Luk 4
4
Jisas ra traika kaikan ba
(Mt 4.1-11; Mk 1.12-13)
1Jisas Spirit Holikira ni aibanhwi, Jordan awala wina kli tawi balan ba ra, Spirit Holikira mita upla iwras tasbaya ra brih wan. 2Jisas ba yu 40 bahara kan, bara dibil bal mahka traika kaikan. Baha piua nani ra diara piras kan, bamna plun dauki kan. 3Baku bamna, dibil ba bila:
—Man ba Gâd Luhpia kaka, naha walpaya ra aisas bara brit takbia.
4Jisas pana win:
—Ulbanka ba wisa: ‘Upla brit mita baman raya kaia apia sa.’#Kli S 8.3.
5Tisku baku kan, dibil mita Jisas ba brih il kum purara ulan, nakra klipan kum ra king tasbaya aiska ba marikan. 6Bara dibil Jisas ra win:
—Naha kuntrika nani prana na bara karnika nani sut maikamna, kan naha sut yang mihti ra mangkan sa bamna; bara yaura yaia lukuna ba yabisna. 7Yang ra lulam kriki puram suni mayunma kaka, naha sut man dukiam kabia.
8Sakuna Jisas pana win:
—Ulbanka ba wisa: ‘Man Dawan Gâdkam ra puram suni mayuns, bara witin dukia baman dauks.’#Kli S 6.13.
9Baha ningkara, dibil Jisas ba Jerusalem tawanka ra bri si, tempel bahna ra suni, naku win:
—Man ba kasak Gâd Luhpia kaka, naha wina kauhs; 10kan Ulbanka nani ra naku wisa:
‘Gâd ai insalka blîkbia
main mai kaikbia bara kainam kahbia.#Law 91.11.
11Ai mihta nani wal mai alki bukbia,
walpa kumi ra sin minam prukbia apia dukiara.’#Law 91.12.
12Jisas pana win:
—Ulbanka ba sin wisa: ‘Dawan Gâdkam ra traika kaikpara.’#Kli S 6.16.
13Baku bamna, Sitan kaikan Jisas ra traika kaikaia diara wala sakras kan, bamna piua wiria prais kat witin ba swin.
Jisas Galili ra ai warkka daukan ba
(Mt 4.12-17; Mk 1.14-15)
14Jisas Galili ra balan, Spirit Holikira karnika ni aibanhwan pali, bara baha tawanka aiska uplika nani witin dukiara aisi kan. 15Smalki kan prias dauki pliska bani ra, bara upla sut mita sin mayuni kan.
Jisas Nasaret ra
(Mt 13.53-58; Mk 6.1-6)
16Jisas Nasaret ra wan; baha tawanka ra sika witin pâwan ba. Ris yua ra#Ris yua: baha sika sabat piua ba. ai natka kan ba baku, Ju nani priaska watla ra wih diman, bara ai mina ra buan Ulbanka nani wina aisi kaikaia. 17Prapit Aiseya wauhkataya ba witin ra yan. Witin aisi kaikaia wisi kwâkan ba naku ulban kata:
18“Dawan Spiritka ba yang purira sa,
kan aihka ai sakan sa,
sturi yamni upla umpira nani ra brih waia dukiara;
silak ra mangkan uplika nani ra pri lâka smalkaia ai blikan,
bara blain nani ra yarka kaikaia,
taiban ra uplika nani ba pri sakaia;
19Dawan yamni wan kaikan manka ba
upla ra aisi smalkaia.”#Ais 61.1-2.
20Baha ningkara Jisas wauhtaya ba praki bara Ju nani priaska watla ra hilpika kan ba ra yan; bara mahka iwan. Baku mika, upla nani baha Ju nani priaska watla ra kan ba sut witin kat ban kaiki kan. 21Baku bamna, witin mahka aisi, naku win:
—Naiwa piua pali naha Ulbanka ba aimakan sa, man nani mamwanra.
22Upla nani bahara kan ba sut, Jisas dukiara pain baman aisin, tâ sin iwan kan, bîla painkira nani witin nani ra aisin ba dukiara. Pana pana sin makabi wali kan:
—¿Naha apia Josep luhpia ba?
23Jisas baha nani ra win:
—Kasak pali mai wisna, man nani naha maprika sturka na ai wima: ‘Daktar, man sikniskam ba wina raws.’ Bara sin ai wima: ‘Kapernaum ra daukram tânka yang nani walri ba, naha man pali tasbayam ra sin dauks.’
24Bara witin kau ban aisi, win:
—Kasak pali mai wisna, prapit kumi sin âpu sa, ai tasbaya uplika nani mita yamni briaia.#Jn 4.44. 25Prapit Ilayas piua ra Israel ra piarka mairin manis bâra kan; mani yumhpa pura bakriki lî auhras kan, bamna plun sin tiwan pali kata baha kuntrika sut ra.#1 Ki 17.1. 26Bamna Gâd mita Ilayas ba baha piarkika nani Israel ra bâra kan ba kumi ra sin blikras kata, sakuna Sidón tasbaya ra tawanka kum nina Sarepta, bahara piarka mairin kumi iwi kan ba ra lika blikan.#1 Ki 17.8-16. 27Baku sin, prapit Ilaidsa piua nani ra, Israel ra lipar sikniska bri uplika nani manis bâra kan, sakuna baha nani kumi sin rakras kan, Naamán Siria kuntrika wina kata ba baman lika.#2 Ki 5.1-14.
28Naha diara nani walan, baha Ju nani priaska watla ra upla nani bâra kan ba sut ai kupia baikan. 29Baku mika, upla nani ba buan, bara mahka Jisas ba tawan ba wina kangbi sakan, witin nani ai tawanka paskan ba bahna tâ pali kat brih wan, baha wina tukbi batakaia dukiara. 30Sakuna Jisas lika witin nani lilapas bâk lui, mahka wan.
Waitna kum pirit saura kum bri kan ba
(Mk 1.21-28)
31Jisas Galili tawanka kumi ra wan, nina Kapernaum, bahara witin ris yua ra upla nani ra smalkan. 32Ai smalkanka bîla nani ba dukiara upla nani ba tâ iwan, kan ai bîla nani aisi kan ba lika karnakira pali kata.#Mt 7.28-29.
33Baha Ju nani priaska watla ra waitna kumi bâra kan, witin pirit tâski bri kan; bara witinka ba ai tâ baiki winan:
34¡Jisas Nasaret wina, ban wan swis! ¿Dîa kan wan tilara dimisma? ¿Man ba wan sauhkaia aulma ki? Yang mai kakaira pali sna. Man ba Holikira Gâd wina ba sika.
35Jisas piritka tâski ra lawi dauki, win:
—¡Bîlam praks, bara naha waitna na sin swis!
Baku mika, pirit tâski ba mita waitna ba witin nani mawan kat tasba ra batakan, mahka sin witin ba wina takan, diara kumi sin watawi munras. 36Upla sut tâ iwan, bara pana pana tawi, aisi kan:
—¿Naha dîa bîla atia? Naha waitna adar brisa bara karnika sin brisa pirit saura nani ra aisabia ba ra, upla nani wina takaia.
37Baku bamna, baha pliska bani ra iwi kan nani ba sut Jisas dukiara aisi kan.
Jisas Saiman maya yaptika rakisa
(Mt 8.14-15; Mk 1.29-31)
38Bamna Jisas Ju nani priaska watla ba wina taki, Saiman watla ra wih diman. Saiman maya yaptika lika rih karna dauki kata, bara witin dukiara upla nani Jisas ra makaban. 39Jisas mairin ba purara wih aimakupi, rihka ra lawi daukan, bara rihka ba witin wina takan. Baha sim piua ra, mairin ba mahka bûi, witin nani dukia dauki kan.
Jisas siknis uplika nani rakisa
(Mt 8.16-17; Mk 1.32-34)
40Yu pat tutni kan, siknis sât sât bri kan uplika nani ba sut Jisas ra bri balan; witin baha nani kumi bani ra ai mihta nani kahban, bara rakan. 41Siknis uplika manis wina pirit saura nani sin takan, bara bîla baikra wini, naku aisi kan:
—¡Man ba Gâd Luhpia sma!
Sakuna Jisas mita pirit saura nani ra lawi daukan, yan sin aisaras kan, witin nani kaikan witin ba Misaya kan.
Jisas Galili ra smalkisa
(Mk 1.35-39)
42Yu baiwan ba ra, Jisas tawan ba wina taki, yakan takan plis kum ra. Sakuna upla nani mita pliki, ban witin bâra kan ba kat balan. Witin nani want kan alki takaskaia, swika waia apia. 43Sakuna Jisas mita baha nani ra win:
—Yang tawan wala nani ra sin Gâd King aimaki ba Lâka sturka ba wiaia, kan baha dukiara ai blikan sa.
44Baku bamna, Jisas ban smalki tauki kan Judia#4.44 Tila taim, Judia dukiara aisi bara Palestina aiska ba ra luki aisisa. ra Ju nani priaska watla nani ra.
Valið núna:
Luk 4: MSKTU
Áherslumerki
Deildu
Afrita
Want to have your highlights saved across all your devices? Sign up or sign in
© 2010 Bible Society in Nicaragua