Luk 19
19
Jisɔs na Sakiyɔs
1Jisɔs yɛlɛ nyi Jɛriko jɔ shing shɔngɔ. 2Nlolom awɔng jɔlɔ ɔ nɔ bɔ jɔ lɔngɛ rɛ Sakiyɔs; ajɔlɔ ntoboɛshi nkaga atakshi nɔ jɔlɔ ɛfangɛnɛ. 3A jɔ nɔgɔ rɛ anyɛn Jisɔs, wɔ teb akikab amɛjɔm mal nyen teb ɛblɔng anɛ. 4Ɔwɔ abɛ nɔ tam gɔ ɛshishɔng shɔng war gɔ ɛte ji bɔ lɔngɔ rɛ sikamɔ rɛ a nyenɛ, teb Jisɔs jɔ shingɛ gɔ mbang nyiɔ.
5Ɔji Jisɔs ringe gɔ ji jiɔ, abɔngɔ gɔ rɔ kimawɛ tɔng rɛ, “Badɛ kingking Sakiyɔs, teb lɛl nkpe jɔlɔ gɔ gatak.” 6Ɔwɔ abadɛ nɔ kingking bǝgberɛ na ɛyɛbɛbtem. 7Na anɛ kpɛk kpɛ nyenɛ nɔ bɔ bɔmɔ ɛmumɔ rɛ, “Nlolom nɔa ɛtam ɛbɔng gɔ ɛtak gɛ nɛ abi afɛm!”
8Sakiyɔs kim tamɛ yimi tɔng Jisɔs rɛ, “Nshɔ, wog! Nkpe kagɛ akpak ɛjang nshɔl ɛnyamɛ, wɔ rɛ fɛr jɔl rɛya nim nɛ gɔ ɛbi mbang, nkpe fɛrɛ kpɛyɛ gɔ nkpɛlɛ ɛni gbalɛgbalɛ.”
9Jisɔs kim bungɔ tɔngɛ rɛ, “Lɛl ɛbtarɛ ɛba gɔ nlatak nyaa, teb nlolom nɔa, fufɔ, ɛtɔtɔngɔ Ɛbraham ji. 10Teb rɛ Mɔna Nlolom ba rɛ abishɛb anɛ ba mitan fɛrɛ tarɛ bɔ.”
Ɛbganɛ ni le lagɛ alɔgɔ ɛbtom awobo
(Matiyu 25.14-30)
11Na bɔ jɔ wongo atong kayɛ, Jisɔs shɔrɔashi ntɔng tob bɔ ɛbganɛ, teb akabɛ Jɛrushɛlɛm ji anɛ tire rɛ Ɛtol Ɛshɔwɔ kpe lɔngɔ ɛfumfum ajing. 12Akim bungɔ rɛ, “Bɛlɛ nlolom awɔng nɔ lɔng ɛbange nab ɛblobo, nɔ tamɛ gɔ ɛjabɛ jindige rɛ bɔ kayɛ ɛtol, akim fɛrɛ krɛ. 13Gɔ ji amikim tam alɔngɔ abɔnɔnjo ɛbɛ anɛ awobo ka nɔ nɛ ɛkpɔgɔ ngol ajing. Tɔng bɔ rɛ, ‘Kɔ akpɔgɔ nya wan kpede abɔ, tɛtɛ nfɛrɛ.’ 14Wɔ anɛ ɛbɛ akɔrɔm bɔ, ɔwɔ bɔ tomo agboajɛnba tuɛ rɛ, ‘War shɛbim rɛ nlolom nɔa jɔl ntol ɛnyarɛ.’
15“Bɔ ka nlolom nɔnu ɛtol, akim fɛrɛ krɛ. Bǝlɔng abɔnɔnjo ɛbɛ rɛ bɔ ba bǝtɔngɛ nshing nyi bɔ bɛlɛ nɔ gɔ akpɔgɔ nya aka bɔ. 16Ngbɔgambanga nɛ ba bǝtɔngɛ rɛ, ‘Nshɔ, mɛ bɛl ɛkpɔgɔ ɛwobo ji ngol kpɛlɛ gɔ nya akam nɔ.’ 17A rɛ, ‘Gafɔ ɛtinge mɔnanjo ɛwamɛ. Teb alem nɔbɔbɔ gɔ mɔnshishigɔ nɔ nka nɔ, nle ka ɛshiɛjabɛ ɛwobo afile.’ 18Ɛtɔnɔ nlɔgɔ ɛbtom tɔb ba bǝtɔngɛ rɛ, ‘Nshɔ, mɛ bɛl ɛkpɔgɔ ngol ɛlon kpɛlɛ gɔ nya akam nɔ.’ 19Ndɛnjo kim fangɛ rɛ, ‘Wɔ kɔ ɛshi ɛjabɛ ɛlon file.’
20“Nlɔgɔ ɛbtom nɔndige kim kpɛ ba bǝtɔngɛ rɛ, ‘Nshɔ, nyen akpɔgɔ ngol ɛnya; ngbadɛ gɔ njaga mbɔmɔ brɛ. 21Nfalafal, teb akperidi. Akpejɔ kɔ ji ki le ɛja fɛrɛ fu ji aki bam.’ 22Ndɛnjo kimawɛ fangɛ rɛ, ‘Wɔ ɛbe mɔnanjo! Nkpe kɔgɔ alom ɛnya fɛrɛ lama! Wɔ nyinyi rɛ mɛ nkperidi, nkpejɔ kɔ ji ki le ɛjamɛ fɛrɛ fu ji nki bam. 23Jɛnji wangɛ aki kag akpɔgɔ ɛnyamɛ gɔ njo ɛkoro akpɔgɔ? Na mikrɛ nu fɛrɛ bɛl akpɔgɔ ɛnyamɛ na nshing.’
24“Ɔwɔ akim bungɔ tɔng anɛ ba yimi ɔ rɛ, ‘Tarɛ ɛkpɔgɔ nya gɔ gɛ ɛbɔ wɔ nkpɛlɛ nlɔgɔ ɛbtom nɔgɔ nɔ kpe ɛkpɔgɔ ngol ɛwobo.’ 25Bɔ kimawɛ fangɛ rɛ, ‘Nshɔ, yɛ ɛshibɛbɛl ɛkpɔgɔ ngol ɛwobo!’ 26Akim fangɛ rɛ, ‘Ntɔng wan rɛ nɛ awɔngawɔngɔ nɔ kpe ɛjom bɔ kpɛkpɛlɛ gbalɛgbalɛ, wɔ ba ki kpe ɛjomjom, amɔnshishigɔ ba bɔ rɛ bɛl bɔ nkpe grɛ tarɛ. 27Wɔ anɛ ba ɛjang ɛbamɛ ba kishɛb rɛ mɛ jɔl ntolabɔ, ba na bɔ a bǝwol bɔ gɔgamɛ ɛshimar!’ ”
Jisɔs yɛlɛ gɔ Jɛrushɛlɛm na ntol
(Matiyu 21.1-11; Mak 11.1; Jɔn 12.12-19)
28Na Jisɔs malɛ na ntɔng, agbɔ bɔ mbang, nyi Jɛrushɛlɛm. 29Na akabɛ Bɛtifage na Bɛtani gɔ ɛwɔngɔ Olifes, atomo batɔtɔnɔ ɛbɛ anɛ abal tu gɔ ɛjabɛ rɛ, 30“Shɔng gɔ ɛjabɛ ji le gɔ ɛshishɔng ɛbanɛ, na nyɛlɛ nɔ, nkpenyɛnɛ ngongɔ ɛnyinya nyi bɔ kanɛ ɔ, ji nɛ kana kǝkomo. Fangɛ wan ba na wɔ. 31Nɛ awɔngawɔngɔ rɛ bab wan rɛ, Jɛn ji wangɛ nkpe fangɛ? Tɔngɛ rɛ, Nshɔ wɔ kpeshɛbɛ.”
32Anɛ ba atomo bɔ tu bɔ gbɔmbang shɔng nyen ɛjomajingajingɛ naji atɔngɔ bɔ. 33Na bɔ jɔ fangɛ ngongɔ ɛnyinya nyinu, nfɔnɔ kim babɛ bɔ rɛ, “Jɛn ji wangɛ nkpɛ fangɛ?”
34Bɔ fangɛ rɛ, “Nshɔ, wɔ kpeshɛbɛ.” 35Bɔ kɔyɛ ba gɔ ji Jisɔs, yal nlaba bɔmɔ gɔ njam ɛnyinya tɔb Jisɔs war komo. 36Na ajɔ jɛn shɔngɔ, anɛ jɔ yalɛ abɔmɔ bɔ gɔ mbang.
37Na kabɛ Jɛrushɛlɛm gɔ ɛji ji mbang jɔ jɛ nyi ɛrɛdɛ bi ɛwɔngɔ Olifes, ɛblɔngɔ atɔtɔnɔ Jisɔs kpɛk kpɛ bɔmɔ ɛbtem ɛyɛbɛbtem jɔ jige Ɛshɔwɔ gbogbo gɔ ajijɔgɔ nshɔl kpɛk kpɛ nya bɔ minyen: 38“Ɛbfolo jɔl ka ntol nɔ ba gɔ mbing a Nshɔ! Ɛbkɔnɔ jɔl gɔ ɛjabɛ ɛtol Ɛshɔwɔ, ɛblobo jɔl gɔ rɔrɔ!”
39Afarasi nyandige nya wɔbɔ gɔ ɛblɔng nyiɔ kim tɔngɔ Jisɔs rɛ, “Ntetebe, nyam atɔtɔnɔ ɛba bɔ bǝl ɛrogo!”
40Jisɔs kim fangɛ bɔ rɛ, “Ntɔng wan rɛ bɔ rɛbǝl ɛrogo, atal kpe kime ɛbinge.”
Jisɔs linge lagɛ Jɛrushɛlɛm
41Na akabɛ Jɛrushɛlɛm nyen ɛjabɛ, a ling teb ɛjabɛ, a rɛ, 42“Le rɛya, wan nyinyi ji lɛl ji kpe kɔgɔ ɛbkɔnɔ ba! Wɔ anu nimal nyen teb rɛ bɔ brɛ rɛ wan nkǝ nyen! 43Ɛfong kpe bagɛ bi anɛ ba ɛjang ɛba kpa bamɛ tu, shinga kag, shaadɛ ayagɛ kpɛk kpɛ tua. 44Bɔ kpe rangɛ wan na abɔn kpɛk kpɛ gɔ atang, bɔ nim yagɛ ɛbtal atingatingɛ sha gɔ ɛji ji nɔng nɔ, teb nim gbɛrɛ ngarɛ nyi Ɛshɔwɔ bagɛ rɛ bǝtarɛ wan!”
Jisɔs jɛ gɔ ɛtak Ɛshɔwɔ
(Matiyu 21.12-17; Mak 11.15-19; Jɔn 2.13-22)
45Na Jisɔs yɛlɛ gɔ atang ɛtak gɛ Ɛshɔwɔ, akimɛ ɛkamɛ anɛ ba jɔ gongɔ nshɔl. 46Akim tɔngɔ bɔ rɛ, “Nwɛr Ɛshɔwɔ bungɔ rɛ, ‘Ɛtak gɛ ɛjamɛ le ka ɛrɔ akagɛ.’ Wɔ wan nfɛr rɔd bom ɛkan awaju!”
47Ɛfong abɔngabɔngɔ Jisɔs jɔ tebe gɔ ɛtak gɛ Ɛshɔwɔ. Atoboɛshi a bajɔmanjɔm Ɛshɔwɔ, na batetebe ajang a Mosis, na atoboɛshi anɛ bɔ jɔ tir shɛbɛ rɛ bɔ wolɛ. 48Wɔ bɔ tirim mal bɛl mbang nyi bɔ le wolɛ, teb anɛ kpɛk kpɛ jɔ wongo atong kayɛ, bɔ jɔm shɛb rɛ ɛblom atingatingɛ ɛnɛ fɔrɔ bɔ.
Valið núna:
Luk 19: NBP
Áherslumerki
Deildu
Afrita
Want to have your highlights saved across all your devices? Sign up or sign in
©️2024 Luke Initiative for Scripture Translation