Blasi Sturka 10
10
Noa luhpia nani kiamka nani ba
(1 Kr 1.5-23)
1Naha nani sika Noa luhpia nani kiamka ba: Sem, Cam, Jafet ba, lisamra tara luan ba ningkara witin nani ai luhpia baikan ba wina ai kiamka nani takan ba.
2Jafet luhpia nani ba: Gómer, Magog, Madai, Javán, Tubal, Mésec bara Tirás, 3Gómer luhpia nani ba: Asquenaz, Rifat bara Togarmá. 4Javán luhpia nani ba: Ilaidsa, Tarsis, Quitim bara Rodanim. 5Naha nani sika Jafet kiamka nani takan ba, bara witin nani kabu un tasbaya ra iwan, taika kumi wina takan kiamka nani, bara baha tânka kat sin ai nisanka nani takan bara ai tasbaya kat iwan ai bîla kat sin aisin.
6Cam luhpia nani ba: Cus, Misraim, Fut, Kenan. 7Bara Cus luhpia nani ba: Sebá, Havilá, Sabtá, Raamá bara Sabtecá. Raamá luhpia nani ba: Sebá wihki Dedán wal. 8Bara Cus ba sika Nimrod aisika, witin na pas waitna karnakira tasba ra bal takan. 9Nimrod na Dawan kupia lâka ba mita daiwan âikra, antin waitnika aihwa pali takan. Bara baha wina aisinka kum takan: “Nimrod wal baku, Dawan kupia lâka mita antin tatakra tara kum kan ba.” 10Witin ai kingka tasbaya tara nani bukan ba: Babel, Érec, Acad bara Calné. Baha nani sut lika Sinar tasbaya ra sa. 11Baha Sinar tasbaya wina Asur ra taki wan bara witin sin tawan tara wala nani paskan. Ninibi, Rehobot-ir bara Quélah tawanka ba sin. 12Bara Ninibi, Quélah wal bilka ra Resen tawanka tara ba bâra sa.
13Misraim kiamka nani takan ba: Lud uplika nani, anameo nani, lehabita nani, naftuhíta nani, 14petruseo nani, casluhíta nani bara caftorita nani sin; baha nani kiamka wina filisteo nani ba bal takan.
15Kenan luhpia nani: Sidón ba ai tawahkia kan, muihnika Het sin. 16Kenan kiamka nani ba: Jebús uplika nani, amorreo nani, gergeseo nani, 17heveo nani, araceo nani, sineo nani 18Arvad uplika nani, semareo nani bara Hamat uplika nani sut sin, baha nani wina Kenan kiamka nani sahwi ailal takan ba. Ningkara, witin nani turwi aihka aihka dakwi taki iwan. 19Witin nani ai tasbaya piarkika ba, Sidón wina waupasa tani ra Guerar kat, baha lika Gaza lamara, baha wina lalma tani ra Sodoma, Gomora, Adma ban Seboím bâk lui Lesa lama kat. 20Naha nani sika Cam luhpia nani, kiamka kumi wina takan ba, ai tasbaya nani kat iwan, ai nisanka bîla kat aisin.
21Jafet muihnika almukka Sem ba sin, ai luhpia nani brin. Éber kiamka nani sut ba Sem luhpia nani kiamka wina takan. 22Sem luhpia nani ba: Elam, Asur, Arfaxad, Lud bara Aram. 23Aram luhpia nani ba: Us, Hul, Guéter bara Mas. 24Arfaxad luhpia Sélah, Sélah luhpia Éber. 25Bara Éber ai luhpia waitna wâl sakan: kumi ba nina Péleg#10.25 Péleg nina tânka ba Hibru ra ulban ba: dakbi sakaia. mâkata, kan witin ai yua nani ra tasba ra upla nani ba aihka dakwi taki iwi kan bamna, bara Péleg muihnika nina ba lika Joctán mâkan. 26Bara Joctán ai kiamka sakan: Almodad, Sélef, Hasar-mávet, Jérah, 27Hadoram, Uzal, Diclá, 28Obal, Abimael, Sebá, 29Ofir, Havilá bara Jobab, naha nani sut ba Joctán kiamka baman. 30Witin nani iwi kan tasbaya nani ba Mesá wina ban Sefar kat auya ba bilka ra kan, unta tara, il nani tasbaya lalma tani ra. 31Baha nani sika, Sem luhpia nani taika kum wina takan nani ba. Kiamka kumi bani ba ai nisanka kat, ai bîla aisi ba kat, bara ai tasbaya kat iwan.
32Baha uplika nani sut ba sika Noa luhpia nani, ai kiamka nani wina bara ai taya nani ailal takan ba; baha nani wina nisan nani ailal tasba ra bal takan. Lisamra tara luan ba ningkara tasba aiska ra yakaban, bara nisan sâtka ailal ba takan.
Valið núna:
Blasi Sturka 10: MSKTU
Áherslumerki
Deildu
Afrita
Want to have your highlights saved across all your devices? Sign up or sign in
© 2010 Bible Society in Nicaragua