Génesis 18
18
Tzaj ttziyan Dios jun tcy'ajal Abraham
1Cub tyec'un tib Kman twitz Abraham cyjak' tze' c'ol tuj ttx'otx' Mamre. K'ukltok Abraham ttzi tja xbalun ja, tej nimtok cyak, tbajlen chilcuk'ij. 2Xitzun tque'yin Abraham ex o til ox xinak wa'l cycub twitz. Tejtzun tque'yinte Abraham ke xinak lu, jurat naj jaw we' c'molte cye, cub ẍmeje', pon tacl tibaj twitz max twitz tx'otx', 3ex tma cyja':
—Tat, ka ma cnet xtalbil wu'ne tuj twitza, chin cubsale twitza, mi'n tz'aj naja tuj njaye, akine tmajena. 4E ttzaj k'it ch'in a' tu'n tel tx'jet cyi'j cykane, ex che ojlane tjak' t-xlecumal tze' lu. 5Ctzajel wi'ne ch'in cywaye tu'ntzun toctl cyipune, ex tbajlenxi cywaye, jacutzun tzyettl cybeye. Atzun til ma che ule wuc'ile, akine cymajene, chi Abraham.
Tzaj cytzak'we'n ke xinak:
—Binchama ic tza'n ma tmaya, che chi.
6Ocxtzun naj Abraham tuj tja ex xi tma'n te Sara:
—Jurat-x k'intza ox malbil arin aju tbanil, xyok'in baja, ex binchama junjun pan, chi Abraham.
7Jurat naj xi ojkelan Abraham jatum ate'tok twacẍ, etz tjyo'n aju tal wacẍ mas tbanil ex xi tk'o'n te jun tmajen. Atzunte jlu, jurat naj baj tbincha'n. 8Ax icx tzaj ti'n Abraham cyes ex lech tuc'ix chibj otok tzk'aj, ex cub tk'o'n cywitz. Ax o cub we' cytxlaj tej in che wa'ntok tjak' tze'.
9Tzajtzun cykanin te cyja':
—¿Jatum ta' Sara aju t-xu'jila? Atzun te xi ttzak'we'n cye:
—Max ta' tuj ja.
10Tmatzun jun cyxol ke ox xinak cyja':
—Tuj juntl abk'i chin ultle tuc'ila, ex tzul itz'j jun tal Sara aju t-xu'jila, chi xinak.
Atzunte Sara in bintok ti'j yol, tajsa'ntok ti'jxi Abraham ttzi ja. 11Otok che tijin Abraham tuc'ix Sara ex otok we' ttxjon Sara ic tza'nx in baj cyi'j xu'j teyle junjun xjaw. 12Tu'ntzun jlu xi ttze'n Sara tuj tanmi ex cub t-ximan cyja': ¿Axpelo toc tzul itz'j jun wale, porque ma chin tijine ax icx te nchmile ma tijin? 13Tmatzun Kman te Abraham:
—¿Tiku'n ma jaw tze'n Sara ex ma tma cyja': Axpelo toc tzul itz'j jun wale ex ma chin tijine? Chi. 14¿Atpelo jun ti'xti cyuw mlay bant wu'ne? Tuj tk'ijlalil banimaj ti'j chin ultle tuc'ila ex tzul itz'j jun tal Sara, chi Kman.
15Tzaj t-xobil Sara ex cub tewan.
—Minti'we ma chin jaw tze'n, chi Sara.
Tzajtzun ttzak'we'n Kman te cyja':
—Mi'n. Ba'n wu'ne ma jaw tze'na, chi Kman.
In cubsan Abraham twitz Dios ti'j tnam Sodoma
16E jawtzun we' ke xinak, tzyet cybe ex xi cyque'yin tumlal tnam Sodoma. Xi bet ch'in Abraham cyuc'il tu'n cybaj cyk'olben cyib. 17Tmatzun Kman: ¿Cbelpelo wewane twitz Abraham aju cbantel wu'ne? 18Ax toc c'oquel Abraham te jun nintz nasyon ex nim tipun, ex ti'j che bel ncy'iwla'ne cycyakil xjal twitz tx'otx'. 19O jaw nsc'o'ne tu'n t-xi tma'n cye tc'wa'l ex cye tiyjil tu'n tcub cybi'n ke nxnak'tzbile, ex tu'n cybinchante aju ba'n ex tz'aklxix, tu'ntzun tjapun wu'ne tcyakilju o txi ntziyane te, chi Kman. 20Tzajtzun tma'n Kman te cyja':
—Ma nbiye tkanil ti'j tcyakil mya ba'n in cybincha'n ke aj Sodoma ex ke aj Gomorra, ex cyja' tch'iy nimxix cyil. 21Tu'ntzun jlu chin belexe que'yilte ja'lo, ex oc wila'ye ka ax toc o chmet mya ba'n ic tza'n o nbiye, ex ka mi'n. Atzun c'elel nnic'e ti'j, chi Kman.
22Cubtzun be cyu'n ke cabe xinak tu'n cypon tuj Sodoma, atzunte Abraham ax cyaj we' twitz Kman. 23Xi lak'e' ch'intl Abraham ttxlaj ex xi tma'n te cyja':
—¿Che najelpe ke xjal tz'aklxix tu'na junx cyuc'il ke binchal mya ba'n? 24¿Yajtzun ka ma cnet 50 xjal tz'aklxix tuj tnam? ¿Cnajelpe tnam tu'na? ¿Mlaype cub tnajsa'na til tu'n tc'ujlalila cyi'j 50? 25Mya tuj tumel tu'n cycub tbyo'na ke xjal tz'aklxix junx cyuc'il ke binchal mya ba'n, ex tu'n tbinchanteya cyi'j ke tz'aklxix ic tza'nx cyi'j binchal mya ba'n. Mi'n tbinchaya icju. Aya jwes cyibaj cycyakil xjal twitz tx'otx', ¿mlaype tbinchaya aju tz'aklxix? Chi Abraham.
26Tzajtzun ttzak'we'n Kman te cyja':
—Ka ma cnet 50 xjal tz'aklxix wu'ne tuj Sodoma, cbel nnajsa'ne cyil cycyakil keju najl ma chixin tu'n nc'ujlalile cyi'j 50.
27Xitzun tma'n Abraham juntl maj:
—Nman, najsama tu'nju nno'cx nk'on wibe tu'n nyoline tuc'ila icju, masque weye tkukil tx'otx' kine. 28Balo atx jwe'tl tu'n ttz'aket 50 xjal tz'aklxix. ¿Cbelpe t-xituna tcyakil tnam tu'nju jwe'tl minti' ma tz'aket?
Tzajtzun ttzak'we'ntl Kman:
—Mlay cub nxitune tnam ka ma cnet 45 xjal tz'aklxix wu'ne.
29Xitzun tma'n Abraham juntl maj:
—¿Yajtzun ka ma cnet nok 40 xjal tz'aklxix ma chixin?
Tzajtzun ttzak'we'ntl Kman:
—Mlay cub nxitune, tu'n nc'ujlalile cyi'j 40.
30Xitzun tma'n Abraham juntl maj:
—Nman, chin cubsale twitza, mi'n jaw k'ojla wi'je ka cucx in chin yoline. ¿Yajtzun ka ma cnet nok 30 xjal tz'aklxix ma chixin?
Tzajtzun ttzak'we'ntl Kman:
—Mlay cub nxitune ka ma cnet 30 xjal tz'aklxix wu'ne.
31Xitzun tma'n Abraham juntl maj:
—Nman, najsama tu'nju nno'cx nk'on wibe tu'n nyoline tuc'ila icju. ¿Yajtzun ka ma cnet nok winkin xjal tz'aklxix ma chixin?
Tzajtzun ttzak'we'ntl Kman:
—Mlay cub nxitune, tu'n nc'ujlalile cyi'j winkin.
32Xitzun tma'n Abraham juntl maj:
—Nman, chin cubsale twitza, mi'n jaw k'ojla wi'je ka ma chin yoline o'cx juntl maj. ¿Yajtzun ka ma cnet nok laj xjal tz'aklxix ma chixin?
Tzajtzun ttzak'we'ntl Kman:
—Mlay cub nxitune, tu'n nc'ujlalile cyi'j laj.
33Ic'tzun Kman tuj lugar tej tbaj yolin tuc'il Abraham; atzunte Abraham aj meltz'aj tuj tja.
Valið núna:
Génesis 18: MAMH
Áherslumerki
Deildu
Afrita
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993