Génesis 19
19
Cub t-xitun Dios tnam Sodoma ex Gomorra
1Ch'ixtok toc yupj tej cypon ke cab anjel tuj Sodoma. K'ukltok Lot ttzi tlamel tnam. Tejtzun cyxi tque'yin, jaw we' c'molte cye, cub ẍmeje', pon tacl tibaj twitz max twitz tx'otx', 2ex xi tma'n cye cyja':
—Chin cubsale cywitze, Tat, cyxi'ye tuj njaye, akine cymajene, ex cycyaj tene tuj ak'bil lu. Atzun ba'n tel cytx'jo'ne cykane, ex nchi'jxi te prim ba'n ttzyetl cybeye, chi Lot cye.
Atzun cye anjel cyma:
—Mi'n. Ax c'elex ak'bil keye tuj cay, che chi anjel.
3Atzunte Lot cubsanxix cywitz, ex cubtzun tuj cywitz tu'n cyxi' max tja. Tejtzun cypon tja Lot, oc ten Lot binchalte cywa, tbincha pan minti' t-samel tuj, ex e wa'n.
4Na'nxtok cycub tan, baj cytxolban cyib cycyakil ke xinak aj Sodoma ti'jele tja Lot, tza'nx ke cu'xun ax icx ke tij xjal, 5ex e oc ten sch'il ti'j Lot in cyma'ntok cyja':
—¿Jatum ate' ke xinak ẍe ul tjaya te konic'an ja'lo? K'i'metza ke. Kajbile tu'n kcub tane cyuc'il, che chi ke xinak aj Sodoma.
6Etztzun Lot yolil cyuc'il, cyaj tlamo'n ja, 7ex xi tma'n cye:
—Akeye wamiw, chin cubsale cywitze, mi'n cybinchaye mya ba'n lu. 8At cabe nme'jele na'nx cylonte xinak; che eletz wi'ne tu'ntzun cybinchanteye alcye cyajbile cyi'j. O'cx mi'n cybinchaye mya ba'n cyi'j ke xinak lu. Atzun til ma che ul wuc'ile tuj njaye, chi Lot.
9Tzajtzun cytzak'we'n xjal:
—Lak'ebila. Aya jun stranjer xjal ma tzula najal tzalu ex ja'lo tajbila tu'n tcawina kibaje. Oc kbinchaye mas mya ba'n ti'ja cywitz ke cabe xjal ate'cx tuj tjaya, che chi.
E pon tilj ti'j Lot ex e pon lak'e' tu'n tocx cypa'n tlamel ja. 10Etztzun cynukpi'n cyk'ab ke xinak ate'cxtok tuj tja Lot, ocx cyi'n tuj ja ex jurat naj etz cylamo'n tlamel ja. 11Atzun ke xjal ate'tok ttzi ja, bi'x cub moẍix cywitz cyu'n ke xinak, tza'nx ke cu'xun ax icx ke tij xjal, ex e tacpaje'; cyja'tzun tten, minti'tl cnet ttzi ja cyu'n. 12Tzajtzun cyma'n ke xinak te Lot cyja':
—¿Atpe mastl xjal tuc'ila tzalu? Ke tji'ya, ke tcy'ajala, ke tme'jela, ex tcyakilju at teya tuj tnam lu, k'i'mexa ke tzalu, 13porque cbel kxitune tnam lu. O japun tuc'il Kman nimxix tkanil cyil xjal tuj. Tu'ntzun jlu ma ko tzaj sama'ne xitul te.
14Etztzun Lot k'malte cye tji', akeju otok bant ti'j tu'n cymoje' cyuc'il tme'jel, ex xi tma'n cye cyja':
—Chuxkeye ex cyexe tzalu, porque cbel t-xitun Kman aju tnam lu, chi Lot.
Atzun cye tji' oc cyk'o'n ka nok in la'jintok Lot.
15Tej tcub k'ij, xi cyma'n anjel te Lot cyja':
—Chuxa, we'ctza, k'i'mexa t-xu'jila tzalu cyuc'ix ke cabe tme'jela, ka mi'n taja tu'n tnaja oc tcub tcastiw tnam lu ku'ne. 16Minti'x bant naj tten Lot. Tu'ntzun jlu, lach'o'n etz cyu'n ke xinak, tuc'ix t-xu'jil ex ke cabe tme'jel, tu'nju tzaj k'ak'an tc'u'j Kman ti'j. E je'tz k'i'n tu'n cyetz ti'jxi tnam tu'ntzun cyclet. 17Tejtzun cyetz ti'jxi tnam, tzajtzun tma'n jun cyxol keju cabe xinak cyja':
—Tel oka tu'ntzun tcleta. Mi'n tz'ajtz tque'yina ti'jtza ex mi'n cub we'ya tuj tcyakil chk'ajlaj lu. Txi'ya cywi witz tu'ntzun mi'n tnaja, chi xinak.
18Xitzun tma'n Lot cye cyja':
—Mi'n. Chin cubsale cywitze tat. 19Ma cybinchaye nim xtalbil weye tu'nju ma chin colpete cyu'ne. Mlay chinxe cywi witz, tu'nju mya yajcu jacu nc'ulba'ye jun ti'xti mya ba'n tuj be, ex axlo jacu chin cyime. 20Cyque'yinxe tal tnam nikayin ta' ma chixin. Jacu chinx oke tuj. Cyk'o'ntze ambil weye tu'n nxi'ye, tu'ntzun nclete tuj. ¿Myapelo ax toc ch'in tal tnam lu? Chi Lot.
21Tzajtzun ttzak'we'n xinak te cyja':
—Ax icx ba'n ma tz'e'la tuj nwitze aju tcubsbila ti'j jlu, ex mi'n cub nxitune aju tnam ma tmaya, 22pero jurat-x naj txi'ya clol tiba ma chixin. Minti' cbantel wu'ne acux na'nxtok tpona ma chixin, chi xinak.
23Otok jawil k'ij tej tpon Lot tuj Zoar. 24Atzunte Kman tzaj tchitun k'ak' ex azufre cyibaj tnam Sodoma ex Gomorra. Tzaj jlu twitz cya'j tuc'il Kman. 25E cub t-xitun, tuc'ix tcyakil chk'ajlaj, cyuc'ix cycyakil keju najl cyuj tnam, tuc'ix tcyakilju in ch'iytok twitz tx'otx'. 26Atzunte t-xu'jil Lot lepcho'ctok ti'j, ajtz tque'yin ti'jtzi. Axtzun cyaj we', ex baj noj ti'j tu'n atz'an.
27Tuj juntl k'ij te prim, xi' Abraham jatum cub ten yolil tuc'il Kman. 28Xi tque'yin tumlal Sodoma ex Gomorra, ex tuj tcyakil chk'ajlaj o til in jawtok sib, mer ic tza'n sib in jaw tuj jun jorni. 29Cyja'tzun, tej tcub t-xitun Dios ke tnam tuj chk'ajlaj, ul Abraham tuj t-ximbetz, ex etz ti'n Lot tuj xitbil cye tnam jatum otok najan.
Tej cytzaj xe't ke aj Moab ex ke aj Amón
30Jax Lot najal tuj tiwitz tx'otx', ex e jax ti'n ke cabe tme'jel tuc'il, porque tzaj t-xobil ti'j tu'n tcyaj ten tuj Zoar. Atzun najan cyuc'il ke cabe tme'jel tuj jun toy' pic. 31Xitzun tma'n tzicbaj te tz'inbaj cyja': Ma tijin kman, ex tuj tcyakil tx'otx' lu mi a'l jun xinak tu'n tmoje' kuc'il, ic tza'n in bant cyu'n xjal. 32Tu'ntzun jlu, kk'o'nc vin te kman tu'n tchyo'n twi', ex e kcub tan tuc'il tu'ntzun ttzaj tc'wa'l ki'j, chi tzicbaj. 33Axtzun konic'an oc cyk'o'n vin te cyman, ex cub tan tzicbaj ttxlaj tman. Atzunte mambaj misicyer o tna' tej tcub tan tme'jel ttxlaj, mi tej tjaw we'.
34Te juntl k'ij xi tma'n tzicbaj te tz'inbaj cyja': Konic'an may' ma chin cub tane tuc'il tat. Ax icx kk'o'nc vin te tuj konic'an ja'lo, jacutzun cub tan teya tuc'il tu'ntzun ttzaj tc'wa'l ki'j, chi tzicbaj. 35Axtzun konic'an oc cyk'o'n vin te cyman, ex cub tan tz'inbaj ttxlaj tman. Atzunte Lot misicyer o tna' tej tcub tan tme'jel ttxlaj, mi tej tjaw we'. 36Cyja'tzun tten oc ten cyal ke cabe tme'jel Lot tu'nx Lot. 37Ultzun itz'j tal tzicbaj, Moab tbi oc, aju cyxe'chel ke aj Moab, akeju ate'x ja'lo. 38Ax icx te tz'inbaj ul itz'j tal, Ben-ammí tbi oc, aju cyxe'chel ke aj Amón, akeju ate'x ja'lo.
Valið núna:
Génesis 19: MAMH
Áherslumerki
Deildu
Afrita
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993