Genesis 2
2
1Kaya nahaman an kalangitan asin an daga. 2Kan matapos nin Dios an gabos niyang gibo, nagpahingalo siya sa ikapitong aldaw. 3Kaya benendisyonan niya asin pinabanal an ikapitong aldaw, huli ta sa aldaw na iyan nagpahingalo siya sa gabos niyang gibo nin paglalang. 4Siring kaini an pagkalalang kan kalangitan asin kan daga.
An Tatamnan nin Eden
Kan gibohon nin Kagurangnan#2:4 Kagurangnan: An Hebreyong teksto naggagamit nin Yahweh. An traduksyon na ini naggagamit nin Kagurangnan na darakula an mga letra, bilang pag-arog kan pakagamit kaini sa dakul na mga traduksyon kan Biblia sa Ingles. Dios an kalangitan asin an daga, 5mayo nin ano man na tinanom asin banhi na nagtalubo sa ibabaw nin daga, huli ta dai pa niya pinapauran asin mayo pa nin mag-aataman; 6alagad an tubig hale sa irarom kan daga iyo an nakakadumog sa daga.
7Dangan nagkua nin kabokabo hale sa daga an Kagurangnan Dios; pinorma niyang tawo asin hinangosan sa dungo kan hinangos nin buhay asin an tawo#2:7 TAWO: Sa Hebreyo Adan, na an boot sabihon tawo o katawohan. (Hilingon man sa 3:20.) nagin sarong buhay na linalang.
8Dangan nagbugtak an Kagurangnan Dios nin sarong tatamnan sa Eden sa parteng sirangan, asin duman niya ibinugtak an tawo na saiyang ginibo. 9Pinatalubo niya duman an manlaen-laen na kahoy na magayon paghilingon asin nagtatao nin masiram na bunga. Sa tahaw kan tatamnan idtoon an kahoy na nagtatao nin buhay, saka an kahoy na nagtatao nin pakaaram kan marahay asin kan maraot.#2:9 pakaaram kan marahay asin kan maraot; o pakaaram kan gabos.
10May sarong salog na nagbubulos sa Eden asin nagpapatubig kan tatamnan; pakaluwas sa Eden minasanga ini asin nagigin apat na salog. 11An enot iyo an Pison; minabulos ini sa palibot kan daga nin Havila. 12Digdi makukua an purong bulawan, an mga pambihirang pahamot asin mga batong oniks. 13An ikaduwa iyo an Gihon na minabulos sa palibot kan daga nin Cus#2:13 CUS (nin Mesopotamia); o Sudan. 14An ikatolo iyo an Tigris na minabulos sa sirangan kan Asiria asin an ikaapat iyo an Eufrates.
15Dangan ibinugtak nin Kagurangnan Dios an tawo sa tatamnan nin Eden tanganing pangatamanon asin bantayan ini. 16Tinaraman niya an tawo, “Pwede mong kakanon an bunga kan arin man na kahoy digdi 17alagad dai ka nanggad magkakan kan bunga kan kahoy nin pakaaram kan marahay asin kan maraot;#2:17 pakaaram kan marahay asin kan maraot; o pakaaram kan gabos. sa oras na magkakan ka, magagadan ka.”
18Dangan nagtaram an Kagurangnan Dios, “Bakong marahay na magsolo-solo an tawo. Magibo ako nin sarong maninigong kaibahan niya na makakatabang saiya.” 19Hale sa daga ginibo nin Kagurangnan Dios an gabos na hayop asin gamgam dangan dinara niya an mga ini sa tawo tanganing ngaranan; an inginaran sainda iyo na an pag-apod sainda. 20Kaya nginaranan kan tawo an gabos na gamgam asin hayop alagad dai siya nakakua nin sarong maninigong kaibahan na makakatabang saiya.
21Kaya pinatorog nin Kagurangnan Dios an tawo asin mantang torog pa ini, kuminua siya nin sarong gusok dangan isinara niya an laman. 22Guminibo siya nin sarong babae hale sa gusok asin dinara niya ini sa lalaki. 23Dangan nagsabi an lalaki,
“Ini nanggad an tolang kan sakong tolang asin an laman kan sakong laman.
Aapodon siyang ‘Babae’ huli ta kinua siya hale sa lalaki.”
24Kaya babayaan nin lalaki an saiyang ama saka ina dangan masaro sa saiyang agom na babae, asin sindang duwa magigin saro. 25An lalaki asin babae parehong huba, alagad dai sinda nasopog.
Valið núna:
Genesis 2: MBBBIK92
Áherslumerki
Deildu
Afrita
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.