Huan 3
3
Kòmbersashon entre Hesus ku Nikodemo
1Tabatin un fariseo yamá Nikodemo ku tabata lider di pueblo hudiu. 2Un anochi el a bai serka Hesus i bis'É: ‘Rabi, nos sa ku Dios a manda bo pa siña nos. Niun hende no por hasi e señalnan milagroso ku bo ta hasi, si Dios no ta huntu kuné.’ 3Hesus a kontest'é: ‘Mi ta sigurá bo: niun hende no por mira reino di Dios, si e no nase di nobo.’#3:3 di nobo; e palabra griego tradusí 'di nobo' por nifiká tambe: di ariba 4Nikodemo a bis'É: ‘Kon un hende ku ta hende grandi kaba por bolbe nase? Akaso e por drenta skochi di su mama atrobe i bolbe nase?’ 5Hesus a rospond'é: ‘Mi ta sigurá bo: niun hende no por drenta reino di Dios, si e no nase di awa i spiritu. 6Un hende ta nase físikamente di su mayornan humano, ma spiritualmente e ta nase di Spiritu Santu. 7No keda sorprendí pasobra Mi ta bisa bo ku boso mester nase di nobo.#1 Pedro 1:3,23 8Bientu ta supla kaminda e ke; bo por tende su zonido, ma bo no sa di unda e ta bini ni unda e ta bai. Asina ta ku tur hende ku nase di Spiritu.’#Predikador 11:5 9Nikodemo a puntr'É: ‘Kon e kos ei por ta posibel?’ 10Hesus a bis'é: ‘Abo ku ta maestro di Israel no sa e kosnan akí? 11Mi ta sigurá bo: nos ta papia loke nos sa i nos ta testiguá loke nos a mira, ma boso no ta aseptá nos testimonio. 12Si boso no ta kere Mi ora Mi papia tokante kos terenal, ta kon boso lo por kere Mi antó ora Mi papia tokante kos selestial?#Sabiduria 9:16 13Niun hende no a yega di subi bai shelu; ta solamente Yu di hende a baha bini for di shelu.#Barug 3:29 14Manera Moises a hisa e kolebra di bròns riba un staka den desierto,#Numbernan 21:9; Sabiduria 16:6-7 asina tambe mester alsa Yu di hende,#Isaías 52:13; Huan 8:28; 12:32-34; 18:32 15pa tur ku kere den djE, haña e bida eterno ku ta den djE.’ 16Pasobra Dios a stima mundu asina tantu ku El a duna su úniko Yu, pa tur esnan ku kere den djE no bai pèrdí, ma haña bida eterno. 17Dios no a manda su Yu den mundu pa kondená mundu, ma pa salba mundu pa medio di djE.
18Lo no kondená esun ku kere den e Yu; esun ku no kere den djE ta kondená kaba, pasobra e no a kere den e úniko Yu di Dios. 19T'esaki ta e kondena: lus a bini na mundu, ma hende a stima skuridat mas ku nan a stima lus, pasobra nan tabata praktiká maldat. 20Tur hende ku ta praktiká maldat ta odia lus i nan no ta bini serka djE, pa nan aktonan malbado no pone nan kara na bèrgwensa.#Job 24:13-17 21Esun ku ta praktiká bèrdat ta serka di e lus, pa e lus mustra ku e hende akí a aktua di akuerdo ku boluntat di Dios.
Hesus i Huan Boutista
22Despues Hesus i su disipelnan a bai region di Hudea. Aki Hesus a keda i tabata batisá hende. 23Awor Huan tambe tabata batisá hende na Enon, serka di Salim, pasobra ei tabatin hopi awa. E hendenan tabata bini pa risibí boutismo. 24Tur e kosnan akí a sosodé tempu no a benta Huan den prizòn ainda.#Mateo 14:3; Marko 6:17; Lukas 3:19-20 25Disipelnan di Huan a kuminsá diskutí ku un hudiu tokante e baño ritual pa purifikashon. 26Despues nan a aserká Huan i bis'é: ‘Rabi, bo ta kòrda e hòmber ku tabata huntu ku bo na e otro banda di Yordan; esun ku bo a testiguá na su fabor? Wèl, at'é ta batisá hende i tur hende ta bai serka dje!’ 27Huan a kontestá nan: ‘Ningun hende no tin nada ku e no a haña di Dios. 28Boso mes ta testigu kon mi a testiguá i bisa: “No ta ami ta e Mesias,#Huan 1:20 pero a manda mi su dilanti.” 29Brùit ta pertenesé na brùidehòm, ma amigu di e brùidehòm ku ta para pa tende stèm di e brùidehòm, ta bira mashá kontentu ora e tend'é. Esei ta e goso ku ami ta sinti i el a yega na su kulminashon! 30E mester bira mas importante, miéntras ami ta bira ménos importante.’
Esun ku ta bini for di shelu
31Esun ku ta bini djariba ta mas ku tur hende. Esun ku ta biba riba mundu ta pertenesé na mundu i e ta papia di kos ku tin di aber ku e mundu akí. Esun ku ta bini di shelu ta riba tur hende; 32E ta papia di loke El a mira i tende, ma niun hende no ta aseptá su testimonio. 33Esun ku aseptá su testimonio ta konfirmá ku Dios ta papia bèrdat. 34Pasobra esun ku Dios a manda ta papia palabra di Dios; pasobra Dios ta dun'É Spiritu Santu na abundansia.#3:34 pasobra…abundansia: tambe por tradusí ku Hesus ta duna Spiritu Santu na abundansia 35Tata ta stima su Yu i a entregá tur kos den su man.#Mateo 11:27; Lukas 10:22 36Esun ku ta kere den e Yu, tin bida eterno; esun ku desobedesé e Yu, lo no tin bida eterno, pero ta keda sufri kastigu di Dios.
Valið núna:
Huan 3: PBDC13
Áherslumerki
Deildu
Afrita
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013