मात्ति 20
20
खेतालाचिगा मुन्डुम्
1येसुङा माट्सा खाट्टुए, “टोनालोग्ङिना मुलुक् ठिबाङ् स्वाँरा डाङ्बा गाड्डेना ए॥ एका भ्यानिक् स्वाँरा डाङ्बा उन्ङाना आङ्गुर बारिङि टोॽवा चोक्मालाङ्सा खेतालाचि कोन्सिङा भारा होन्डे॥ 2हिट्नुङ् खेतालाचिलोक् रुपाङाना ठिक् राङ् निमेक् सोरोक् लेन् लेन्ङाना पिनाँनि लोडुचिउङ् ओआङ्गुर बारिङि टोॽवा चोक्ङा खेङ्सुचे॥
3“हिट्नुङ् भ्यानिक् याङ् बाजाँ लिसाना खेरा बाजार खाडानाँ हिट्नि आम्टेप्मा याप्मिचि टोॽवा मालेउङ् खेडोक् ओयेबाइसागा उन्ङा निसुचे॥ 4हिट्नुङ् उन्ङा हिट्नागा लोडुचे, ‘खानि चा आङाना आङ्गुर बारिङि टोॽवा चोक्सिङा खाडानि, हिट्नुङ् खानिङा आटोगुम्ना निम्याक् आङा खानि पिनाँनि॥’ 5हिट्डेउङ् हिट्नागा टोॽवा चोक्ङा ओखाडे॥
“हिट्नुङ् उन् फेरि बारो बाजेलेङ् हिट्नुङ् सुम्बोक् बाजेलेङ् चा भारा खाडाउङ् आरु याप्मिचि चा हिट्डेडोक् लोडुचिउङ् टोॽवाङि खेङ्सुचे॥ 6फेरि लेम्बोक् बाजेलेङ् भारा खाडानाँ उन्ङा आम्टेप्मा याप्मिचि टोॽवा मिचोक्ङे खेरोक् बाजारङि ओयेबेसाइगा निसुचे॥ उन्ङा हिट्नागा सिलाप्टुचे, ‘खानि पोङ् नेहि लेन्नाटेप् टोॽवा मिचोक्ङे खेरोक् आयेबेसिएगा?’ 7हिट्नागाँ ओलोडुए, ‘खोलो साङा चा आन्याँ टोॽवाङि याप्मि ओखेङ्नेट्नि॥’ टब उन्ङा हिट्नागा लोडुचे, ‘हिट्डे भोने खानि चा आङाना आङ्गुर बारिङि टोॽवा चोक्सिङा खाडान्याक्॥’
8“जब युसाना पाका लिसे, आङ्गुर बारि डाङ्बाङा उन्ङाना टोॽवा काचोक्चिगा ओठेडोङ् लोडुए, ‘खेतालाचि छेम्डुचिउङ् सोब्बे नुङ्ना एङ्स्वा टोॽवाङि ओकेङागालाम्मा पाइले ओकेङागालाउङ्सा उन्चि निम्याक् पिडुचि॥’#लेबि १९:१३; धारमाबिधि २४:१५
9“हिट्नुङ् लेम्बोक् बाजे टोॽवाङि ओकेङागा खेतालाचि ओआबे, हिट्नुङ् हिट्नागा सोब्बेङा ठिक् लेम्बा चोक्बालाक् टोॽवाङाना निम्याक् ओटोगुए॥ 10हिट्ना बेला सोब्बे नुङ्ना पाइला टोॽवाङि ओकेङागा खेतालाचि ओआबे, हिट्नुङ् हिट्नागाङा याप्मा डोक् निम्याक् टोगुम्टुम्मा होला नुङ् उमिट्टे, टरो हिट्नागा सोब्बेङा चा ठिक् लेम्बा भोरिना टोॽवाङाना निम्याक् डोक् ओटोगुए॥ 11जब हिट्नागाँ निम्याक् ओटाक्टुए, हिट्नुङ् हिट्नागा स्वाँरा डाङ्बा बिरुद्दाङि गिन्गिन् चोक्मा ठालाँ ओचोगे॥ 12हिट्नागाँ नाड्डे ओलोडुए, ‘नागा एङ्सुवा ओटायागा याप्मिचिङा टे ठिक् घान्टा एडोक् टोॽवा ओचोगुए, हिट्नुङ् आन्याँउम्टे लेन्नाटेप् टुक्लोक् हुटुॽवामाङि टोॽवा चोगुम्मे, टरो खान्ङा हिट्नागा चा आन्याँ टेप्मा डोक् निम्याक् आपिडुचे॥’
13“टरो हिट्ना स्वाँरा डाङ्बाङा हिट्नागा माड्डेङि ठिबाङ् लोडुए, ‘आसाइबा, आङा खान् पाक्चा ओचाफेन्लोक् चोग्नेन्गेट्नेन्ना॥ पाक् खान्ङा आङालोक् ठिक् लेम्बाङाना निम्याक्ङि टोॽवा चोक्माना काबुल आचोगुना माखाइ टे? 14खान्ङा टोक्माना कानिम्याक् खाट्टुङ् खाडा॥ नागा एङ्स्वा ओटायागालोङ्सा चा खान् पिनाना टेप्मा डोक् पिमाचिगा निङ्ग्वा चोगुङ्टुङ्॥ 15पाक् आङा आप्पे आपैसा आनिङ्ग्वा लोसागा पिमाचिगा आधिकार वाइना इ? पाक् आङा आरु लुक्मा टुक्टुङ्चिङ्नाँ कामिक् टुगेनि?’”
16हिट्नुङ् येसुङा माट्टुए, “हिट्डेउङ् एङ्स्वागा पाइले उलियुक् हिट्नुङ् पाइलेगा एङ्स्वा उलियुक्॥”#मात्ति १९:३०; मारकुस १०:३१; लुका १३:३०
येसुङा फेरि उन् सिना बारे माट्टुना
(मारकुस १०:३२-३४; लुका १८:३१-३४)
17येसु यरुसलेमलेङ् खाडागेट्टाना बेला उन्ङा बारो जाना ओचेलाचि आरकोलेङ् खाट्टुचिउङ् लोडुचे, 18“खेम्सानुम्, आनि यरुसलेम खाडिगेट्टि॥ हिट्नि याप्मि छा गाडुवाडाङ्बाचि हिट्नुङ् धारमाबिधि काहिसिक्बाचि मुक्ङि उपिडुटु॥ हिट्नुङ् हिट्नागाँ उन् सेप्मा नुङ् फाट्टुरङि ओठेन्डुटु, 19हिट्नुङ् खिजेक्पा चाट्मा, कोरराङा लेम्मा हिट्नुङ् खाप्चेङि छुमा लाउङ्सा हिट्नागाँ पानिछोङ्बाचि मुक्ङि जिम्मा उपिडुटु, टरो सुम्बोक् लेम्बा उन् फेरि सियानालाम्मा उहिङ्ग्वाट् लियुङ् कोब्युक्॥”
ठिबाङ् मामाङाना बिन्टि
(मारकुस १०:३५-४५; लुका २२:२४-२७)
20हिट्नुङ् जाब्दियाङाना इप्पाङ् उइछाचि उन्चि मामाङा येसु सोरि आब्टुचिउङ् उटुम्बुट् येप्टुङ् उन्ङि बिन्टि ठाङ्सुए॥ 21येसुङा हिट्ना सिलाप्टुए, “खान् पाक् रिङ् चाहाब् आलिसेना?”
हिट्नाङा लोडुए, “आडाङ्बा, खान्ङाना कामुलुक्ङि नागाचि इप्पाङ् येम्बेछा आइछाचिङि ठिबाङ् खान्ङाना छुप्टाङ्लेङ् हिट्नुङ् आरको फेन्साङ्लेङ् युङ्मा ओटोक्चुवाक्॥”
22टरो येसुङा हिट्नागा लोडुचे, “खानि पाक् आनाक्टेट्टिगा हिट्ना रिङ् खानिलाउङ्सा ठाहा वाइना॥ पाक् आङा ठुङुङ् लाबुङ्ना याङ्छामाङाना खोरे खानिङा ठुङ्मा आहिडुम्टुम्नि टे?”
हिट्नागाँ “ठुङ्मा हिडुम्टुम्मा” पिक्सा ओलोडुए॥
23टब येसुङा हिट्नागा लोडुचे, “छेम्बा डोक्, आङा ठुङुङ्ना खोरे खानिङा आठुङुम्टुम्, टरो आङाना छुप्टाङ्लेङ् हिट्नुङ् फेन्साङ्लेङ् युङ्मा पिमाउम्बाक् आङाना आमुक्ङि वाइना॥ नागा ठोङ् जुन् लोङ्सा आङाना माङ्हाङ् पाबाङा टेयार चोगुएसुए, हिट्नागा लोङ्सा एरोक् पिडुचिचि॥”
24ना रिङ् ओखेम्सुङ् आरु ठिमेक् जाना चेलाचिम्बाक् हिट्नागाचिलोक् उन्चि याग्लेडे॥ 25हिट्नुङ् येसुङा हिट्नागा सोब्बे छेम्डुचिउङ् लोडुचे, “खानि लोङ्सा ठाहा डोक् युङ्ग्वा, पानिछोङ्बाचिगा सासाक्चिङा उन्चि याप्मिचि सासान् ओचोगुचिगा, हिट्नुङ् ठेगा ठालुचिङा उन्चि उछिक्ङि उलिसागा याप्मिचि आधिकार ओचोगुचिगा रिङ् खानिङा आनिसुएसुम्मे॥#लुका २२:२५-२६ 26टरो खानिङिउम्बाक् हिट्डे लिनिना॥ खानि माड्डे ठेना लिमा निङ्ग्वा काचोक्बाङा सोब्बेङाना सेवा चोक्मा कोन्युक्॥ 27हिट्नुङ् खानिङि पाइले लिमा निङ्ग्वा काचोक्बा खानिङाना सेवा चोक्मा कोन्युक्॥#मात्ति २३:११; लुका २२:२६ 28हिट्डेडोक् याप्मि छा चा आरुलाम्मा सेवा टोक्मालोङ्सा माखाक्, टरो आरु सेवा चोक्मा हिट्नुङ् जोम् याप्मिचि छुट्कारा पिमा आप्पे ओसोक्मा लेट्मा लोङ्सा टायाना॥”
येसुङा इप्पाङ् याङ्कानिनिबाचि नुमानिङ् चोगुचिगा
(मारकुस १०:४६-५२; लुका १८:३५-४३)
29येसु लोक् ओचेलाचि यारिहो खालाङ्गा ओनाडुङ् ओखाडागेट्टानाँ याप्मिचिगा ठेना खिमेयाङ्मे ओएङ्-ओएङ् ओखाडे॥ 30इप्पाङ् याङ्कानिनिबा याप्मिचि लाम्बो ओछेउङि युङैसाचिगा॥ येसु हिट्ना लाम्बो लिसाउङ् खाॽयुगेट् नुङ् हिट्नागाचिङा खेम्साचुङ् नाड्डे पिक्सा राट्टाचे, “हाउ दाउद पुङ्लाङिना डाङ्बा, आन्च्याँ लुक्मा याप्मिटुक्टा!” 31याप्मिचिङा “चेक्नेन्चिन्, स्वाग् युङाचि” पिक्सा खेमा ओलाप्टुचे॥ टरो हिट्नागाचि झान् टुक्लोक् राट्टाचिउङ् पिगाचे, “हाउ दाउद पुङ्लाङिना डाङ्बा, आन्च्याँ लुक्मा याप्मिटुक्टा!” 32येसु लाम्टियागेट्टाना बेला डोक् येबे हिट्नुङ् हिट्नागाचि छेम्डुचिउङ् सिलाप्टुचे, “खान्चि लोङ्सा आङा पाक् चोगुङ्ना नुङ् आमिट्चिचिगा?”
33हिट्नागाचिङा माट्टाचुए, “डाङ्बा, आन्च्याँ याङ्निमा उहिचुङा॥”
34येसुङा हिट्नागाचि लुक्मा टुक्टुचिउङ् उन्चि मिक्ङि खोट्टुबिडुचे, हिट्नुङ् हिट्ना बेला डोक् हिट्नागाचिङा याङ्निसाचुए हिट्नुङ् उन् ओएङ्-ओएङ् खाडाचे॥
Valið núna:
मात्ति 20: APH
Áherslumerki
Deildu
Afrita
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society