KU̧U̧NAŊMƆ 6
6
Mɔ nɛ dea ha̧ gasa bɔnɛ mɛ hɔ
1Ŋgimbi nɛ bíí ku̧u̧ naŋ dɔka-a sɛn zaŋnu, nɛ wa ku̧u̧ naŋ kpaa o boko-bem kaɗi,#Job 1.6; 2.1 2o bem ko Sɔ̧ zɔka o boko-bem ko bíí yora zɔŋa nyɛmna, ɓɛɛ wa kai o wan nɛ wa kɔ̧a̧ nɛ kóò. 3GASA WAN tɔ̧a̧: «Ɔmi kɔ‘m beka duk tɛ bíí ɓɔnsɛnɛ na; a̧ tɛ duk kànà nɛ pɛ 120 ɓɛɛ, wen bíí nɛ mɔ nɛ fee fee.» 4O kusa-wi yaa so zu nù ŋgimbi'i. Ŋgimbi nɛ o bem ko Sɔ̧ ndaɗa in o boko-bem ko bíí ko nɛ bem, o wi nɔ‘i yaa so nɛ o ŋgaŋa-wi, in nin-wa hura so mbɛt.#Tɔra-bíí 13.33
5GASA WAN zɔka ɗaŋmɔ ko bíí zu nù dɔk dɔk siti; wese lɛŋ in ŋgimbi lɛŋ see bíí ta kànà nɛ dee ɗaŋmɔ.#Mt 24.37; Lk 17.26; 1 Pi 3.20 6GASA WAN kpaia taamɔ, wen ge sa'i dee bíí e zaŋnu ge nde? See-aa nyima tɛ mɔ‘i, 7ɓɛɛ a̧ tɔ̧: «Mi tɛ kum bíí n'am dea, bíí, o gasa saɗi in o be saɗi gu nɛ o nɔ̧́í̧ yinɛ zu nù. Kà‘m iŋ so gáà, mi de wa na.» 8Mɔ kpɔk, GASA WAN kpaa desee zu Nɔe.
Nɔe
9-10Nɔe duka so nɛ wi-de-mɔ nɛ yuwar-a nɛ yɔ kaya mgbara o bíí ŋgimbi kɔ̧-a̧ na. A̧ baa so nɛ yuwar ko Sɔ̧. O bem ko Nɔe nɛ mɔɔ nɔ'ɔ; a̧ koo nɛ be-wiwii taar: Sɛm, Kam, in Jafɛt.#2 Pi 2.5 11Zaŋnu lɛŋ duna nɛ ɗaŋmɔ in ŋgayamɔ sɛn ti Sɔ̧. 12Sɔ̧ zɔka zaŋnu lɛŋ duna nɛ ɗaŋmɔ, wen bíí lɛŋ ɗaŋa naŋanɔ kɔ‘i zu nù.
13Sɔ̧ tɔ̧ɔ̧ ha̧ Nɔe: «War kɔ‘m, sɔŋkur mɔ ko bíí lɛŋ hɔɔ kaɗi. Nɛ́ wen zu o bíí a̧ ŋgamɔ duna nɛnɛ zu nù, ɓɛɛ mi tɛ ɗaŋ wa in nù lɛŋ yinɛ. 14Mɛ̀ dé gasa kombon kɔ-mɛ nɛ̀ nika-te; mɛ̀ gɔ́n bɛr-aa gɔn, ɓɛɛ mɛ̀ yɔ́k kɔ̧ a̧ in ɗoŋ-aa nɛ mɔɔ-dɔ̧i̧-mɔ. 15Mɛ̀ dé zi̧a̧-a̧ mɛtrɛ 133; pɛsa-a mɛtrɛ 22; kusa-a mɛtrɛ 13. 16Mɛ̀ bá ger-tua kombon'i, ɓɛɛ mɛ̀ é be woi-aa mgbara zu-a in ká̧-a̧ tɛ reeta mɛtrɛ. Mɛ̀ é nú-a nɛ ká̧-a̧; ɓɛɛ mɛ̀ dé bɛr-aa taar zu ŋmaa. 17Kɔ‘m, mi tɛ de ha̧ ndiɓa-kórò mɛ hɔ zu nù, wen kuma mɔ nɛ a̧a̧ sɛn ɗɔɔ yiwese lɛŋ. Mɔ lɛŋ nɛ ɔm ɔm, o mɔɔ nɔ‘i zu nù lɛŋ tɛ kum. 18Mi tɛ nɔ tɔk in mɛɛ; mɛ̀ yé kɔ̧ gasa kombon, mɛ in kóò kɔ-mɛ, o bem kɔ-mɛ in o kóò kɔ-wa. 19Mgbara mɔ lɛŋ nɛ ya kpasa, o mɔ lɛŋ nɛ a̧a̧ nɛ ɔmi, mɛ̀ káí wa yiitoo yiitoo nyɛm nɛ ɗoŋ zuduk-wa si kɔ̧ gasa kombon, ha̧ wa mɛ kpasi in mɛɛ, kóò-a in wíì-a. 20O nɔ̧́í̧ sɛn tɛ zuduk-wa nɛtɛ nɛtɛ, o gasa saɗi in o geɗek-a kpɔk kpɔk nyɛm nɛ ɗoŋ zuduk-wa; o saɗi zu nù lɛŋ nyɛm nɛ ɗoŋ zuduk-wa, wíì-a in kóò-a tɛ ye kombon in mɛɛ mɛ kpasi. 21Ɓɛɛ war kɔ-mɛ, mɛ̀ mɔ́í̧ o nyɔŋmɔ nɛtɛ nɛtɛ lɛŋ a wen nyɔŋa-a kɔ-mɛ in wa.» 22Nɔe dee kànà mɔ lɛŋ nyɛm nɛ ɗoŋ ha̧a̧nú ko Sɔ̧.#Heb 11.7
Valið núna:
KU̧U̧NAŊMƆ 6: GB11
Áherslumerki
Deildu
Afrita
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.