lasi nangli aphrang apar kopine akehingnomuchot kephophedetjile non pen apara pap klemrinon.”
15Ansi halabangso amonit damsi alangliphan keso kepame abang ke Jisu helo pusi Jihudi atum angbong keja atum aphan thandamlo. 16Lasi halatum Jisu aphan kepasungji pang-cheng-lo, pima alangli kesang arnisi keso pamelo. 17Jisu halatum aphan thakdunsi pulo, “Ne-Po ke kaiketa kam klemver, lapen nelita klemvek nangji.”
18Labangso alam apotsi Jihudi atum Jisu aphan kepathiji ansose chesik-lo. Pima alangli Sabbath arni kekroikre anchot kali, Arnam ke alangli methang a-Polo pusi pulo, lapen lasonsi alangli methangsi Arnam pen chepachingbar-lo.
Sopo Ajakong
19Lasi Jisu thakdunsi pulo, “Neli nanglitum aphan ahokpetsi nangpulang, Sopo amethang ke thangta klem un-e; alangli kethekdunlong Po keklembom akamsi alangli klemchot. 20Pima Po ke Sopo aphan chinghon, lapen alangli keklembom akam an Sopo aphan paklang, lapen nanglitum kadokave aphan kepamanghuphrongji aphan alangli la apar akethemu akam hei heita alangliphan paklangjilang. 21Po-le kethitang aphan pathursi chethe kepi asonthotsi Sopota amethang aning kehang aling aphansi chethe pi. 22Lapen Po amethang amat ke badu aphanta ingsaise. Atheke kadokave atum Po aphan aman kepi asonthotsi Sopo aphanta aman kepithekji aphan alangli amethang a-Sopo aphansi kangsai akam an pektang-lo. 23Sopo aphan aman kepipe abang ke Sopo aphan nangketoi abang aphan, atheke Po aphanta aman pipe.
24“Neli nanglitum aphan ahokpetsi nangpulang, neli lam karju lapen neliphan neketoi abang aphan kekroi abang ke kejut un-e achethe do. Alangliphan ingsaisedetji, bonta alangli ke kethi angbong pen damsi chethe angbong lutdamtang-lo. 25Neli nanglitum aphan ahokpetsi nangpulang, kethitang atum Arnam a-Sopo ase arjulongji, lapen la karju atum rengji, lason ahut nangleji; lapen nonta la nangletang-lo. 26Po amethang ke chethe atiri asonthotsi alangli Sopo aphanta chethe atiri paplang-lo. 27Alangli Sopo aphan kangsai ajakong pitang-lo. Pima alangli ke Monit a-Sopolo. 28Nanglitum labangso alam pen apot manghuri; pima kethitang atum an alangli se arjulongji, 29lapen amethang atipit arlo pen nangbarji, lason ahut vangji. Akeme keklem atum ke thursi rengji, lapen akehingno keklem atum ke thursi kesung phoji.#Dan 12.2
Jisu Aphan Haki Kechodun
30“Nelimethang ajakong penke neli thangta klem un-e; Arnam neliphan nekethan atengsi neli ingsaichot. Lasi neli akangsai ke chokpamelo, pima neli ke nelimethang aning kehang aling keklemji bor-i-e. Neliphan neketoi abang aning kehang atengsi neli ke klemchot.
31“Nelisi nelimethang ahaki chepi asonte neli kethan alam ke ahok pu dengmememe. 32Bonta komane abangsi neli lamjir haki pibomlo, lapen alangli neli lamjir kethan alam anke ahokpet alamlo, lake neli chini. 33Nanglitum Jon adung monit toilo, lapen alangli ahok alamjir ahaki pilo.#Jon 1.19-27; 3.27-30 34Komane abang neli lamjir haki pinangji, lapu kali, bonta nanglitum kejok kelong thekji aphansi neli la pulo. 35Jon ke kekar-ang, lapen keturbong amelur asonthak thak-lo, lapen nanglitum malomso ahut an alangli akethe-ang angbong kechehokjisi neli ning hang-lo. 36neli nelimethang ahaki do. Lake Jon kepi ahaki apar themulo. Neli keklem akam, atheke Neli Po neliphan nekepaklemtoi akam hei heisi neli lamjir thanlo, lapen lake Po neliphan netoitang-lo pu paklangdak-lo. 37Neliphan neketoi abang, Pota neli lamjir haki pilo. Nanglitum alangli se arju longlepinlang, mate arje thek-longlepinlang.#Mat 3.17; Mar 1.11; Luk 3.22 38Nanglitum alangli kethan alam ning chebibe, pima nanglitum alangli nangketoitang abang aphan kroikre. 39Nanglitum hastro porhebom, pima lahei hei pen ajok kejut un-e achethe longji pusi nanglitum mathalo. Lapen la hastrota neli lamjir thanlo. 40Tebonta nanglitum chethe kelongji aphan neli long kevangji ning hanghe.
41“Neli monit pen kero kelongji aphanle keri kali. 42Bonta nanglitum kopuson amonitma, lake neli chini, lapen nanglitum aning arlo Arnam aphan akanghon ave, lata neli chini. 43Neli neli-Po amen pensi vang-lo, bonta nanglitum neliphan dengdedet-lo. Bonta komane abang amethang amen pen vang-lote nanglitum alangliphan chakji. 44Nanglitum lahin lahin pen kero kelongji aphan ning hang, bonta inutpet Arnam nangkeparoji aphan ke nanglitum bor-i-e; tangte nanglitum kopusi neliphan kroithekjima. 45Tebonta neli nanglitum aphan Po angno adai nangdinji puke nanglitum mathari. Nanglitum aphan adai nangkedinji abang ke nanglitum ning kechethedam abang, atheke Moses helo. 46Nanglitum Moses aphan kroilo asonte neliphanta kroiji apot-lo, pima alangli neli lamjir tok-lo. 47Bonta nanglitum jongsi alangli ketok alam kroikre tangte kopusi neli kepu alam kroithekjima?”
Valið núna:
JON 5: KARBIBSI
Áherslumerki
Deildu
Afrita
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.