Luk 8
8
Abǝkal ba tɔnɔ Jisɔs
1Kpɛm kɔ ngarɛ Jisɔs bɔmɔ ɛbjɛnɛ gɔ ɛbjabɛ ɛbjabɛ jɔ bung atinge alom lagɛ Ɛtol Ɛshɔwɔ. Batɔtɔnɔ ɛbɛ ɛwobo anɛ abal jɔlɔ na a nɛ, 2abǝkal bandige ba amiyege bɔ ayam na abi atɔgɔ tɔb jɔlɔ ɔ na a nɛ fufɔ: Mɛri (nɔ bɔ jɔtɔb lɔngɛ rɛ Madalen), nɔ bɔ kamɛ abi atɔgɔ ashima yege na Joanna na Kusa; 3Joanna, nɔ nlom ji Kusa, jɔ kpor ɛtakgɛ Ɛrɔd; na Susana; na abǝkal bagɔ. Abǝkal ba kpɛk kpɛ jɔ kɔ nshɔl nyi bɔ kpenɔ jɔ tɔb Jisɔs na batɔtɔnɔ ɛbɛ.
Ɛbganɛ ni le lagɛ mbamgbɛ nɔ jɛ ɛbamɛ amɔgɔ nshɔl
(Matiyu 13.1-9; Mak 4.1-9)
4Anɛ lɔngɔ gɔ ɛbjabɛ ɛbjabɛ ba gɔ ji Jisɔs; ɔji ɛblɔng anɛ gba ɛkan, ɔwɔ Jisɔs tobo ɛbganɛ niya tɔng bɔ rɛ.
5“Bɛlɛ nɛ awɔng nɔ jɛ ɛbamɛ amɔgɔ nshɔl gɔ ɛgbɛ. Na ajɔ shaadɛ amɔgɔ nshɔl gɔ ɛgbɛ, amɔg nyandige jɔ gbɔ gɔ mbang, bɔ jɔ kadɛ gɔ ata, nrok gɔ rɔ fɔgɔ li. 6Amɔg nyandige gbɔ komo gɔ atal, ɔji mangɛ nɔ, kpɔ, teb alab gɔ ndi kiyalɛ. 7Amɔg nyandige gbɔ yɛl gɔ ɛblɔng ajɔngo, ajɔngo tamim bɔ gbal. 8Amɔg nyandige nya gbɔ gɔ ɛtinge ndi; gbalɛ kab nkpɛlɛ atalalon shingɛ na nya bɔ bamɛ nɔ.”
Ɔwɔ Jisɔs radɛ ntɔng rɛ, “Wongo wan atong, nɛ nɔ kpɛ atong awog!”
Ji wangɛ nɔ atobo ɛbganɛ niya
(Matiyu 13.10-17; Mak 4.10-12)
9Batɔtɔnɔ Jisɔs babɛ ji ɛbganɛ niya lɔngɔ nɔ. 10Jisɔs kim fangɛ rɛ, “Ɛwag bi jɔlɔ gɔ mbǝr lagɛ Ɛtol Ɛshɔwɔ bɔ ma ka, wɔ anɛ bagɔ nkpe bungɔ gɔ ngana nganɛ, nɔngɔ ji bɔ rɛ bɔngɔ bɔ nim nyen, wongo atong bɔ nim bɛl ɛblingɛ.
Jisɔs ka ɛblingɛ lagɛ nɛ nɔ kpe bamɛ amɔgɔ nshɔl
(Matiyu 13.18-23; Mak 4.13-20)
11“Nawɔ ɛbganɛ niya lɔngɔ nɔ: Amɔgɔ nshɔl le na alom Ɛshɔwɔ. 12Amɔgɔ nshɔl nya gbɔ gɔ mbang le na anɛ ba wogo alom Ɛshɔwɔ, wɔ Nlim kim bagɛ biyege bɔ alom gɔ ntem, nɔngɔ bɔ kǝ bɛl ɛbtamɛ na ɛbladɛ. 13Amɔgɔ nshɔl nya gbɔ komo gɔ atal le na anɛ ba wogo alom Ɛshɔwɔ na ɛyɛbɛbtem, wɔ gɔ nteme bɔ yɛlim. Bɔ bɛlɛ ɛbtamɛ gɔ mɔngarɛ, na ɛbgarɛ ba nɔ, bɔ gbɔ. 14Amɔgɔ nshɔl nya gbɔ komo gɔ ajɔngo, le na anɛ ba wogo alom Ɛshɔwɔ, wɔ ɛfige ayɔ na afang ɛying na nyɛbɛ ɛbkpen, lim akab ɛnye gbɔ ɛwɔ. 15Amɔgɔ nshɔl nya gbɔ gɔ ɛtinge ndi le na anɛ ba wogo alom Ɛshɔwɔ file gɔ ɛbtem ating, tɛtɛ kab atinge akab tu na ɛbkpen jɔlɔ nɔ.
Ɛbganɛ ni le lagɛ ɛtrikang
(Mak 4.21-25)
16“Nɛ lim nɔ kpejɔ nyalɛ ɛtrikang kɔ ɛbjɔng kɔngɔ afi kag gɔ afɔgɔ nte. Alega kpagɛ gɔ nkamɛ ɛtrikang, nɔngɔ ji anɛ ba kpe yɛlɛ gɔ atang njo le nyen.
17“Teb ajingajingɛ lim ji bɔ brɛ nɔ ji le ki lɔng gɔ ɛlitak, wɔ ajingajingɛ lim ji bɔ bolo nɔ ji anɛ le ki lɔng aji gɔ ɛlitak ka anɛ nyen.
18“Konokpo ɛja na a kpe wongo atong, teb anɛ ba kpe ɛjom, bɔ kpe kpɛ kpɛlɛ bɔ gbalɛgbalɛ, wɔ anɛ ba ki kpe ɛjom ajingajingɛ, abɔn shishɔgɔ ba bɔ kɛrɛ rɛ bɔ kpenɔ bɔ kpegrɛ tarɛ bɔ.”
Nyen na abinyen Jisɔs
(Matiyu 12.46-50; Mak 3.31-35)
19Nyen na abinyen Jisɔs ba rɛ bɔ binyɛn Jisɔs, wɔ teb ɛblɔng anɛ bɔ mɛmalim nyen. 20Nɛ awɔng kimawɛ tɔng rɛ, “Nɛja na abinyen ɛba yim gɔ ɛlitak, kpe shɛbɛ rɛ bɔ nyena.” 21Jisɔs kim fangɛ bɔ rɛ, “Nejamɛ na abinyen ɛbamɛ ɔ anɛ ba miwog alom Ɛshɔwɔ fɛrɛ lim naji fomo nɔ.”
Jisɔs shadɛ ɛbogo alab
(Matiyu 8.23-27; Mak 4.35-41)
22Ɛfong abɔng Jisɔs tɔngɔ batɔtɔnɔ ɛbɛ rɛ, “Ba wan ɛshiri ɛgboga aya jigɔ.” Ɔwɔ bɔ kim yɛlɛ ɛgbang bɔmɔ ɛfinge shɔngɔ. 23Na bɔ jɔ fing shɔngɔ, Jisɔs gbɔ ɛblo. Gɔ mɔngarɛ tilim, ɛbɔgalab bɔm ɛlime ɛgbang kim ɛrongɔ, ji bɔ jɔlɔ gɔ nyɔ ɛbku na ɛbkpen. 24Batɔtɔnɔ ɛbɛ kim jɛgɛ shɔng nyamɛ, rɛ, “Nshɔ, Nshɔ! Ɛkpe kpɔgɔ na a!” Jisɔs nyamɛ nyam nfɛb na ɛbogalab ragɛ; ɛji shɔrɔ gɔmɔ. 25Ɔwɔ ababbɛ batɔtɔnɔ ɛbɛ rɛ, “Ɛbtamɛ ɛnanɛ legan?” Ɛfalfal bɔb bɔ fɛrɛ lamɛ bɔ anyar, bɔ jɔ bab atɛm rɛ, “Njɛnanɛ awɔ a? Nɔ nyamɛ nfɛb na alab wogɛ?”
Jisɔs lime nlolom nɔ bɛlɛ abi atɔgɔ nɔb.
(Matiyu 8.28-34; Mak 5.1-20)
26Jisɔs na batɔtɔnɔ ɛbɛ finge shiri aya Galili shɔngɔ nyi Jɛrasɛnɛ ji le gɔ ɛgbog jigɔ.
27Na Jisɔs badɛ gɔ ɛbga, nlolom awɔng nɔ lɔng gɔ ɛjabɛ jiɔ nɔ bɛlɛ abi atɔgɔ bǝkperɛ. Gɔ nya gbalɛgbalɛ ajɔ jɛnɛ ɛbonjogo abɔmɔ ajɔm kpɛ kag, gɔ ɛtak ajɔm kpɛ kang, afɛr jɔlɔ gɔ alamalam. 28Ɔji anyɛnɛ Jisɔs, aling bǝkeme gbɔyɛ gɔ ata jɔ binge gbogbo rɛ, Jisɔs, Mɔn Ɛshɔwɔ Nɔ Gbalɛ Shing, “Jɛn ji akpe shɛbɛ gɔ gamɛji? Magbɔngɔ, kim kagɛ ɛrɛm!” 29A bungɔ nɔ teb Jisɔs nyamɛ ɛbi ɛtɔgɔ rɛ lɔngɛ gɔ ngɔbjing. Teb ngarɛ gbalɛgbalɛ kpejɔ kɔyɛ ɛkɔ ji jɔlarɛ bɔ kagɛ gɔ afɔm na agbakɔbɔ gɔ abɔ na ata bom jɔ babɛ, akpe kim agbakɔbɔ abi atɔgɔ kamɛ tu gɔ ɛwungwung.
30Jisɔs kimawɛ bab rɛ, “Bɔ kpejɔ lɔng arɛnan?” A rɛ, “Ndorr”, teb akpe abi atɔgɔ gbalɛgbalɛ gɔ ngɔbjing.
31Abi atɔgɔ jɔ gbɔngɔ Jisɔs gɔ nkpɛla kpɛlɛ rɛ akǝ kam bɔ tu gɔ ɛbing ni ki kpe nkalshi.
32Bɛlɛ ɛblɔngɔ akog nya jɔlɔ ɔ kpedekpede jɔ li nshɔl gɔ nab ɛwɔng. Abi atɔgɔ jɔ gbɔngɔ Jisɔs rɛ ayagɛ bɔ yɛl gɔ ngɔbjing akog nyaa, ayagɛ bɔ.
33Ɔji abi atɔgɔ lɔngɔ gɔ ngɔbjing a nlolom nɔnu, bɔ shɔng yɛlɛ gɔ ngɔbjing akog. Bɔ kpɛk kpɛ bɛ badɛ gɔ ɛdamɛ shɔng yɛl gɔ aya nyanlen tan.
34Na anɛ ba jɔ lɛɛ akog nyenɛ ji milim, ɔwɔ bɔ bɛ shɔng tɔrɔ gɔ ɛbjabɛ na ɛbgbɛ bi le kabɛ ɔ. 35Anɛ lɔng jɛ shɔng nyen ji milim. Ɔji bɔ ringe gɔ ji Jisɔs, bɔ nyenɛ nlolom nɔ abi atɔgɔ mɛ lɔng gɔ ngɔjing jig gɔ ata Jisɔs na ɛlebe nfɛnfɛ, amifɛrɛ gɔ gɛya alon, ɛfalfal bɔb bɔ.
36Anɛ ba nyenɛ nɔ tɔngɔ anɛ bagɔ na nlolom nɔ abi atɔgɔ jɔlɛ gɔ ngɔbjing minɔb. 37Ɔwɔ anɛ kpɛk kpɛ ba le gɔ ɛjang ɛbjabɛ Jɛrasa jiɔ tɔngɔ Jisɔs rɛ atam ka bɔ ɛyagɛ, teb ɛfalfal ji bɔbɔ bɔ gbalɛ shing. Nɔwɔ Jisɔs yɛlɛ gɔ ɛgbang tam.
38Nlolom nɔ abi atɔgɔ mɛ lɔng gɔ ngɔbjing jɔ gbɔngɔ Jisɔs rɛ atɔnɛ tam, wɔ Jisɔs tomɛ rɛ, 39“Fɛrɛ shɔng krɛ wɔ shɔng tɔng anɛ ji Ɛshɔwɔ milim ka.” Nɔwɔ nlolom nɔnu tamɛ nɔ jɔ tɔng anɛ kpɛk kpɛ gɔ ɛbjabɛ ji Jisɔs milim kayɛ.
Jisɔs lime anɛ nɔb
(Matiyu 9.18-26; Mak 5.21-43)
40Ɔji Jisɔs mifɛrɛ shiri gɔ ɛgbog aya jiga abǝkpere, ɛblɔng anɛ bi jɔ shegɛ gberɛ.
41Nlolom awɔng nɔ bɔ jɔ lɔngɛ rɛ Jayirɔs, ntoboɛshi gɔ ɛtak ji Aju kpejɔ wanɛ, ba bǝgbɔ Jisɔs gɔ ata, jɔ gbɔngɛ rɛ ajɛ gɔ ɛtak ɛjɛ, 42teb mɔnɔwɛ awɔngawɔngɔ nɔ nkal, nɔ jɔlɔ ɛwobo aya ɛbal, nɔng gɔ nyɔ ɛku. Na Jisɔs tamɛ ɛbjɛn, ɛblɔng anɛ lɔng bǝshingɛ kag. 43Nlikal awɔng jɔlɔ gɔ ɛblɔngɔ bɔ nɔ nyenɛ ɛrɛm bi alung shayɛ gɔ nab gɔ ɛwobo anya ɛbal, afad ajingajingɛ ji abɛlɛ nɔ ka ba alema akam, nɛnɛ mɛtirim mal lim a nɔb. 44Alongo gɔ njam bǝkeme lagɛ Jisɔs abɔ gɔ nkalɛ ɛlamɛ, gɔ ndoando nyiɔ alung ragɛ ɛlɔngɔ. 45Jisɔs kim babɛ rɛ, “Nyenɛ wɔ lagim abɔ.”
Anɛ kpɛk kpɛ gbamɛ, Pita kim bungɔ rɛ, “Nshɔ, nror anɛ ɛgbal shing nyi kpa tamɛ.”
46Jisɔs rɛ, “Nɛ awɔng ɛmim laga abɔ, teb ɛkɔ ɛmim lɔng gɔ ngɔbjing.”
47Ɔji nlikal nɔnu gbɛrɛ rɛ animalɛ biri, ɔwɔ ajɔ kam ba bigbɔ jama alang gɔ ata Jisɔs. Jɔ tɔrɔ gɔ ɛshimar anɛ kpɛk kpɛ ji wangɛ alagɛ abɔ na ji aminɔb ɛyam tutu.
48Ɔwɔ Jisɔs kimawɛ tɔng rɛ, “Mɔn ɛwamɛ, ɛbtamɛ ɛna ɛmalim a nɔb. Shɔng gɔ ɛbgɔmɔ.”
49Na Jisɔs bɛlɛ tɔng gɔ nyɔ jɔ bung, nɛ awɔng nɔ lɔng gɔ ɛtak gɛ Jayirɔs ntoboɛshi gɔ ɛtak ji Aju kpejɔ wanɛ ba bǝtɔngɔ Jayirɔs rɛ, “Mɔnɔwa nɔ nkal ɛkpɔ, kǝ kpe fige ntetebe ayɔ.”
50Ɔji Jisɔs wogo nɔ, atɔngɔ Jayirɔs rɛ, “Kǝfal; bɛl ɛbtamɛ, rɛ akpe nɔbɔ.”
51Ɔji Jisɔs ringe gɔ ɛtak gɛ Jayirɔs, anɔngim nɛ awɔngawɔngɔ tɔnɛ yɛl gɔ njo shingim Pita, na Jɔn, na Jɛmshi, na nyen na ndɛ mɔn. 52Anɛ kpɛk kpɛ jɔlɔ gɔ ɛkpa ɛku jɔ ling mɔn nɔ kpɔ nɔ. Ɔwɔ Jisɔs kim tɔngɔ bɔ rɛ, “Kǝ kpɛ ling wan, akǝ kpɔ akpe lalena.”
53Bɔ anɛ kpɛk kpɛ jɔ wɔlɛ na, teb bɔ nyinyi rɛ mɔn nɔnu ɛbkpɔ. 54Jisɔs kimawɛ file gɔ ɛbɔ rɛ, “Mɔnɔwamɛ, mɛlɛ yimi!” 55Ɛtɔgɔ mɔn nɔnu fɛrɛ biyɛlɛ amɛlɛ yimi tutu. Ɔwɔ Jisɔs tɔngɔ bɔ rɛ bɔ kayɛ ɛjom alɛgɛ ali.
56Ndɛ na nyen mɔn lamɛ bɔ anyar, ɔwɔ Jisɔs ka bɔ ɛbrɛgɛ rɛ bɔ kǝ tɔng nɛ awɔngawɔngɔ ɛjom ji milim.
Valið núna:
Luk 8: NBP
Áherslumerki
Deildu
Afrita
Want to have your highlights saved across all your devices? Sign up or sign in
©️2024 Luke Initiative for Scripture Translation