یوحنا ۱۶
۱۶
1 «اَ کأرأنَ جٚه اَسه شٚمٚره گم کی او وخت کی گریفتأریأنٚ اَمرأ روبرو بیدی، شیمی ایمأنَ جٚه دٚس ندید.» 2 شٚمٚره کنیسه‌یأنٚ جَا بیرونَ کونٚده و ای وخت فأرٚسِه کی مردوم اَ فیکر اَمرأ کی خودایَ خیدمت کودأندرد شٚمٚره کوشٚده. 3 هنٚ وأسی شیمی اَمرأ اَطؤ کونٚده کی نه، پئرَ شنأسٚده و نه مٚرَه. 4 پس او زمأت خأطر بأوٚرید کی تومأمٚ اَ ایتفأقأنٚ خٚوٚرَ جٚه پیشتر شٚمٚره بٚدأ بوم. هنٚ وأسی اَ ماجیرأیَ او وخت شٚمٚره نوگوفتم چونکی شیمی اَمرأ ایسأبوم.
روح‌القدسٚ کأر
5 «ولی اَسه دِه شٚم اونی ورجأ کی مٚرَه اوسه کوده و هیتأ جٚه شومأن وأنوٚرسیدی: "کی کؤیَه شوئؤندری؟" 6 ولی غم و غورصه دأریدی. 7 می شؤئؤن شٚمٚره منفعت دأره، چونکی اگه نٚشم، او روحی کی آرأمٚش دِهه #۱۶:۷ اَ کلمه یونأنی زوأنٚ میأن کی «پاراکلیت» ترجومه بوبوسته جوروأجورٚ مأنی دأره: یاور، مودافع، قوّت فأدن کس، آرأمٚ کونه و رأنمأ.شیمی ورجأ نأیِه. امّا اگه بٚشٚم اون اَیِه، چونکی من اونَ شیمی ورجأ اوسه کونم. 8 او وخت کی اون بأیٚه، دونیأیَ، گونأ، خودا عیدألت و آینده دأوریأنٚ وأسی محکوم کونه. 9 دونیأ گونأ اَنٚ کی نٚخأیه مٚرَه ایمأن بأوٚره. 10 خودا عیدألت آشیکأرَ به، چونکی می پئرٚ ورجأ شٚم، جأیی کی ده نتأنیدی مٚرَه بیدینید. 11 ایتأ دأور اَیِه، چٚره کی اَ دونیأ رییس اَسه محکومٚ بوسته.
12 «دِه خٚیلی چیأن دأرم کی بٚگم، امّا حِیف کی اَسه نتأنید بفأمید.» 13 امّا او وخت کی روح‌القدس کی همٚتأ رأستیأن اونی جَا جوش کونه بأیٚه، تومأمٚ حِئقتَ شِمِره وأشکأفِه و نیشأن دِهه. چونکی جٚه خودش گب نٚزنه، بلکی هر چی‌یَ کی می جَا بشتأوسته، وأگویا کونه. اون آینده جَایٚم شٚمٚره وأخٚوٚرَ کونه. 14 اون می جلال و بوزورگی‌یَ شٚمٚره نیشأن دِهه و اَ کأرٚ اَمرأ می عیزت و ایحترأمَ بأعیث به. 15 می پئرٚ تومأمٚ بوزورگی و جلال، می شینه. او وخت کی بوگفتم می جلال و بوزورگی‌یَ شٚمٚره نیشأن دِهه، می منظور هن بو.
غورصه؛ شأدمأنی بِه
16 «پور دِه بأقی نییٚه کی من شٚم و ده مٚرَه نیدینیدی. امّا ایتأ کوجه زمأتٚ پٚسی وأگردم و ایوأردِه مٚرَه دینیدی.»
17 ای عیده جٚه اونی شأگردأن کس‌کسٚ جَا وأورسئده: «اوستأد چی گه؟ اونی منظور جٚه اَ گبأن چیسه کی گه: "ده مٚرَه نیدینیدی، امّا ایتأ کوجه زمأتٚ پٚسی مٚرَه دینیدی؟" 18 اونی منظور چیسه کی گه" پئرٚ ورجأ شٚم"؟»
19 عیسا بٚفأمٚسته کی شأگردأن خأییدی ایچی اونی جَا وأوٚرسٚد. پس بٚفرمأسته: «خأییدی بدأنید کی می منظور چیسه کی بوگفتم: دِه مٚرَه نیدینیدی، ولی ایتأ کوجه زمأتٚ پٚسی مٚرَه دینیدی؟ 20 اَنَ بدأنید کی دونیأ مردوم جٚه می شؤئؤن شأدی کونٚده، امّا شومأن غورصه خوریدی و آرسو فوکونید. امّا او وخت کی ایوأردِه مٚرَه بیدینید، شیمی گریه وأگرده و شأدی به. 21 هچین ایتأ زائو زنأکٚ مأنستَن کی درد کٚشه، ولی او وخت کی خو زأکَ زأیِه، جٚه شأدی اونی دردأن اونَ جٚه خأطرَ شِه، چونکی ایتأ تأزه اینسأنَ بودونیأ بأوٚرده. 22 شومأنم اَسه غورصه دأریدی، امّا ایوأردِه شٚمٚره دینٚم. او زمأت شأدَ بیدی و هیکس نتأنه اَ شأدی‌یَ شیمی جَا فأگیره. 23 او زمأت میأن دِه می جَا هیچی نخأییدی. من حِئقتَ شِمِره گفتن دٚرٚم، شومأن می نأمٚ اَمرأ هر چی می پئرٚ جَا بٚخأیید، شٚمٚره فأده. 24 تأ هسأ می نأمٚ اَمرأ هیچی نخأستیدی. بٚخأیید کی فأگیرید و شأد بیبید و شیمی شأدی کأمیلَ بَه.
25 «اَ چیأنَ مٚثٚألأنٚ اَمرأ شٚمٚره بوگفتم. امّا ایتأ زمأت فأرٚسِه کی دِه اَ کأرأن لأزیم نییٚه و همه چی‌یَ جٚه می پئر وأشکأفم و شٚمٚره گم. 26 او وخت می نأمٚ اَمرأ خأییدی. اَنٚ بٚگم کی لأزیمٚم نییٚه کی من شیمی سفأرشَ، پئرَ بوکونم اونچی‌یَ کی خأییدی شٚمٚره فأدَه؛ 27 چٚره کی پئر خودش، شٚمٚره دوس دأره چونکی شومأن مٚرَه دوس دأریدی و ایمأن دأرید کی من جٚه می پئرٚ ورجأ بأمؤم. 28 هطؤیه، من جٚه می پئرٚ خودا ورجأ بأمؤم اَ دونیأ میأن و هسأ دونیأیَ نٚهٚم و اونی ورجأ وأگردم.»
29 شأگردأن بوگفتٚده: «اَسه تی گبأنَ اَمی اَمرأ وأشکأفأنی و گب زِئندری، نه مثألٚ اَمرأ. 30 اَسه بفأمستیم کی همه چی‌یَ دأنی و حتّا لأزیم نأری هیکس خو سوألَ تی اَمرأ بوگو بشتأو بوکونه. هن اَمِرِه وٚسته کی ایمأن بأوریم کی شومأ جٚه خودا ورجأ بأمؤیید.»
31 عیسا وأوٚرسِه: «آخرپٚسی اَ موضو‌یَ ایمأن بأوٚردیدی؟ 32 امّا ایتأ زمأت فأرٚسِه، و یا اَنکی بِیتر بٚگم هه الأنٚم فأرٚسِه کی شومأن کولوشٚ مأنستَن اورشین اَییدی و شومأن هرتأ شیمی خأنه وأگردیدی و مٚرَه تنأ نیهیدی. امّا من تنأ نییٚم، چونکی می پئر می اَمرأ ایسأ. 33 اَ چیأنَ بوگفتم کی شیمی خأطر جم بٚبه. اَ دونیأ میأن خٚیلی موشکلأن و مرأرتأنٚ دینیدی؛ ولی شیمی دیل قورص بٚبه، چونکی من اَ دونیأیَ پیروزٚ بوستم.»
Valið núna:
یوحنا ۱۶: GLK_NT
Áherslumerki
Deildu
Afrita
Want to have your highlights saved across all your devices? Sign up or sign in
© 2024 Transform Iran