Masmur 19
19
AMISY Apa kovo ntiti raeno anakotaro danari rai muno raeno Apa ananyao rai
1Masmur Daud po ratoe. Nto irati akari po anugano matayao ukiny maugavo ransyerane rai ai.
2Naume muno ama anakotaro no no ama uga rai mo Amisye Apa kovo ntiti raroron,
muno mandepe mo Apa anakero daijaro aneme rai raura.
3Masyote mo Apa kovo ntiti ravovo tutiro masyoto miridi nto rai,
muno namane mo rariri tutiro namano miridi nto rai.
4Naume ma mayaode intai jewen, mayao jewen bayave,
ama ranamote mamo vatane wandanaune ramu.
5Weramu ama kine manonon nto no munije rai tenambe,
ama ana mo raura mamo muija nto no munije ama mamaran rai vintabo.#19:4-5 Aneme so ama ntunato raije mare naume mayao ramu, weramu mo Amisye Apa kovo ntiti raroron kakavimbe.
Nai naumo warae Amisye Po uma apa randume ratayao to.
6Uma umaso tipu seo kai rave, maisyare anya kamuram puje no apa tanoano vauname rai kai rave.
Uma umaso puje, maisyare anaanivo bambunin pansanan irati apa unanuijo ratayao aije raito anayanambe rautan.
7Nai ranijo wanamuram uma tipu seo rai,
pansanana to pasyo no varet,
apa varo mamoane meweno vatane inta maije ramu.
8AMISY Apa anaparatot wemi mamai dave,
mo vambunine raugav akare vatane awa jugara mai jakato.
Ananyao AMISY wemi ntindimu ti anave rai,
mo ana ratantona ntiti raudeo vatano unanta rai jewene mai.
9Anaparatot AMISY wemamo ananyao nsarokir,
mo anayanambe raugavo vatane manuga rai.
Ananyao AMISY mamo kakui rave mije,
mo vatane manyao ti makari mbaro Apa bekere rai.
10Wamo AMISY asyaniv, wemi mamai no Amune rai,
wamanya rai tutira ntoa nuge nuganui.
Patimugo AMISY omamo ayao tugae,
muno moyar tenambe.
11Wambekero ananyao AMISY rai mo wama mbekero emasije rai rakivan,
tugae mo emasi kakui manui rave rakivan.
Muno Apa ananyao mo anyauene ama mana manavane rakivan,
tugae mo anyaune ama poko muje rave kobe no ama nenete rai rakivan bintabo.
12Tugae, ananyao umaso raugaje vatano panapatambe AMISY Aije ai indamu mo aorai;
vatano po raijaro matuve opamo kovo manakoe ratayao amarom.
13Are pirati po taune apa ana dave ti ngkakai namirati pantatukambe raije raen?
Amisy, syare Nyo sya ayao kakai syantatukambe rai namije rapaya rinai.
14Muno Winyo inansopo marambe ayao kakai syo raen to weramu inakari kapan dai so rai,
inda vemo ama vambunine mo inatatuv asyo inya.
Wirati indamu vemo ana ngkakaije inta raeno rinai jinya,
yara ripaya irati sya ayao kakai mare ntapekano rinai rai.
15Sya AMISY, ribeker syare sya ayao daura ore som muno sya ana datantona som mamaisyo winanuga rai.
Winyirati sya unato oram inamamavube Nai muno Nyo rinapaya sya marova mai.
Valið núna:
Masmur 19: yva
Áherslumerki
Deildu
Afrita
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)