मत्ती 19
19
येशुसो यरुशलेम्ल डोगेन् १९:१–२०:३४
छ्योबु छ्युङ्म घीज्ये युङ धङ् मीत् युङे ढीक्ल १-१२
1येशुगी हुगी केच्च्य हुगो ॱस्येत् छर्नी खोङ् गालीलानी थो़न्न यहुदीयागी यर्दन् चङ्बी़ पारीगी लुङ्बल फीम्ब बेत्। 2ॱनी खोङ्गी तीङ्ल मी छेत्मीत् युङ बेत्। हुबे छीक्न यो़प्पे नेप्प घयेत् दी कुरीक् खोङ्गी ढक्तु ची़प्प बेत्।
3खोङ्ल छो़त्लीन् तदु हुदु फरीसी यरीब युङ्न हुबे खोङ्ल छ्योगो़ रोरङ्गी छ्युङ्म ॱनो़बागी ॱलो़ तोङ्ज्ये युङ्गेन् बेक्क न मीत् युङ्गेन् बेक्क? सीन्न ढीब बेत्। 4हीगी लेल्ल येशुगी ॱसुङ्रप्ल थो़ङ्गेङ्गी केच्च्य हीगो खीक्की डोन ॱमत् तेब?
छङ्म थम्ज्येत् छ्यादु ची़क्केन् खोङ्गी ॱङो़न् धङ्बु छ्योगो धङ् भुमु सो़ब बेत्। 5हीगो झ्यीनी छ्योगो रोरङ्गी फम च्यानी भीन रोरङ्गी छ्युङ्मदङ् मुल डीक्न दो़क्केन् बेत्। हुनी हुब ॱङीबी़ ली़ दी च्यीक् हीम्बल डोगेन् बेत्। (छ्यारप् १:२७)
6हीगो झ्यीनी हुब ॱङी मेम्ब च्यीक् बेत्। हुन्दुक् झ्यीन को़न्ज्योक्की कङ्ज्यीक्पल सो़न स्यक्प दी मी या टो़ज्ये मीत् युङ्गेन् बेत् सीन्न ॱस्येप्प बेत्।
7ॱनी हुबे यङ् खोङ्ल हुगो हीन्न, मोशागी ढीबे कल घन्डल
छो पत्तर ढीन बीन्न छ्युङ्म ॱलो़ तोङ्ज्ये युङ्गेन् बेत् सीक्केन् बेक्क? (ठीम्लु २४:१)
8हीगी लेल्ल येशुगी खीत्रङ् ॱअप्स्यी़त् मीप्पे मी झ्यीनी, मोशागी हुन्दुक् झ्यीबे क टो़त् गो़ ॱस्यर बेत्। हुगो गोमनीरङ् झ्युङ्न युङ मेम्बेत्। 9हीगी ढीक्ल ङ खीत्रङ्ल सीक्केन्। मी ॱसी़ रोरङ्गी छ्युङ्म ॱयोङ्दङ् ङीबे ढीक्ल मेम्ब, धो़न् ॱयोङ्गी ढीक्ल ॱलो़ तङ्न ॱयोङ्म ठीक्कुक्क हुगो ॱयोङ्गी नङ्जङ् ठोबे दीक्पल डोगेन् बेत् झ्यीब बेत्।
10हुनी ॱलोप्टुक् दीबे खोङ्ल हुगो हीन्न ॱनी, ॱनम दीरङ् ॱमत् ठीक्प देत्न, गा युङ्गो़ट्टो झ्यीब बेत्। 11ॱनी हीगी लेल्ल येशुगी मी कुरीक्ल हीगो मीत् डीक्केन् बेत्। को़न्ज्योक्की ॱसुल हुन्दुक् झ्यीब ॱनङ् यो़दङ् हुल मेन्द। 12भालीन् मीत् झ्यीच्च्येगी धो़न् दी मी यरील कीजी़नीरङ् च्यो़न् झ्युङ्न युङ्गेन् बेत्। ॱनी मी यरील यङ् छ्योबु छ्युङ्म युङ् ॱमीत् छुगेल्ल ॱयोङ्गी मीत्तल सो़ तङ युङ्गेन् बेत्। ॱनी मी यरी यङ् तेङ् यी़गी ज्यागक्की धो़न्दु ॱनम ॱमत् ठीक्पल दो़क्केन् बेत्। ॱनी हीगो ॱसुल डीक्को़दङ् हुगी हुल डीक्प झ्यीज्यीत् झ्यीब बेत्।
भीजल येशुगी ॱवङ् केन ॱमेल्लम् स्यी़न टेप्प १३-१५
13हुनी हुदु मी घयेक्की भीज गज्येन् ठीक्न युङ्न हीबल छ्यक्वङ् केन ॱमेल्लम् स्यी़न ॱनङ्रो झ्यी सीन्न येशुल स्यी़ब बेत्। ॱनी ॱलोप्टुक् दीबे हुब क च्येत्न लप्स्य तङ बेत्। 14ॱनी येशुगी लेल्ल भीज घयेत् हुब क ॱमत् च्यो़त्। हुब ङ च्याल युङ्दु ची़त्। घन्ड हीन् सीन्न तेङ् यी़गी ज्यागक् भीज हीब डस्सीगी बेत् सीन्न झ्यीब बेत्। 15हुगी भीज दीबे गोल खोङ्गी छ्यक्वङ् केन टेप्प बेत्। हुनी खोङ् ॱयोङ्ल फीम्ब बेत्।
मी छ्युक्पु च्यीक्की ढीक्ल १६-२६
16हुनी तीङ्ला येशु च्याल मी च्यीक् युङ्न हुगी खोङ्ल चयेलम ङल फु तक्पे छी थोबे ढीक्ल ङे घन्दुक् झ्यीबे गये ले झ्यीत् गोगेन् बेक्क? सीन्न ढीब बेत्। 17ॱनी हुल खोङ्गी खोक्की ङल घन्डल गये ढीक्ल ढीगेन्? गय च्येम्म दी च्यीगी च्यीक् मेन्द, ॱयोङ् मीप्प बेत्। फु तक्पे छी थोप्सल स्युक्च्ये ॱनो़न रङ् छ्यो़डीम्गी क घयेत्ल चीन दो़च्च्यीत् झ्यीब बेत्। 18ॱनी हुगी खोङ्ल घन् दीगी क घयेत्ल ची गोगेन् बेक्क? झ्यीब बेत्। ॱनी हील येशुगी
मी ॱमत् ॱसो़च्च्यीत्। ॱयोङ्दङ् मत् ङीज्यीत्। की़न्नक् ॱमत् कुज्यीत्। पङ्बु झ्यीप्पे यङ्ल ॱएलम मत् ज्यक्च्यीत्। 19फमल खुच्च्य झ्यीज्यीत्। रङ्गी लोल यो़क्केङ्गी मील रङ्गी रङ् डस्सीरङ् ॱसम्न झ्यम्ब झ्यीज्यीत् झ्यीब बेत्। (थो़म्ब २०:१२-१६)
20ॱनी हुगी स्यो़म्ब दीगी हीगो त ङे कुरीक् चीन युङेन्। हरुङ् हीले ॱल्हक्मा घन्ड झ्यीत् गोगेन् बेक्क? झ्यीब बेत्। 21ॱनी हुल येशुगी रङ् फी़न्सुम् छङ युङ्ज्ये ॱनो़न ज्युक्ल रङ्ल घङ् यो़प्पे नोर् घयेत् दी चोङ्न टङ्बु घयेत्ल गो़न बील्ल रङ् ङे ॱलोप्टुक्ल ॱस्योक्। हुनी रङ्ल तेङ् यी़दु तीर्क थोप्केन् बेत् सीन्न ॱस्येप्प बेत्। 22हीगो घोनी हुगी स्यो़म्ब दी ॱसीम्दुक्की फोप्नेत् छ्यान टप्नर बेत्। घन्ड हीन् सीन्न हुल नोर् छेत्मीत् यो़प्प बेत्।
23हीनी येशुगी ॱलोप्टुक् दीबल ङे खीत्रङ्ल गन्दीय ॱस्येत् योङ्। मी छ्युक्पु बर तेङ् यी़गी ज्यागक्ल स्युक्पल घन्दुक्मे घाब दुक्क। 24ङे खीत्रङ्ल हरुङ्द ॱस्येत् योङ्। मी छ्युक्पु बर को़न्ज्योक्की ज्यागक्ल स्युक्पले त ॱमुक्मु घम खप्की ॱमीक्ल स्युक्प ले ॱल्हा युङ्गेन् बेत् झ्यीब बेत्। 25हील ॱलोप्टुक् दीब गन्दीक्म ॱह लेन खोङ्ल नुक्म हीन्न, मी ॱसु दी छी थर्वल थो़न् छुगेन् ॱनी? सीन्न ढीब बेत्। 26ॱनी येशुगी हुबल तेन हीगो कोलीमी ङो़नी युङ् ॱमीत् छुगेन् बेत्। ॱनी हीन्न अक्, को़न्ज्योक् ङो़नी कुरीक् युङ् छुगेन् बेत् झ्यीब बेत्।
ॱलोप्टुक्पल थोप्केङ्गी ॱल २७-३०
27हुगी लेल्ल पत्रुस्की खोङ्ल ङीक्की ॱनी कुरीक् फङ्न स्यक्न ङीत् नीज्यरङ्गी ॱलोप्टुक्ल स्युन यो़त्। ॱनी ह ङीत्ल घन्ड दी थोप्केन् बेक्क? सीन्न ढीब बेत्। 28ॱनी हुल खोङ्गी ङे खीत्रङ्ल गन्दीय ॱस्येत् योङ्। धी़ ॱसम्ब ॱस्यर्न, कोलीमीगी ॱरेबु रोरङ्गी तो़त्वङ् च्येम्मे ओ़च्च्यल ॱवङ् च्येम्मे स्युडील जेन दो़क्केन् बेत्। ॱनी हुगी यङ्ल ङे लम्ल युङ्गेन् खीत्रङ्सो ओक् ॱवङ् च्येम्मे स्युडी च्युन्नील जेन इस्राएल्की ज्यी़त् च्युन्नीबुल ॱवङ् च्योङ्गेन् बेत्। 29ङे मीङ्गी ढीक्ल मी ॱसी़ रोरङ्गी ढोङ्ब हीन्, पी़न् हीन्, फम हीन्, भीज हीन्, फस्स्यी मस्स्यी घन्ड फङ्न स्यक् यो़दङ् हुगोल हुन्दुक् झ्यीब घयेत् ज्यगोर् थम्ब ॱल्हक्मु थोप्केन् बेत्। ॱनी हुल फु तक्पे छी दी इक् थोप्केन् बेत्। 30ॱनी हीन्न अक्, ॱएम्मा घयेत् दी गज्येन् तीङ्ल झर् डोगेन् बेत्। ॱनी तीङ्मा घयेत् दी यङ् गज्येन् एल्ला थो़न् डोगेन् बेत् झ्यीब बेत्।
Valið núna:
मत्ती 19: LHM
Áherslumerki
Deildu
Afrita
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society