Iivan 2
2
Kuanan svuad՚bu
1Kolmandennu päivänny piettih Galilein Kuanas svuad՚bua. Iisusan muamo oli sie, 2dai Iisus da Hänen opastujat oldih kučuttu svuad՚bah. 3Keskel svuad՚bua loppiettihes viinat, i muamah sanoi Iisusale: «Heil ei ole viinua.» 4No Iisus vastai: «Naine, jätä minuu rauhah. Minun aigu ei vie tulluh.» 5Hänen muamah sanoi käskyläzile: «Midä Häi teile käskenöy, se luajikkua.»
6Sie oli kuuzi tyhjiä kiviast՚ettu, kudamis piettih vetty jevreilöin vieron mugazih puhtastundoih näh. Net oldih kahten kolmen miärän#2:6 Yksi miäry oli läs n՚elliäkymmendy litrua. suuruot. 7Iisus sanoi käskyläzile: «Täytäkkiä astiet viel», i hyö täytettih net laidazii myö. 8Sit Häi sanoi: «A nygöi ammuldakkua siepäi da viegiä pidoloin vahnimale», i hyö viedih. 9Vahnin opii vetty: se oli muuttunuh viinakse. Häi ei tiedänyh, min tiettih käskyläzet, kudamat ammuldettih vetty, kuspäi viinu oli tulluh. Häi kučui sulhazen 10da sanoi: «Enzimäzekse taritah hyviä viinua, a sit konzu svuad՚burahvas algau humalduo, taritah pahembua. A sinä olet pietellyh hyvän viinan täh suate.»
11Tämä oli Iisusan enzimäine tunnusruado, tämän Häi luadii Galilein Kuanas. Täl Häi ozutti oman taivahallizen valgien, i Hänen opastujat uskottih Häneh. 12Tämän jälgeh Iisus dai Hänen muamo, vellet da opastujat mendih Kapernaumah i oldih sie päivy-toine.
Iisus puhtastau jumalankoin
(Matf. 21:12-13; Mark. 11:15-17; Luk. 19:45-46)
13Jevreilöin Äijänpäivän pruazniekku oli tulos, i Iisus lähti Jerusalimah. 14Jumalankois Häi tabai niilöi, kudamat myödih häkkilöi, lambahii da kyyhkölöi. Istui sie d՚enganvaihtajiigi. 15Iisus luadii nuorupalois pletin i ajoi kaikkii heidy häkkilöinneh i lambahinneh jumalankoispäi. Häi lykii d՚engoinvaihtajien d՚engat muah i kuadoi heijän stolat. 16Kyyhkölöin myöjile Häi sanoi: «Viegiä iäre linduzet! Älgiä luajikkua minun Tuatan taloidu torgukohtakse!» 17Sit opastujile juohtuttih mieleh Pyhien Kirjutuksien sanat: «Jumalankoin palavu puolistamine syöy Minuu.»
18Jevreilöin vahnimat sanottih Iisusale: «Mittumalbo tunnusruavol voit ozuttua, ku sinul on valdu nenga ruadua?» 19Iisus vastai: «Levitäkkiä tämä jumalankodi, i kolmeh päiväh minä sen nostan uvvessah.» 20Sit jevreit sanottih: «Tädä jumalankodii azuttih n՚ellikymmen kuuzi vuottu. Sinägo sen nostazit kolmes päiväs?» 21No jumalankodih näh paistes Iisus pidi mieles omua rungua. 22I sit, konzu Häi nouzi kuollieloispäi, opastujile juohtuttih mieleh nämä Hänen sanat, i hyö uskottih Pyhih Kirjutuksih da sih, midä Iisus oli paissuh.
23Konzu Iisus Äijänpäivän pruazniekan aigua oli Jerusalimas, monet uskottih Hänen nimeh, ku nähtih Hänen tunnusruavot, kudamat Häi luadii. 24No iče Iisus ei avavunnuh rahvahale, Häi vet tiezi heidy kaikkii. 25Hänele ei pidänyh nikenen sanua ristikanzah näh, Häi tiezi, ken midä sydämes kandau.
Valið núna:
Iivan 2: LIVVI
Áherslumerki
Deildu
Afrita
Want to have your highlights saved across all your devices? Sign up or sign in
(c) Biblienkiännändyinstituuttu, Helsinki 2003