Mateo 11
11
Ri Juan Aj Ya'l Bautismo keb'utaq lo rutijo'n ruk' ri Jesús
(Lc. 7:18-23)
1Echiri' ri Jesús xuk'is kipixab'axik ri kab'lajuj utijo'n, xel b'i chiri' re kak'utunik y re kutzijoj Ruch'a'tem ri Dios chupa taq ri kitinamit rutijo'n.
2Ri Juan k'o pa cárcel echiri' xuta ri ku'an ri Cristo. Xeb'utaq k'u lo ka'ib' chike rutijo'n ruk' Rire, 3cha' ke'kitz'onoj che:
—¿E rilal Rucha'o'n lo ri Dios, ri Jun b'i'tal chik kak'unik, o kaqoy'ej chi junoq chik? —xecha'.
4Ri Jesús xuk'ul uwach:
—Jix y chitzijoj che ri Juan ronoje wa kixtajin che utayik y che rilik. 5Ma ri e potz' ketzu'nik, ri e sik keb'inik, ri k'o yab'il lepra chike kekunutajik, ri e t'o'k ketanik, ri ekaminaq kek'astajik y chike ri nib'a'ib' katzijox ri Utzilaj Tzij.#11:5 Pa Is. 61:1 kub'i'ij: Rucha'o'n lo ri Dios e kutzijoj ri Utzilaj Tzij chike ri nib'a'ib'. 6Nim uq'ij ralaxik k'u ri' ri na kasach ta ri kub'ulib'al uk'u'x wuk' —xcha'.
Ri Jesús kach'a't puwi ri Juan Aj Ya'l Bautismo
(Mr. 7:24-35)
7Ek'uchiri' xeb'ek rike, ri Jesús xujeq kach'a't puwi ri Juan chike ri winaq, jewa' xub'i'ij:
«¿Sa' ri xe'ila alaq pa ri luwar katz'intz'otik? ¿Xe'ila neb'a alaq jun achi na jinta ukowil xa pacha' tani kajabajo'x ruma ri tew? 8¿Sa' ri xe'ila alaq? ¿Xe'ila neb'a alaq jun achi uwiqom rib' ruk' chomilaj k'ul? Na e ta ri', ma eta'am alaq ri lik kewiqiqik, ri' pa kocho e aj wach ejeqel wi. 9Kantz'onoj k'u ri': ¿Sa' ri xe'ila alaq? ¿Xe'ila alaq jun q'alajisanel? Are', yey paqatzij wi kamb'i'ij che alaq: Rire e más k'o uwach chikiwa ri jujun chik q'alajisanelab'. 10Ma jewa' kub'i'ij Ruch'a'tem ri Dios puwi ri Juan:
Ri'in kannab'esaj b'i ri waj chak chawach Ri'at
cha' kuyijb'a' ri b'e chwach pan rawoponib'al Mal. 3:1
kacha'.
11»Paqatzij wi kamb'i'ij che alaq: Na jinta junoq chike ri tikawex eb'alaxinaq wara che ruwachulew más k'o uwach chwa ri Juan Aj Ya'l Bautismo. Pero chwi k'u ri' wa' wa ke'ek, china ri kok chupa rutaqanik ri Dios petinaq chila' chikaj, tob' na jinta uwach, más nim uq'ij ralaxik chwa ri Juan.#11:11 Ri Juan Aj Ya'l Bautismo na xril ta chub'i rukamik y ruk'astajib'al ri Jesús, yey na xril tane ruqajib'al lo ri Ruxlab'ixel ri Dios, ma xkamik echiri' k'amaja' kik'ow taq wa'. E uwari'che ri xkikoj rub'i' ri Cristo chwi lo rukamik ri Juan más k'o xq'alajisax chikiwach rike chwa ri Juan. Lc. 10:23-24; Heb. 11:39-40
12»Ruk' ri Juan Aj Ya'l Bautismo xjeq lo utzijoxik ri Utzilaj Tzij puwi rutaqanik ri Dios petinaq chila' chikaj, y wa' k'a katajin utzijoxik waq'ij ora, tob' e k'o ri kakitij uq'ij kakiq'atej wa'. Na ruk' ta k'u ri', e ri lik kakitij uq'ij kakitzukuj wa taqanik, kaya'taj chike keb'ok chupa. 13Ma lik chwach pana echiri' xujeq katzijon ri Juan, ri q'alajisanelab' y ri Moisés kitz'ib'am chi lo chupa ri Tzij Pixab' chwi ruk'unib'al rutaqanik ri Dios. 14We kiwaj k'u ri'ix kikojo, ri Juan e ri Elías, ri jun b'i'tal chik kak'unik. 15China k'u ri k'o utanib'al che utayik, ¡chuta k'u ri'!
16»¿China k'u ruk' kanjunimaj wi kiwach wa winaq re waq'ij ora? E kanjunimaj kuk' ri k'o'mab' keb'e'tz'ula pa k'ayib'al y lik kesik'in chikiwach, 17kakib'i'ij:
Echiri' ri'oj xqach'awisaj su' chiwe,
ri'ix na xiwaj taj kix-xajawik;
yey echiri' xqatunaj b'ix b'isob'al uwach chiwe,
na xiwaj taj kixjuyuyik
kecha'.
18»Jek'ula' kaki'an taq ri winaq, ma echiri' xk'un ri Juan Aj Ya'l Bautismo, rire lik ku'an ayuno y na kutij tane vino. Yey ri winaq kakib'i'ij: “Wa' wa'chi k'o puq'ab' jun itzel uxlab'ixel” kecha'.
19»Xk'un k'u lo Ralaxel Chikixo'l Tikawex. Rire kutij ronoje ri kaya' chwach, yey taq ri winaq kakib'i'ij: “Wa' wa jun achi lik japjatel y q'ab'a'rel, kachb'i'il raj tz'onol puaq re tojonik#11:19 “Raj tz'onol puaq re tojonik”: Kil “cobrador de impuestos” pa vocabulario. y raj makib'” kecha'. No'j kaq'alajin na k'ut china taq ri lik k'o runa'oj ri Dios kuk' ruma ri ki'anom» xcha ri Jesús.
Ri k'axk'ob'ik kape pakiwi ri tinamit na kakitzelej ta kitzij
(Lc. 10:13-15)
20Ek'uchiri', ri Jesús lik xeb'uyaj ri winaq re taq ri tinamit pa u'anom wi uk'iyal milagros, ma rike na xkitzelej ta kitzij chwach ri Dios. Jek'uwa' xub'i'ij:
21«¡Lik toq'o' iwach ri ix aj Corazín! ¡Lik toq'o' iwach ri ix aj Betsaida! Ma we ta chupa ri tinamit Tiro y ri tinamit Sidón#11:21 Lik eta'matalik ri ejeqel pa wa keb' tinamit Tiro y Sidón, lik e aj tioxab' y lik e aj makib'. Is. 23:1-18 xilitaj wi wa k'utub'al re ruchuq'ab' ri Dios xin'an chiwach ri'ix, k'o tan q'ij ta lo ri' xkitzelej kitzij chwach ri Dios, kikojom chi k'u kiq'u' k'ax rij y kitz'uyub'am kib' pa chaaj ruma ri kib'is. 22E uwari'che kamb'i'ij chiwe: Echiri' kopon ri q'ij re ri q'atb'al tzij, más nim ri k'axk'ob'ik kape piwi ri'ix chwa ri k'axk'ob'ik kape pakiwi ri winaq re ri tinamit Tiro y ri tinamit Sidón.#11:22 Ri tikawex kitom ri Utzilaj Tzij y na kakikoj taj, más k'ax ri kape pakiwi' chikiwa ri tikawex na jinta k'o kitom puwi'.
23»Yey ri ix aj Capernaúm, e chiwach ri'ix lik yakom chi iq'ij k'a chikaj; yey na e ta ri', ma lik kak'aq ne b'i iq'ij y kixk'aq ne b'i k'a chi xib'alb'a' re tijb'al k'ax. Ma we ta pa ri tinamit Sodoma xilitaj wi wa milagros xin'an chiwach ri'ix ix aj Capernaúm, ri' la' la tinamit k'a k'o tane wo'ora.#Gn. 19:24-28 24Ek'u kamb'i'ij wa' chiwe: Pa ri q'ij re ri q'atb'al tzij, lik nim ri k'axk'ob'ik kape piwi ri'ix chwa ri xpe pakiwi ri winaq re ri tinamit Sodoma» xcha'.
Ri Jesús kuyak uq'ij Ruqaw
(Lc. 10:21-22)
25Ek'u la' la joq'otaj ri Jesús xu'an orar chwach Ruqaw, jewa' xub'i'ij:
«Nuqaw, kanyak q'ij la, Lal Rajaw ruwa kaj y ruwachulew, ma ri q'alajisam la chike ri lik kaki'an ch'uti'n che kib', wa' ewam la chikiwach ri lik k'o kina'oj y lik k'o kimajom. 26Jela' x'an la, Nuqaw, ma e x'aj la ri'» xcha'.
27Tek'uchiri', xub'i'ij chike ri tikawex:
«Ronoje taq ri k'olik ya'tal lo panuq'ab' ruma ri Nuqaw. Na jinta k'u junoq lik umajom usuk' chi utz sa' ruwach Ruk'ajol ri Dios, xew ri Qaqaw Dios eta'mayom re. Y na jinta ne junoq umajom usuk' chi utz sa' ruwach ri Qaqaw Dios, xew Ruk'ajol ri Dios eta'mayom re; yey puq'ab' k'u ri' Ruk'ajol k'o wi china chike karaj kuq'alajisaj wi wa'.
Ri uxlanem kuya ri Jesús
28»Chixpeta wuk', iwonoje ri ix kosinaq y k'o iweqa'n, ma ri'in kanya uxlanem chiwe. 29Chiya'a iwib' chuxe' ri nuyuku kankoj ri'in chiwe. Chimaja k'u iwe'ix chwij, ma ri'in utz nuk'u'x y na kan'an ta nim che wib' chiwach. We ki'an k'u ri' wa', kiriq na ri utzil chomal piwanima'. 30Ma ri nuyuku ri'in, na k'ayew ta ruk'axik b'i y ri eqa'n kanya b'i chiwe na al taj» xcha'.
Valið núna:
Mateo 11: acrN
Áherslumerki
Deildu
Afrita
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.