मात्ति 27
27
येसु पिलातास सोरि
(मारकुस १५:१; लुका २३:१-२; युहान्ना १८:२८-३२)
1एका भ्यानिक् ख्वाप्पा गाडुवाडाङ्बाचि हिट्नुङ् याप्मिचिगा ओठेडोङ्चि येसु सेप्मा लाउङ्सा उन्ङाना बिरुद्दाङि उमुन्डुब्टे॥ 2हिट्नुङ् हिट्नागाँ येसु ओलाबुङ् ओखाट्टुए, हिट्नुङ् हाकिम पिलातास जिम्मा उपिडुए॥
याहुदा सियाना
(मुलिचेला टोॽवा १:१८-१९)
3टब येसु धोका कापिबा याहुदाङा उन् सेप्माना रिङ् ठाहा टोगुङ् हिट्नाङाना आड्डिक् उनिङ्ग्वा टुगाउङ् काएल्-काबु लिसे, हिट्नुङ् हिट्ना रुपाक्ङाना तिस राङ् नोक्माबिमाचि लोङ्सा गाडुवाडाङ्बाचि हिट्नुङ् ओठेडोङ्चि सोरि खाडे॥#मुलिचेला टोॽवा १:१८-१९ 4हिट्नुङ् हिट्नागा लोडुचे, “आङा फाट्टुर मालेना याप्मि धोका पिडुङुङ् पाप चोगुएसुङे॥”
टरो हिट्नागाँ ओलोडुए, “आन्याँ पाक् याप्मिओलोयुक्ना? नाउम्टे खान्ङाना कारिङ् गोलो॥” 5ना रिङ् खेम्सुङ् याहुदाङा हिट्ना रुपाङाना राङ्चि माङ्ठाना भिट्रा लेप्टुङ् हिट्ना खाडे, हिट्नुङ् छुडासिए॥
6गाडुवाडाङ्बाचिङा हिट्ना राङ् ओकोबुङ् ओमाट्टुए, “ना राङ्उम् ओफाबा युङ्माना माङ्ठानाङाना बाकासङि युङ्मा ओचेट्नुना लिनिना, पोङ्भोने नाम्टे याप्मि सेडुम्नाँ हुङ्माना ओफाबा ए॥” 7हिड्डेउङ् हिट्नागा उन्चि उन्चि रिङ्पान् ओचोगाउङ् हिट्ना ओफाबाङा भारागा याप्मिचिगा लास हुम्मा लोङ्सा कुमालेङाना स्वाँरा उइनुए॥ 8हिड्नाड्डेउङ् हिट्ना स्वाँरा हाट्ले सोम्मा चा “हेलिक्ङाना स्वाँरा” ओलोडुना॥
9टब यारमिया माङ्काटाङा माट्टुना ना रिङ् युडे– “इस्राएलङिगा याप्मिचिङा उन् मोल्याँ ओचोगुना दाम्बाक् रुपाङाना तिस राङ् डाना॥ हिट्ना हिट्नागाँ ओलाडुए, 10हिट्नुङ् टाङ्बाङा याङ्लोडा गाड्डे डोक् हिट्नागाँ कुमालेङाना स्वाँरा इम्मा लोङ्सा हिट्ना ओफाबा चालाँ ओचोगुए॥”#जाकारिया ११:१२-१३; यारमिया ३२:६-१५
येसु पिलातास सोरि
(मारकुस १५:२-१५; लुका २३:३-५,१३-२५; युहान्ना १८:२९–१९:१६)
11येसु रोमि हाकिम ओटोकानाङि येबे, हिट्नुङ् हिट्नाङा येसु नाड्डे पिक्सा सिलाप्टुए, “पाक् खान् याहुदि याप्मिचिगा हाङ्बा इ?”
येसुङा लोडुए, “खान्ङा डोक् हिड्डे आमाट्टुएट्टु॥” 12हिट्नुङ् गाडुवाडाङ्बाचि लोक् ओठेडोङ्चिङा येसु याप्मा रिङ्ङि फाट्टुर ओलाबुए, टरो उन्ङा पाक्चा माट्टुवाट्टुन्॥ 13टब पिलातासङा उन् नाड्डे पिक्सा लोडुए, “खान्ङाना बिरुद्दाङि हिट्नागाँ आम्टेप्मा रिङ्ङि फाट्टुर मालाब्येट्, पाक् खान्ङा आखेम्सुन्गा इ?” 14टरो येसुङा ठिक् रिङ्ङाना चा उत्तार पिडुवाट्टुन्चिन्॥ ना निसुङ् हाकिम चा आड्डिक् डोङ् ठोङ्डे॥
15याहुदिचिगा छुट्कारा चाडा बेला याप्मिचिङा ओसेगुना ठिबाङ् खाम्बाङ्ङि ठायाना याप्मि हाकिमङा लेप्माना चालान् डाना॥ 16हिट्ना बेला बारब्बा निङ् लिसाना ठिबाङ् निङ्ला मुक्टाना कैदि खाम्बाङ्ङि डाना॥ 17हिट्नुङ् याप्मिचि उछुमाउङ्, पिलातासङा हिट्नागा सिलाप्टुचे, “खानि खोड्डे आपिगिटिगा? आङा खानिलाउङ्सा खोनाम्बाक् लेडुङ्ना? बारब्बा इ खिरिस्ट ओलोडुना येसु इ?” 18पोङ्भोने धारमिक् ओठेडोङ्चिङा येसु डाहा ओचोगुङ् डोक् उन् जिम्मा उपिडुना नुङ् उन्ङा ठाहा टोगुएसुना॥
19पिलातास न्याए चोक्माना बैठाक्ङि युङेसाना बेला ओपाङ्डाङ्माङा उन् नाड्डे पिक्सा खाबोर हाक्टुए, “हिट्ना फाट्टुर मालेना याप्मि पाक्चा मेट्टुन्, पोङ्भोने हाट्ले युसा उन्ङाना बारेङि सेम्माङ् माक्टुङ्नाँ आङा आड्डिक् दुखे टोगुएसुङे॥”
20टरो गाडुवाडाङ्बाचि लोक् ओठेडोङ्चिङाम्बाक् याप्मिचिगा खिमेयाङ्मे बारब्बाम्बाक् याप्मिलेडाबिडा हिट्नुङ् येसुम्बाक् सेडु पिक्सा मुसिक्पा ओचाट्टुचे॥ 21हाकिमङा फेरि सिलाप्टुचे, “नागाचि इप्पाङ्ङि खोनाम्बाक् आङा खानि लोङ्सा लेडुङ्ना नुङ् खानि आमिट्टिटिगा?”
हिट्नुङ् हिट्नागा उपिगे, “बारब्बा॥”
22हिट्नुङ् पिलातासङा हिट्नागा लोडुचे, “हिड्डे भोने खिरिस्ट ओलोडुना येसुम्बाक् आङा पाक् चोगुङ्ना टे?”
हिट्नागा सोब्बेङा ओलोडुए, “हिट्ना खाप्चेङि छुमा कोन्युक्!” 23पिलातासङा लोडुचे, “पोङ्? ना याप्मिङा पाक् आपाराध चोगुएसुएना टे?”
टरो हिट्नागा औधि राट्सा नाड्डे उपिगे, “हिट्ना खाप्चेङि छुडु!”
24टरो पिलातासङा पाक्चा चोक्मा हिनिना निसुए, हिट्नुङ् हाट्ले खालाङ्बालाङ् लियुक् नुङ् किट्टाउङ् उन्ङा याप्मिचिगा टोकानाङि चुवाङा उमुक् वासिडुङ् लोडुचे, “ना याप्मिङाना ओहेलिक्ङाना जिम्मा आङि ओठानिचा ए, खानि डोक् ओठायाक्॥”
25हिट्नुङ् सोब्बे याप्मिचिङा ओलोडुए, “ना याप्मिङाना ओहेलिक्ङाना फाट्टुर आन्याँ हिट्नुङ् आन्याँ छालेट्चिङि डोक् ओठायाक्॥”
26टब पिलातासङा हिट्नागा लोङ्सा बारब्बा लेडुबिडुचे, टरो येसुम्बाक् कोरराङा लेम्मा उटिलिङ्गाचि लोडुचे हिट्नुङ् खाप्चेङि छुमा जिम्मा पिडुचे॥
टिलिङ्गाचिङा येसु खिजेक्पा ओचाट्टुना
(मारकुस १५:१६-२०; युहान्ना १९:२-३)
27हिट्नुङ् पिलातासङाना इम्टेप्मा उटिलिङ्गाचिङा येसुम्बाक् हाकिमङाना हाङ्पाङ् भिट्रा ओखाट्टुए, हिट्नुङ् सोब्बे टिलिङ्गाचि उन्ङाना याम्बा-नायाम्बा उछुमे॥ 28हिट्नागाँ ओलोट्लिङ् ओफेन्डुबिडुङ् हाङ्बाङा वाडुना गाड्डेना फाना लोट्लिङ् उन् ओमेट्टुए॥ 29हिट्नागाँ उटिउँबाङाना पागारि ओचोगुङ् ओटेहेक्ङि ओमेट्टुए, हिट्नुङ् हिट्नागाँ उछुप्टाङ् उमुक्ङि पारयाङ् उयुङ्सुबिडुए, हिट्नुङ् ओटोकाना सोरि गुङ् ओचोगाउङ् नाट्डे पिक्सा खिजेक्पा ओचाट्टुए, “हाउ याहुदिचिगा हाङ्बा, स्या मेट्ने॥” 30हिट्नुङ् हिट्नागाँ ठ्या ओठोक्टुए, हिट्नुङ् हिट्ना पारयाङ्ङा ओटेहेक्ङि ओलेम्सुए॥ 31हिट्नुङ् उन् खिजेक्पा चाट्मा उहिडुङ् हिट्नागाँ हिट्ना लोट्लिङ् ओफेन्डुबिडुए, हिट्नुङ् फेरि उन्ङा वाडुना ओलोट्लिङ् ओमेट्टुङ् उन् खाप्चेङि छुमा लोङ्सा ओखाट्टुए॥
येसु खाप्चेङि उछुडुना
(मारकुस १५:२१-३२; लुका २३:२६-४३; युहान्ना १९:१७-२७)
32लाम्बोङि ओखाडागेट्टाना बेला हिट्नागाँ सिमोन उनिङ् लिसाना कुरेनि खालाङ्गाङिना ठिबाङ् याप्मि उटुबुए॥ हिट्नुङ् हिट्नागाँ हिट्ना याप्मि येसुङाना खाप्चे खुमा ओमेट्टुए॥ 33हिट्नुङ् हिट्नागा गालगाथा ओलोडुना डेन्ङि ओटासुए॥ (गालगाथाङाना उटुप्बाक् “नाम्जिङ् डेन्” लियुक्)॥ 34हिट्नुङ् हिट्नागाँ येसु खिक्ना थोक् ओठेन्डुना आङ्गुरङाना इमालिङ् ठुङ्मा उपिडुए, टरो उन्ङा ठोट्टुङ् हिट्ना ठुङुवाट्टुन्॥#छाम्लोमा छाप्ला ६९:२१
35जब हिट्नागाँ येसु खाप्चेङि उछुडुए, हिट्नुङ् हिट्नागाँ ओलोट्लिङ् चिट्ठा ओठेन्डुङ् ओहान्डुजोए॥#छाम्लोमा छाप्ला २२:१८ 36हिट्नुङ् हिट्नि उयुङाउङ् हिट्नागाँ येसु ओकोडुए॥ 37“येसु, याहुदिचिगा हाङ्बा” पिक्सा छेप्बालाक् उन्ङाना बिरुद्दाङिना दोस पाट्रा ओखेङ्सुबिडुए॥ 38येसु खाप्चेङि उछुडुनाँ उन्लोक् इप्पाङ् याङ्काखुट्चिङि ठिबाङ् उछुप्टाङ्लेङ् हिट्नुङ् आरको ओफेङ्साङ्लेङ् ओचोगुचिउङ् हिट्नागाँ खाप्चेङि उछुडुचे॥
39हिट्ना लाम्बो उलिसाउङ् ओलाम्टिगा याप्मिचिङा उन्चि टेहेक् वान्सा उन् खिजेक्पा ओचाट्टुए,#छाम्लोमा छाप्ला २२:७; १०९:२५ 40हिट्नुङ् ओलोडुए, “हाउ माङ्ठाना होडुङुङ् सुम्बोक् लेम्बा डोक् चोगुङ्टुङ् पिक्ना याप्मि, खान् आप्पे लोङ्सा हिङुजो॥ हिट्नुङ् खान् माङ्हाङ् छा भोने, खाप्चेलाम्मा होन्डाउङ् यो ठाया उङ्सा॥”#मात्ति २६:६१; युहान्ना २:१९
41हिट्डेडोक् गाडुवाडाङ्बाचि, धारमाबिधि काहिसिक्बाचि लोक् ओठेडोङ्चिङा चा उन् खिजेक्पा ओचाट्टुङ् नाड्डे ओलोडुए, 42“नाङा आरु याप्मिचिउम् हिङुचे, टरो आप्पे लोङ्साम्बाक् हिङ्मा हिडुन्ना॥ ना इस्राएलङाना हाङ्बा भोने, हाट्ले खाप्चेलाम्मा होन्यु उङ्याक्, हिट्नुङ् एडोक् आन्याँ ना बिस्वास चोगुम्टुम्मा॥ 43नाङा माङ्हाङ्ङि भोरोसा चोगुटु, हिट्नुङ् माङ्हाङ्ङा ना लाउङ्सा निङ्ग्वा चोगुटु भोने हाट्ले डोक् छुट्कारा उपिडुवाक्, पोङ्भोने नाङा ‘आङा माङ्हाङ् छा’ पिक्सा माट्टुना डाना॥”
44हिट्नुङ् उन्लोक् खाप्चेङि उछुडुचिगा याङ्काखुट्चिङा चा नाड्डे पारा डोक् उन् खिजेक्पा चाट्टाचुए॥
येसु सियाना
(मारकुस १५:३३-४१; लुका २३:४४-४९; युहान्ना १९:२८-३०)
45हिट्नुङ् लेन्ना बारो लेम्सुना बेलालाम्मा सुम्बोक् लेम्सुना सोम्मा देस टेप् डुम्बारिक् डुम् लिसे॥ 46सुम्बोक् बाजेलेङ् येसु नाड्डे पिक्सा टुक्लोक् राट्टे, “इलोइ इलोइ, लामा साबाखाथनि?”#छाम्लोमा छाप्ला २२:१ #२७:४६ ना छेप्बालाक् आरामाइक् रिङ् ए॥ ना रिङ्ङाना उटुप् नाड्डे लियुक्, “हाउ आमाङ्हाङ्, आमाङ्हाङ्, खान्ङा आङा पोङ् याङ्आनाडाङेना?” 47हिट्नि ओयेबेसागा माड्डे आम्टेप्मा याप्मिचिङा ना रिङ् ओखेम्सुङ् नाड्डे उपिगे, “ना याप्मिङाउम् एलिया गोलो छेम्डुएट्टु॥”
48हिट्ना बेला डोक् हिट्नागा माड्डे ठिबाङ् पिन्डा खाडाउङ् सुना इमालिङ्ङि झुम्रो लुम्सुङ् आप्टुए हिट्नुङ् हिट्ना झुम्रो लाहुरिक्ङाना ओछोम्बोङि खेङ्सुङ् येसु ठुङ्मा पिडुए॥#छाम्लोमा छाप्ला ६९:२१ 49टरो आरु नाट्डे उपिगे, “पुयुम् ए, एलिया उङ्युङ् ना हिङुटुनि टे॥”
50टब येसु फेरि टुक्लोक् राट्टे हिट्नुङ् ओसोक्मा लेडुए॥ 51हिट्ना बेला डोक् माङ्ठानाङि ओखेङ्सुएसुना पारदा इप्पोक् ओफारा लिसाउङ् उठुङ्लाम्मा उछिक् सोम्मा सेङ्से॥#पारस्थान २६:३१-३३#२७:५१ ना पारदाम्बाक् सेङ्सेङ्ना ठोङ् हिट्नुङ् आड्डिक् सेङ्सेङ्ना ठोङ्ङि ओखेङ्सुना पारदा डाना॥ माङ्हाङ्ङा याप्मिचि निमेट्मालाउङ्सा ना पारदा सेङ्सुए, हाट्ले सानिङ्डाङ्बाचि एरोक् माखाक्, ख्वाप्पा याप्मिचि उन्ङि खाप्मा उहियुक्॥ हिट्नुङ् नारा वान्डे हिट्नुङ् याक्ठेरेक्चि ओहोडे, 52उहुम्पाचि ओङ्से, हिट्नुङ् उसियाडागा धारमोति याप्मिचि जोम् उहिङ्ग्वाट् उलिसाउङ् ओकोबे॥ 53हिट्नुङ् हिट्नागा उहुम्पालाम्मा ओहोन्डे, हिट्नुङ् येसु सियानालाम्मा उहिङ्ग्वाट् लिसा कोबाउङ् हिट्नागा सेङ्सेङ्ना खालाङ्गाङि उलिगे हिट्नुङ् जोम् याप्मिचिङि ओठेट्टे॥
54हिट्नुङ् लुक्लेमा काडाना हिट्नुङ् हिट्नि लिसाना घाटाना उनिसुङ् येसु ओकोडुङ् उयुङासागा काप्तान लोक् उन्लोक् उलिसागा आड्डिक् उकिट्टे, हिट्नुङ् हिट्नागाँ नाड्डे ओमाट्टुए, “छेम्बा डोक्, ना याप्मिउम् माङ्हाङ् छा डोक् रैछो॥”
55हिट्नि गालिललाम्मा ओटायागा जोम् मेन्झेमाचि ओवासेट्टागा, हिट्नागाँ लाप्माङ्लाम्मा हिट्नि लिसागा सोब्बे रिङ् उपुयेट्टुगा॥ हिट्नागाँ येसु घुवार फासा गालिललाम्मा डोक् उन् रोक् रिक्सा ओआबैसागा॥#लुका ८:२-३ 56हिट्नागा माड्डे मारियाम माग्दालिनि, याकुब हिट्नुङ् योसेफङाना उमा मारियाम, हिट्नुङ् जाब्दियाङाना येम्बेछा उइछाचि याकुब लोक् युहान्नाङा उमा डाना॥
येसु उहुम्पाङि उयुङ्सुना
(मारकुस १५:४२-४७; लुका २३:५०-५६; युहान्ना १९:३८-४२)
57हिट्नुङ् युसाना पाका आरिमाथियाङिना योसेफ उनिङ् लिसाना ठिबाङ् वागाठागा याप्मि टाए॥ उन् चा येसुङा ओचेला डोक् डाना॥ 58हिट्ना पिलातास सोरि खाडाउङ् येसुङाना ओलास नाक्टुए, हिट्नुङ् पिलातासङा चा ओलास उन् पिमा लोङ्सा आग्याँ पिडुचे॥ 59योसेफङा ओलास खाट्टुङ् ठिक् ओछोङ्ग्वाट् नुना सुति लोट्लिङ्ङा रिगुए, 60हिट्नुङ् हिट्नाङा लुङ्गेॽवा फाडुङ् आप्पे लाउङ्सा चोगुना ओछोङ्ग्वाट् ओहुम्पाङि युङ्सुए॥ हिट्नुङ् ठेना लुङ्गेॽवाङा ओहुम्पाङाना ओयासिङि टेप्टुढोङ् उन् हिट्नालाम्मा खाडे॥ 61मारियाम माग्दालिनि हिट्नुङ् आरको मारियामम्बाक् ओहुम्पाङाना चिपा याम्बा युङैसाचिगा॥
टिलिङ्गाचिङा येसुङाना ओहुम्पा ओकोडुना
62आरको लेम्बा, युङ्माना लेम्बा#२७:६२ सुकुबारम्बाक् याहुदिचिङा उन्चि युङ्माना लेम्बा लाउङ्सा टेयार ओचोगुगा॥ सान्साबारम्बाक् उन्चि युङ्माना लेम्बा लिसे, हिट्नुङ् हिट्ना बेला हिट्नागा पाक्चा टोॽवा ओचोक्निगा॥ गाडुवाडाङ्बाचि हिट्नुङ् फारिसि याप्मिचि पिलातास सोरि उछुमे, 63हिट्नुङ् हिट्नागाँ ओलोडुए, “आडाङ्बा, आन्याँ मिट्टुएसुम्मे हिट्ना कासुब्बाङा उहिङ्ग्वाट् लिसानाँ ‘आङा सिङाउङ् सुम्बोक् लेम्बा उहिङ्ग्वाट् लिङा’ पिक्सा माट्टुएट्टुना डाना॥#मात्ति १६:२१; १७:२३; २०:१९; मारकुस ८:३१; ९:३१; लुका ९:२२; १८:३१-३३ 64हिट्नाड्डेउङ् सुम्बोक् लेम्बा सोम्मा हिट्ना ओहुम्पा सुराक्छित युङ्मा लाउङ्सा कोमेट्टुचि॥ हिट्डे लिनेट्नि भोने ओचेलाचि ओटायुङ् ओलास याङ्उखुट्टुङ् खाप्मा उहिडुटु, हिट्नुङ् ‘उन् टे सियानालाम्मा उहिङ्ग्वाट् लिसाउङ् कोबे’ पिक्सा याप्मिचि ओलोडुचिचि॥ हिट्नुङ् नाउम्टे पाइलेना धोका नुङ्ना चा आझै ओचाफेन्मा लियुक्॥”#२७:६४ पाइलेना धोकाम्बाक् येसुङा ओचेलाचिङा उन् मासिह नुङ् ओलोडुना रिङ् डोक् हिट्नागाँ उमिट्टुना डाना॥ 65हिट्डे लिसाउङ् पिलातासङा हिट्नागा लोडुचे, “टिलिङ्गाचि खाट्टानुम्चिम् खाडानि, हिट्नुङ् खानिङा आहिडुम्लोक् खोड्डे पारिक् सुराक्छे लियुक्ना हिट्नाड्डे चोगानुम्॥” 66हिट्नुङ् हिट्नागा ओखाडाउङ् ओहुम्पा सुराक्छे चोक्माउङ्सा ओहुम्पा ओटेप्टुना लिङ्गेॽवाङि छाप् लाहाब् ओचोगुए, हिट्नुङ् टिलिङ्गाचि उयुङ्सुचिउङ् कोमेप्मा ओमेट्टुचे॥
Valið núna:
मात्ति 27: APH
Áherslumerki
Deildu
Afrita
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society