मर्कुस् 12
12
गोङ्गोङ्गी स्यीङ्ग सगेन् घयेक्की ढीक्ल ॱलीङ्दम् १-१२
1हीनी येशुगी हुगी मी घयेत् दील ॱलीङ्दम्गी केच्च्य गज्येन् हीन्दुक् सीन्न ॱस्येप्प बेत्। मी च्यीक्की रोरङ्गी स्यीङ्ग दील गोङ्गोङ् चुन हुल च्यारी तीक् खीरी ज्यप्न स्योक्केन् बेत्। हुनी गोङ्गोङ् चीर्च्येम च्यीक् ढी़न स्योक्केन् बेत्। हुनी झ्यागीम् थोन्दीक्म च्यीक् इक् सो़न स्योक्केन् बेत्। ॱनी गोङ्गोङ्गी स्यीङ्ग दी मी ॱयोङ्म घयेत्ल फीस्सोल टेत्न रोरङ् लुङ्ब स्येल्ल डोगेन् बेत्। 2ॱनी गोङ्गोङ् दी छो़बे धी़जो़त्ल ॱसप्तक्प दीगी रोरङ्गी फक् दी लीन्दु सीन्न ॱयोक्पु च्यीक् तोङ्गेन् बेत्। 3ॱनी ॱस सगेन् दीबे हुगी ॱयोक्पु दी सुङ्न दुङ्न तोङ्सीरी ॱलोक्न तङ बेत्। 4ॱनी यङ् ॱसप्तक्प दीगी ॱयोक्पु ॱयोङ्म च्यीक् हुब च्याल तङ बेत्। ॱनी हुल ॱसुम्ब गो दील बेन्न ॱम पब बेत्। 5ॱनी यङ् ॱसप्तक्प दीगी ॱयोङ्मा च्यीक् तङ बेत्। हुबे हुगो ॱसेत् तङ बेत्। ॱनी हीगो डस्सी गज्येन् तङ बेत्। ॱनी हुबे यरील दुङ बेत्। यरी ॱसेत् तङ बेत्। 6ॱनी ॱसप्तक्प दील हरुङ् ॱयोङ्मा च्यीक् यो़प्प बेत्। हुगो खोङ् रोरङ्गी झ्यम्बे भु दी हीङ्गो़प्प बेत्। ॱनी ॱसप्तक्प दीगी ङरङ्गी भुल त हुबे घन्ड अक् मीत् झ्यीप्प, थोङ् झ्यीक्को़ट्टो ॱनो़न भु दी तङ बेत्। 7हीनी ॱस सगेन् दीबे रोरङ्सो नङ्दु हन्देन् त ॱसप्तक्पे भु दीरङ् ॱलीच्च्युङ्। ह डो। हुगो ॱसेत्तोङ्। ॱनी हुगी फस्स्यी मस्स्यी घयेत् दी हज्यरङ् झ्यीदोङ् सीन्न ढो़ झ्यीब बेत्। 8हुनी हुबे ॱसप्तक्पे भु दी सुङ्न ॱसेत्न स्यीङ्गे नङ् दीनी ढी़त्न पुर् तङ बेत्। 9ॱनी हुबे हुन्दुक् झ्यीनी ॱनी, गोङ्गोङ्गी स्यीङ्गे दक्पु दीगी हुबल घन्ड झ्यीक्केन् बेक्क ॱनी? ॱसप्तक्प दी युङ्न ॱस सगेन् घयेत् दी ॱसेत्न गोङ्गोङ्गी स्यीङ्ग दी ॱयोङ्म घयेक्की लक्ल टो़क्केन् बेत्। 10ॱसुङ्रप्ल थो़ङ्गेङ्गी केच्च्य हीगो खीक्की मत् डोब ॱनी?
सोबो़न् घयेक्की घो ॱमीत् छ्यो़त्ल ॱसम्न पुर् तङे दो दी यङ् सुर्की दो घो छ्यो़स्स्योल झ्युङ्न युङ बेत्। 11हीगो चोव ज्यीन्दक्की जेप्पे ले बेत्। हील ङीत् ॱह लेसी छोर्कुक् सीर दुक् न ॱनी। (ॱसुङ्रप्की गुल्लु ११८:२२-२३)
12ॱनी उन यो़क्केन् मी छ्यीया घयेत् दीबे येशु सुङ्ज्ये ॱनो़ब झ्यीब बेत्। ॱनी हीन्न अक्, यङ् हुब मी घयेत्ल ज्यीब बेत्। खोङ्गी ॱलीङ्दम् हुगो हुबे रोरङ्सो़ ढीक्ल ॱस्येच्च्युङ् ॱनो़ब ॱह घोव बेत्। हुनी हुब घीन टप्नर बेत्।
सीजर् ज्याबुल ठेम जबे ढीक्ल १३-१७
13हीनी हुबे येशुगी तम्ल सील्लुङ् तान ॱङेत्त ॱयेङ्ज्येल फरीसी धङ् हेरोद् छ्योगी मी यरी खोङ् च्येल्ल तङ बेत्। 14ॱनी हुब युङ्न हुबे खोङ्ल चयेलम नीज्यरङ् मी सङ्बु, को़न्ज्योक्की लम् दीम्बरङ् तो़ङ्गेन्, मी खल ॱमीत् तय, दम्ङीत् मीप्प ॱस्यो़क्केन् हीम्ब ङीत्ल ॱस्यो़च्च्ये यो़त्। हज्यरङ्गी छ्यो़डीम्ल रोम्गी सीजर् ज्याबुल हज्यरङ्गी ठेम जप्न डीक्केन् बेक्क न मत् जप्न डीक्केन् बेक्क? 15हज्यरङ्गी जप्च्ये युङ्गेन् न मीत् युङ्गेन्? सीन्न ढीब बेत्। ॱनी खोङ्गी हुबे खोक्प अयेक्प दी ॱह घोनी हुबल ङल घन्डल खीक्की हीन्दुक् झ्यीबे ॱङीङ् गुक्केन्? ङल टङ्ग दीनार् च्यीक् खुर्लेत्ते। ङे हुगी पर् दील तेगी झ्यीब बेत्। 16हुनी हुबे रोम्गी टङ्ग च्यीक् तो़म्ब बेत्। हुल तेनी खोङ्गी हुगी टङ्गे पर् हुगो धङ् हुगी यीगी दी ॱसी़ बेक्क? सीन्न ढीब बेत्। ॱनी हुबे लेल्ल सीजर् ज्याबी़ बेत् झ्यीब बेत्। 17ॱनी येशुगी हुबल हुगो हीन्न, सीजर् ज्याबी़ घङ् हीम्ब दी सीजर्लरङ् टो़त्। को़न्ज्योक्की घङ् हीम्ब घयेत् दी को़न्ज्योक्लरङ् टो़त् झ्यीब बेत्। ॱनी खोङ्गी केच्च्य हील हुब ॱह लेनर बेत्।
ॱसोम्बुल लोङ धङ् मीत् लोङे ढीक्ल तम् ढीब १८-२७
18हीनी तीङ्ला सदुकी छ्योगी मी यरी येशु च्याल तम् च्यीक् ढीदु युङ बेत्। सदुकी घयेक्की लुल मी ॱस्यीनर यङ् ॱसोम्बुल मीत् लोङ्गेन् बेत् सीगो़प्प बेत्। 19ॱनी हुबे येशुल चयेलम हज्यरङ्गी ढीक्ल मोशागी ढीन यो़प्पे कल
मी छ्योगो पी़न् च्यीक् भीज मीप्पल ॱस्यीन ॱनी, हुगी नङ्जङ् दी हुगी होक्की पी़न् दीगी ॱनमल ठीक्न रोरङ्गी अज्यो ॱस्यीगेन् दीगी ढीक्ल ज्यी़त् सो़न स्योक् गोगेन् बेत् सीर थो़ङ्गुक्। (ठीम्लु २५:५)
20ॱनी पी़न् दी़न् च्येम्मे ढोङ्ब च्यीक्तु पी़न् छ्यीस्स्यो दीगी ॱनम ठीक्नी, हुगो भीज मीप्पल ॱस्यीनर बेत्। 21ॱनी हुगी नङ्जङ् दी हुगी पी़न् होक्मा दीगी ठीक्प बेत्। ॱनी हुगो ओक् भीज मीप्पल ॱस्यीनर बेत्। ॱनी हीगो डस्सी हुगी पी़न् होक्मा दी इक् हुन्दुक् दीरङ् झ्यीन ॱस्यीनर बेत्। 22ॱनी पी़न् दी़ङ्गर्ल हुन्दुक् झ्यीन भीज मत् युङल ॱस्यीनर बेत्। हुनी स्युक्ला हुगी भुमु दी इक् ॱस्यीनर बेत्। 23ॱनी स्युक् थमल ॱस्यीनर घयेत् कुरीक् ॱसोम्बुल लोङ्न ॱनी, पी़न् दी़ङ्गर्की ॱनमल गीरे भुमु हुगो हुगी यङ्ल पी़न् घन् दीगी नङ्जङ्ल युङ्गेन् बेक्क? सीन्न ढीब बेत्। 24हीगी लेल्ल येशुगी खीत्रङ्गी को़न्ज्योक्की ॱसुङ्रप्की धो़न् यङ् ॱह मीत् घोयेत्। को़न्ज्योक्की ॱवङ् यङ् ॱह मीत् घोयेत्। खीत्रङ्गी ॱह मीत् घोवल क लम् नोर्नर बेत्। 25ॱस्यीनरनी ॱसोम्बुल लोङ्नी, इगीदु हीदु झ्यीब डस्सी ॱनम ठीक्केन् धङ् ॱनमल डोगेङ्गी लेमु मीत् युङ्गेन् बेत्। तेङ् यी़गी भङ्ज्येम्ब डस्सी युङ्गेन् बेत्। 26ॱस्यीनर घयेत् ॱसोम्बुल ॱलोङे ढीक्ल मोशागी ॱसुङ्रप्ल थो़ङ्गेन् चङ्गी दोङ्बुल मी बर्न युङे यङ्गी केच्च्य खीक्की मत् डोब ॱनी? हुगी केच्च्यल को़न्ज्योक्की मोशाल
ङ अब्राहाम्गी को़न्ज्योक्, इसहाक्की को़न्ज्योक्, याकुब्गी को़न्ज्योक् हीन् सीर यो़क्केन् बेत्। (थो़म्ब ३:६)
27खोङ् ॱस्यीनर घयेक्की को़न्ज्योक् मेम्ब, ॱसोम्बु घयेक्की को़न्ज्योक् बेत्। खीत्रङ् लम् नोर्नरे मी बेत् सीन्न ॱसुङ बेत्।
क गो़स्यो धङ् चा छ्यीस्स्योगी ढीक्ल ढीब २८-३४
28हुगी यङ्ल छ्यो़डीम्गी चयेलम च्यीक्की येशुदङ् हुगी सदुकी दीब केच्च्यल थुक्री चीय थोङ्नी, येशुगी लेम्बु खेसी हुबल ॱलोक्प ॱह घोनी हुगो युङ्न हुगी खोङ्ल छ्यो़डीम्गी क घयेक्की छीक्नी गो़स्यो धङ् चा छ्यीस्स्यो दी घङ्गो बेक्क? सीन्न ढीब बेत्। 29ॱनी हीगी लेल्ल खोङ्गी क चा छ्यीस्स्यो धङ् गो़स्यो दी हीगो बेत्।
ॱवे इस्राएली घयेत् नेन्। हज्यरङ्ल चोव ज्यीन्दक् दी हज्यरङ्गी को़न्ज्योक् च्यीगी च्यीक्रङ् बेत्। 30रङ्गी चोव ज्यीन्दक् को़न्ज्योक्ल रङ्गी ॱसीम्बे यीक्नी, रङ्गी ॱस्यीरप् रीक्प छङ्म धङ् रङ्गी ओङ्बु घङ् यो़प्प कुरीक्की झ्यम्ब खुर्च्यीत्। 31ॱनी हीगी तीङ्नी रङ्गी लोल यो़क्केङ्गी मील रङ्गी रङ् डस्सीरङ् ॱसम्न झ्यम्ब झ्यीज्यीत्। (ठीम्लु ६:४-५)
हीब ॱङीले चा छ्यीयागी क ॱयोङ् मीप्प बेत्। 32ॱनी हुगी छ्यो़डीम्गी चयेलम दीगी खोङ्ल चयेलम नीज्यरङ्गी गन्दीय गस्सी ॱस्येच्च्युङ्। को़न्ज्योक् च्यीगी च्यीक् मेन्द, ॱयोङ् मीप्प सीक्केन् हुगो खुङ्देन् बेत्। 33को़न्ज्योक्ल हज्यरङ्गी ॱसीम्बे यीक्नी, ॱस्यीरप् रीक्प छङ्मे धङ् घङ् यो़प्पे ओङ्बु कुरीक्की झ्यम्ब खुर्न दो़त् गोगेन् बेत्। हुनी रङ्गी लोल यो़क्केङ्गी मील रङ्गी रङ् डस्सीरङ् ॱसम्न झ्यम्ब झ्यीज्यीत् सीक्केन् हीगो को़न्ज्योक्ल ॱहेन पुगेङ्गी छ्यो़प्प धङ् छ्यो़प्प ॱयोङ्मा घयेत्ले एक् हीगो चा छ्यीस्स्यो धङ् गो़स्योल ॱनेगेन् बेत् झ्यीब बेत्। 34ॱनी येशुगी हुगी मी दीगी लेम्बु खेसी ॱलोक्प घोनी खोङ्गी हुल रङ् को़न्ज्योक्की ज्यागक्नी ज्यङ्स्यो मीन्दुक् सीन्न ॱसुङ बेत्। हीनी झ्यीनी खोङ्ल तम् ढीये ॱआर् मी ॱसुल आक् मत् युङ बेत्।
ख्रीष्ट् घन्दुक् झ्यीन दाऊद्गी ज्यी़त् युङ्गेन् ३५-३७
35हीनी येशु छ्यो़गङ्गी च्यारीगी नङ्ल स्युन ॱलोप्स ज्यप्न टेप्प बेत्। ॱनी हुगी यङ्ल उन यो़प्पे मी घयेत् दील खोङ्गी छ्यो़डीम्गी चयेलम घयेत् हुबे को़न्ज्योक्की को़बे च्यप्को़न् ख्रीष्ट् दाऊद्गी ज्यी़त् बेत् सीन्न सीगुक्। ॱनी हुगो घन्दुक् झ्यीन युङ्गेन् बेक्क? सीन्न ढीब बेत्। 36धम्बे थुगी झ्यीन दाऊद्गी रोरङ्गी हीन्दुक् सीन्न ॱस्येप्प बेत्।
चोव ज्यीन्दक्की ङे चोव ज्यीन्दक्ल हीन्दुक् ॱसुङ बेत्। रङ्गी ड घयेत् रङ्गी कङ्बे होक्ल ङे नम् ॱलुक्न स्योक् स्योक् थुक्ल रङ् ङे ॱये छ्योदु दो़त् सीन्न ॱसुङ थो़ङ्गेन् बेत्। (ॱसुङ्रप्की गुल्लु ११०:१)
37दाऊद् रोरङ्गीरङ् ख्रीष्ट्ल चोव ज्यीन्दक् सीक्को़त्न ॱनी, खोङ् यङ् घन्दुक् झ्यीन दाऊद्गी ज्यी़त् युङ् छुगेन्? सीन्न खोङ्गी ॱसुङ बेत्। ॱनी खोङ्गी केच्च्य हील मी घयेत् दी ॱनेन्सी छोर्न नेम्ब बेत्।
38येशुगी यङ् मी घयेत्ल हीन्दुक् सीन्न ॱलोप्स ज्यब बेत्। छ्यो़डीम्गी चयेलम घयेत्ल खीत्रङ् धोजीम् झ्यीज्यीत्। हुब घो़ रीङ्मु घो़ङ्गेन् बेत्। ठोम् छुसदु मी घयेक्की ॱसे स्यी़न युङल हुब मो़सी झ्यीक्केन् बेत्। 39यहुदीगी छ्यो़गी छोगङ्दु धङ् मी डो़न् तोङ्सदु हुब ढे तेङ्ल दो़च्च्येल मो़सी झ्यीक्केन् बेत्। 40हुबे मोरेङ्मु घयेक्की ढोङ्ब लुप्केन् बेत्। मील तो़न्ज्येल ॱसुव रीङ्मु तोप्कीन् दो़क्केन् बेत्। हुन्दुक् झ्यीबल तीङ्ला छ्येप्प ॱल्हक्मु फोक्केन् बेत् सीन्न ॱस्येप्प बेत्।
मी मोरेङ्मु च्यीक्की च्यीप्टे ॱङी पुबे तम् ४१-४४
41हुनी येशु छ्यो़गङ्दु पयीसक् पुसे फच्चो़त्तु देत्न मी घयेक्की पयीसक् पुब दील तेब बेत्। ॱनी मी छ्युक्पु छ्युक्पु घयेक्की गज्येन् पुब बेत्। 42ॱनी मी मोरेङ्मु टङ्बु च्यीक् युङ्न हुगी च्यीप्टे ॱङी पुब बेत्। हुगो सङ्गी पयीसक् च्यीप्टे च्यीक् डस्सील ॱनेगेन् बेत्। 43हुनी खोङ्गी ॱलोप्टुक् दीब लोल भो़न हुबल खोङ्गी ङे खीत्रङ्ल गन्दीय ॱस्येत् योङ्। हुदु पयीसक् पुगेन् कुरीक्की छीक्नी हुगी मोरेङ्मु हुगी मङ्स्योल पुसोङ्। 44ॱयोङ्म घयेक्की रोरङ्सो़ ॱल्हक्टो़रङ् क पुसोङ्। मोरेङ्मु हुगी रोरङ् टङ्बु हीम्बे ॱमत् छ्योक्, रोरङ्ल गो़सी यो़त्न अक्, घङ् यो़प्प दीरङ् कुरीक् पुसोङ् सीन्न ॱसुङ बेत्।
Valið núna:
मर्कुस् 12: LHM
Áherslumerki
Deildu
Afrita
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society