LUK 24
24
Langngaibü
(Mt 28.1-10; Mk 16.1-8; Jn 20.1-10)
1Lausikei balea shaangbounyet, ngeyang enyu, haoenei lamlebü ponlem onang jungan hee to loukei. 2Haoenei laang kho heekhün ka khokan apan hapbei, 3lausikei ladang haoen atkei haoenei Bunyubou Jisu mang kho ühüp. 4Haoen kho shanga maang phenyembo kitoua, müt nyi soneibü nei lean loukei hoba haoen junga lokei. 5Yaksa shuong hatkei hoba haoeneibü thenyek kao ae yeikei, lausikei müt nyi khoei haoen to laukei, “Kanei aila haibü yoa langkei kibou lameida? 6(Hao hanei aki; hao langngaia.) Hao Galila kijinei haoei kan to lai laukei kho damenashi, 7khei Müteibü Shou shabü shuongeibü ik to khümbo kuan aplabü, peiseia thünglabü hoba sembounyet nyibou langngailabü.” 8Haoenei haoeibü ngüh shuong damenkei, 9hoba ladang haoen hee ka ngaikei haoenei khübü pendou Anthükche khola hoba joubü shuong pendou la lenkei. 10Haoen Mari Magdalin, Joana, hoba Jakob nyu Mari; hoba lubü yaksa shuong yoan haoenei youkoikjai shuong la ajanjan pendou lenkei. 11Yaksa shuongei lenbü kho pendou haoen la amlangbü la yeikukei hoba youkoikjai shuongei haoen to maialem. 12(Lausikei Peter loenkei hoba heedang to langkei, hoba haoei sühlangan semlitisi haoei nei inyaibü kho ong hapbei; ai haüthükkei khüto maangpangko hao chem to ngaikei.)
Emos Lam Wakou
(Mk 16.12-13)
13Haoeibü eik yoa müt nyi khünyet, Jerusalem ka mail nyet thüng hean, Emos dogo nyenbü sang che to hauko kikei; 14hoba ai ong haüthükkei khübü pendou shangabü haosi lauyoko hauko kikei. 15Haosi lenyo lauyoko kijinei, Jisu nyangko loukei hoba haosi yoto haukei, 16lausikei haosiei ashen. 17Jisuei haosi to laukei, “Kasi lam sünga ai shangabü lauyoko paida?” Haosi khün the khüman lokei. 18Haosi yoa müt che, Kleopa nyenbüei hao to jongaikei, “Jerusalem to loubü yenbou yoa tat ngiet ai haüthükkei kho angebüje no ong yingakei lo?” 19Haoei haosi to laukei, “Ai yingkei?” Haosiei hao to laukei, “Nazaretbü Jisu, ao Mühghaü hoba müt pendou thedanga ngüh hoba kümsileia sei kakbü thuseibü che kikei, 20hoba küneibü ungshedbou shuong hoba khuleibü shuongei hao haitilabü shanga khümbo kuan apbei, hoba hao peiseia thüngkei. 21Hobaje künei hao kho Israelbü deletlabü müt che yingkei dogo dambo kiteikei. Lausikei khei ayingtei, aishanga, khüto liman, haüthükan phaia tatei sembounyet yinga. 22Kün yo kabü yaksa shuong atei kün moktikei. Haoen hee to enyu haukei; 23haoenei haoeibü mang ühüp, lausikei haoenei khuthük hangangbü mangsang hapbei hoba hao lang kia dogo haoen to lenkei dogo lauko longeikei. 24Hobaje kün yoa kibü at heedang to haukei, hoba yaksa shuongei lenbü tegü kikei, lausikei haoje haoenei ühüp.” 25Haoei haosi to laukei, “Kan ngoubü mütshuong! Thuseibü shuongei lenan kibü pendou to mailemla kan latetche kit khaikei! 26Khrista kho khonkuan phaia haoeibü soneikangbü to atlabü kümsilei aying si?” 27Hobaje Mosa ka khangan hoba thuseibüa sühko haoei Laishiba phang pendou ka hao shangabü dobü wanan lenkei. 28Haoenei haoen hauko kibü sang nyangko loukei, hoba hao saabou haula kibü tegü hanglenkei; 29lausikei haosiei hao haosi yoa setngaila sukojako laukei, “Chasemlam süha hoba chanyu nepla kümda.” Hibü hao haosi yoa sühla haukei. 30Ladang hao haosi yoa setkei haoei wentek jungkei hoba haükuko shaknyinkei hoba haosi la kukei. 31Haosieibü nyek khitkei, hoba haosiei hao shenkei; hoba hao haosi jungka mauan apbei. 32Haosi cheei che to laukei, “Haoei lama seti to joyojinei hoba seti to Laishiba ka ngühtet wanan lenjinei setieibü maang- pon to lambei aying lo?” 33Haosi khoyam loenkei hoba Jerusalem to ngaikei; khünei haosiei Anthükche kho hapbei hoba haoen yoa lubü shuongkei chela kaman kikei. 34Haoenei, Bunyubou kho tükde langngaia hoba Simon to longan lena dogo lauko kikei. 35Kho tegü Emos kabü müt nyi khoei lama ai haüthükkei hoba wentek shaknyinjinei haosiei hao lai shenkei kho ngetikei.
Jisu Hao Eikshuong to Longan Lenbü
(Mt 28.16-20; Mk 16.14-18; Jn 20.19-23; Ykj 1.6-8)
36Ladang haoen yoa khübü shangabü lauyoko kikei hao haoen yoa lokei hoba haoen to laukei, “Kan yoa sangmai kishi.” 37Haoenei sou hapda dogo daman haoen mokde apyokei hoba hat- yokei. 38Haoei haoen to laukei, “Kan aila kheinyu maangpon shaleyoda? Kanei aila maanga hainyu shuyoda? 39Ngeibü ik hoba you to chühashi; ho ngo yingkei. Kü to meitiashi hoba chühashi; kanei kü to hapbü tegü soushou la phejak si lo aki.” 40(Haoei kho lauan phaia haoei haoen la haoeibü ik hoba you lenkei.) 41Haoenei khün sühkokei maialem, hibü haoen olinbüei shenan maangpangyoko kijinei haoei haoen to laukei, “Kanei han denche shaula kilao?” 42Haoenei hao la ngau thungbü pem che hean kukei. 43Haoei kho sungletkei hoba haoen thedanga shaukei.
44 #
Isa 53 Haoei haoen to laukei, “Mosa Ngühkhüm, Thuseibü hoba Nyensang Chiaa kü shangabü dobü pendou loushadlabü kümsilei dogo ngo kan yoa kijinei ngei kan la lenbü kho ho ki.”
45Kheijinei haoei Laishiba ditenlabü shanga haoeneibü maangpon ipbukei; 46hoba haoei haoen to laukei, “Laishibaei lenbü kho ho ki: Khrista kho khonkujan, hoba sembounyeta haibü ka langngaijan, 47hoba hao nyena maangpon sepeibü hoba shabü ap shanga Jerusalem ka khangan phangshuong pendou la songlenlabü. 48Khübü aukabü kho kan ki. 49Hobaje ngei Kübouei theletbü kan la hautikulabü kia; lausikei thükae ka kan thükto sei alot shongko kan sangnyua setjan.”
Jisu Khuthük to Anlangbü
(Mk 16.19-20; Ykj 1.9-11)
50Haoei haoen Bethani aeto leilangkei, hoba haoeibü ik shingan haoen haükukei. 51Haoei haoen haükuko kian hao haoen ka bangkei, hoba khuthük to anlangkei. 52Haoenei hao lembei hoba olinbü yaangei Jerusalem to longeikei; 53hoba haoenei haoeneibü jihsiphai khümbo lembüchema Mühghaü nyen sangko dantikei.
Valið núna:
LUK 24: CHANGBSI
Áherslumerki
Deildu
Afrita
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.