मात्ति 26
26
येसु सेप्माना योजाना
(मारकुस १४:१-२; लुका २२:१-२; युहान्ना ११:४५-५३)
1येसुङा नागा सोब्बे रिङ् माप्मा हिडुङ् ओचेलाचि लोडुचे, 2“खानिलोङ्सा ठाहा डोक् युङ्ग्वा, हाट्लेना इप्पोक् लेम्बा ओएङ्स्वा छुट्कारा चाडा मानाँ चोक्माना बेला लियुक्, हिट्नुङ् याप्मि छा खाप्चेङि छुमा उन्चि मुक्ङि उपिडुटु॥”#पारस्थान १२:१-२७
3हिट्ना बेला कैयाफा ओलोडुना सानिङ्डाङ्बा युङ्ना पाङ्ङि गाडुवाडाङ्बाचि हिट्नुङ् याप्मिचिगा धारमाबिधि काहिसिक्बाचि उछुमे॥ 4हिट्नुङ् हिट्नागाँ खोड्डेउङ् येसु सोगोप् लाब्माना हिट्नुङ् सेप्माना नुङ् निङ्ग्वा ओचोगुए॥ 5टरो हिट्नागाँ ओमाट्टुए, “चाडा बेलाङिम्बाक् नाड्डे चोगिन्चा, नाभाउङ् याप्मिचिङि खालाङ्बालाङ् लियुक्॥”
येसु बेथानियाङि आभिसेक् चोक्बालाक्
(मारकुस १४:३-९; युहान्ना १२:१-८)
6हाट्ले येसु बेथानिया युक्टाम्ङि सिमोन ओपाङ्ङि खाडे, हिट्ना पाइले कोर रोग लाहाब् लिसाना डाना॥ 7ठिबाङ् मेन्झेमा लुङ्गेॽवाङा चोक्बालाक् सिङ्गामरमर ओलोडुना सिसाङाना बोटालङि माहाङ्गो आट्टार आप्टुङ् येसु सोरि आबे, हिट्नुङ् येसु चामा चासिङा युङाना बेला हिट्ना आट्टार उन्ङाना ओटेहेक्ङि हुङ्सुबिडुए॥#लुका ७:३७-३८ 8ना रिङ् उनिसुङ् चेलाचिगा उन्चि याक्लेडे, हिट्नुङ् हिट्नागा उपिगे, “नाट्टेप् औधि माहाङ्गो आट्टार पोङ् खेरोक् लेप्टुएना? 9पोङ्भोने ना आट्टार याप्माङि छोङ्सुङ् हिट्ना ओफाबा पाक्चा ओवानिगा याप्मिचि पिडुचिनाँ लिसाएट्टे बे॥”
10टरो येसुङा ना रिङ् ठाहा टोगुङ् हिट्नागा लोडुचे, “पोङ् ना मेन्झेमा याङ्छामा आचाट्टुम्टुम्ना? नाङा आङा लोङ्साउम् ओचेट्नुना टोॽवा चोगुएसुए॥ 11पोङ्भोने पाक्चा ओवानिगा याप्मिचिम् टे खानिलोक् सोरोक् उलियुक्, टरो आङाउम्टे खानिलोक् सोरोक् लिनिङ्ना॥ 12ना आट्टार आयेम्ङि हुङ्सुङ् हुम्मालाउङ्सा नाङा टेयार चोगुएसुए॥ 13छेम्बा डोक्, आङा खानि लोनाँनि, नारा टेप् खोनि खोनि ना नुना खाबोर पारचार चोक्युक्, हिट्नि ना मेन्झेमाङा चोगुना टोॽवा चा हिट्ना मिट्मा लाउङ्सा ओमाट्टुटु॥”
याहुदाङा येसु धोका पिमा टेयार लिसाना
(मारकुस १४:१०-११; लुका २२:३-६)
14हिट्नुङ् बारो जाना चेलाचि माड्डे ठिबाङ् याहुदा इस्कारियोत ओलोडुना गाडुवाडाङ्बाचि सोरि खाडे, 15हिट्नुङ् लोडुचे, “आङा येसु खानि मुक्ङि जिम्मा पिनाने भोने, आङा पाक् याङ्आपिडिटिङागा?” हिट्नुङ् हिट्नागाँ हिट्ना रुपाङाना तिस राङ् उपिडुए॥#२६:१५ ना ओफाबाम्बाक् टोॽवा काचोक्बाङाना लेम्बोक् माइनाङाना निम्याक् लिसाना डाना॥ जाकारिया ११:१२ 16हिट्नुङ् याहुदाङा हिट्ना बेला नुङ् येसु लाप्माना ओचेट्नुना लाम्बो पुमा ठालाँ चोगुए॥
आन्तेङिना भातेर
(मारकुस १४:१२-२६; लुका २२:७-२३; युहान्ना १३:२१-३०; १ कोरिन्थि ११:२३-२५)
17खामिर मिठेन्ने चोक्बालाक् चालेपाङाना चाडाङाना पाइलेना लेम्बा चेलाचि येसुङि ओआबाउङ् नाड्डे पिक्सा उसिलाप्टुए, “खान् लाउङ्सा आन्याँ खोनि छुट्कारा चाडाङाना भातेर टेयार चोगुम्माना?”
18उन्ङा हिट्नागा लोडुचे, “खालाङ्गाङि ठिबाङ् याप्मिङि खाडानि, हिट्नुङ् हिट्ना लोडानुम्, ‘काहिसिक्बाङा नाड्डे माट्टुएसुए, आङाना बेला नेट्टाङ् टाइसे॥ आङा आचेलाचिलोक् कापाङ्ङि छुट्कारा चाडा मानाँ चोगुङ्टुङ्॥’” 19हिट्नुङ् चेलाचि ओखाडाउङ् येसुङा लोडुचि गाड्डे डोक् ओचोगुए हिट्नुङ् छुट्कारा चाडाङाना भातेर टेयार ओचोगुए॥
20नाम् कुडाउङ् येसु बारो जाना ओचेलाचिलोक् चामा चाङा युङे॥ 21उन्चिङा ओचोएट्टुना बेला उन्ङा हिट्नागा लोडुचे, “छेम्बा आङा खानि लोनाँनि, खानि माड्डे ठिबाङ्ङा आङा धोका याङ्पियुक्॥” 22ना रिङ् ओखेम्सुङ् चेलाचिगा आड्डिक् उन्चि निङ्ग्वा टुगे हिट्नुङ् हिट्नागा ख्वाप्पाङा ठिबाङ्-ठिबाङ्ङा नाड्डे पिक्सा सिलाप्मा ठालाँ ओचोगुए, “टाङ्बा, पाक् हिट्ना याप्मि आङा इ?”
23उन्ङा हिट्नागा लोडुचे, “आङालोक् डोक् ठालिङि चालेपा लुम्सुनाँ आङा धोका याङ्पियुक्॥#छाम्लोमा छाप्ला ४१:९ 24धारमाछाप्लाङि छेप्टि गाड्डे याप्मि छा सिमा खाप्मा डोक् कोन्युक्॥ टरो इनामा हिट्ना याप्मि लोङ्सा, जुन्ङा याप्मि छा धोका पिडुटु॥ हिट्ना याप्मिउम्टे पोङ्नेट्निना डोक् बे ओचेट्नुना लिसे॥” 25टब धोका पिडुलाबुना याहुदाङा सिलाप्टुए, “काहिसिक्बा, पाक् हिट्ना याप्मि आङा इ?”
येसुङा हिट्ना लोडुए, “खान्ङा आप्पे डोक् आमाट्टुएट्टु॥”
26हिट्नागा चामा-ठुङ्मा ओचोगेट्टाना बेला येसुङा चालेपा कोबुङ् माङ्हाङ्ङि पोए-पोए ठाङ्सुङ् एगुए हिट्नुङ् ओचेलाचि पिडुचिउङ् लोडुचे, “ना टाक्टानुमुङ् चायानुम्, ना आयेम् ए॥”
27हिट्नुङ् उन्ङा खोरे चा याङुङ् माङ्हाङ्ङि पोए-पोए चोगुङ् ओचेलाचि नाड्डे पिक्सा पिडुचे, “खानि सोब्बेङा नालाम्मा ठुङानुम्॥ 28ना ओछोङ्ग्वाट् माङ्हुप्ङाना आहेलिक् ए॥ ना हेलिक् जोम् याप्मिचिङा पाप छेमा ओटोगु नुङ् बागाँ चोक्युक्॥ 29आङा खानि लोनाँनि, हाट्लेलाम्मा आङाना माङ्हाङ् पाबाङाना उमुलुक्ङि आङा ओछोङ्ग्वाट् मिलिए सोम्मा फेरि आङ्गुर ओमोॽवा आङा खानिलोक् ठुङ्निङ्ना॥”
30हिट्नुङ् येसु लोक् ओचेलाचिङा ठिक् छाम्लोमा ओठाक्टुङ् उन्चि जैतुन झोन्झोन्बालेङ् ओखाडे॥
पाटरुसङा येसु इन्कार चागुटु नुङ् माट्टुना
(मारकुस १४:२७-३१; लुका २२:३१-३४; युहान्ना १३:३६-३८)
31येसुङा हिट्नागा लोडुचे, “हाट्ले युसा खानि सोब्बेङा याङ्आनाडिटिङा॥ पोङ्भोने धारमाछाप्लाङि नाड्डे छेप्टेसे–
‘आङा गोठाले सेडुङ्टुङ्, हिट्नुङ् बागालङिगा ठुँबाचि सोब्बेलेङ् चेम्बेलेङ् उलियुक्॥’#जाकारिया १३:७
32“टरो आङा सिमालाम्मा उहिङ्ग्वाट् लिङाउङ् कोब्मा काट्नाउङ् खानि नुङ्ना पाइले गालिलङि खाट्नाँ॥”#मात्ति २८:१६
33पाटरुसङा येसु लोडुए, “खान् सोब्बेङा मानाडे भोने चा आङाम्बाक् खान् खोना बेला चा नानेन्ना॥”
34येसुङा पाटरुस लोडुए, “छेम्बा, आङा खान् लोनाँ, हामो युसा कोक्साबा ओक्मा नुङ्ना पाइले खान्ङा आङा सुम्बोक् खेप् सोम्मा इन्कार आचोक्ङा॥”
35टरो पाटरुसङा उन् नाड्डे लोडुए, “आङा खान्लोक् सिमा डोक् कोन्ना लिसे भोने चा आङा खान् इन्कार चोक्नेन्ना॥” हिट्नुङ् आरु ख्वाप्पा चेलाचिङा चा हिड्नाड्डे डोक् ओमाट्टुए॥
गेतसामनि बाकेंचाङि येसुङाना बिन्टि
(मारकुस १४:३२-४२; लुका २२:३९-४६)
36हिट्नुङ्ना येसु ओचेलाचिलोक् गेतसामनि ओलोडुना ठोङ्ङि खाडे, हिट्नुङ् हिट्नागा नाड्डे लोडुचे, “खानि नाहि डोक् युङानि, आङा चिपा याम्बा खाट्नाउङ् बिन्टि चोक्ङा॥” 37टरो पाटरुस हिट्नुङ् जाब्दियाङाना इप्पाङ् उइछाचिम्बाक् उन्लोक् खाट्टुचे हिट्नुङ् येसु आड्डिक् निङ्ग्वा सागु लोक् याङ्छामाङि ठाए॥ 38हिट्नुङ् उन्ङा हिट्नागा लोडुचे, “आङाना आसोक्मा ठेक्टाउङ् सिङा गाड्डे डोक् लिसाइसाङे॥ खानि नाहि ओछेक्छेक् चोगानिउङ् युङानिउङ् आङा टाक् याङ्पिडानि॥”
39हिट्नुङ् उन् चिपा याम्बा खाडाउङ् खाम्ङि गुङ् चोगाउङ् नाड्डे पिक्सा बिन्टि चोगुए, “ए आप्पा, लिमा हियुक् भोने, ना याङ्छामाङाना खोरे आङालाम्मा याङ्होट्टाबिडा, टरो चा आनिङ्ग्वा गाड्डे माखाक्, टरो कानिङ्ग्वा गाड्डे डोक् उलियाक्॥”
40हिट्नुङ् येसु कोबाउङ् सुम्बाङ् ओचेलाचि उलिसागा ठोङ्ङि आबानाँ हिट्नागा उइम्सेसागा टुबुचे, हिट्नुङ् पाटरुस लोडुए, “पाक् खानि ठिक् घान्टा चा आङालोक् मिइम्मे युङ्मा आहिडिन्गै? 41खानि ओछेक्छेक् युङानि हिट्नुङ् बिन्टि चोगानि, हिड्डेउङ् खानि वारिक्ङि आठाइन्गा॥ खानि निङ्ग्वाउम् टेयार युङ्ग्वा, टरो खानि येम् फेटुलो लिसाइसे, हिट्नुङ् टेयार वाइना॥”
42फेरि येसु खाडाउङ् नाड्डे पिक्सा बिन्टि चोगे, “आप्पा, ना याङ्छामाङाना खोरे आङा मिठुङ्ङे लिनिना भोने, कानिङ्ग्वा डोक् पुरो उलियाक्॥” 43हिट्नुङ् येसु फेरि सुम्बाङ् ओचेलाचि उलिसागा ठोङ्ङि आबानाँ हिट्नागा उइम्सेसागा टुबुचे, पोङ्भोने हिट्नागाँ उन्चि मिक्युमा उन्चि मिक् डोक् ओङ्मा उहिडुवाट्टुन्॥
44हिट्डेउङ् उन्ङा हिट्नागा फेरि नाडुढोचिउङ् तेस्रो खेप् बिन्टि चोक्ङा खाडे, हिट्नुङ् उन्ङा हाले माट्टु गाड्डे डोक् बिन्टि चोगे॥ 45हिट्नुङ्ना चेलाचि सोरि आबाउङ् हिट्नागा लोडुचे, “पाक् खानि हाट्ले चा आइम्सिउङ् आराम आचोगेट्टिगि? खेम्सानुम्, हाट्ले बेला लिसे, याप्मि छा कायाङ्छाबाचि मुक्ङि पिमा बेला लिमा हिडे॥ 46हाट्ले कोबान्याँक् हिट्नुङ् खाड्याक्॥ पुयानुम्, आङा धोका कापिबा याप्मि टामाहिडे॥”
येसु ओलाबुना
(मारकुस १४:४३-५०; लुका २२:४७-५३; युहान्ना १८:३-१२)
47येसु चेक्टेट्टाना बेला डोक् बारो जाना ओचेलाचि माड्डे ठिबाङ् याहुदा हिट्नि होन्डा टाए॥ हिट्नालोक् गाडुवाडाङ्बाचि हिट्नुङ् याप्मिचिगा ओठेडोङ्चिङा ओपाङ्सुचिगा जोम् याप्मिचिगा खिमेयाङ्मे चेप्सा हिट्नुङ् लाहुरिक् ओयाङुगा ओटाए॥ 48उन् धोका कापिबा याहुदाङा हिट्नागा नाड्डे पाइले डोक् लोडुएसुचिगा, “जुन् याप्मि आङा चुप्पा चोगुङ्टुङ्, हिट्ना डोक् येसु, हिट्ना डोक् लाबानुम्॥” 49हिट्ना बेला डोक् याहुदा येसु सोरि खाडाउङ् “काहिसिक्बा, बाबा” पिक्सा चुप्पा मेट्टुए॥ 50येसुङा हिट्ना लोडुए, “हाउ साइबा, खान् नाहि पाक् चोक्मा नुङ् आटाएना, हिट्ना एला चोगुएट्टु॥” हिट्नुङ् हिट्नागाँ येसु ओलाबुए॥
51ना उनिसुङ् येसुलोक् उलिसागा माड्डे ठिबाङ्ङा ओचेप्सा होट्टुङ् सानिङ्डाङ्बाङाना ओचाकारङाना उनुभेक् खोक्टुबिडुए॥ 52टरो येसुङा हिट्ना लोडुए, “काचेप्सा उसुप्ङि युङ्सु, पोङ्भोने जुन्ङा चेप्सा चालाँ चोगुटु, हिट्ना चेप्साङा डोक् जाखाम् लियुक्॥ 53खान् पाक् आमिट्युक्ना, पाक् आङा माङ्हाङ् पाबाङि बिन्टि चोक्मा हिनिङ्ना इ? हिट्नुङ् उन्ङा ना बेला डोक् माङ्हाङ् रिङ् काउग्बाचि बारो पोल्टान् नुङ्ना जोम् आङा लाउङ्सा पाङ्सुन्चिन्गै टे? 54टरो हिड्नाड्डे लिसे भोनेम्टे धारमाछाप्लाङि नागा रिङ् लिमा डोक् कोन्युक् नुङ् छेप्बालाक् रिङ् खोड्डेउङ् युमा हियुक्ना टे?”
55हिट्ना बेला येसुङा याप्मिचिगा खिमेयाङ्मे लोडुचे, “पाक् आङा याङ्काखुट्उङ् खानि लाहुरिक् हिट्नुङ् चेप्सा आयाङुमुङ् आङा लाब्सिङा आटैसेगि? आङा सोरोक् लेम्बा माङ्ठानाङि सिक्छे पिसा युङाङे, हिट्नुङ् खानिङा आङा आलाबेएट्टिन्ङा टे॥#लुका १९:४७; २१:३७ 56टरो माङ्काटाचिङा ओछेप्टुना धारमाछाप्लाङिना रिङ् उयुयाक् नुङ् डोक् नागा सोब्बे रिङ् लिसाना ए॥” हिट्नुङ् ओचेलाचि सोब्बेङा उन् ओपोक्टुढोङ् उपिन्डे॥
काचाहारि-कुन्डालङि येसु
(मारकुस १४:५३-६५; लुका २२:५४-५५,६३-७१; युहान्ना १८:१३-१४,१९-२४)
57येसु कालाब्बाचिङा उन् सानिङ्डाङ्बा कैयाफाङाना ओपाङ्ङि ओखाट्टुए॥ हिट्नि धारमाबिधि काहिसिक्बाचि हिट्नुङ् ओठेडोङ्चि उछुमाइसागा॥ 58पाटरुसउम्बाक् नेट्टाङ् मिखाट्ने चिपा लाप्माङ्लाम्मा डोक् येसु ओएङ्-ओएङ् सानिङ्डाङ्बाङाना ओपाङ्ङिना टेल्लाङ्ङि टासुए॥ हिट्नुङ् हिट्नि पाक् लियुक्ना नुङ् पुङा भिट्रा खाडाउङ् टिलिङ्गाचिलोक् युङे॥ 59हिट्नुङ् सानिङ्डाङ्बाचि हिट्नुङ् काचाहारि-कुन्डालङिगा ख्वाप्पाङा येसु सेप्मा कोन्युक् पिक्सा उन्ङाना बिरुद्दाङि माङ्जोना साचिँ कापिबा कोम्मा ठालाँ ओचोगुए॥ 60हिट्नि जोम् माङ्जोना साँचि पिमा ओटाए, टरो ठिक् पारमान् चा हिट्नागाँ ओटोग्वाट्टुन्॥ आन्तेङि इप्पाङ् याप्मिचि हिट्नि होन्डाचे, 61हिट्नुङ् माट्टाचुए, “ना याप्मिङा ‘आङा माङ्हाङ्ङाना माङ्ठाना होडुङुङ् सुम्बोक् लेम्बाङि डोक् चोक्मा हिडुङ्टुङ्’ पिक्सा माट्टुना डाना॥”#युहान्ना २:१९
62हिट्नुङ् सानिङ्डाङ्बा कोबाउङ् उन् सिलाप्टुए, “पोङ् खान् पाक्चा आचेक्निना? पाक् नागा याप्मिचिङा खान्ङाना बिरुद्दाङि ओमाट्टुना साचिँ आखेम्सुन्नै?” 63टरो येसु स्वाग् मिचेक्ङे युङे॥ फेरि सानिङ्डाङ्बाङा उन् सिलाप्टुए, “उहिङ्ग्वाट् माङ्हाङ्ङाना उनिङ्ङि खान् आग्याँ पिनाँ, आन्याँ याप्मिलोडा, पाक् खान् माङ्हाङ् छा खिरिस्ट इ टे?” 64टरो येसुङा हिट्ना लोडुए, “खान्ङा डोक् आमाट्टुएट्टुए॥ टरो चा आङा खानि लोनाँनि, हाट्लेउङ्ना खानिङा याप्मि छा सोब्बे नुङ्ना बोल्लेउ माङ्हाङ्ङाना उछुप्टाङ्लेङ् सिङासान्ङि युङाना हिट्नुङ् टाङ्साङ्लाम्मा खिमेमाङि उङ्युगेट्ना आनिसुम्टुम्॥”
65हिट्नुङ् ना रिङ् खेम्सुङ् सानिङ्डाङ्बाङाना ओयाक् लेडाउङ् ओलोट्लिङ् सेङ्सुए हिट्नुङ् माट्टुए, “लु खेम्सानुम्, ना याप्मिङा माङ्हाङ् लोडुजोए॥ हाट्ले आनिलोङ्सा आरु पाक् पारमान् चाहाबा लिसेना टे? ना याप्मिङा माङ्हाङ् लोडुजोना रिङ् खानिङा आखेम्सुम्एट्टुम्मे टे॥ 66लु माट्टानुम्, खानि पाक् आपिगिटिगा?”
हिट्नागा सोब्बेङा ओमाट्टुए, “ना दोसि ए, ना सेप्मा डोक् कोन्युक्॥” 67हिट्नुङ् हिट्नागाँ ओनाभाक्ङि ठ्या ओठोक्टुङ् उठुबुए, हिट्नुङ् आम्टेप्माङा नाड्डे पिक्सा ओकाकालाङि ओलेम्सुए, 68“हाउ खिरिस्ट, लु माट्टुवाक्, खान् साङा मालेम्सेना, याप्मिलोडा॥”
पाटरुसङा येसु इन्कार चोगुना
(मारकुस १४:६६-७२; लुका २२:५६-६२; युहान्ना १८:१५-१८,२५-२७)
69हिट्ना बेला पाटरुस भारा टेल्लाङ्ङि युङेसाना॥ हिट्नि ठिबाङ् चाकारनि उन् सोरि टायाउङ् लोडुए, “खान् चा टे गालिलङि युङ्ना येसुलोक् आवासेट्टाना, माखाइ टे?”
70टरो पाटरुसङा सोब्बे याप्मिचि टोकानाङि इन्कार चोगुङ् लोडुए, “खान् पाक् आपिग्येट्ना, आङा ठाहा टोक्निङ्ना॥”
71हिट्नुङ् उन् भारा ढुवारिक् सोरि होन्डे॥ हिट्नि सोरि आरको ठिबाङ् चाकारनिङा उन् निसुए, हिट्नुङ् हिट्नि उलिसागा याप्मिचि लोडुचे, “ना याप्मि चा नासारातङिना येसुलोक् डाना॥”
72फेरि पाटरुसङा चामारसिङा चोङ् “आङा हिट्ना याप्मि मिसेन् डोक् निनिङ्ना” पिक्सा इन्कार चोगुए॥
73होप्मो बेला ओएङ्स्वा हिट्नि उलिसागा याप्मिचि चा पाटरुस सोरि ओआबाउङ् ओलोडुए, “छेम्बा डोक्, खान् चा हिट्नागाँगा ओसाइबा डोक्, पोङ्भोने खान् आचेक्ना रिङ्लाम्मा डोक् ठाहा लियुक्नि॥”
74हिट्नुङ् फेरि चा पाटरुसङा चामारसिङा चोउङ् माट्टुए, “हाउ आङा ढाँट् फोक्टाङे भोने माङ्हाङ्ङा आङा साजाए याङ्उपिङाक्, आङा हिट्ना याप्मि मिसेन् डोक् निनिङ्ना॥” हिट्नाडे माट्टुना मे कोक्साबा ओक्टाढेन्डे॥
75हिट्नुङ् “कोक्साबा ओक्मा नुङ्ना पाइले खान्ङा आङा सुम्बोक् खेप् सोम्मा इन्कार याङ्आचोक्ङा” पिक्सा येसुङा लोडुना रिङ् पाटरुसङा मिट्टुए॥ हिट्नुङ् उन् भारा होन्डाउङ् आड्डिक् टुक्लोक् हाबे॥
Valið núna:
मात्ति 26: APH
Áherslumerki
Deildu
Afrita
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society