JOHAN 1
1
Langkei Ngüh
1 #
Kao 1.1 Kaodak moyaüjineithama Ngüh kiteikei. Ngüh kho Mühghaü yoa kikei hoba Mühghaü to jetei kikei. 2Büngla khangla hao Mühghaü yoa kiteikei. 3Ajanjan pendou hao danko ong kümbei, hoba hao ayokoje aikei aküm. 4Langkei pendou hao ka pakkei, hoba langkei kho khunak shousi ngesakbü kikei. 5Ngesakbüei nakthüh phanga hauda, hoba nakthühei kho ladangkei anyetti.
6Mühghaü ka hautibü müt che kiteikei; hao nyen Johan kikei. 7Hao danko pendouei mailemtila shanga ngesakbü shangabü ngüh chung künla hao aukabü shanga loukei. 8Ngesakbü kho hao aying, lausikei hao ngesakbü shangabü ngühchung künla loukei.
9Müt pendou ngesaktibou, tükdebü ngesakbü kho kaodak to louko kikei. 10Hao kaodaka kiteikei, hoba kaodak kho hao danko longkei, khei yingasikei kaodakei hao ange. 11Hao jembü chem to loukei, lausikei haoeibü jembü mütliei hao asunglet. 12Lausikei aoyouei hao sungletkei, haoen la Mühghaü shousi shuong yeila hau kukei. 13Haoen müteibü haang ka aying, ayingsi mütei maangangbü ka aying, lausikei Mühghaü ka loukei.
14Ngüh khoei müt la yeikei hoba sen yoa kikei hoba haoeibü soneikangbü, onou hoba ngühmaiei shenan, Boueibü Jayangshou soneikangbü senei hapbei. 15Johanei hao shangabü aukabü künkei hoba ngekkei, “Ngei ao shangabü, ‘Ao kü phaito louada, hao küto yaangbou, aishanga hao küto shaang kiteikei’, dogo laukei kho hao ki.” 16Haoeibü atakenbü keisiyaang ka senei onoubü jongsak che phainei che sungletkei; 17aishanga Ngühkhüm kho Mosa danko kukei; onou hoba ngühmai Jisu Khrista danko loukei. 18Aoeikei Mühghaü hapan achühkei; lausikei, tükdebü, Bou jungkabou, Mühghaü-Jayangshouei ong sen la hao tang khittia.
Johan Baptikuboueibü Ngühlang
(Mt 3.1-12; Mk 1.1-8; Lk 3.1-18)
19Ladang Jihudabüei Jerusalem ka Johan to, “No ao” dogo phela ungshedbü shuong si Levibü shuong hautikei, haoeibü aukabü ho kikei: 20“Ngo Messia aying!” Kho haoei aeibou haüko theletkei. 21Haoenei hao to phekei, “Kholonga ai? No Elija sai?” Haoei laukei, “Ngo ji!” “No Thuseibü sai?” Haoei jongaikei, “Aying!” 22Haoenei hao to laukei, “No ao? Künei kün hautibou la jongaibü kujan yingkei. Nyi ka shangabü ai lenla?” 23#Isa 40.3 Haoei laukei, “‘Bunyubou lamnyu tangshaitham kümashi’, dogo yama müt atei ngekbou kho ngo.” 24Haoen Farisibü shuongei hautikei, 25hoba haoenei hao to phekei, “No Messia aying. Elija aying, Thuseiboukei aying longa, kholonga nyi aila baptikuda?” 26Johanei haoen to jongaikei, “Ngei deia baptikuda. Kan yoa che loakei, ao kanei ange; 27kü phaito loulabou kho hao yingkei. Ngo haoeibü nguoklüh sengkula amukei.” 28Habü ho Johanei baptikushang Jordan thidang Bethania haüthükkei.
Mühghaü Sanshoushou
29Nyibounyet haoei Jisu hao jungto louko hapbei, hoba haoei laukei, “Chühashi! Kaodak shabü künlangbou, Mühghaü Sanshoushou. 30‘Kü phaito müt che loulabü, ao kü to thükkabou ki; aieilausi hao kü to shaang kiteikei’, dogo lenko ngei ao shangabü laukei, kho hao. 31Ngeikei hao ashenkei, lausikei hao Israel la tang khittila shanga ngei deia baptikuko loukei.” 32Hobaje Johanei hai lauko aukabü kukei, “Ngei khuthük ka Soushou dukutuk tegü louyenan, hao to pakko hapbei. 33Ngei hao angeen, lausikei ngo deia baptikula hautibouei kü to laukei, ‘Nyi ao thükto Soushou louyenan pakko hapbei, hao kho Soushou Saopobüa baptikubou ki.’ 34Ngei ho hapa, hoba hao kho Mühghaü Shou dogo ngei aukabü küna.”
Jisueibü Shaangbou Eikshuong
35Toukei, nyibounyet Johan haoeibü eik müt nyi yoa loan kikei. 36Jisu paiko kibü to chühan haoei laukei, “Chühashi, Mühghaü Sanshoushou.” 37Haoeibü eik müt nyiei haoei laubü ditkei hoba haosi Jisu phai sembei. 38Jisuei sepeian chühngaikei, hoba ladang haoei haosi sembo hapbei, haoei haosi to laukei, “Kasiei ai lamda?” Haosi ei hao to laukei, “Rabai (tetlabü, Lenbou), no lanei kida?” 39Haoei haosi to laukei, “Kaiya, hoba kasiei haplabü.” Hibü haosi haukei hoba hao kishang hapbei, hoba haosi khünyet hao yoa kikei. Kho chasem angh lei thünga kiteikei. 40Johanei laubü ditan Jisu phai sembü müt nyi yoa cheje Simon Petereibü na Andria kiteikei. 41Haoei tongde haojai Simon hapbei hoba hao to laukei, “Künei Messia (tetlabü, Naangenbou) hapa.” 42Haoei hao Jisu jungto leibakei. Jisuei hao to chühkei hoba laukei, “No Jona shou Simon, no Kefa (laobou Peter dogo sepeikei, tetlabü, ‘Laangnyudak’) dogo nyenlabü.”
Jisuei Filip si Nathaniel Ngabü
43Nyibounyet Jisu Galil to haumang sühkei, hoba haoei Filip hapbei. Jisuei hao to laukei, “Kü phai semshi.” 44Filip kho Andria si Peter habü sang Bethsaida ka kiteikei.
45Filipei Nathaniel hapbei hoba hao to laukei, “Künei Nazaret kabü Josef shou Jisu, ao shanga Mosa Ngühkhüma hoba thuseibü shuongei dokei, kho müt hapa.” 46Nathanielei hao to laukei, “Nazaret ka aiche maibü longlep si?” Filipei hao to laukei, “Louan chühashi.” 47#NC 32.2 Jisuei Nathaniel hao jungto louko hapbei hoba hao shangabü laukei, “Tükdebü Israelbü, aeibou lanbü müt che hato chühashi.” 48Nathaniel ei hao to laukei, “Nyi ngo lai ngekei?” Jisuei jongaikei, “Filipei no angajinei, no bhuklong che phanga kian ngei no hapbei.” 49Nathaniel ei jongaikei, “Lenbou, no Mühghaü Shou; no Israel bü Choba.” 50Jisuei jongaikei, “Ngei no bhuklong phanga hapbei dogo lenbü shanga nyi mailemda lo? Nyi khübü to yaangbou haplabü.” 51Hobaje haoei hao to laukei, “Maimaitham ngei ngühmaia kan pendou to lenda, kanei khuthük ipan haplabü hoba Mühghaü khuthük hangangbü shuong Müteibü Shou thüka angko louyenko haplabü.”
Valið núna:
JOHAN 1: CHANGBSI
Áherslumerki
Deildu
Afrita
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.