Luk 13
13
Yaga abɔ gɔ abi afɛm nɔngɔ akǝkpɔ
1Gɔ ngarɛ nyiɔ, bɛlɛ anɛ ba jɔlɔ na Jisɔs. Bɔ tɔngɛ lagɛ na Pilɛt jɔ wol anɛ gɔ Galili ba jɔ folo nshing ka Ɛshɔwɔ. 2Jisɔs kim fangɛ rɛ, “Wɔ tire rɛ anɛ ba Galili ba ba ga le anɛ ba abi afɛm shingɛ kpɛk kpɛ anɛ gɔ Galili teb ɛrɛm bi bɔ nyenɛ nɔ a? 3Ntɔng wan rɛ, nɔshang! Ntɔgɔ tir gbɔ ndɔn mbɛl ɛbtamɛ, wan fufɔ nkpe tɔb kpɔ. 4Na ɛbko anɛ ara ba kpɔ nɔ ɔji ɛkamɛ gbɔ nɔ bolo bɔ gɔ Salɔm -wɔ tire rɛ bɔ ba ga lim abi afɛm shingɛ anɛ kpɛk kpɛ ba le gɔ Jɛrushɛlɛm a? 5Ntɔng wan rɛ, nɔshang! Ntɔgɔ tir gbɔ ndɔn, wan fufɔ nkpe tɔb kpɔ.”
6Ɔwɔ atobo ɛbganɛ niya rɛ: “Nlolom awɔng bamɛ ɛte ji bɔ lɔngɔ rɛ fig gɔ ɛgbɛ ɛjɛ; ajɛ gɔ nkpɛla nkpɛlɛ shɔng jangɛ atingim nkab. 7Ɔwɔ atɔngɔ nlolom nɔ jɔ babɛ ɛgbɛ rɛ, ‘Gɔ ɛjomo nnya ɛra anu nkpejɔ ba a bijange ɛte fig jiya nkǝtir ting nkab. Gbak tob gɔ ndi! Yim kpe lime jɛn a?’ 8Nlolom nɔnu kimawɛ fangɛ rɛ, Nshɔ, ‘yaga abɔ kpɛkang gɔ ɛjomo ɛbya ating, nɔngɔ mɛ nkpa ndi yege gɔ nab kpɛlɛ ɛjom ji lelimɛ agbal. 9Rɛkab ɛyabu, nɔb! Tɔgɔ fɛr kab, a gbak tob.’ ”
Jisɔs lime mbanɛ jɛn ɛfong ɛragɛ ɛku
10Ɛfong ɛragɛ ɛku Aju abɔng bi Jisɔs jɔ tebe gɔ ɛtak ji Aju kpejɔ wanɛ. 11Nlikal awɔng jɔlɔ ɔ nɔ ɛbi ɛtɔgɔ mɛ bom ɛbanɛ gɔ ɛbko a nnya ɛra. Njam gal ajɔm kpɛ mal tannɛ. 12Ɔji Jisɔs nyenɛ nɔ, alɔngɛ tu nɛɛ atɔngɛ rɛ, “Nɛ, Ɛshɔwɔ matarɛ yagɛ gɔ ga ɛyam.” 13Ɔwɔ a konɛ ɛbɔ, gɔ ndoando nyiɔ atanɛ bɔmɔ ɛjige Ɛshɔwɔ.
14Ntoboɛshi gɔ ɛtak ji Aju kpejɔ wanɛ ragɛ ɛbtem na Jisɔs teb aleme nɛ ɛyam gɔ ɛfong ɛragɛ ɛku Aju. “Ɔwɔ akim bungɔ tɔng anɛ rɛ, Le nfong ɛragɛra nyi ɛbtom a lime. Ba gɔ nfong nyiɔ bɔ lima a nɔb. Gɔ ɛfong ɛragɛ ɛku shang.”
15Nshɔ Jisɔs kimawɛ fangɛ rɛ, “Wan anɛ ba ɛshimar njam bal! Nɛ nɔa nɔ leke lingɛ ɛfɔng ɛbɛ na anyinya gɔ ɛbrɔ rɔd bɔ shɔng wɔɔ alab ɛfong ɛragɛ ɛku Aju a? 16Nlikal nɔa lɔng gɔ ɛbange nab Ɛbraham, nɔ Nshɛtan mɛkag ɛrɛgɛ gɔ nnya ɛbko a nnya ɛra. Nɔbim rɛ bɔ tarɛ yagɛ gɔ ɛfong ɛragɛ ɛku Aju a?” 17Ɔji Jisɔs bungɔ nshɔl nyaa, kpɛk kpɛ anɛ ba ɛjangɛ ɛbɛ gbɔ ndɔn. Ɛbtem yɛbɛ anɛ kpɛk kpɛ gɔ ajɛnɛ nshɔl nya Jisɔs kpelime.
Ɛbganɛ ni bungɔ lagɛ amɔgɔ mustard
18Ɔwɔ Jisɔs kim babɛ rɛ, “Ɛtol Ɛshɔwɔ fɔngɔ jɛn? Ɛjomaji nlikɔ garɛ na Ɛtol Ɛshɔwɔ? 19Le na amɔgɔ mustard nya nɛ kɔ nɔ shɔng bam gɔ ɛgbɛ ɛjɛ. Migbal shingɛ njijɔg ɛte, nrok gɔ rɔ shi ntak gɔ abɔbɔ ɛnyɛ.”#13.19 Akɛkrɛ amɔg nte nya nɛ ki kono ɛkpo rɛ kpemangɛ nya nɛ kɔ shɔng bam gbal shingɛ njijɔg ɛte. Aju lɔngɔ rɛ mustard seed.
Ɛbganɛ ni le lagɛ ɛyis
20Akpɛ bab rɛ, “Ɛjomaji nlikɔ garɛ na Ɛtol Ɛshɔwɔ? 21Le na ɛjom ji kpejɔ lim ɛbrɛd tong ji nlikal awɔng kɔ nɔ shimɛ gɔ nshɔl nyi bɔ kpejɔ lim ɛbrɛd tɛtɛ tong.”
Nfida mbo
22Na Jisɔs tamɛ nyi Jɛrushɛlɛm, a jɔ tebe anɛ gɔ ɛbjabɛ binlen na binshɛ bi a jɔ shing gɔ mbang. 23Nɛ awɔng kimawɛ bab rɛ, “Nshɔ, abɔn amɔg a anɛ ba ba Ɛshɔwɔ kpe tarɛ a?”
Akim fangɛ bɔ rɛ, 24“Ntɔng wan, nɔg gɔ mbang anyinganyingɛ wɔ shing gɔ nfida mbo yɛl gɔ atang, teb anɛ gbalɛ gbalɛ, lenɔg rɛ bɔ shing yɛl gɔ atang, bɔ nimmal. 25Nfontak rɛ shi titam yimi bam mbo, akpe shagɛ gɔ ɛlitak jɔ gbak jɔ gbɔngɔ rɛ, ‘Nshɔ, titi lingɛ mbo ka war.’
“Yɛ kpe fangɛ rɛ, ‘Manyim wɔ lim nle gbɛrɛ ɛji ji alɔng nɔ.’ 26Ɔwɔ nkpekimɛ ɛbungɔ rɛ, ‘War ɛli fɛrɛ wɔɔ na na, afɛrɛ jɔ teb gɔ garɛ ɛbjabɛ.’
27“Akpe fangɛ rɛ, ‘Ɛjabɛ aji alɔng nɔ nyim nɛ nɔ ale nɔ. Kam wan ɛyagɛ, wan anɛ ba abi afɛm!’ 28Akpe linge jɔ li aman, ɔji wan minyen Ɛbraham, Isaak na Jɛkɔb na batinge ateb Ɛshɔwɔ kpɛk kpɛ gɔ ɛjabɛ Ɛtol Ɛshɔwɔ, wɔ wɔfɔnɔ bɔ rɔya gɔ ɛlitak. 29Anɛ kpe lɔngɔ gɔ njol a fonfo na njol ɛbgong na gɔ rɔ mfam na ɛrɛdɛ, bǝkɔ njiya bɔ gɔ ɛbkak gɔ ɛjabɛ Ɛtol Ɛshɔwɔ. 30Gɔ ɛlɔgɔlɔgɔ akalanjam anɛ mba ba lijɔl agbɔgɔ mbang, agbɔgɔ mbang fɛr jɔl akalanjam.”
Jisɔs nyangɛ lagɛ Jɛrushɛlɛm
31Gɔ ngarɛ nyiɔ bɛlɛ Afarasi nya bitɔng Jisɔs rɛ, “Tam ɛjabɛ jiya sha wɔ yangɛ ɛji. Teb Ɛrɔd kpe shɛbɛ rɛ awola.”
32Jisɔs kim fangɛ rɛ, “Shɔng tɔng nɛ awag nɔ rɛ, ‘Nkpagɛle kamɛ abi atɔgɔ yegɛ fɛrɛ lim anɛ ba ayam nɔb lɛl na bina, gɔ nfong ɛra nkpe malɛ na ɛbtom ɛnamɛ.’ 33Tu ɔji linɔ, nkpe tir shɔrashi ɛjɛn ɛnamɛ lɛl na bina na njam fonfo, teb fomom rɛ ntinge ateb Ɛshɔwɔ bɔ wolɛ gɔ ji ajingajingɛ ji shingɛ Jɛrushɛlɛm!
34“Ɛyee Jɛrushɛlɛm, wan ba kpejɔ wol atinge ateb Ɛshɔwɔ fɛrɛ tobo alɔgɔ ɛbtom ba bɔ tomo tu wan atal. Nkpɛlɛ ɛbek nyi mi nɔg rɛ mɛ nfɔgɔ abɔn ɛbanɛ ɛji ajing, na nkɔk fɔgɔ abɔn ɛbɛ gɔ akpongkpong, wɔ wan atirim tamɛ. 35Ntɔng wan rɛ, teb ntirim tamɛ, ɛtak ɛjanɛ kpe gbɔgɔnku. Wan mɛnim kpɛ nyen tɛtɛ wan tɔng rɛ, ‘Ɛbfolo jɔl ka yɛ nɔ ba gɔ mbing a Nshɔ.’ ”
Valið núna:
Luk 13: NBP
Áherslumerki
Deildu
Afrita
Want to have your highlights saved across all your devices? Sign up or sign in
©️2024 Luke Initiative for Scripture Translation