मत्ती 12
12
ङीत्तुवे कल ङीब धङ् मत् ङीबे ढीक्ल १-१४
1हुनी ङीत्तुवे ङीन् च्यीक् येशुसो ढे घुङ्नी फक्की लम् च्यीक्ल फीम्ब बेत्। ॱनी डोये यङ्ल ॱलोप्टुक् दीब ढोप्प तोबे हुबे ढे ॱही़ तोन सेब बेत्। 2ॱनी फरीसी घयेक्की हुगो थोङ्नी हुबे येशुल व तो़दे त। नीज्यरङ्गी ॱलोप्टुक् हुब ङीत्तुवे यङ्ल हुन्दुक् झ्यीच्च्ये मीत् युङ्गेन् बेत् सीरे कल ॱमीत् चीय, हुन्दुक् झ्यीगुक् न ॱनी सीन्न झ्यीब बेत्। 3हुगी लेल्ल येशुगी धङ्बु दाऊद् धङ् दाऊद्गी दल यो़प्पे मी दीब ढोप्प तोनी, हुबे घन्ड झ्यीब बेक्क खीक्की हुगो डोन ॱमत् तेब ॱनी? 4खोङ् को़न्ज्योक्की सीङ्गङ्ल स्युन को़न्ज्योक्ल पुबे ढोप्ची घयेत् खोङ्जो़ डुन से तङ बेत्। हुनी रोरङ्गी दगु दीबल अक् बीन्न, हुबे एक् सेब बेत्। हुगो स्येन् छ्यो़प्पो़न् घयेक्की मेन्द, सज्ये मीत् युङ्गेन् बेत्। 5हीगी ढीक्ल खीक्की छ्यो़डीम् डोन ॱमत् तेब ॱनी? ङीत्तुवे यङ्ल छ्यो़प्पो़न् घयेक्की छ्यो़गङ्दु छ्यो़प्प पुबे ले झ्यीन अक्, हुगो ङीबल मीत् डोगेन् बेत्। 6ङे खीत्रङ्ल ॱस्येत् योङ्। छ्यो़गङ्ले त छ्यीया च्यीक् हीन यो़क्केन् बेत्। 7ॱसुङ्रप्ल को़न्ज्योक्की
छ्यो़प्प पुबले त खीत्रङ्सो नङ्दु ॱङीङ्ज्यी झ्यीत्री चीयल ङ मङा गुगुक् सीर दुक् न ॱनी। (होशे ६:६)
हीगी धो़न् हीगो खीत्रङ्गी ॱह घोव हीन्न ॱनी, ङीब मीप्पे मील धो़म्मीत्ल ङीब ॱमत् कप् यो़ट्टो। 8कोलीमीगी ॱरेबु ङीत्तुवे एक् दक्पु बेत् झ्यीब बेत्।
9येशु हुनी स्युङ्ज्योङ् हुबे छ्यो़गी छोगङ्ल स्युन फीम्ब बेत्। 10ॱनी उन लक्प ॱस्योर्नरे मी च्यीक् यो़प्प बेत्। ॱनी हुदु हुबे येशुल ॱङेत्त ॱयेङ्ज्येल ङीत्तुवे यङ्ल नेप्प ढक्तु ची़च्च्ये युङ्गेन् बेक्क न मीत् युङ्गेन् बेक्क? सीन्न ढीब बेत्। 11हीगी लेल्ल येशुगी खीत्रङ्ल लुक् च्यीगी च्यीक् यो़त्न ॱनी, हुगो ङीत्तुवे यङ्ल जरोक्ल जान ॱनी, हुगो ॱमीत् तो़म्ब स्योक्केन् दी खीत् ॱसु दी यो़प्प बेक्कक् ॱनी? 12लुक्ले त गज्येङ्गी मी चा छ्यीया हीन्डो न ॱनी। हीगो झ्यीनी ङीत्तुवे यङ्ल मील गय झ्यीच्च्ये युङ्गेन् बेत् सीन्न 13खोङ्गी हुगी लक्प ॱस्योर्नर दील रङ्गी लक्प दी च्योङ् झ्यीब बेत्। हुनी हुगी लक्प दी च्यङ्नी, लक्प ज्याबोक्म दी डस्सीरङ् हुगो ॱस्युम् थोगी ढक्नर बेत्। 14हुनी फरीसी दीब छ्यील थो़न्न फीन्न येशु घन्दुक् झ्यीन ॱसो़क्केन्? सीन्न ढो़ झ्यीब बेत्।
को़न्ज्योक्की दम्बे ॱयोक्पु १५-२१
15ॱनी हुगी ढो़ दी येशुगी ॱह घोनी खोङ् ॱयोङ्ल झ्यो़न्नर बेत्। ॱनी खोङ्गी तीङ्ल मी गज्येन् तीङ् दीत्न युङ्नी, हुबे घुङ्न यो़प्पे नेप्प घयेत् दी खोङ्गी कुरीक् ढक्तु ची़प्प बेत्। 16ॱनी खोङ्गी हुब घयेत्ल ङ ॱसु बेक्क हुगी ढीक्ल खीत्रङ्गी केच्च्य घन्ड अक् ॱमत् ॱस्यो़त् सीन्न गन्दीक्म ॱङाब बेत्। 17ॱनी हीगो कलुङ् ॱस्यो़क्केन् यशैयागी हीन्दुक् सीन्न ॱस्येत्न स्यक्पे केच्च्य हीगो डुबल झ्युङ बेत्। 18को़न्ज्योक्की ॱसुङ्गेन् बेत्।
ङे दम्बे झ्यम्बे ॱयोक्पुल ङ गुव दुक्। खोङ्गी ज्यप्तक्ल ङे ङरङ्गी थु तङ्न स्योक्केन्। ज्यी़त् ज्यी़त् घयेत्ल खोङ्गी दम्ङीत् मीप्पे ठीम् सीगेन् बेत्। 19केच्च्यल खोङ्गी थुक्री ॱमीत् चीगेन् बेगो। केत् छ्यीम्मु ॱमीत् तो़ङ्गेन् बेगो। ॱसट्टक्तु खोङ्गी केत् ॱह मीत् घोगेन् बेगो। 20खोङ्गी दम्ङीत् मीप्पे ठीम् दी ज्यला थो़न् थो़न् थुक्ल ॱनुक्म छ्यक्नर यङ् खोङ्गी च्योक्ले मीत् झ्यीक्केन् बेगो। दुङ्रेल मी ॱम कीम् कीम् बर्केन् यङ् खोङ्गी ॱसो़त्ले मीत् झ्यीक्केन् बेगो। 21ज्यी़त् ज्यी़त् घयेक्की खोङ्गी छेल्ल रीगो स्योक्केन् बेगो सीर थो़ङ्गेन् बेत्। (यशैया ४२:१-४)
येशुल दी़क्की ॱवङ्गी ॱनो़प्प दीक्कुक् सीर २२-३२
22हुनी हुदु स्यर्च्योक् तम् लप् ॱमीत् छुगेन् ॱनो़प्प अयेक्प स्यीन्नरे मी च्यीक् येशु च्येल्ल ठीक्न युङ बेत्। येशुगी हुगो ढक्तु ची़त्नी, हुनी हुगी मी दी ॱमीक्की थोङ्गेल्ल धङ् तम् लप् छुगेल्ल ॱसोङ बेत्। 23ॱनी हील हुगी मी घयेत् दी ॱह लेन खोङ्गी ढीक्ल हुबे हुगी मी हुगो दाऊद्गी ज्यी़त् हीम्ब न, न ॱसु ब अक्? झ्यीब बेत्। 24ॱनी हीगी केच्च्य हीगो फरीसी घयेक्की ॱह घोनी हुबे खोङ्गी ढीक्ल हुगी मी हुल ॱनो़प्प अयेक्प घयेक्की चोबो़न् बाल्जीबुल्की ॱवङ् यो़प्पेत्। ॱनी हुगी ॱवङ् दीगी क ॱनो़प्प अयेक्प ॱयोङ्म घयेत् तो़न्न दीक्को़प्पेत् झ्यीब बेत्।
25हुबे ॱनो़बे केच्च्य हुगो येशुगी ॱह घोनी हुनी खोङ्गी हुबल ज्यागक् घङ्गोल अक् नङ्दु मत् डीक्प, गो ॱङील भीन ॱनी, हुगो रुम्न मीत्तल डोगेन् बेत्। सार् हीन्, ढोङ्ब हीन्न अक्, हुगो नङ्दु मत् डीक्प, गो ॱङील भीन ॱनी, हुगो घन्दुक् झ्यीन ॱने छुगेन्। 26शैतान्गी शैतान्रङ् तो़न्न दीत्न, हुब नङ्दु मीत् डीक्प झ्युङ्न ॱनी, हुगी ज्यागक् हुगो घन्दुक् झ्यीन ॱने छुगेन्। 27ङे त बाल्जीबुल्की ॱवङ्गी ॱनो़प्प तो़न्न दीप्प झ्ये। ॱनी तीङ्ला खीत्रङ्गी भीज घयेत् दीबे ॱसी़ ॱवङ्गी तो़न्न दीक्केन् बेक्क ॱनी? हुगी यङ्ल खीत्रङ्गी भीज दीबेरङ् हीगी ढीक्ल खीत्रङ् फम्दु ची़क्केन् बेत्। 28ॱनी हुगो मेम्ब, ॱनो़प्प अयेक्प घयेत् हुगो को़न्ज्योक्की थुगी झ्यीन ङे तो़न्न दीक्केन् हीन्न ॱनी, को़न्ज्योक्की ज्यागक् खीत्रङ् च्याल ॱलीत् छर हीम्बल डोगेन् बेत्। 29मी ज्यीक्पागी ढोङ्ब लुप् गो़ झ्युङ्न ॱनी, ढोङ्बे दक्पु ज्यीक्स्यो दी कीङ्न स्यक्न मेन्द, हुगी यप्च्य घयेत् दी लुप् ॱमीत् छुगेन् बेत्।
30ॱसु ङे छ्योल मीन्दुक्क हुगो ङे ड हीम्बल डोगेन् बेत्। ॱसु ङदङ् छ्य झ्यीन दी़त्रो मीत् झ्यीप्पेक्क हुगी हरुङ् तोर्न मीत्तल तोङ्गेन् बेत्। 31हीगी ढीक्ल ङे ॱस्येत् योङ्। मी घयेक्की घन्डे दीक्परङ् झ्ये, घन्डे ॱमो़म्बी़त्रङ् तङ्न आक्, हुगो धक् डोगेन् बेत्। ॱनी धम्बे थुगी ढीक्ल ॱमो़म्बी़त् तङे दीक्प हुगो ॱनी ॱस्युली मीत् धक्केन् बेत्। 32कोलीमीगी ॱरेबी़ ढीक्ल मी ॱसी़ तम् अयेक्प च्यीक् लप्कुक्क हुगो धक्तु ची़त् छुगेन् बेत्। ॱनी धम्बे थुगी ढीक्ल मी ॱसी़ तम् अयेक्प लप्कुक्क हुगो हीगी धी़ हील अक् धक् ॱमीत् छुगेन्, ॱनी तीङ्मागी धी़ल अक् मीत् धक्केन् बेत्।
ॱस्यीङ्दोक् गा धङ् आक्पागी पी ३२-३७
33दोङ्बु गाल डलु दी इक् गारङ् छ्यागेन् बेत्। ॱनी दोङ्बु आक्पाल डलु दी इक् आक्पारङ् छ्यागेन् बेत्। दोङ्बु गा धङ् आक्पा हुगी डलु दील तेन खीत्रङ्गी ॱह घो छुगेन् बेत्। 34ॱवे डी़गी ज्यी़त्, खीत् मी ङेम्ब यो़क्केन् झ्यीनी, खीक्की घन्दुक् झ्यीन गागी तम् लप् ॱस्यीगेन्? ॱसीम्ल घन्डे घेङ्न यो़दङ् हुगो ख दीनी इक् थो़ङ्गेन् बेत्। 35मी सङ्बी़ रोरङ्गी ॱसीम्बे जो़त्ल गागी ढङ् घङ् देन यो़प्प घयेत् दी तो़ङ्गेन् बेत्। मी ङेम्बे यङ् रोरङ्गी ॱसीम्बे जो़त्ल अयेक्पे ढङ् घङ् देन यो़प्प घयेत् दी तो़ङ्गेन् बेत्। 36हीगी ढीक्ल ङे ॱस्येत् योङ्। ठीम्ज्यो़क्की ङीङ्गी यङ्ल मी घयेक्की धो़म्मीत्ल लबे तम् छीक् च्यीक्की चीस्यी इक् टो़त् गो़ ॱस्यर्केन् बेत्। 37हुगी ङीङ्गी यङ्ल रङ् धक्पर्ल थो़ङ्गो़दङ् न फम्गो़दङ् हुगो रङ्गी घङ् लब घयेत् दील तेन च्यो़क्केन् बेत् झ्यीब बेत्।
यीक् छ्यीसीगी ता ॱयेङ्गेन् ३८-४२
38हुनी हुगी फरीसी यरीब धङ् छ्यो़डीम्गी चयेलम यरीबे येशुल चयेलम नीज्यरङ्गी यीक् छ्यीम्मी़ लेगी ता च्यीक् तो़र्रो झ्यीदे, ङीत् तज्येम झ्यीब बेत्। 39हीगी लेल्ल येशुगी हीगी धीङ्सङ्गी मी ङेम्ब, ॱयोङ्दङ् ङीगेन् घयेत् हीबे यीक् छ्यीम्मी़ ता तो़ल्लेत् सीक्केन् बेत्। हुन्दुक् झ्यीबल कलुङ् ॱस्यो़क्केन् योनाल झ्युङे ता हुगो डस्सी मेन्द, ता ॱयोङ् ॱमीत् तो़ङ्गेन् बेत्। 40योना न छ्यीम्मी़ ढोप्पे नङ्दु स्यक्पु ॱसुम् थुक् देप्प डस्सी कोलीमीगी ॱरेबु उक् ॱसे नङ्दु स्यक्पु ॱसुम् थुक् दो़क्केन् बेत्। 41नीनवेगी मी घयेत्ल योनागी केच्च्य ॱस्येत्नी, हुनी हुबे ॱएङ्गी लम् दीनी ॱसीम् ज्युर्न युङ बेत्। हुगो झ्यीनी ॱनी, ठीम्ज्यो़क्की ङीङ्गी यङ्ल हीगी धीङ्सङ्गी मी हीबल हुब घयेक्की इक् ङीब कोप् छुगेन् बेत्। घन्ड हीन् सीन्न हुन्दो हीन ॱस्यो़क्केन् हीगो योनाले त छ्यीया च्यीक् बेत्। 42धङ्बु जम्बुलीङ्गी ॱल्हो ङो़गी ज्यामु च्यीक् सोलोमन्गी झ्यी़रीक्ल तदु युङ बेत्। हुगो झ्यीनी, ठीम्ज्यो़क्की ङीङ्गी यङ्ल हुगी इक् धीङ्सङ्गी मी हीबल ङीब कोप् छुगेन् बेत्। घन्ड हीन् सीन्न हुन्दो हीन सोलोमन्ले त छ्यीया च्यीक् यो़क्केन् बेत्।
ॱनो़प्प च्यीक्की ॱनो़प्प ॱयोङ्म दी़न् ठीक्न युङ्गेन् ४३-४५
43ॱनो़प्प स्यीलोक्पोक्म स्यीन्नरे मी च्यीक्की नङ्नी ॱनो़प्प दी थो़न्नी हुनी हुगो ॱस कम्बु ठोक्मीक्की लुङ्बल ङेस ॱयेङ्दु डोगेन् बेत्। ॱनी ङेस दी ॱमत् ॱङीबल 44हुगी यङ् रोरङ्गी ङरङ् एल्ला दो़स्स दीलरङ् लोक्केन् सीन्न लोक्न युङ्गेन् बेत्। युङ्नी, एल्लागी दो़स्स दी ॱनुम्रीलीक्ल छ्यान डीक्पोक्म ॱसेन तोङ् ठोलीक्ल यो़प्प ठेक्केन् बेत्। 45हुनी हुगो फीन्न यङ् रोरङ्ले दुक्पागी ॱनो़प्प अयेक्प ॱयोङ्म दी़न् ठीक्न युङ्न हुनी हुब कुरीक् हुल स्युन दो़क्केन् बेत्। हुनी हुगी मी दीगी मीजी दी एल्लागी दीले दुक्पा युङ्गेन् बेत्। ॱनी हीगो डस्सी दी क धीङ्सङ्गी मी ङेम्ब घयेत् हीबल युङ्गेन् बेत् सीन्न ॱसुङ बेत्।
ॱसु ॱसु येशुगी आम धङ् पी़न् हीम्ब युङ्गेन् ४६-५०
46येशुगी हुन्दुक् झ्यीन नङ्दु मी घयेत्ल केच्च्य ॱस्यो़प्पे यङ्ल खोङ्गी आम धङ् पी़न् दीब युङ बेत्। ॱनी हुब येशुदङ् केच्च्य लप्च्ये ॱनो़न छ्यी दीन यो़प्प बेत्। 47ॱनी नङ् दीदु मी च्यीक्की येशुल नीज्यरङ्गी आम धङ् पी़न् घयेत् नीज्यरङ्दङ् केच्च्य लप्च्ये ॱनो़न उन छ्यीन ॱलीत्न दुक् सीगुक् झ्यीब बेत्। 48हीगी लेल्ल येशुगी ङे आम धङ् पी़न् घयेत् दी ॱसु बेक्क ॱनी? सीन्नी 49खोङ्गी रोरङ्गी ॱलोप्टुक् दीब ङो़ल जुगु चुन ङे आम धङ् पी़न् घयेत् दीब हीब बेत्। 50तेङ् यी़न स्युगेन् ङे यप्की थुल यो़प्पल मी ॱसी़ नेन्न झ्यीगुक्क हुगो ङे पी़न् धङ् आम हीम्बल युङ्गेन् बेत् झ्यीब बेत्।
Valið núna:
मत्ती 12: LHM
Áherslumerki
Deildu
Afrita
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society