JON 13
13
Jisu Amethang Asangho Atum Aphan Akeng Kecham
1Kejok kechemathadam Achojun a-Meipi pen arnisi aphrang. Jisu labangso apirthe osi Po along kedamji ahut nangletang-lo pu alangli chechinilo. Pirthe athak kedo amethang amonit atum aphan alangli kaiketa chinghonlo, lapen ha kejut ahut anta alangli halatum aphan chinghonbomlo.
2Jisu lapen asangho atum aningve a-an cholo. Jisu aphan hotur arideng kepahodaijisi Hi-i Sarpoke Simon Iskariot asopo, Judas Iskariot aphan aning pahang-lo. 3Po Jisu aphan kadokave aphuthak ajakong pitang-lo, alangli ke Arnam along pensi kevang lapen Arnam along chedamthupo puke Jisu chechinilo. 4Lasi alangli an kecho pen thursi athak kechingchoi achoi keding chephlok-lo, lapen avam pe-so epak chekok-lo. 5Ansi alangli anthong along lang dungsi asangho atum akeng kechamji lapen avam kechekok apeso pen kevenji pangcheng-lo. 6Alangli Simon Pitor adung vang-lo. Ansi Pitor alangliphan pulo, “Nangli neli keng nekechamji puma Hemphu?”
7Jisu thakdunsi pulo, “Nonke nangli la neli keklem akam chinine, mo aphisi chiniji.” 8Pitor alangliphan pulo, “Neli nangliphan jonghe setta neli keng nangpacham longle!”
Jisu thakdunsi pulo, “Nelile nangli keng nangchamchete nanglike non pen apara neli sangho kali.”
9Simon Pitor alangliphan pulo, “Tangte neli keng anchot kali Hemphu, neliri lapen neliphuta nechamtha.”
10Jisu alangliphan pulo, “Lang kechinglutang abang ke kakpametang-lo. Alangliphan ke akeng pen apar ke thangta cham nangnelo. Nanglitum angbong hala inut pen apar ke kadoka-veta ingthir-et-lo.” 11Jisu aphan komat abangsi hotur arideng hodaijima, lake Jisu aphrang pen chinilo. Lasi alangli pulo, “Inut pen apar ke nanglitum kadokaveta ingthir-et-lo.”
12Jisu halatum akeng chamdet aphi hala athak kechingchoi achoi keding chingchoithulo. Ansi alangli an kecho kangni adim chedamthusi halatum aphan pulo, “Neli nonhet nanglitum aphan keklemtang akam nanglitum chininema?#Luk 22.27 13Nanglitum neliphan kuru lapen Hemphu pusi nepulo, lapen nanglitum neliphan lason nekehang ke chokpamelo, pima halabangso abang ke neli helo. 14Neli, atheke nanglitum a-Hemphu lapen akuru abangsi nanglitum akeng nangchamlo apotsi nanglitumta lahin lahin akeng checham seroi nangji. 15Nanglitumta neli keklem asonthot keklemthekji aphan neli nanglitum aphan nang-paklangtang-lo. 16Neli nanglitum aphan ahokpetsi nangpulang, a-Hemphu apar aban abang themu, lapu kali, lapen apherangke abang ke alangliphan nangketoi abang apar themu, lapu kali.#10.24; Luk 6.40; Jon 15.20 17Nonke nanglitum labangso ahok alam chinilo. Lasi nanglitumle labangso alam ateng klemlote nanglitum ko-an aning arongpo!
18“Neli nanglitum kadokave alam-jirle kepudam kali. Neli kangvaitang abang aphan neli chini. Bonta hastro alam chekok nangji, atheke hastro pulo, ‘Ne pen an kecho rap rap abang hotur cheplangsi nephan akengti chirung-lo.’#Lun 41.9 19Labangso alam kechekokji ahut, ‘Halabangso abang ke neli helo,’ pu nanglitum kekroithekji aphansi non labangso alam kechekok ke ako neli nanglitum aphan labangso alam nangthanlo. 20Neli nanglitum aphan ahokpetsi nangpulang, neli nangketoi abang aphan kechak abang ke nephanta nechak-lo, lapen neliphan nekechak abang ke neliphan neketoi abang aphanta chak-lo.”#Mat 10.40; Mar 9.37; Luk 9.48; 10.16
Jisu Aphan Hotur Arideng Kehodaiji Alam Jisu Kechethanmek
21Jisu labangso alam pudet aphi rat atum angno pudak-lo, “Neli nanglitum aphan ahokpetsi nangpulang, nangli-tum angbong inut abang neliphan hotur arideng hodaiji.”
22Jisu komat alamjirsi labangso alam pudamloma, lake asangho atum chininedetsi lahin lahin chelang pelet pelat-lo. 23Sangho atum angbong pen Jisu kechinghon abang ke Jisu adungsi ingnilo. 24Simon Pitor alangliphan ang-thek paklangsi pulo, “Alangli la komat alamjirsi kepudamma, arjutha.”
25Lasi la Jisu kechinghon asangho abang Jisu adung patebok muchotsi alangliphan arjulo, “Lake komat abangma Hemphu?”
26Jisu thakdunsi pulo, “Neli him echet nimsi inut aphan pipo; alangli ke labangso abang helo.” Ansi alangli him echet nimlo, lapen la ensi Simon Iskariot asopo, Judas Iskariot aphan pilo. 27Halabangso ahim achet kedeng pen mamat Judas aning arlo Soitan lut-lo. Ansi Jisu alangliphan pulo, “Nangli keklemji akam klem seraknon.” 28Hala kangniphrong atum baduta la Jisu kepu alam athe chininedet-lo. 29Pima Judas aridengsi tangka athia do apotsi, Jisu alangliphan cho jun amei akenangji amar kepanam-damtoilo, kalite keduk kelak atum aphan kopine pitu pusi pulo pusi sangho angbong manene atum ke mathalo. 30Halabangso ahim longdet pen mamat Judas ingtan damjuilo. Halabangso ahut ke ningvekuk-lo.
Hukum Kemi
31Judas damjui aphi Jisu pulo, “Non Monit a-Sopo adak atur klangji dokdok-lo. Non alangli pen ajok Arnam adak atur klangji dok dok-lo. 32Lapen mo alangli pen ajok Arnam adak atur klang lote Arnam amethangsi Monit a-Sopo adak atur paklangpo. Alangli la non mamat klempo. 33Ne kechinghon atum, neke non malomso ahut ansi nangtum along dochotpo. Nangtum nephan riji. Bonta ne Jihudi atum angbong keja atum aphan kepu asonthotsi nangtum aphanta nangpulang, nangtum ne kedamji adim nangdun un-e.#Jon 7.34 34Non ne nangtum aphan hukum kemi nangpipo! Nangtum lahin lahin chinghonnon. Ne nangtum aphan nangkanghon asonthot-le nangtum lahin lahin chinghonnon.#Jon 15.12,17; 1 Jn 3.23; 2 Jn 5 35Nangtum lasonle lahin lahin chinghon lote nangtum ke nesangho atumlo pu kadokave atum chinipo.”
Pitor Chekobirbedetji Pu Jisu Kethanmek
(Mat 26.31-35; Mar 14.27-31; Luk 22.31-34)
36Simon Pitor alangliphan pulo, “Nangli konatsi kedampoma Hemphu?”
Jisu thakdunsi pulo, “Nangtum nonke ne kedamji adim nangdun un-e. Bonta mo aphi ke nangtum nelong nangdunji.”
37Pitor alangliphan arjulo, “Neli nangli long nangkedun un-edetji athe kopima, Hemphu? Neli ke nangliphan pen ajok nelipran setta chepidetji!”
38Jisu thakdunsi pulo, “Nang nephan ajok nangpran chepijima? Ne ahokpetsi nangpulang, vo kuke ako nang nephan chinine pusi batai kethom puji.”
Valið núna:
JON 13: KARBIBSI
Áherslumerki
Deildu
Afrita
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.