یوحنا ۲
۲
موجیزه عروسی میأن
1 دو روجٚ پٚسی، عیسا مأر ایتأ عروسی، دیهأتٚ قانا، جلیلٚ میأن میهمأن بو. 2 عیسا و اونی شأگردأنٚم هو عروسی میأن دعوت بوبوسته بود. 3 عروسی میأن شرأب تومأنٚ بوسته. عیسا مأر تِشویش اَمرأ اونی ورجأ بأمؤ و بوگفته: «شرأب نأرٚده.»
4 عیسا بٚفرمأسته: «بأنو جأن، چٚره مٚرَه اَ کأر دورون دٚخالت دیهی؟ می وخت هنو فأنرٚسه.»
5 اَ حأل اَمرأ، عیسا مأر خیدمتکأرأنَ بوگفته: «هر چی شٚمٚره گه انجأم بدید.»
6 اویَه شیش‌تأ پیله سنگی خوم نٚهأ بو کی فقد مذهبی مرأسیمٚ دورون اوشأنی جَا ایستفأده بوستی و هر تأ حدودٚ صد لیتر جأ دأشتی.
7 عیسا او خیدمتکأرأنَ بٚفرمأسته: «اَ خومأنَ آب جَا پورَ کونید.» 8 او وخت کی پورَ کودٚد، بٚفرمأسته: «هسأ ایپچه جٚه اونَ اوسأنید و صأب مجلٚسٚ رِه بٚبٚرید!»
9 صأب مجلس خٚوٚر نأشتی او آبَ کی شرأب بوبوسته بو، جٚه کؤیَه بأوٚردٚده (ولی خیدمتکأرأن دأنستید). پس او وخت کی اونَ بیچیشته، زأمأیَ دؤخأده 10 و بوگفته: «صأبخأنأن همیشٚک خوروم شرأبٚ اَمرأ میهمأنأنٚ جَا پذیرأیی کونٚده بأزین کی همٚتأنٚ کله گرم دکفته، اَرزأنٚ شرأبَ اَوٚرٚده. امّا تو خورومٚ شرأبَ آخرٚ سٚرٚ رِه بدأشتی.»
11 اَطؤ بوبوسته کی عیسا خو اوّلی پیله موجیزه‌یَ قانای جلیل میأن نیشأن بٚدأ و خو جلالَ آشیکأرٚ کوده و اونی شأگردأن اونَ ایمأن بأوٚردٚد.
عیسا معبدٚ میأن ایسأ
12 بأزون عیسا خو مأر، برأرأن و شأگردأنٚ اَمرأ ایتأ چن روج بوشؤ کفرناحوم.
13 عَیدٚ پسَح کی ایتأ جٚه یوهودٚ پیله عَیدأن بو، نیزدیکٚ بوستأندوبو. پس عیسا بوشؤ اورشلیم شهر. 14 اویَه، معبدٚ میأن، مردومَ بیدِه کی قوربأنی مرأسیمٚ انجأم دٚئنٚ وأسی، گأب، گوسوٚند و کوتٚرَ بیهین بوفروشٚ رِه موشغولده. صرّأفأن خوشأنی پولأنَ میز رو دیچه بود و موشتریأنٚ اَمرأ موعأمله کودأندوبود.
15 عیسا لأفندٚ اَمرأ، شلأق چأکوده و همٚتأنَ جٚه اویَه بیرونَ کوده. گأبأن و گوسوٚندأنَ بیرون فٚرأنه و صرّأفأنٚ سکه‌یأنَ فوکوده زیمینٚ سٚر و اوشأنٚ میزأنَ فوگوردأنه. 16 بأزون بوشؤ کوتٚر فروشأنٚ ورجأ و بوگفته: «اَشأنَ جٚه اَیَه بٚبٚرید بیرون و می پئر خأنه‌یَ بأزأرٚ مأنستَن چأنکونید.»
17 بأزون عیسا شأگردأن، او موقدسٚ کیتأبأنٚ نوبوّتَ بٚخأطر بأوٚردٚد کی فٚرمأیه: «ایشتیأقی کی تی خأنه رِه دأرم، آتشٚ مأنستَن می دورونَ وٚل گیره.»#۲:۱۷ مزمور ۶۹:۹.
18 یوهود قومٚ پیله کسأن عیسا جَا وأورسئده: «تو چی حقٚ اَمرأ اَ کأرأنَ کونی؟ اگه خودا اَنَ تٚرَه وئأشته، ایتأ موجیزه اَمرأ، اَمٚرَه نیشأن بٚدأ!»
19 عیسا جوأب بٚدأ: «خٚیلی خُب، موجیزه‌یی کی شِمِره کونم اَنه کی: اَ معبدَ فوگوردأنید کی من سه روجٚ میأن اونَ ایوأردِه چأکونم!»
20 بوگفتٚده: «چی گی؟ چهل و شیش سأل درأزه بٚکٚشه کی اَ خأنه‌یَ چأکونٚد. تو خأیی اونَ سه روجٚ میأن چأکونی؟»
21 امّا عیسا منظور جٚه «معبد»، خودشٚ جأن بو. 22 جٚه اَنٚ پٚسی کی عیسا مورده‌یأنٚ جَا ویریشته و زٚنده بوسته، اونی شأگردأن اونی اَ گبأنَ خأطر بأوٚردٚد. بأزون موقدسٚ کیتأبأن و عیسا گبأنَ ایمأن بأوٚردٚد.
23 عَید روجأنٚ میأن، اونی نیشأنه‌یأن وأسی کی موجیزه مأنستَن بو، خٚیلیأن اورشلیمٚ میأن اونَ ایمأن بأوٚردٚد. 24 ولی عیسا اوشأنَ ایعتمأد نوکوده، چونکی مردومٚ دیلٚ جَا وأخٚوٚر بو، 25 و لأزیم نوبو هیکس اونَ بٚگه کی مردوم چندر زود خوشأنی عقیده‌یَ عوضَ کونٚده، چونکی اون اینسأنَ خُب شنأختی.
Valið núna:
یوحنا ۲: GLK_NT
Áherslumerki
Deildu
Afrita
Want to have your highlights saved across all your devices? Sign up or sign in
© 2024 Transform Iran