Matius 11
11
1Lama Yesus naftutu monuk Ni manglarat buti resin du, I nti a ntate ain a ne ma nti kotar ma tomwat Yahudyar ramin a ne. Ma I nti iano ma nafwibar Ratu Ni Ngribatnir ma naftutu tomwatar ma ramin iane.
Yesus natanuk na Yohanes mangadiris
11:2-19
(Luk. 7:18-35)
2Noak a ne Yohanes mangadiris namin sel. Noak ma i ndengar ma tomwatar rasaur na safe ma Ray Silai nose, i nluan Ni manglartar ketnir ma rti rakmat Yesus ma renrat I. 3Ne sir rfalak, “Maken, Ko ye Ray Silai ma Ratu nyoding a ne lo, nre ka kam mdaf tomwat walyetar sa nbal?” 4Ne Yesus nfalak, “Mbyali kmi ma mfyalak ber Yohanes na safe-safe monuk ma msyalan ma mdyengar: 5Matbolar rakeban, mangamluktwar rmpan, mangampalwar rangamon a rbali, mangtokar radengar, mangmwatar rmorip a rbali, ma kufwibar Ibar Ngamone ber tomwatar ma rawatan a nbal.#Yes. 35:5-6; 61:1 6Ma ngamone ber tomwatar ma to ratliur Yakw nempa dedesar ma ralele Yakw.”
7Lama Yohanes ni manglartar rbali sir e Yesus ntabw ma natanuk na Yohanes ber tomwat ngayadin na iane. I nfalak, “Luryain e kmi mtyi msyalan Yohanes na ain letkape ma fen safe? Mtyi msyalan tomwate ma ni andaun to ntai farlan riar ma mnaur nanrir sir a ne e? Tate nre! 8Nre mtyi ma msyalan safe? Msyalan tomwate ma nfonak rabit ngafele e? Tate nre! Tomwate ma nfonak rabit ngafele ne namin lan rayar nir das silayar. 9Mpa mtyi ma msyalan safe? Mtyi msyalan nabyar sa e? Au, iane botuan desar, fali Yohanes silai i a nlengan nof nabi walyetar. 10Fali Yohanes ye ma nasusan tomwatar dalmir ma rlangun Yakw. Ma iane farlan ma Ratu nfalak na Kitap Lelerap dalam farye:
‘Msyalan, I ye ma kswiduk i,
Yakw klwuan i ma nbalun nof Ko, ma naflawar dalamtene ber Ko!’#Mal. 3:1
11Yakw kfwalak ber a kmi, ni botuan e nof tomwatar monuk na saryamprene ye to fen lese nbal ma ubany nlengan nof Yohanes mangadiris. Nempa noak ma Ratu neluk Rai ma nfarete tomwatar, sir ma to ubnir sasaf a ne keta ubnir a rlengan Yohanes mangadiris. 12Noak ma Yohanes mangadiris ntabw ni karyae i nafwibar feti Ratu neluk Rai ma nfarete tomwatar. Mpa terik lere ye tomwatar yadin ma reluk Ratu Ni tomwatar. Nempa tomwat yatkar yadin a nbal ma rose rteri sir. Sir rbangal Ratu Ni tomwatar a ne ma rareke ma rfarete sir. 13Ntabw nof luryain terik ma Yohanes nma lere ye, rarengi lo na safe ma terjadi ne. Ma safe-safe monuk a ne rarengi na tetetkar ma luryain e Ratu nal ber Musa ma nabyar nir kitpar.#Luk. 16:16 14Ratu nfalak na Kitap Lelerap dalam feti nabi Elia keta nma nbali saryamprene. Mpa farlan kmi milele safe ma Kitap Lelerap a ne nfalak, keta mifai desar feti, Yohanes a ne iane Elia lo.#Mal. 4:5; Mat. 17:10-13; Mrk. 9:11-13 15Ka mdyengar fen ngamone safe ma kfwalak ye!
16Keta kal safe la kpwasal tomwatar na are ye? Sir farlan kangkir ma ramtoran pasar, ma klop sa nabali nor klop sa ma rfalak:
17‘Kam mtef tibal#11:17 Mtef tibal na teks asli nfalak feti moup buli. ber a kmi, nempa to mlyampir ma myenari,
kam mbeu bew mangmwate, nempa to mtyasing.’
18Iane feleles farlan kmi a nbal. Kmi to mlyangun Yohanes ma to mlyangun Yakw nbal. Noak ma Yohanes nma e i to ntame ma nenum anggur. Ne kmi mfyalak, ‘Smwangat yatak nsung i.’ 19Nempa noak ma Yakw, Tomwate Anaky kmwa, Yakw ktwame ma kwenum anggur. Ne kmi mfyalak, ‘No msyalan tomwate ne! Nampayatak, manganabuk, natbwarin nor mangtak ulbatyar ma tomwat salar.’ Boloka kmi mfyalak Yakw farane, nempa tomwatar bise ma rafai Ratu Ni anfai silai. Sir rafai Ratu Ni anfai silai ne nof ma rsalan tomwatar ma rlarat Ningw anftutwar a ne nir wewelmpampan ngamonar.”
Ratu keta nukun tomwatar ma rasipur I
11:20-24
(Luk. 10:13-15)
20Mpene Yesus ndotar tomwatar ma ramin propinsi Galilea seriny baldu. Fali boloka nose ngrimpasalnar yadin na nir kotar a ne nempa sir to rmpeang ma rtate nir salar. 21“Suse desar tomwat Khorazim ma Betsaidar a kmi. Keta Ratu nukun a kmi maberat desar! Yakw kose ngrimpasalnar ber a kmi lo nempa to mtyate mir salar. Farlan luryain tomwatar na kote Tirus ma Sidon rsalan ngrimpasalnar ma Yakw kose ber a kmi lere ye, botuan feti rtate nir salar ma rampalim doan ye lo.#Yes. 23:1-18; Yeh. 26:1; 28:6; Yl. 3:4-8; Am. 1:9-10; Za. 9:2-4 22Nempa Yakw kfwalak ber a kmi: Nait ma Ratu nukun saryamprene e keta nukun a kmi maberat a nlengan nof tomwatar na kote Tirus ma Sidon. 23Ma tomwat Kapernaum a kmi a nbal! Ka kete mdyaun feti keta Ratu nfair a kmi far surga. Tate desar! Ratu keta nyebas a kmi far neraka!” Fali Yakw kose ngrimpasalnar ber a kmi nempa to mtyate mir salar. Farlan luryain Yakw kose ngrimpasalan ber kote Sodom, feleles farlan ma kose ber a kmi lere ye, botuan feti Ratu to nukun kote Sodom, ma kote ne lolone namin terik lere ye. #Kej. 19:24-28; Yes. 14:13-15 24Nempa Yakw kfwalak ber a kmi, “Nait ma Ratu nukun saryamprene keta nukun a kmi maberat nlengan nof tomwatar na kote Sodom.”#Mat. 10:15; Luk. 10:12
Mya ma takmat Yesus nema nafline dalminrar
11:25-30
(Luk. 10:21-22)
25Noak a ne Yesus nsampayang ma nfalak, “O Amo, Ko ye Mangnrur Silai ma mkwuase langit ma saryamprene. Yakw kose alang ber Ko, fali mfwatutu kabanir monuk a ne ber tomwatar ma to rafai sasaf. Nempa mumudim ber mangafayar ma nir andaun ngamonar. 26Amo, iane Ko Nim mpempeang. 27Ma Ko mwal safe-safe monuk ber Yakw lo. To tomwate fen lese ma nafai feti Yakw ye Anaky, lan Amangw. Farlan a nbal, to tomwate fen lese ma nafai Amangw, lan Anaky. Ma keta kufbwotin Amangw a nbal ber tomwatar klwarat Ningw mpempeang.”#Yoh. 3:35; 1:18; 10:15
28Wangur kmi mtyang lo ma to bomir myal ma mibare mir suse ne. Mpa mya ma mikmat Yakw ma kalin suse ne kof a kmi, nema kose ma mryase mperane. 29Ka myose mlyarat safe ma kfwalak ma kuftutu ber kmi a ne. Fali Yakw kswabar ma kmwarkein ma kose ma mryase mperane.#Yer. 6:16 30Fali Ningw faretar ma kal ber a kmi a ne merawe ma myose mlyarat, ma to nose ma mkyoman suse.
Valið núna:
Matius 11: YMD
Áherslumerki
Deildu
Afrita
Want to have your highlights saved across all your devices? Sign up or sign in
© Yayasan Pemberdayaan Masyarakat Desa © Wycliffe Bible Translators, Inc. All rights reserved.