Mataafa Uumata 6
6
Neequmta orra
1Orra ete piita qara' lekaannooyye, tuparra ishootta' delade. #Iyyo 1:6; 2:1 2Hellaa Waaqa ka akka tuparrosen papaxxaari akken. Ka ishoottoppa a ishootta' aaka reexaden ka hemen. 3Yaahiwwe ka kide, “Nama qootan so'a ka to'o malla, hapurase xayyo caatta daanno nama olliiyyi haka paraparati in kallaado. Amma desa paayyatte, nama para dippa ka kunda lakki qaropa in kallaado.” 4A hellaa Waaqa tuparra orra olliiyyi muken ka hellaa xaayeneeyye ka kamma kuli orra kukutta ka Nefiliimeta piita qara kala. Ishootta xattaayye, orra maxanyumaan upnaatame kurraaysho ka dakaade. #dikoota 13:33
5Yaahiwwe orra piita qara kalo akkima neeqi ka karittaaysho kara neequmta dikanno akke. #Maati 24:37; Luqa 17:26; Peti 1ta 3:20 6Yaahiwwe sede a piita qara nama uume ka ishi neeqnaatte, ikka semmalla harmmo nyarrahe. 7Semmalla Yaahiwwe ka dikade ka kide, “Uumatase an uume ana nyarrahasiiseey, allen sanynyeeta nama piita qara qishsha. Pinaana piita qara kala ka xampira moontan xa'anna piisan piita qara alle pashsha.” 8Nama takka Noohe kidammo xoori, fuula Yaahiwwe tura'e ulfeena akkade.
Waaqa Noohen paha dikade
9-10Arekammopa xata qoota Noohe desa torrini. Noohe hellaa hamiyya sessa qapa. Maxxadaasso nefo, Seemi ka Kaami isho Yaafeeti kidammi. Noohe nama Waaqa fuurro ka hanqeellayta. Sitiiyyi isha patta dapa kooni in kinnin. #Peti 2ta 2:5 11Sitiiyyi, orra piita qara kalo piisa fuula Waaqa tura dapaaw kooni. Piita ka karpan immakaatte. 12Waaqa ete piita tooynooyye, piita akka nyapalte orra qara co ka juppootan immakaade akke.
13Waaqa ka oori Noohe' kide, “Sanynyeeta inna nama alle patissa'e, in piisade. Qoota piita nyalaan immakaatte malla, anti nama ka piitan ollin pashshaay, upnaado. 14Atti' xoori, qoyra paxaara oppaayye markapa kodado. Ka kara kaatadda kode ka akka pisha karopa in kallini'i, karan ka laka tulan saale. 15Markapose oto' koonittooyye, derumaadi dunduma dippa sessa, paldumaadi dunduma kunda keni ka qa'antaadi, dunduma kunda sessa kode. 16Ka oppa' maskooteta kode ka akka xayxayta karan kalo'e, dunduma takka mina' kitto qussa qaropeela arta diishe. Ka qudattoppa desa xarra ishi' kode. Oto' koonittooyye, a riqa mina oli qareela sessa kode. 17Anti wa moonte arepa xata ca ka nessa oorsanna piisa patissa'en pisha pateetta piita qara' qeeda. Wa piita qara ca' piisa ka piraman. 18Ma xoori xaayti, ke ollin kodayteeta kodadaay, ke ka iskatteetaayti ka hellaatti ka haantowwa hellaatti ollin markapa karopa kala.
19“Akka ke olli pisha pateetta kela pahane'e, wa nessa qapa pisa oppa lakki lakki qape ka markapa karopa kalshe. Wa lakki lakki a ollin qapnnitta oppa xorma ka akkooteta ollin qape. 20Akka caadane'e, sanynyeeta xampira ka a pinaana shashakka isho a kutkutta pisa oppaayye, a lakki lakki kodden ka ke kapopa de'en. 21Ka wa ke ka uumatase markapa kara co piisa' damta kodda ollopa pohe ka markapa karopa kalsado.” 22Noohe ka wa Waaqa isha ajaje piisa kode. #Ip 11:7
Valið núna:
Mataafa Uumata 6: MaQu
Áherslumerki
Deildu
Afrita
Want to have your highlights saved across all your devices? Sign up or sign in