Masmur 20
20
Sambaya Amisye anajo indamu Po anasineko raunande akari titi ai
1Masmur Daud po ratoe. Nto irati akari po anugano matayao ukiny maugavo ransyerane rai ai.
2Reama akari titi winy, koveamo AMISY Po winaraniv muno Po napaya irati anakotaro mo nansosobe rai,
reamare Amisy Opirati darino aneno Yakop aora be yambe naora!
3Reamare Amisy no no Apa Yavaro ndandinit, aneme rareande Po nasopan,
muno nai Sion, Opamo de, Po vambunine raugaje winai.
4Reamare nya anakotaro ndameseo Ai mamo aemeno rai,
muno maero ndameseo Ai mamo mo aveti ananibe rai.
5Reamare nya anakotaro mbekedai mamo Po raveti mamaisy,
muno anakotaro nyo ratantona tavone mamo Po raveti ama ine no rai.
6Indati reansananibe reanggwain weye reama akari titi winyo anasineko wama marova mai.
Muno reamo nyovara wao njayaibe rangki, omamo mbe rarorombe Amisy Apa vambunine raijaseo titive.
Reamare AMISY Po nya ana ndanajo ravera mamaisy.
7Soamo umba syo raen tugae: AMISY Po anasineko raunande akarijo titi Po atayao terave#20:7 No koano Israel raijamo vatano wo apatimu indamu be akari titive opamo manino saitun rauvaro akari rai. ai to.
Nai munijo Manunggara ndandinit AMISY Po raude ti mamaisyo ai,
AMISY anem ngkov mbambunine mirati mo anasineko raunande akari titi ai.
8Vatane inta nawamo manaveano awa kereta marova obo ramen,
inta manaveano awa kuda obo mansamen no marova rai.
Yara wamamo wansanaveano AMISY, Opirati wama Amisy,
Apa vambunine obo ramen.
9Vatano manaveano kereta muno kuda obo mansamene nawamo utataopon,
yara wamamo wansayae tindimuve muno wamo anasineko.
10AMISY, reamare Nyo anasineko raude irati reama akari titi ai!
Arono reamo winanonae, reamare Nyo reama ana ndanajo ravera mamaisy!
Valið núna:
Masmur 20: yva
Áherslumerki
Deildu
Afrita
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)