Genesis 16
16
Ni Agar ken ni Ismael
1Saan nga aganak ni Sarai nga asawa ni Abram. Ngem adda tagabuna a babai a taga-Egipto nga agnagan iti Agar. 2Isu a kinunana ken ni Abram, “Yantangay ta dinak pinaraburan ti Apo iti anak, apay a dimo kaiddaen ti tagabuk bareng no aganak iti agpaay kaniak?” Immanamong ni Abram, 3ket naited ni Agar kenkuana a kas asawa nga agserbi kenkuana. (Sangapulo a tawen idin ni Abram iti daga ti Canaan.) 4Kinaidda ni Abram ni Agar ket nagsikog. Idi madlaw ni Agar a masikogen, timmangsit ket inumsina pay ni Sarai.
5Kinuna ni Sarai ken ni Abram, “Sika ti nakaigapuan ti pananglais kaniak ni Agar.#5 Sika ti…Agar; wenno Agsagabaka koma gapu iti saan a naimbag a naaramid kaniak. Siak a mismo ti nangted kenka ngem um-umsiennakon manipud ammona a masikogen. Ikeddeng koma ti Apo no siasino kadata ti mapabasol.”
6Kinuna ni Abram, “Tagabum daytoy a babai. Aramidem kenkuana ti aniaman a kayatmo.” Naranggas ni Sarai ken ni Agar agingga a nagtalaw ti tagabu.
7Iti asideg ti maysa nga ubbog iti let-ang, iti dalan nga agturong idiay Sur, adda anghel ni Yahweh a nangsabat kenkuana. 8Kinunana, “Agar, tagabu ni Sarai, sadino ti naggapuam ken sadino ti papanam?”
“Tinalawak ti apok,” insungbat ni Agar.
9Kinuna ti anghel ni Yahweh, “Agsublika ket agserbika kenkuana.” 10Ket innayonna, “Ikkankanto iti adu nga annak ken appoko ket dinto mabilang ti kaaduda. 11Aganakkanto iti lalaki ket panaganamto iti Ismael#11 ISMAEL: Dumngeg ti Dios ti kayatna a sawen iti Hebreo. agsipud ta impangag ti Apo ti asugmo. 12Ngem agbiagto ti anakmo a kas atap nga asno. Kabusornanto ti tunggal maysa ket agbalinto met a kabusor ti amin. Saanto nga agnaed iti sidong dagiti kabagianna.”
13Kinuna ni Agar iti bagina, “Pudno kadi a nakitak ti Dios ket sibibiagak pay laeng kalpasan ti pannakakitak kenkuana?” Ngarud, pinanagananna ni Yahweh a nakisarita kenkuana iti “Ti Dios a Makakita.” 14Daytoy ti gapuna a maaw-awagan ti bubon nga adda iti nagbaetan ti Kades ken Bered iti Beer-lahai-roi.#14 BEER-LAHAI-ROI: kayatna a sawen, “Ti Bubon ti Sibibiag a Makakita Kaniak.”
15Lalaki#Gal. 4:22. ti impasngay ni Agar ket pinanaganan ni Abram iti Ismael. 16Walopulo ket innem ti tawen idin ni Abram.
Valið núna:
Genesis 16: RIPV
Áherslumerki
Deildu
Afrita
Want to have your highlights saved across all your devices? Sign up or sign in
© 1996 Philippine Bible Society