Muuduko 4
4
Keneke Ebeleke todoral Gooti Yawellu abuuwiyolo tovinokwono
1To'no'gwowi Adameke gami abolo Iviyokwe teyaul sumwonyo ino sumaleyokwe kwolaiyo sumwoluko sumo'nokakwono. Toro tov a'mwo toolluro kwolaiyo pwol yoma'no sumaiyokwe aro sajunokakwono. “Oo Gooti Yawelluro mollonumwaloduke tovida'ai kwolaiyo akal joma'mono.” Toro yajunyuno sumaiyokwe kwolaiyo toolluno yovo tov Kenolo amullowarokakwono. 2Toro mullowaro'no mwalno sumaiyokwe lukomgu aki aiko te kwolaiyo sumwoluko puruv sumo'nokakwono. Toro te Kenollu gagwai'yago Ebelollu somarokakwono. Toro todoral aguto gulluno sumaleyokwe toga gagwai'yago Ebelol sipsip toorai moduvomwallokwe sumo'nyajukekono. Aki gadai'yago Kenol wosamuju'womdo ton saujajukekono.
3Toro todoral mwalno sumaleyokwe iruko pullugwoji Kenol gami womdo tovida'ai wosamujuko pun mulomokabino sumaiyokwe Gooti Yawellu abuuwiyokaikono. 4#Hib. 11:4Aki Ebelol gami sipsip mulejai'nodupudo tooravuro sujuraiyo pwollu romino sumaiyokwe munollo sugudo ton dovomokabo'no Gooti Yawellu abuuwiyokaikono. Toro te Gooti Yawel Ebeleke'aro gamoro kwiyoka tokwe'aro tovalluno ilaiyo amollomarokaikono. 5Toro kuvi kuruv Keneke'aro gamoro wosamujuko kwiyoka togai'aro tonyuno'gwowi ilaiyo mamollomarokaikono. Toro tovino tov Kenol surodo bwotonyo kuunokaikono. Toro wuunyuno sumaiyokwe mesubuuto to'no airowopiyokaikono. 6Toro te Gooti Yawel Kenollu kuudoganokaikono. “Guu burowo'nyo kavlo tovino surodo doguunadopiyo? Aki mesubuuto airowopiyadokuudo tov buro'nyo'mo'mdeyo?” Kuudoganokaikono. 7Toro wuudoganyuno sumaiyokwe aro kuudokaikono. “Guvu sugudo subi tookujuno nuu ilaiyo nokwo molloguma'monyugono. Toro kuvi kuruv guu sugudo mibi to'gwowi ma'no ma'nodo tov gumi kaiyako igolagumeyo'mo aduuwaso. Ma'no ma'nodo su tov kuullujuluko pwolbusuko gumi galodovagunyo'mo tov wobo toru nopuu'naso. Toro te ma'no ma'nodo su tov gumi mido mollogumwallo'mo yodowo'jure kuvi kuruv guu uuwolo'bino'moneyokwe guureji neya domollomwalnogawono.” Gooti Yawel Kenollu toro kuudokaikono.
8 #
Mt. 23:35; Lk. 11:51; 1Jn. 3:12 Toruda'ai iruko pullugwoji Kenol gagwai'yago toollu aro kuudokaikono. “Navu kamikwako tomuu yomollowolo.” Kuudokaikono. Toro todoral kamikwako tomuu yomolluno sumaleyokwe toga Kenol gami gagwai'yago Ebelollu aromiyosokaikono.
9Me'no romiyosuno sumaiyokwe mwaloduke toga Gooti Yawel Kenollu aro kuudoganokaikono. “Gumi jugwai'yago Ebelol gadomuu dukomwallo?” Kuudoganokaikono. Toro kuudoganoka toga Kenol kuudokaikono. “Awiyo. Nuu su to kwollu mwonumwakonyugono. Nuu mi nyugwai'yago toollu mollomwalokwenyumaiyo.” Kenol toro kuudokaikono. 10#Hib. 12:24Toruda'ai Gooti Yawel Kenollu kuudokaikono. “Burowo'nyo sumadekudeyo? Jugwai'yago toolluro mujako tov kwako tovi me'no kuumokakwono. Toro tov a'mwo deko to'busuko anyudumoka tovi kuu'numokwono.” Kuudokaikono. 11Toro wuujuno sumaiyokwe aro kuudokaikono. “Guvu toro sumado tovino tov aga tabunyuwuulo akav gubwemekugono. Jugwai'yago aromiyosumado toolluro mujako tov kwako akavi me'no kuumokakwono. Toro te kwako mujako kuumoka su tovi mamwalbinekugono. Toro kweku kuruv kwako su tovi wuugollu'movo'bi pumuuno neya pla'binekugono. 12Toro tekwogu noonyumwonyu wosamuju'womdo aburaudubi su ton ilaiyo mabilapinogano. Aki gumi ago yiunokuudo mwallo'moneyokwe puru nonagutekwogugano. Yasuwa'no ga tomuu ga tomuu mwolomollumwalbinekugono.” Kuudokaikono.
13Toro kuudoka tovi Kenol wuu'no'no Gooti Yawellu aro kuudokaikono. “Awi. Tabunyu akav kula'nyo'maiyo. Bwotonyokwono. Nuu toro tov ku'nono mimekwonyugono. 14Guu kwako akai amanyudukwopimado tov guuge wobo toru mamwalosunonyugono. Toro tekwonyu pumuu yasuwa'no yomollodo'mure toga a'mwo pworo nuwonopi noromiyollusanubwepinekwonyugono.” Kenol toro kuudokaikono. 15Toro kuudoka tovi Gooti Yawel aro kuudokaikono. “Awiyo. A'mwo pwol gumi ku'nono maromiyagubweyonekono. Toro kuvi kuruv a'mwo pwol gumi aromiyagubweyo'ji toollu tabunyuwuulo bwotonyo kuunodo puruv nuubwemekono.” Kuudokaikono. Toro wuujuno sumaiyokwe toga Gooti Yawel Kenollu noromipiyokwe duuwallo'mo puruv gamoro kulako tovi kuubweyokaikono. 16Toro uubweno sumaiyokwe Kenol Gooti Yawellu wuugollu'mo'mno sumaiyokwe kwako pumuuno avlavokaikono. Toro tool, “Kwako yomollovo,” dodupudo toru'no plaino sumaiyokwe amwalokaikono. Kwako su toru womdo Idenda'ai kuujo tool sulopiyamoka tomgu wo'dowodokwono.
Kenolluro kwikweyago kwolaiyo sumo'nopo toorainokwono
17To'no'gwowi Kenol abolo puruv malluno sumaiyokwe sumwonyo yolno kwolaiyo sumwoluko sumo'nokakwono. Toro tov kwolaiyo pwol yoma'no sumaiyokwe Inookolo amullowarokakwono. Toro mullowa'no sumaiyokwe toga Kenol wagwolago bwotonyo puruv amodokaikono. Toro mojuno sumaiyokwe gami kwolaiyo Inookolluno kuudo yauro'no wagwolago su toru'no yovo tov Inookoru sowarokarukono. 18Toruda'ai Inookol aguto gulluno sumaiyokwe kwolaiyo pwol yawosuno'no Iratolo amullowarokaikono. Aki Iratol aguto gulluno sumaiyokwe kwolaiyo pwol yawosuno'no Mehuujaiyololo amullowarokaikono. Aki toruda'ai Mehuujaiyolol aguto gulluno sumaiyokwe kwolaiyo pwol yawosuno'no Metuusaiyololo amullowarokaikono. Aki toruda'ai Metuusaiyolol aguto gulluno sumaiyokwe kwolaiyo pwol yawosuno'no Lamekolo amullowarokaikono. 19Aki toruda'ai Lamekol abolo puruval amarokaikono. Toro tovalluno yovo tov Adakwe Silakwe tovallu amarokaikono. 20Toro te Adav kwolaiyo pwol yoma'no sumaiyokwe Jabalolo amullowarokakwono. Toro tool yiuwi'nokai sel ago te mwallo'mo tov kwolda'ai amollubworosokakwono. Aki yiuwi'nokai buulmokau ki'duvollo'mo kuruv kwolda'ai amollubworosokakwono. Jabalol toro amollubworosajukekono. 21Toro te aki gami gagwai'yago toolluno yovo tov Juubalolekono. Toro tool gita romiyo'mo tokwe'aro nogunyo wiporopto killo'mo tokwe'aro tovalluda'ai dato daromiyo'mo tov kwolda'ai amollubworosokakwono. Juubalol toro sumo'nyajukekono. 22Toruda'ai aki Lamekolluro abolo puruv Silav kwolaiyo pwol yoma'no sumaiyokwe Tuubal Kenolo amullowarokakwono. Toro tool noonyumwonyu muugo ton yakwollo'moneyokwe aiyon sallukwa'jo tokwe'aro aiyon kuunodo tokwe'aro tovalluda'ai sakwollajukekono. Tuubal Kenol toro sajukekono. Aki toro toollu jo'mwo tovino yovo tov Namovokwono.
23To'no'gwowi puga Lamekol gami abolo tovallu doma'no sumaiyokwe kuuguudo aro amadokaikono.
“Adavoo, Silavoo, nuu kemi kwolo Lamekolo tova'nyugono. Toro toonyuro yogalo akavi kevu neya duu'nyulo.” Lamekol toro doma'no sumaiyokwe aro kuudokaikono. “A'mwo pwol kwa'dalo anyabwo'ji toollu nuu noromiyosumekono. Aki a'mwo muugunyo pwol amunyokuuronumollo'ji kwollu kuruv yiuno'no noromiyosumekono.”
Amadokaikono. 24Aki kuuguudo puruv aro amadokaikono.
“Gooti tool aro me'no adokaikono. “A'mwo pwol Kenollu aromiyoso'ji tool tabunyu bwotonyo kuunodo nomaronekono.” Gooti tool toro adoka kuvi kuruv moro tabunyu kuubwemi to'gwowi bwotonyo maluko'nyo'maiyo. Gooti toolluro tovi nuuwolowonokwono. Toro te a'mwo pwol mi aromiyanubweyo'ji tool moro tabunyu su toro tov nomaronekono.”
Lamekol gami abolo tovallu toro kuudokaikono.
Iviyov kwolaiyo muuduko pwollu somaroka tovinokwono
25Toruda'ai Adameke Iviyokwe teyaul aki aiko te sumwonyo yolno kwolaiyo sumwoluko sumo'nokakwono. Toro te Iviyov kwolaiyo pwollu yoma'no sumaiyokwe adokakwono. “Oo kwolaiyo akal Kenol aromiyosoka Ebelolluro aiko toru mallo'moneyokwe Gooti tool anyamokaldeyo.” Toro tovino tov Iviyov kwolaiyo toolluno Setolo amullowarokakwono. 26Toro te Setol kwol kuruv aguto gulluno sumaiyokwe kwolaiyo pwol yawosuno'no Inoosolo sowarokaikono. Su toro togada'ai a'mwo tooro Gooti toolluno yovo Yaweloo tovi muuduko wuudodupu sulomoropiyajuporogano.
Valið núna:
Muuduko 4: SMB
Áherslumerki
Deildu
Afrita
Want to have your highlights saved across all your devices? Sign up or sign in
© 2022: Ethnos360 Sanford, Florida