Ripimae Agaa 15
15
Gote-me Abram Para Onaa Adapu Maralawa Kenan Su Page Gialualo Agaa Rogasipi.
1Goanu aba pinaloare, adea-podena Gote-na agaa gupa ipisa: Abram, pala naomape. Niri nena ralubi yade, Neme nere oyae waru gialua.
2Gore Abram-me lalo: O Adaa Aa mudu neme niri ake gialiya? Niri naki meda namadu idega, Ninaa oyae rayore Eliesa gode Damaskas aame mealia. 3Gorabu Abram-me lalo: Niri nogo-naki meda nagenede, goa pea pulu nina oyae rayore nina kogono aame rayo mealia. 4Gorabu Adaa Aa-na agaa gupa ipisa: Nena oyae go aame namealia, pare nena madilide nakimi, nena oyae rayo mealia. 5Nipu amanane mea pua goa sa: So yaa-para adasa, mada dipialiri so ubakedonu dipia. Gorabu goa sa: Neme maralalide onaare gorupa ralalimi.
6Abram-me Adaa Aa-na sa agaa kone rulasa. Gorabu, Adaa Aa nipu redepone aa sa.
7Wala Adaa Aa-me nipu-para goa sa: Niri ora Adaa Aa, neme ne Kaldia suna Ur piri mea epawadere, go su ora ne gudiyatalo pawade.
8Gorabu Abram-me lalo: O Adaa Aa mudu, neme go su na yaadelore akepu mada makualuaya?
9Gore Adaa Aa-me nipupara lalo: Ni piri mena gawa meda para meme mena wai-para, sipisipi yadapu meda page rayo mali repo pati mea ipu, yaa puluma lapo page mea ipu.
10Abram-me mo yaenu rayo Gote piri mea ipua, lapolapolo loralapata pua rikirana pora masawa amupisa. Yalapo komea goa napi pa isa. 11Gorabu yaa itayamame nolalo riya ipisimi pare, Abram-me ratu rubebe pisa.
12Nare pabola popesa raburi, Abram nipu u adaa meda patisa. Gorabu nipu adaa riba medame rigitaniasa rabu pala omesa. 13Gorabu Adaa Aa-me nipu para lalo: Neme go piare waru makuape, neme maralalide onaare ada medanini kimisu onaanurupa awalimi, goapua nimuri go alimide su ada onaana slav#15.13 Slav-re kogono yoto nai, pama kogono pae onaa, nimu bi-naiya. Gore nimuna surube onaana rolo para pimi. kogono pae onaa alimi. Go onaana kogonore mali 400 rupara radapi kogono pualimi. 14Goa palimide su adarenuri neme page nimu keda waru katoa, wala orope nimu gima epalimi raburi, nimumi oyae adapu mea epalimi. 15Go yapare nere lo kumana rupara awa omali. 16Nena ruru onaare go su-para abi naepalimi. Akoloya Amor onaame waea pa palaeme. Nimuna waea waru palaina loare pane ratu rubalua. Go rabu nena rururi kaara maala popenaloa nimu wala epalimi.
17Nare paboa riba saraburi, miru yawapalae repenagaa sosopene-para paa meda page pata paa rupa roriaa ipua mena paaki lapona rikirana popesa. 18Goyapinare Gote-me Abram rapu agaa rogasa. Goapua lalo: Nena rururi go su kalalo, go ipa Isip pua mo ipa Yupritis rupara 19abia go suri Keni onaa-para, Kenis onaa-para, Kadmon onaa-para, 20Et onaa-para, Peris onaa-para, Repaa onaa-para, 21Amori onaa-para, Kenan onaa-para, Gigasi onaa-para, Sebus onaa-para, gonu pimi suri ne gialo.
Valið núna:
Ripimae Agaa 15: kew
Áherslumerki
Deildu
Afrita
Want to have your highlights saved across all your devices? Sign up or sign in
© 2004, Wycliffe Bible Translators, Inc. All rights reserved.