मर्कुस् 3
3
लक्प ॱस्योर्नरे मी च्यीक् ढक्प १-६
1हीनी यङ् लेन् च्यीक् येशु छ्यो़गी छोगङ् च्यीक्ल स्युन फीम्ब बेत्। ॱनी उन लक्प ॱस्योर्नरे मी च्यीक् यो़प्प बेत्। 2ॱनी हुदु मी यरीगी हरीङ् ङीत्तुवल येशुगी नेप्प हुगो ढक्तु ची़क्कुक्क न ॱमीत् ची़प्पेक्क तेदोङ् सीन्न खोङ्ल च्यीव झ्यीब बेत्। 3ॱनी येशुगी हुगी लक्प ॱस्योर्नर दील लोङ्न ॱस्योक् झ्यीब बेत्। 4हुनी खोङ्ल च्यीव झ्यीक्केन् घयेत् दीबल ङीत्तुवे ठीम्ल घङ्गो दी झ्यीन युङ्गेन् बेक्क? गय झ्यीन न, न अयेक्प झ्यीन? ॱरोक्च्यप् झ्यीन न, न ॱसेत्न? सीन्न ढीब बेत्। ॱनी हील हुब घयेत् ॱसीङ् थागी लेनर बेत्। 5येशु खोङ्डोक्की हुबल फोरी तेब बेत्। हुबे ॱसीम् गट्टक्प यो़प्प दी थोङ्नी खोङ् थु नन हुगी लक्प ॱस्योर्नर दील रङ्गी लक्प दी च्योङ् झ्यीब बेत्। हुनी हुगी लक्प दी च्यङ्नी, ॱस्युम् थोगी ढक्नर बेत्। 6हुनी हुगी फरीसी दीब छ्यील थो़न्न हेरोद् छ्योगी मी घयेत् च्याल फीन्न येशु घन्दुक् झ्यीन ॱसो़क्केन्? सीन्न ढो़ झ्यीब बेत्।
छो़ छीगदु नेप्प घयेत् ढक्तु ची़प्प ७-१२
7-8हुनी येशु रोरङ्गी ॱलोप्टुक् दीबदङ् दल छो़ छीगल फीम्ब बेत्। खोङ्गी घङ् जेप्पे ले घयेत् दी मी घयेक्की ॱह घोनी हुदु खोङ् च्याल गालीलानी, यहुदीयानी, यरुशलेम्नी, इदुमीयानी, यर्दन् चङ्बी़ पारीनी, टायर् धङ् सीदोन्गी लुङ्बनी मी छेत्मीत् जोम्न युङ बेत्। 9हुनी येशुगी रोरङ्गी ॱलोप्टुक् दीबल ङे ढीक्ल ढु च्यीक् ठोक्क झ्यीन स्योक्। स्येन् हीदु ङल मी मङ् ढाब रुप्न ॱलीत् योङ् सीन्न ॱङाब बेत्। 10घन्ड हीन् सीन्न खोङ्गी नेप्प गज्येन् ढक्तु ची़त्नी ॱनी, हुनी नज यो़प्प च्येम्म घयेत् कुरीक् खोङ्ल रेक्तु सीन्न रुप्न युङ बेत्। 11ॱनो़प्प स्यीन्न यो़प्पे हुगी मी दीगी नङ्नी ॱनो़प्प स्यीलोक्पोक्म घयेत् दीगी येशु नम् घदु ठेत्न आक्, हुबे खोङ्ल छ्यक् छेन नीज्यरङ् को़न्ज्योक्की ॱरेबु बेत् सीन्न केत् ज्यप्न युङ बेत्। 12ॱनी हुब घयेत्ल खोङ्गी ङ ॱसु बेक्क हुगी ढीक्ल केच्च्य घन्ड अक् ॱमत् ॱस्यो़त् सीन्न गन्दीक्म ॱङाब बेत्।
ठीक्नल च्युन्नी दम्बे तम् १३-१९
13हुनी येशु लदोक् च्यीक्ल जेन फीम्ब बेत्। हुनी खोङ्गी रोरङ्गी थुल ॱमीन दम्ब घयेत् दील ॱस्योक् सीन्न भो़ब बेत्। हुनी हुब युङ बेत्। 14खोङ्गी हुगी मीरङ् च्युन्नीबु दीबल ठीक्नले मीङ् तान हुब खोङ् रोरङ्दङ् दल दो़च्च्येल, केच्च्य ॱस्यो़त्तु तोङ्ज्येगी ढीक्ल धङ् 15ॱनो़प्प अयेक्प घयेत् तो़न्न दीच्च्येमे ॱवङ् युङ्ज्ये यो़प्पल को़ब बेत्। 16ठीक्नल च्युन्नीबी़ मीङ् दी शीमोन्, हुल यङ् पत्रुस् सीन्न खोङ्गी मीङ् ॱयोङ्म पो़ब बेत्। 17हुनी जब्दीगी भु याकुब् धङ् युहन्ना हुब ॱङीबुल बोअनेर्गेश् सीन्न मीङ् ॱसम्ब ताब बेत्। हुगी धो़न् दी डुक्की केक्की भु सीक्केन् बेत्। 18हुनी अन्द्रीयस्, फीलीप्, बार्थोलोमै, मत्ती, थोमा, अल्फयस्की भु याकुब्, थेदीयस्, शीमोन् जेलोतेस् 19धङ् खोङ् डलक्ल तोङ्गेन् यहुदा इस्करीयोत् झ्यीब हीजो़त् च्यीक् बेत्।
येशुल बाल्जीबुल् स्युब बेत् सीक्केन् २०-३०
20हुनी युङ्नी येशुसो खीम् च्यीक्ल स्युब बेत्। ॱनी हुदु यङ् मी छेत्मीत् जोम्न युङ्नी, खोङ्जोसोल सम सलोङ् ओङ् मत् युङ बेत्। 21ॱनी येशुगी ढीक्की केच्च्य घयेत् दी खोङ् रोरङ्गी फम पी़न् घयेत् दीगी ॱह घोनी, खोङ् ठीक्तु हुब युङ बेत्। घन्ड हीन् सीन्न मी घयेक्की खोङ्ल हुगो ॱनोबु हीम्ब न? सीन्न झ्यीब हीङ्गो़प्प बेत्।
22ॱनी यरुशलेम्नी छ्यो़डीम्गी चयेलम यरी खोङ् च्येल्ल युङ्न हुबे येशु हुल बाल्जीबुल् स्युन यो़प्प हीङ्गो़प्पेत्। ॱनो़प्प अयेक्प घयेक्की चोबो़न् दीगी ॱवङ् दी हुल यो़प्पेत्। ॱनी हुगी ॱवङ् दीगी क ॱनो़प्प अयेक्प ॱयोङ्म घयेत् दी तो़न्न दीक्को़प्पेत् सीन्न झ्यीब बेत्। 23ॱनी हुब घयेत्ल येशुगी छुल्ल भो़न पी गज्येन् तो़न्न हीन्दुक् सीन्न ॱस्येप्प बेत्। शैतान्गी यङ् शैतान्रङ् घन्दुक् झ्यीन दीक्केन्? 24ज्यागक् च्यीक्की नङ्दु मत् डीक्प, गो ॱङील भीन ॱनी, हुगो घन्दुक् झ्यीन ॱने छुगेन्? 25ढोङ्ब च्यीक्की नङ्दु मत् डीक्प, गो ॱङील भीन ॱनी, हुगो घन्दुक् झ्यीन ॱने छुगेन्? 26शैतान्गी डल शैतान्रङ् लोङ्न मत् डीक्प, भीन ॱनी, हुगो चव ॱमीत् छुब, ये डोगेन् बेत्। 27मी ज्यीक्पागी ढोङ्ब लुप् गो़ झ्युङ्न ॱनी, ढोङ्बे दक्पु ज्यीक्स्यो दी कीङ्न स्यक्न मेन्द, हुगी यप्च्य घयेत् दी लुप् ॱमीत् छुगेन् बेत्। 28ङे खीत्रङ्ल गन्दीय ॱस्येत् योङ्। कोलीमीगी घन्डे दीक्परङ् झ्ये, घन्डे ॱमो़म्बी़त्रङ् तङ्न आक्, हुगो कुरीक् धक् डोगेन् बेत्। 29ॱनी मी ॱसी़ धम्बे थुगी ढीक्ल ॱमो़म्बी़त् तोङ्गुक्क हुगी दीक्प हुगो नम् नम्ल अक् मीत् धक्केन् बेत्। हुगो धी़ ज्यी़न्दु मीत् येब दो़क्केङ्गी दीक्प बेत् सीन्न ॱस्येप्प बेत्। 30घन्ड हीन् सीन्न हुबे येशुल ॱनो़प्प स्यीलोक्पोक्म स्युब हीङ्गो़प्पेत् सीन्न झ्यीब हीङ्गो़प्प बेत्।
येशुगी फम पी़न् युङ ३१-३५
31हुनी येशुगी आम धङ् पी़न् दीब हुदु युङ बेत्। युङ्नी, हुब छ्यीदु देत्न खोङ्ल छ्यील थो़ल्लेत् झ्यी सीन्न केच्च्य तङ बेत्। 32ॱनी नङ्न मी गज्येन् खोङ्दङ् दल यो़प्प बेत्। ॱनी हुबे खोङ्ल नीज्यरङ्गी आम धङ् पी़न् घयेत् नीज्यरङ् ठेत्तु उन छ्यीन ॱलीत्न दुक् सीगुक् झ्यीब बेत्। 33ॱनी हुब घयेत्ल खोङ्गी ङे आम धङ् पी़न् घयेत् दी ॱसु बेक्क ॱनी? सीन्न ढीब बेत्। 34हुनी खोङ्ल तीक् खीरी कोर्न यो़प्पे मी घयेत् दील तेन खोङ्गी ङे आम धङ् पी़न् घयेत् दीब हीब बेत्। 35को़न्ज्योक्की थुल यो़प्पल मी ॱसी़ नेन्न झ्यीगुक्क हुगो ङे पी़न् धङ् आम हीम्बल युङ्गेन् बेत्।
Valið núna:
मर्कुस् 3: LHM
Áherslumerki
Deildu
Afrita
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society