Genesis 21
21
Ti Pannakayanak ni Isaac
1Kas inkari ni Yahweh, binendisionanna ni Sara. 2Nagsikog#Heb. 11:11. ni Sara ket naganak iti lalaki, uray no lakay unayen ni Abraham nga asawana. Naipasngay ti maladaga iti tiempo nga intuding ti Dios a pannakayanakna. 3Isaac ti impanagan ni Abraham iti anakna. 4Idi#Gen. 17:12; Ara. 7:8. walo nga aldawnan, kinugit ni Abraham, kas imbilin ti Dios kenkuana. 5Agtawen ni Abraham iti sangagasut idi mayanak ni Isaac. 6Kinuna ni Sara, “Inikkannak ti Dios iti panggapuak nga agragsak ken agkatawa.#6 agkatawa; Agkatawa ti kayat a sawen ti nagan nga Isaac iti Hebreo. Makipagkatawanto met amin dagiti makangngeg iti daytoy.” 7Kinunana pay, “Siasino ti makaibaga idi ken ni Abraham nga agpasusonto ni Sara? Ngem naganakak met laeng nupay lakayen ni asawak.”
8Dimmakkel ti ubing. Iti aldaw a pannakapusotna, nangipaay ni Abraham iti dakkel a padaya.
Mapapanaw da Agar ken Ismael
9Iti maysa nga aldaw, madama nga agay-ayam ni Ismael nga anak ni Agar a taga-Egipto ken ni Isaac nga anak ni Sara.#9 ni Isaac nga anak ni Sara kuna ti dadduma a kadaanan a patarus. Awan daytoy a paset iti Hebreo a teksto. 10Nakita#Gal. 4:29-30. ida ni Sara ket kinunana ken Abraham, “Pagtalawem daytoy a tagabu ken ti anakna. Diak kayat nga adda binglay ti anak daytoy a babai kadagiti sanikuam a tawiden ti anakko.” 11Kasta unay ti pannakaburibor ni Abraham gapu iti daytoy agsipud ta anakna met ni Ismael.
12Kinuna#Rom. 9:7; Heb. 11:18. ti Dios ken ni Abraham, “Dimo pagdanagan ti ubing ken ni Agar a tagabum. Aramidem ti ibaga ni Sara agsipud ta ninto Isaac ti pagtaudan dagiti kaputotam nga inkarik. 13Maaddaanto met iti adu nga annak ti putotmo ken ni Agar ket agbalindanto a maysa a nasion, ta anakmo met ni Ismael.”
14Kabigatanna, nasapa a pinarubbuatan ni Abraham dagiti agina. Pinabalonanna ni Agar iti kanen ken inumen a danum a naikarga iti supot a lalat. Impasallabayna ti ubing iti inana. Pimmanaw ni Agar ket nagalla-alla iti let-ang ti Beerseba. 15Idi naibusen ti balonda a danum, pinanawanna ti ubing iti sirok ti maysa a bassit a kayo. 16Nagtugaw iti agarup sangagasut a metro manipud iti nangibatianna iti ubing. Kinunana iti bagina, “Diak maitured a kitaen a matay ti anakko.” Bayat ti panagtugawna, nagsangit ti ubing.#16 nagsangit ti ubing kuna ti maysa a kadaanan a patarus. Iti Hebreo a teksto, nagsangit ni Agar.
17Nangngeg ti Dios ti sangit ti ubing. Manipud langit, kinuna ti anghel ti Dios ken ni Agar, “Ania ti pakariribukam, Agar? Dika agbuteng. Nangngeg ti Dios ti sangit ti ubing. 18Tumakderka, inka ubbaen ti ubing ket ay-aywem. Manipud iti kaputotanna, pataudekto ti maysa a dakkel a nasion.” 19Kalpasanna, impakita ti Dios ken ni Agar ti maysa a bubon. Napan kinargaan ni Agar ti supot a lalat iti danum ket pinainumna ti ubing. 20Inaywanan ti Dios ti ubing. Dimmakkel iti let-ang ti Paran ket nagbalin a nalaing a mangnganup. 21Imbirokan ni inana iti asawaenna a taga-Egipto.
Agtulag da Abraham ken Abimelec
22Iti#Gen. 26:26. dayta a tiempo, napan ni Abimelec agraman ni Ficol a pangulo ti armadana iti yan ni Abraham. Kinunana, “Iti amin nga aramidmo, kanayon nga adda kenka ti bendision ti Dios. 23Dawatek ngarud nga isapatam iti imatangna a dinakto allilawen, dagiti annakko wenno dagiti kaputotak. Napudnoak kenka, isu nga ikarim a napudnoka met kaniak ken iti daytoy a pagilian a pagnaedam.”
24“Isapatak,” kinuna ni Abraham.
25Iti naminsan, napan nagreklamo ni Abraham ken ni Abimelec maipapan iti bubon nga inagaw dagiti adipen ti ari. 26“Diak ammo no siasino ti akin-aramid iti daytoy,” kinuna ni Abimelec. “Dimo imbagbaga kaniak ket ita la a maammoak.” 27Adda nagnumoan dagiti dua ket inikkan ni Abraham ni Abimelec iti sumagmamano a karnero ken baka. 28Nangilasin ni Abraham iti pito nga urbon kadagiti karnerona.
29“Apay nga inlasinmo dagitoy?” sinaludsod ni Abimelec.
30Kinuna ni Abraham, “Agpaay kenka dagitoy urbon ti karnero, kas pammaneknek iti panangbigbigmo a siak ti nangkali iti bubon.”
31Napanaganan dayta a lugar iti Beerseba,#31 BEERSEBA: iti Hebreo, Bubon ti Sapata wenno Bubon ti Pito ti kayat a sawen daytoy a balikas. ta sadiay ti nagsapataanda a dua.
32Kalpasan ti pannakaaramid ti katulagan, nagsubli da Abimelec ken Ficol idiay Filistia. 33Nangimula ni Abraham iti kayo idiay Beerseba, ket nagdaydayaw ken ni Yahweh, ti agnanayon a Dios. 34Nabayag a nagnaed ni Abraham iti daga dagiti Filisteo.
Valið núna:
Genesis 21: RIPV
Áherslumerki
Deildu
Afrita
Want to have your highlights saved across all your devices? Sign up or sign in
© 1996 Philippine Bible Society