Gen 2
2
1Kwasekuphela ukwenziwa kwezulu lomhlaba lakho konke okukukho. 2Ngosuku lwesikhombisa uNkulunkulu wawuqeda umsebenzi wakhe abewenza. Waphumula ngosuku lwesikhombisa emsebenzini wakhe wonke abewenza.#Eks 20:11 #Heb 4:4, 10 3UNkulunkulu wabusisa usuku lwesikhombisa, walwenza lwaba ngcwele; ngoba ngalolosuku waphumula emsebenzini wakhe wonke wokudala uNkulunkulu ayewenza.
4Le yindaba yokudalwa kwezulu lomhlaba ekudalweni kwakho. Mhla iNkosi uNkulunkulu isenza izulu lomhlaba, 5kwakungakabikho isihlahla emhlabeni, lemibhida yeganga yayingakamili; ngoba iNkosi uNkulunkulu yayingakanisi izulu emhlabeni, kungakabikho muntu wokulima umhlabathi. 6Kodwa kwenyuka inkungu ivela emhlabathini, yathelela ngamanzi elizweni lonke. 7INkosi uNkulunkulu yasimbumba umuntu ngomhlabathi, yaphefumulela umoya wokuphila emakhaleni akhe; umuntu waba ngumuntu ophilayo.#1 Kor 15:45
Insimu yaseEdeni
8INkosi uNkulunkulu yenza insimu eEdeni ngasempumalanga, yambeka khona umuntu eyayimenzile. 9INkosi uNkulunkulu yamilisa emhlabathini zonke izihlahla ezibukekayo lezilungileyo zokudliwa; yamilisa phakathi kwensimu isihlahla sokuphila lesihlahla sokwazi okulungileyo lokubi.#Isam 2:7; 22:2, 14 10Kwavela eEdeni umfula wokuthelela insimu. Wehlukana usuka lapho, waba yizifula ezine. 11Ibizo lesokuqala liyiPishoni; yiso esizingelezele ilizwe lonke laseHavila lapho kukhona igolide. 12Lihle igolide lalelolizwe; kukhona amatshe amahle athiwa ibedola leonikse. 13Ibizo lesesibili liyiGihoni; yiso esizingelezele ilizwe lonke laseEtiyopiya. 14Ibizo lesesithathu liyiHidekeli; yiso esigeleza ngasempumalanga kweAsiriya. Isifula sesine siyiYufrathi.
15INkosi uNkulunkulu yasimthatha umuntu, yambeka ensimini yaseEdeni ukuba ayilime, ayilondoloze. 16INkosi uNkulunkulu yamlaya umuntu yathi: Ungadla okwezihlahla zonke zensimu njengokuthanda kwakho; 17kodwa ungadli okwesihlahla sokwazi okulungileyo lokubi, ngoba mhla usidla okwaso uzakufa isibili.
18INkosi uNkulunkulu yasisithi: Kakulunganga ukuba umuntu ahlale yedwa. Ngizakumenzela onjengaye ukuba amsize. 19INkosi uNkulunkulu yabumba ngomhlabathi zonke inyamazana zeganga lazo zonke inyoni zaphezulu; yaziletha kumuntu ukuba abone ukuthi angaziqamba ngokuthini, ukuze kuthi njengalokhu umuntu eziqamba zonke izidalwa eziphilayo, lokhu kube ngamabizo azo. 20Umuntu wazitha amabizo azo zonke inkomo lenyoni zaphezulu lenyamazana zonke zeganga. Kodwa kumuntu kwakungekho onjengaye ukumsiza. 21INkosi uNkulunkulu yamehlisela umuntu ubuthongo obukhulu, walala. Yasikhupha olunye lwezibambo zakhe, yavala indawo ngenyama. 22Ubambo iNkosi uNkulunkulu eyayilukhuphile emuntwini yenza ngalo owesifazana, yamusa kumuntu. 23Umuntu wasesithi:
Lo uselithambo lamathambo ami,
lenyama yenyama yami;
uzakubizwa ngokuthi ngowesifazana,
ngoba ekhutshwe endodeni.
24Ngenxa yalokhu umuntu uzakutshiya uyise lonina, anamathele kumkakhe; bazakuba nyamanye.#Mat 19:5; Mark 10:7, 8; 1 Kor 6:16; Efe 5:31 25Babehambaze bobabili, umuntu lomkakhe, bengelamahloni.
Valið núna:
Gen 2: BE1978
Áherslumerki
Deildu
Afrita
Want to have your highlights saved across all your devices? Sign up or sign in
Bible Society of Zimbabwe 1978