मर्कुस् 5
5
गीरासीनी लुङ्बदु ॱनो़प्प स्युबे मी च्यीक् १-२०
1हुनी खोङ्जोसो छो़ पारीगी लुङ्ब गीरासीनी सीस्स च्यीक्ल ॱलीब बेत्। 2हुनी येशु ढु दीनी छ्यील थो़न्नी, हुदु थो़ल्लोङ् मीक्ल ॱनो़प्प स्यीलोक्पोक्म स्यीन्नरे मी च्यीक् रो बेक्स घयेत्नी थो़न्न युङ्न ठेप्प बेत्। 3हुगो दो़स्स दी रो बेक्स घयेत्ल गीर्न दो़क्को़प्प बेत्। हुगो ॱसी़ इक् घन्डे एक् कीङ् ॱमत् छुब हीङ्गो़प्प बेत्। च्यागोङ् ज्यप्न अक्, सुङ्न स्योक् ॱमत् छुब हीङ्गो़प्प बेत्। 4हुगो लेम्म गज्येन् थक्पे कङ्ब लक्प कीङ्न च्यागोङ् ज्यप्न स्यक्न अक्, हुगी थक्प धङ् च्यागोङ् घयेत् दी च्यक्नी, ॱसी़ इक् हुगो सुङ्न स्योक् ॱमत् छुब बेत्। 5हुगो ङीन् छेन् मीप्प रो बेक्स घयेत्ल धङ् लदोक् पोर्तोक् घयेत्ल ओ़लोक् ज्यक्कील्ल गीर्न रोरङ्गी सी़बु दी दोल घल हीन्न हीन्, चो तोङ्गो़प्प बेत्।
6हुगी फच्चो़त्नीरङ् येशु युङ थोङ्नी ज्युन युङ्न खोङ्ल छ्यक् छेब बेत्। 7हुनी हुगी केत् छ्यीम्मु तो़न्न खोङ्ल ॱवे येशु नीज्यरङ् इगी थोरी चीदु स्युगेन् को़न्ज्योक्की ॱरेबु ङल घन्ड झ्यीच्च्ये ॱनो़गुक्क? को़न्ज्योक् पङ्दु स्यक्न नीज्यरङ्गी ॱन झ्यीन ङल दुक्प अयेक्पे ॱनर्मी तोङ्रो मत् झ्यीत् सीन्न स्युव ज्यब बेत्। 8घन्ड हीन् सीन्न येशुगी हुगोल ॱनो़प्प स्यीलोक्पोक्म रङ् हीगी मी हीनी थो़ल्ल ज्युक् झ्यीच्च्येम ॱयेङ्नी, हुगी खोङ्ल हुन्दुक् झ्यीब हीङ्गो़प्प बेत्। 9ॱनी हुगोल येशुगी खोक्की मीङ्ल घन्ड सीगो़प्प? सीन्न ढीनी, हुगी लेल्ल ङे मीङ्ल ॱमक्कक् सीगो़त्। घन्ड हीन् सीन्न ङीत् गज्येन् यो़त् सीन्न झ्यीब बेत्। 10हुनी हरुङ् हुगी ङीत् घयेत् लुङ्ब हीनी ॱयोङ्ल दीत्रो मत् झ्यीत् सीन्न येशुल स्युव गन्दीक्म ज्यब बेत्। 11ॱनी हुगी यङ्ल फच्चो़त्न पोर्तोक् च्यीक्की डम्नल फक्प छेत्मीत् ॱसोगीन् यो़प्प बेत्। 12ॱनी ॱनो़प्प घयेत् दीगी खोङ्ल ङीत् घयेत् फागी फक्प घयेत् फागी नङ्ल स्युक्च्ये यो़प्पे ॱहक् ॱनङ्रो झ्यी सीन्न स्युदेन् ज्यब बेत्। 13हुनी खोङ्गी ॱहक् ॱनङ बेत्। हुनी ॱनो़प्प स्यीलोक्पोक्म घयेत् दी हुगी मी दीनी थो़न्नी फक्प घयेत् दील स्युनर बेत्। स्युनी, फक्प घयेत् दी कुरीक् ज्युन फीन्न ढागोनी मल्ल छर्न हुगी छो दील खीन कुरीक् ॱङङ्न ॱस्यीनर बेत्। ॱनी उन फक्प दी तोम्दु तोङ्डक् ॱङीगी चीजो़त् च्यीक् यो़प्प बेत्।
14ॱनी हुगी फक्चीब घयेत् दी हुनी ढो़न फीन्न हीगी केच्च्य घयेत् दी हुगी सार् धङ् यु घयेत्ल ॱस्येत्न टेप्प बेत्। ॱनी हुगी मी घयेत् दीगी घन्ड झ्युङ बेक्क तदु डो सीन्न येशु च्याल युङ बेत्। 15युङ्नी, हुगी ॱनो़प्प ॱमक्कक् थो़न्नरे मी दी घो़ घो़न्न उन ढेम्ब गङ्ज्येल्ल ॱसोङ्न दो़प्प ठेत्नी, हुबल ज्यीक्टक् लङ बेत्। 16ॱनी हुदु एल्ला युङ्न थोङ घयेत् दीबे तीङ्ला युङ घयेत् दील ॱनो़प्प अयेक्प स्यीन्नर दी धङ् फक्प घयेत्ल घङ् झ्युङे केच्च्य दी कुरीक् ॱस्येत्न टेप्प बेत्। 17ॱनी हुगी मी घयेत् दीगी खोङ्ल हीगी लुङ्ब हीनी नीज्यरङ् फल्ल लोक्न डोरो झ्यी सीन्न स्युव ज्यब बेत्।
18हुनी येशु लोक्च्येल ढुल स्युक्पे यङ्ल ॱनो़प्प थो़न्नरे मी दीगी खोङ्ल ङ अक् नीज्यरङ्दङ् दल युङ्दु ची़त्रो झ्यी सीन्न स्युव ज्यब बेत्। 19ॱनी खोङ्गी युङ्दु ॱमत् ची़प्प, हुगोल रङ् रङ्गी खीम्ल लोक्ल ज्युक्ल रङ्गी ङीया छेङ्गोर् घयेत्ल रङ्ल चोव ज्यीन्दक्की घन्दुक्मे लेगी ज्यीक्प झ्यीन ॱङीङ्ज्यी जेप्प बेक्क हुगो ॱस्येत्न टो़त्लेत् सीन्न तङ बेत्। 20हुनी हुगी मी दी लोक्न फीन्नी, रोरङ्ल येशुगी घङ् जेप्पे केच्च्य घयेत् दी डेकापोलीस्की लुङ्बल घल अक् ॱस्येत्न टम्ब बेत्। ॱनी हुल मी घयेत् ॱह लेब बेत्।
भुमु ॱस्यीनर च्यीक् धङ् मोनेत् च्येम्म च्यीक् ढक्प २१-४३
21हीनी येशुसो ढुल स्युन यङ् छुरी दीलरङ् लोक्न युङ बेत्। युङ्नी, यङ् हुदु खोङ् च्येल्ल मी छेत्मीत् जोम्न युङ बेत्। ॱनी खोङ् हुदु छो़ छीग दीदु दो़प्पे यङ्ल 22हुगी छ्यो़ छोगी गोयो़प्प घयेक्की छीक्नी यैरस् सीक्केन् मी च्यीक् खोङ् च्येल्ल युङ बेत्। ॱनी हुगोदङ् येशु ठेत्नी, हुगी खोङ्ल छ्यक् छेन 23हीन्दुक् झ्यीब बेत्। ङे झ्यम्बे भुमु दी ॱस्यीज्येम ॱयेङ्न यो़त्। नीज्यरङ् झ्यो़न्न ङे भुमु हुल छ्यक्वङ् केन ढक्तु ची़त्न ॱसो़दु ची़त्रो झ्यी सीन्न स्युव पुब बेत्। 24हुनी येशु हुगोदङ् दल फीम्ब बेत्। फीन्नी, खोङ्गी तीङ्ल मी गज्येन् युङ्न खोङ्ल कोदुम् ज्यब बेत्।
25ॱनी उन मी घयेत् दीगी छीक् दीन ली़गी ठक् भप्न युङ्नी ॱमत् छ्येप्प, लो च्युन्नी ॱसोङे भुमु च्यीक् यो़प्प बेत्। 26ॱनी हुगी रोरङ् ॱमेम्बा घयेत्ल तो़न्नी, हुनी दुक्स्यी च्यङ्ज्यङ् झ्युङ्न रोरङ्ल यो़प्पे नोर् घयेत् दी इक् कुरीक् जोनर हीङ्गो़प्प बेत्। ॱनी नज दी गदु मेम्ब, हरुङ् दुक्तु क टप्नर हीङ्गो़प्प बेत्। 27येशुगी झ्यीबे केच्च्य घयेत् हुगी ॱह घोनी, हुनी मी घयेत् दीगी छीक्नी तक्नी छुल्ल युङ्न खोङ्गी ली़गी छ्यी घो़ दील रेक् तङ बेत्। 28हुगी रोरङ्गी ॱसीम्ल ङ येशुगी ली़गी छ्यी घो़ च्यीक्ल रेक्च्ये झ्युङ्नरङ्, ङे नज हीगो ढक् डोगेन् बेत् ॱनो़ब ॱसम्न युङ हीङ्गो़प्प बेत्। 29हीनी हुगी ठक् जक्केन् दी टीम् छ्येत्नर बेत्। छ्येत्नी, हुगी सी़ दीगी रोरङ्गी नज दी ह ढक्सोङ् ॱनो़ब ॱह घोव बेत्। 30हुनी हुगी यङ्लरङ् येशुगी खोङ् रोरङ्गी सी़नी ॱस्यीक् थो़न्न डोव ॱह घोनी खोङ् तक्ल लोक्न हुगी मी घयेत् दील खीत् ॱसी़ ङे घो़ल रेक्प? सीन्न ढीब बेत्। 31ॱनी ॱलोप्टुक् दीबे खोङ्ल नुक्मे मी मङे कोदुम् ज्यक्प नीज्यरङ्गी थोङ्गीन् थोङ्गीन् ॱसु दील रेक्प बेत् सीन्न ॱसुङ्गेन्? झ्यीब बेत्। 32हुनी खोङ्गी ङल रेक्केन् दी ॱसु हीम्ब न? ॱनो़न घल अक् तेब बेत्। 33हुनी हुगी भुमु दीगी रोरङ्ल घङ् झ्युङ दी ॱह घोनी ज्यीबे दर्कीन् दर्कीन् खोङ्गी ढुङ्दु युङ्न छ्यक् छेन हुगी तम् घयेत् दी खोङ्ल जेङ् ढङ्बु ॱस्येप्प बेत्। 34ॱनी खोङ्गी हुगी भुमु दील ॱवे भुमु रङ्गी छ्य स्यक्प दीगी रङ् ढक्नर बेत्। ह ॱसीम् दीव झ्यीन ज्युक्। रङ् नज हुगी लक्नी थर् छर बेत् सीन्न ॱसुङ बेत्।
35खोङ्गी हीगो ॱसुङे यङ्ल यैरस् दीगी खीम् दीनी लो़न् टो़क्केन् मी यरी युङ्न यैरस् दील नीज्यरङ्गी भुमु ॱनी ॱस्यीसोङ्। ह चयेलमल ओप्च्या ॱलङ्नी घन्ड झ्यीच्च्ये झ्यीब बेत्। 36हुन्दुक् सीरे केच्च्य ॱह घोन अक्, येशुगी हुगो ङो़ल आम्न मत् झ्यीब, हुगी छ्यो़ छोगी गोयो़प्प दील रङ् ज्यीब मत् झ्यीत्। रङ् छ्य दीरङ् स्योक्ते झ्यीब बेत्। 37हुनी खोङ्गी पत्रुस्, याकुब्, याकुब्गी पी़न् युहन्ना झ्यीबरङ् ठीक्नी ॱयोङ्म ॱसु उक् युङ्दु ॱमत् ची़प्प बेत्। 38हुनी खोङ्जोसो हुगी छ्यो़ छोगी गोयो़प्प दीगी खीम्ल ॱलीब बेत्। ॱलीत्नी, उन मी गज्येन् छोन हुट्ट ज्यक्प धङ् ङुच्च्यङ् तोङ्गेन् धङ् ङुजीगी चीरोङ् ज्यक्पदङ् ठेप्प बेत्। 39ॱनी खोङ्जोसो नङ्ल स्युन हुगी मी घयेत् दील खोङ्गी खीत् घन्डल ङुजी ज्यक्को़प्प। हुगी भीज हुगो ॱस्यीय मेम्ब, ॱङीत्ल ॱसोङ बेत् सीन्न ॱसुङ बेत्। 40ॱनी हील हुगी मी घयेत् दी ढो़स्सक् ॱस्योर बेत्। हुनी हुगी मी घयेत् दी खोङ्गी कुरीक् छ्यील दीत्न तङ्न भीजे पब आम दी धङ् हुनी खोङ् रोरङ्दङ् दल युङ दीबरङ् क ठीक्न नङ्ल भीज झ्यीस्स दी च्येल्ल स्युन फीम्ब बेत्। 41हुनी खोङ्गी भुमु दीगी लक्पनी सुङ्न हुल तालीता कुम् सीन्न ॱसुङ बेत्। हीगी धो़न् दी भुमु ङ रङ्ल सीक्केन्। लोङ्ल ॱस्योक् सीक्केन् बेत्। 42खोङ्गी हुन्दुक् ॱसुङ्नी, भुमु दी ॱहोक् लोङ्न छ्यम्ब बेत्। हुगो मोलो च्युन्नीम ॱलीब यो़प्प बेत्। हीगो थोङ्नी हुगी मी घयेत् दी गन्दीक्म ॱह पट्टक् लेनर बेत्। 43हीगी केच्च्य हीगो ॱसुल आक् ॱमत् ॱस्यो़त् सीन्न खोङ्गी हुगी मी घयेत् दील गन्दीक्म ॱङान स्यक्प बेत्। भुमु हील सम गो़ब टो़त् सीन्न अक् ॱङान स्यक्प बेत्।
Valið núna:
मर्कुस् 5: LHM
Áherslumerki
Deildu
Afrita
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society