AKAM 2
2
Karjong Kangthir Nangkehir
1Pentakost Arni nanglesi kekroitang atum an elong adim chingrumpet-lo.#Levi 23.15-21; Keth 16.9-11 2Ansi tongsekot pen tomonpi kevang arki asonthak thak arki sining pen vangsi halatum kangniphrong ahem arlo plengset-lo. 3Anke me ade nangnak amar halatum thek-long-lo. Labangso amar ingdaksi abangphutin aphanta rodampet-lo. 4Halatum do-an Karjong Kangthir pen plengset-lo, lapen Karjong halatum aphan kepaningjetoi asonthotsi halatum kaprek kaprek adet alam pen keningjeji pangcheng-lo.
5Halabangso ahut Jerusalem arongsopi along pirthe adang akheitin pen kevang dhoromi a-Jihudi atum dolo. 6Labangso ase arjulongsi armu ake-ongpi atum chingrumlo. Halatum kematha abidi jutdet-lo, pima la armu atum amethang methang adet alam pensi hala kekroitang atum keningje halatum arjulong-lo. 7Halatum manghuphrong-lo, lapen kematha abidi jutdetsi pulo, “Langtha! La keningje atum an Galili amonit-lo, kalima? 8Tangte kopusonsi halatum ilitum methang methang adet alam pen keningje ilitum arjulong-loma? 9Pima ilitum Parthia, Media lapen Elam adet pen, Mesopotamia, Judia lapen Kappadosia adet pen; Pontas lapen Asia adet pen, 10Phrigia lapen Pamphilia adet pen, Ijip lapen Sairen adung kedo Libia alongri pensi vang-lo. Ilitum angbong manene atum ke Rom pen kevang a-Jihudi lapen Jihudi adhorom ke-endun Jihudi kalidet atumlo. 11Lapen manene atum ke Krit alanglompi, lapen Arob adet pen kevang atumlo. Tebonta halatum ilitum methang methang adet alam pensi Arnam thedung keklem akam alamjir keningje ilitum arjulong-lo!” 12Halatum manghuphrong-lo lapen kematha abidi jutdetsi lahin lahin charjulo, “Labangso kecheplang athe kopima?”
13Bonta akaprek atum ke halatum aphan ingnekchoisi pulo, “Labangso amonit atum drakha ahorlang kemi junsi ingritang-lo!”
Pitor Kethan
14Ansi Pitor hala ketoitang bang kre isi atum pen pen arjapthersi armu atum aphan ase kethe pen kepuji pang-cheng-lo, “Jihudi akortemarli atum, lapen Jerusalem arongsopi kedo atum an, nanglitum nelilam arjutha. Neli nanglitum aphan labangso kecheplang athe than pajirmipo. 15Labangso amonit atum ke hor kangrilo pusi nanglitum mathalo. Bonta latum ke hor kangri kali; pima nonke adap baji sirkep anvet-lang. 16Lake Arnam amontri, Joel kepu asonthot-lo. Atheke alangli pulo,
17‘Arnam pulo, mo kejut arnihei-hei ahut ne lapuson klemji:
Halabangso ahut ne kadokave amonit atum aphuthak nemethang a-Karjong dungji.
Nangtum asopo lapen asopi atum montriji;
nangtum arisomar atum ning arjan thek-longji,
lapen nangtum akesar atum mang hemanji.
18Lapen halabangso arni hei hei ahut ne nemethang abanpi lapen abanpo atum aphuthak nemethang a-Karjong dungji,
lapen halatum montriji.
19Lapen sining angsong ne kemanghumeme akam hei hei,
lapen pirthe athak angthek hei hei paklangji.
Atheke, vi, me lapen karthatklui amehi hei hei angthek ne paklangji;
20arni ingtingkuk cheplangji,
lapen chiklota vi ason erhang cheplangji.
Hemphu kethedung lapen adak-atur keplengset a-arni
vangve ako la kadokave plangji.
21Anke Hemphu amen kehang abang alingsi jokji.’#Jol 2.28-32
22“Israel akortemarli atum, nang-litum labangso alam arjutha! La Najareth a-Jisu pen ajok Arnam kemanghumeme akam lapen angthek hei hei paklangsi alangli ke Arnam pen ajakong kelong amonit-lo pu nanglitum aphan paklangdak-lo. Lake nanglitum methangsi chinilo, pima lake nanglitum angbongsi plang-lo. 23Arnam aphrang pen kemang lapen kepathiktang asonthotsi Jisu aphan nanglitum arideng hodaidet-lo, lapen nanglitum alangliphan papi atum pen ajok thengparpan athak pasaksi pathilo.#Mat 27.35; Mar 15.24; Luk 23.33; Jon 19.18 24Bonta Arnam alangliphan kethi ajakong pen pajoksi pathurlo. Pima kethi alangli phuthak thangnat ajakong avedet-lo.#Mat 28.5-6; Mar 16.6; Luk 24.5
25Pima David alangli lamjir pulo,
‘Hemphu aphan ne kaike ahutta ne ingnosi thek-long-lo;
ne jakong kekomkedetji aphan alang ne ar-e anatsi dolo.
26La apotsi ne ning arong plengset-lo,
lapen ne lam hei heita kechehok alam saidelo.
Lapen nebang arpumta ning kethe pen dopo.
27Pima nang nephan kethi atum kedo adim otekangkedetji,
lapen nangmethang kekroi thirklong aban aphan nang tipit along pathulongledetji.
28Nang nephan chethe atovar akrong hei hei nepachinitang-lo,
nang nelong kedo pen ajok ne ning arong plengsetji.’#Lun 16.8-11
29“Kortemarli atum, ephusar David thilot-lo lapen alangliphan pipdet-lo, lapen pini arni anta atipit ilitum along dolo. Labangso alam neli puthip un. 30Alangli ke Arnam amontrilo, lapen David aso-asu atum angbong pen inut aphan David adim recho pachoji pu Arnam seme tangsi kechak alam alangli chinilo.#Lun 132.11; 2 Sam 7.12-13 31Arnam keklemji alam David aphrang pen chinilo; lasi alangli Khristo kethi pen kethurji alam pulo,
‘Alangliphan kethitang atum kedo adim otekangkedet-lo;
lapen alangli bang arpum pavirlongledet-lo.’
32Arnam labangso a-Jisu aphan kethi pen pathurtang-lo lapen nelitum kadokave labangso ahakilo. 33Alang-liphan Arnam ar-esi pangnitang-lo lapen a-Po Arnam pen hala kechaktang a-Karjong Kangthir longsi la nelitum aphuthak dungtang-lo. Lake non nanglitum thek-longtang-lo lapen arjulongtang-lo. 34Pima Davidle sining angsong kedam kali, tebonta alangli pulo,
‘Hemphu ne Hemphu aphan pulo:
35Ne nang hotur atum aphan nangkeng anghoi paplangpletik ke,
nang ladak ne ar-ele ingninon.’#Lun 110.1
36“Tangte Israel atum an, nanglitum labangso alam chinihurnon: nanglitum thengparpan athak kepathi a-Jisu helo Arnamsi Hemphu lapen Khristo kepaplangtang abang-lo!”
37Labangso alam arjulongsi halatum aning lutchok-lo. Lasi halatum Pitor lapen ketoitang akaprek atum aphan pulo, “Kortemarli atum, nelitum kopi klem nangjima?”
38Pitor halatum aphan pulo, “Nang-litum abangphutinta nangmethang methang apap hei hei diya kelongji aphan ning chiruihurnon. Anke Arnam adan, Karjong Kangthir nanglitum longpo. 39Pima nanglitum, nanglitum aso asu atum aphan lapen heloving kedo atum an aphan, atheke Hemphu, e-Arnam kepha atum an aphan Arnam labangso alam chak-lo.”
40Pitor halatum aphan akaprek kaprek alam pen thansi pacheretoilo, lapen choningrisi pulo, “La kehingno amonit atum aphuthak kevangji akesung pen nanglitum chepajoknon!” 41Ake-ongpi amonit atum alangli kethan alam kroisi baptisom enlo, lapen halabangso arni bang suri kethom anbak amonit atum halabangso asong along chelangdunlo. 42Halatum ketoitang atum along charlidunbom, chingrumdunbom, kechingrum a-an chodunbom lapen Arnam kardom o-edetsi dobomlo.
Kekroitang Atum Akedo Kethak Alam
43Ketoitang atum pen ajok kemang-humeme akam lapen angthek hei hei paklangbomlo, lapen abangphutinta pherehurlo. 44Kekroitang atum an elongpetsi chingrumbomlo, lapen kedo an amarta enrap rap-lo.#4.32-35 45Halatum amethang arit, aberi lapen amar atar hei hei chejorsi abangphutin aphan akenang kedo atengsi atangka ronlo. 46Halatum adon adon chingrumsi aning arong pen lapen aning keme pen Arnam aphan kero pisi him beng-lo, lapen an chorap rap-lo. 47Lapen kadokave amonit atum halatum aphan aning dok-hurlo. Hemphu arnivangta halatum along kejok atum aphai batdunbomlo.
Valið núna:
AKAM 2: KARBIBSI
Áherslumerki
Deildu
Afrita
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.