Chenesis 1
1
1Ʋmmona ka̱ Chitokaka yʋt ʋba, micha yakni aiena ka̱ ikbi tok.
2Mihma yakni ʋt shahahbi bieka, micha nana kʋt ʋlhtaiyaha iksho bieka tok; mihma okhlili hʋt oka hofobi chito paknaka ya̱ onʋtoyula tok: mihma Chitokaka imi Shilombish ʋt oka pataiya paknaka ai o̱ kana̱hanli tok.
3Mihma Chitokaka yʋt, Tohwikelashke, achi tok: mihma tohwikeli tok.
4Mihma Chitokaka yʋt towikeli hʋt achukma ho̱ pisa tok: mihmʋt Chitokaka yʋt tohwikeli ash okhlilika ai iti̱ filʋmmichi tok.
5Micha Chitokaka yʋt tohwikeli ash, Nitak hochifo tok, mihmʋt okhlilika, Ninak hochifo tok: mihma opia kʋt, micha onnahinli kʋt nitak ʋmmona hatok.
6Mihma Chitokaka yʋt, Oka pataiya ka̱ itintakla ya̱ shutik osh talaiashke; micha mihi yosh oka ya̱ oka bi̱ka iti̱ filʋmmichashke, achi tok.
7Mihma Chitokaka yʋt shutik a̱ ikbi cha, shutik nutaka oka aiasha ka̱, micha shutik paknaka oka aiasha ka̱ iti̱ filʋmmichi tok: mihma yʋmohmi tok.
8Mihma Chitokaka yʋt shutik a̱ Ʋba hochifo tok: mihma opia kʋt, micha onnahinli kʋt nitak atukla hatok.
9Mihma Chitokaka yʋt, Oka pataiya shutik nutaka aiasha kʋt itiba fohkʋt atalaia achʋfa ho̱ ai itʋnahashke, mikma a shila yʋt haiakashke, achi tok: mihma yʋmohmi tok.
10Mihma Chitokaka yʋt ashila yash Yakni hochifo tok; mihmʋt oka itiba fohkʋt itʋnaha yash, Okhʋta hochifo tok: mihma yʋmmʋt achukma ho̱ Chitokaka yʋt pisa tok.
11Mihma Chitokaka yʋt, Yakni ʋt hʋshuk, haiyu̱kpulo ʋt nihi waya, micha iti ʋni ʋt ilap aiachʋfa ʋnit, nihi mʋt ilap akinli ho̱ fo̱ka ho̱, offochi na yakni paknaka ya̱ aiashashke, achi tok: mihma yʋmohmi tok.
12Mihma yakni ʋt hʋshuk, micha haiyu̱kpulo ilap aiachʋfa nihi waya, micha iti ʋni ilap aiachʋfa ʋni, nihi mʋt ilap akinli ho̱ fo̱ka ho̱, offochi tok: mihma yʋmmʋt achukma ho̱ Chitokaka yʋt pisa tok.
13Mihma opia kʋt, micha onnahinli kʋt nitak atuchina hatok.
14Mihma Chitokaka yʋt, Nitak a̱ ninak iti̱ filʋmmicha chi̱ kʋt tohwikelichi hʋt ʋba shutik a̱ hiohma̱yashke: micha nana isht ʋlhpisa kʋt kocha ilaiyuka nitak, micha afʋmmi aiena ka̱ isht ʋlhpisashke.
15Micha yʋmmak osh tohwikelichi yosh ʋba shutik a̱ ataloha cha, yakni ya̱ on tohwikelichashke, achi tok: mihma yʋmohmi tok.
16Micha Chitokaka yʋt tohwikelichi chito tuklo ho̱, tohwikelichi i̱ shahli kʋt nitak ak o̱ a̱yakma, tohwikelichi ik lauwo hokʋto ninak ak o̱ a̱ya hi yo̱ ikbi tok: mihmʋt fochik puta ka̱ aieninchit ikbi tok.
17Micha Chitokaka yʋt yakni ya̱ on tohwikelicha he yo̱,
18Micha nitak ma a̱ya he, micha ninak ma a̱ya he, micha tohwikeli kash okhlileka iti̱ filʋmmicha he yo̱, ʋba shutik a̱ talohli tok: mihma yʋmmʋt achukma ho̱ Chitokaka yʋt pisa tok.
19Mihma opia kʋt, micha onnahinli kʋt nitak ai ushta hatok.
20Mihma Chitokaka yʋt, Oka puta kʋt nana ilhko̱honli im ilhfiopak a̱sha ya̱ lauachit ikbashke; mikma hushi ʋt yakni paknaka ʋba shutik takla ya̱ helit itʋnowashke, achi tok.
21Micha Chitokaka yʋt nʋni hochito, micha nan okcha̱ya ilhko̱honli ilap aiachʋfa aiyukali oka yʋt lauachit ikbi ya̱ moma, micha hushi sanahchi a̱sha puta ilap aiachʋfa aiyukali ka̱ ikbi tok: micha yʋmmʋt achukma ho̱ Chitokaka yʋt pisa tok.
22Mihma Chitokaka yʋt yukpalit, Chelit hʋsh apakna cha, okhʋta puta oka ya̱ hʋsh alotashke; mikma hushi ʋt yakni ya̱ apaknashke, achi tok.
23Mihma opia kʋt, micha onnahinli kʋt nitak ishit tahlapi hatok.
24Mihmʋt Chitokaka yʋt, Yakni ʋt nan okcha̱ya puta ilap aiachʋfa aiyukali, micha nan ʋlhpoa, micha nana aka balʋlli, micha nampoa yakni paknaka a̱sha ilap aiachʋfa aiyukali ka̱ tobachashke, achi tok: mihma yʋmohmi tok.
25Micha Chitokaka yʋt nampoa puta ilap aiachʋfa aiyukali, micha nan ʋlhpoa puta ilap aiachʋfa aiyukali, micha nana hosh yakni paknaka om balʋlli puta ilap aiachʋfa aiyukali ka̱ ikbi tok: mihma yʋmmʋt achukma ho̱ Chitokaka yʋt pisa tok.
26Mihmʋt Chitokaka yʋt, Hatak a̱ ila hobachit pishno pi holba ho̱ kiloh ikbí: mikma nʋni okhʋta aiasha, micha hushi ʋba itʋnowa, micha nan ʋlhpoa puta, micha yakni moma, micha nana balʋlli puta yakni ya̱ om balʋlli ya̱ a mominchi hosh i̱ shahlashke, achi tok.
27Yohmi cha Chitokaka yʋt ilap akinli holba ho̱ hatak a̱ ikbi tok; Chitokaka holba ho̱ ikbi tok; nakni, micha tek itatuklo ho̱ ikbi tok.
28Micha Chitokaka yʋt yukpali tok, micha Chitokaka yʋt, Wayʋt hʋsh apaknashke, micha yakni ya̱ hʋsh alotowa cha, hʋsh imaiyachashke: micha nʋni okhʋta aiasha, micha hushi ʋba itʋnowa, micha nan okcha̱ya puta yakni paknaka itʋnowa moma ka̱ hʋsh i̱ shahli hashke.
29Micha Chitokaka yʋt, Yakeh! haiyu̱kpulo puta nihi waya yakni paknaka moma aiasha, micha iti puta iti nan ʋni nihi waya moma ka̱ hʋchim issa lishke: hʋchim ilhpak ahi oke.
30Mikmʋt nampoa puta yakni paknaka aiasha ka̱, micha ʋba hushi puta, micha nana puta yakni paknaka om balʋlli ilhfiopak a̱sha̱ ya̱, im ilhpak ahe mak o̱, haiyu̱kpulo okcha̱ki moma ka̱ im issa lishke, achi tok: mihma yʋmohmi tok.
31Mihma Chitokaka yʋt nana moma ikbi tuk ʋt pisa ma, yakeh! achukma fehna tok. Mihma opia kʋt micha onnahinli kʋt nitak ishit hannali tok.
Valið núna:
Chenesis 1: CHH
Áherslumerki
Deildu
Afrita
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913