Mataafa Uumata 7
7
Pisha pateetta
1Waaqa ka oori Noohe' kide, “Xeltose are kitto oppa ke patta hanqeellumaan kallaanniiyyi, toolaayti piisa qeede ka ollin markapa karopa kala. 2Pinaana damamma oppaayye, tappa tappa xorma ka akkoteeta qeede ka a damammi in kinnini oppaayye lakki lakki xorma ka akkooteta qeede. 3Ka xampira oppaayye, tappa tappa xorma ka akkooteta qeede. Oto asse kootooyye, sanynyeeta pinaana ka a xampira piita qara in qitto. 4Kuyyaata tappa kammaayye an olkamma an mittinin maliiyyin kuyyaata kunda afuri ka halkeetta kunda afuri kara roopa roopsha. Wa nessa qapa piisa ka piita qara patan.” 5Noohe akka Yaahiwwe ishi' kide mina'e' kode.
6A pisha pateetta de'eneeyye, sitiiyyi para Noohe dippa lehi. 7Sitiiyyi, Noohe ka iskatteetaadi ka hellaadi isho haantowwa a hellaadi ollin pisha pateetta kela paha'e markapa karopa kalen. #Maati 24:38-39; Luqa 17:27 8Pinaana a damamma ka a damammi in kinnini ka xampira isho wa piita qara nessa oorsanna pisa oppaayye, 9ikka xorma ka akkooteta lakki lakki kodden ka akkima Waaqa Noohe ajaje mina'e, Noohe olli markapa karopa kalen. 10Kuyyaata tappa kammaayye, pisha pateetta ka roopa paayyen.
11A para Noohe dippa lehi kayeeyye, parose oppaayye leya a lammattati kuyyaata kudanka tappattatiiyyi, paadadda xati piita kela ca piisa ka arepeela kaamaden; maskootewwa pisha a moonta' kuli ka panamen. #Peti 2ta 3:6 12Roopa ka a olkamma in mittinin mali kuyyaata kunda afuri ka halkeetta kunda afuri roope. 13Kuyyaatase a roopa roopa paayyeeyye, Noohe ka iskatteetaadi ka hellaadi Seemi ka Kaami ka Yaafeeti isho haantowwaasso, takka'e markapa karopa kalen. 14Horeeta ka pinaana kutkutta ka a shashakka ka pinaana piitan desa titmanna isho xampira moonta pisa oppaayye, ishootta olli markapa karopa kalen. 15Wa nessa qapa pisa oppaayye, lakki lakki kodden ka Noohe kapopa markapa karopa kalen. 16Uumata nessa oorsanno pisa oppaayye, xorma takka takka ka akkooteta takka takka akka Waaqa ajaje qara'e, ikka markapa karopa kalen. Yaahiwwe ka oori xarrase a markapa' dufe.
17Pisha a pateetta a olkamma in mittinin mali kuyyaata kunda afuri ka halkeetta kunda afuri roopen. Pisha ka piita qareela koopaan aanen ka piita qareela markapa xaashen. 18Pisha ete piita qara' koopaan aanen ka karan xata akata sekaadeneeyye, markapa pisha qara'e oore ka pisha qara tittiitaawni. 19Pisha ka haka irrowwa piita a kukutta piisa qara pirraane'e, akata koopen. 20Ka irrowwa qara piren ka dunduma kudanka keni mina' kitton irrowwa qaropeela qapnaaden. 21Wa piita qara lellehna piisa horeeta ka pinaana ka xampira isho orra kuli ka piita piisa qara piramen. 22Wa nessa oorsanna piisa ka piita qaraayye piramen. 23Waaqa ka wa piita qara nessa qapa piisa, orra ka pinaana ka xampira isho wa piita qara ca ka lellehna piisa pashshe. 24Kuyyaata dippa ka kunda keni kara'e, umma pisha piita qaraayye kellaawa in paayyine.
Valið núna:
Mataafa Uumata 7: MaQu
Áherslumerki
Deildu
Afrita
Want to have your highlights saved across all your devices? Sign up or sign in