लुका 3
3
येशुगी ले झ्यीत् झ्यीत्ले एल्ला घङ् झ्युङ ३:१–४:१३
युहन्नागी येशुल लम् ॱसेन स्यक्पे तम् १-२०
1-2हुनी जकरीयागी भु युहन्ना दी पक्क झ्यङ्दङ्दु दो़प्पे यङ्ल को़न्ज्योक्की ॱसुङ्स्येत् ॱनङ्न तङ बेत्। हुगी धी़ल रोम्गी ज्यागक्की सीजर् ज्याबु दील टैबेरीयस् सीक्केन् दी थो़न्नी, लोङ च्येङ ॱसोङ हीङ्गो़प्प बेत्। हुगी यङ्ल यहुदीयान पेम्बु छ्यीस्स्यो दील रोम्गी स्युङ्गी को़बे पोन्तीयस् पीलातस् यो़प्प बेत्। ॱनी गालीलाल ॱवङ् च्योङ्गेन् दी हेरोद्, ॱनी इतुरीया धङ् त्राखोनीतीस्की लुङ्बल ॱवङ् च्योङ्गेन् दी हेरोद्गी पी़न् फीलीप्, ॱनी अबीलेनेगी लुङ्बल ॱवङ् च्योङ्गेन् दी लुसानीयास् यो़प्प बेत्। ॱनी छ्यो़प्पो़न् चो छ्यीस्स्यो दील हन्नास् धङ् कैयाफा यो़प्प बेत्। 3ॱनी युहन्नागी यर्दन् चङ्बी़ छीग ॱनमुल गीर्न मी घयेत्ल दीक्प धक्च्ये यो़प्पल खीत्रङ् घयेत् ॱएङ्गी लम्नी ॱसीम् ज्युर्ल बप्तीस्ल स्यु सीन्न केच्च्य ॱस्येप्प बेत्। 4हीगी ढीक्ल धङ्बु कलुङ् ॱस्यो़क्केन् यशैयागी ढीबे ॱसुङ्रप्ल थो़ङ्गेन् बेत्।
पक्क झ्यङ्दङ्दु केत् ज्यक्केन् च्यीक् थो़न्न हुगी केच्च्य दील चोव ज्यीन्दक् झ्यो़न्से लम् दीन्दीक्म ॱसेन ठोक्क सो़ज्यीत्। 5लम् ॱहङ्ज्यीत् ॱहोङ्ज्यीत् च्येम्म घयेत् ॱसीरील ॱनोम्ज्यीत्। लम् कोर्च्योक्प घयेत् ॱसीरील धङ् लम् दीज्ये मीप्प घयेत् दीन्दीक्म सो़ज्यीत्। 6हुनी क को़न्ज्योक्की ॱनङे थर्वे लम् दी कोलीमी कुरीक्की थोङ्गेन् बेत्। (यशैया ४०:३-५)
7हुदु युहन्ना च्येल्ल बप्तीस्ल स्युक्तु मी छेत्मीत् जोम्न युङ बेत्। ॱनी हुगी मी घयेत् दील युहन्नागी ॱवे डी़गी भीज, खीत् घयेत् को़न्ज्योक्की खोङ्डोक्की छ्येप्प को़गेन् हुगी लक्नी हीगो डस्सी झ्यीन युङ्न थर्केन् बेत् सीन्न खीत्ल ॱसी़ ॱस्येच्च्युङ? 8हुगो मेम्ब, खीत्रङ्गी ॱसीम् दी ॱएङ्गी लम्नी ज्युर्न हुल पीबे डेबु छ्या गोगेन् बेत्। खीत्रङ्गी ॱसीम्ल अब्राहाम् ङीक्की पुबु हीन् ॱनो़ब ॱसम्बे घन्डे घो ओक् मीत् ज्यक्केन् बेत्। ङे खीत्रङ्ल ॱस्येत् योङ्। हीगी दो हीब अक् को़न्ज्योक्की अब्राहाम्गी ज्यी़त्ल सो छुगेन् बेत्। 9ह दोङ्बु घयेत् ॱहेङ्ज्येमल चवल तरी ॱलीत् छर बेत्। ॱनी डेबु गङ्ज्येन् ॱमीत् छ्यागेङ्गी दोङ्बु घन यो़त्न अक्, हुगो ॱहेङ्न मील पुर्न ॱहे तोङ्गेन् बेत् झ्यीब बेत्।
10ॱनी हुगी मी घयेत् दीगी हुन्दुक् हीन्न ॱनी, ङीत् घन्दुक् झ्यी सीक्केन्? सीन्न खोङ्ल ढीब बेत्। 11ॱनी खोङ्गी लेम्बुल खीत्रङ् ली़ज्ये नङ् घो़ ॱङी यो़प्प च्येम्म दीगी ॱसुल मीन्दुक्क च्यीक् हुल बीन्ज्यीत्। ॱनी सम कोगेन् च्येम्म दीबे एक् हुन्दुक् दीरङ् झ्यीन ॱमीत् कोगेन् दीबल बीन्ज्यीत् सीन्न झ्यीब बेत्।
12ॱनी गोलदर् घयेत् एत् बप्तीस्ल स्युक्तु युङ्नी हुबे युहन्नाल चयेलम ङीत् घन्दुक् झ्यी सीक्केन्? सीन्न ढीब बेत्। 13ॱनी खोङ्गी लेम्बुल खीत्रङ्गी ठीम्ल घङ् यो़प्प मेन्द, हुले ॱल्हक्मु मत् लीन्ज्यीत्।
14हुनी ॱमक्मी घयेत् एत् युङ्न हुबे एक् खोङ्ल ङीत् घन्दुक् झ्यी सीक्केन्? सीन्न ढीब बेत्। ॱनी खोङ्गी हुबल मील स्येन्दोङ् मत् झ्यीज्यीत्। घन्ड नोङ् योङ ॱनो़न ॱयोङ्ल नक् ॱमत् ॱङो़न्ज्यीत्। रङ्गी ॱलल ॱलो दीय झ्यीज्यीत् सीन्न झ्यीब बेत्।
15ॱनी युहन्नागी तम्ल नेङ्गेन् हुगी मी घयेत् दीबे ॱसीम्ल हज्यरङ्गी रीगो झ्यीक्केन् को़न्ज्योक्की को़बे च्यप्को़न् ख्रीष्ट् दी हीगोरङ् हीम्ब न घन्ड ब अक्? ॱनो़ब छ्यर बेत्। 16ॱनी युहन्नागी मी घयेत् दील ङे त खीत्रङ् घयेत् छ्यी़ बप्तीस्लरङ् क ॱलुक्को़त्। ॱनी ङे तीङ्ल ङले गज्येङ्गी ज्यीक्पा च्यीक् युङ्गेन् बेत्। ङ खोङ्गी जुत्ते लेस् ॱस्यीक्केन्जो़त्ल आक् ॱमीत् ॱनेब यो़त्। ॱनी खोङ्गी क खीत्रङ् घयेत् धम्बे थु धङ् मी बरे बप्तीस्ल ॱलुक्केन् बेत्। 17खोङ्गी छ्यक्ल ॱस्येम्म धङ् फुक्मक् घयेत् ॱयुव पीक्च्येमे ॱलुङ्ज्यर् ज्यक्च्येम च्यीक् खुर्न यो़क्केन् बेत्। ॱनी हुगी ॱस्येम्म घयेत् दीदङ् फुक्मक् घयेत् दी ॱयुव पीक्नी, ॱस्येम्म दी खोङ् रोरङ्गी जो़त्ल ॱलुक्केन् बेत्। ॱनी फुक्मक् दी नम्ल अक् ॱमीत् ॱस्यीगेङ्गी मी बर्सल ॱलुक्न ॱहे तोङ्गेन् बेत् सीन्न ॱस्येप्प बेत्। 18ॱनी हीगो डस्सीगी ॱलोप्स ॱयोङ्म आक् गज्येन् ज्यप्न युहन्नागी हुगी मी घयेत् दील केच्च्य ॱनेम्बु ॱस्येत्न टेप्प बेत्।
19पो़न् हेरोद्गी रोरङ्गी पी़ङ्गी छ्युङ्म हेरोदीयस् दी ॱनमल ठीक्प हीम्बे ढीक्ल धङ् ङेम्बे ले ॱयोङ्म गज्येन् झ्यीबे ढीक्ल युहन्नागी हेरोद्ल लप्स्य तङ बेत्। 20हुनी हेरोद्गी युहन्ना चो़ल्ल ॱलुक् तङ बेत्। हीन्दुक् झ्यीन हेरोद्गी रोरङ्गी ङेम्बे ले दील हरुङ् ॱनो़म्ब ज्यब बेत्।
येशु बप्तीस्ल ॱलुक्प २१-२२
21युहन्नागी मी घयेत् बप्तीस्ल ॱलुक्पे यङ्ल हुदु येशु उक् बप्तीस्ल स्युक्तु युङ बेत्। हुनी खोङ् बप्तीस्ल ॱलुक्न, खोङ्गी हुनी को़न्ज्योक्ल ॱसुव तोबे यङ्ल इगी तेङ् यी़ भीनर बेत्। 22ॱनी इगीनी मल्ल धम्बे थु पुक्मी़ सी़ डस्सील युङ्न खोङ्ल घब बेत्। हुनी इगी तेङ् यी़नी मल्ल रङ् ङे झ्यम्बे भु हीन्। रङ्ल ङ गुव दुक् सीक्केङ्गी ॱसुङ्गेत् च्यीक् युङ बेत्।
येशु कीन युङे दुङ्ज्यी़त् २३-३८
23येशुगी गोम केच्च्य ॱस्यो़च्च्येमे ले झ्यीप्पे कप्ल खोङ् फोलो ॱसुम्ज्युबजो़त् ॱलीब यो़प्प बेत्। ॱनी मी घयेक्की येशु युसुफ्की भु दीरङ् बेत् ॱनो़ब ॱसम्गो़प्प बेत्। युसुफ्की पब एली बेत्। 24एलीगी पब मत्तात्, मत्तात्की पब लेवी, लेवीगी पब मल्की, मल्कीगी पब यान्ना, यान्नागी पब युसुफ्, 25युसुफ्की पब मत्तीया, मत्तीयागी पब आमोस्, आमोस्की पब नहुम्, नहुम्गी पब इस्ली, इस्लीगी पब नग्गै, 26नग्गैगी पब माथ्, माथ्की पब मत्तीया, मत्तीयागी पब सेमैन्, सेमैन्गी पब योसेक्, योसेक्की पब योदा, 27योदागी पब युहन्ना, युहन्नागी पब रेसा, रेसागी पब यरुबाबेल्, यरुबाबेल्की पब शाल्तीयेल्, शाल्तीयेल्की पब नेरी, 28नेरीगी पब मल्की, मल्कीगी पब अद्दी, अद्दीगी पब कोसाम्, कोसाम्गी पब एलमादम्, एलमादम्गी पब एर्, 29एर्की पब यहोशु, यहोशुगी पब एलीएजर्, एलीएजर्की पब योरीम्, योरीम्गी पब मत्तात्, मत्तात्की पब लेवी, 30लेवीगी पब शीमीयोन्, शीमीयोन्गी पब यहुदा, यहुदागी पब युसुफ्, युसुफ्की पब योनान्, योनान्गी पब एल्याकीम्, 31एल्याकीम्गी पब मलेया, मलेयागी पब मीन्ना, मीन्नागी पब मत्ताथा, मत्ताथागी पब नातान्, नातान्गी पब दाऊद्, 32दाऊद्गी पब यीशै, यीशैगी पब ओबेद्, ओबेद्गी पब बोअज्, बोअज्गी पब सोलोमन्, सोलोमन्गी पब नहशोन्, 33नहशोन्गी पब अम्मीनादाब्, अम्मीनादाब्गी पब अद्मीन्, अद्मीन्गी पब आराम्, आराम्गी पब हेस्रोन्, हेस्रोन्गी पब पेरेस्, पेरेस्की पब यहुदा, 34यहुदागी पब याकुब्, याकुब्गी पब इसहाक्, इसहाक्की पब अब्राहाम्, अब्राहाम्गी पब तेरह, तेरहे पब नाहोर्, 35नाहोर्की पब सरुग्, सरुगी पब रऊ, रऊगी पब पीलीक्, पीलीक्की पब एबेर्, एबेर्की पब शेला, 36शेलागी पब केनान्, केनान्गी पब अर्पक्साद्, अर्पक्साद्गी पब शेम्, शेम्गी पब नुह, नुहे पब लेमेक्, 37लेमेक्की पब मतुशेला, मतुशेलागी पब हनोक्, हनोक्की पब येरेद्, येरेद्गी पब महलालेल्, महलालेल्की पब केनान्, 38केनान्गी पब एनोश्, एनोश्की पब शेत्, शेत्की पब आदम्, आदम्गी पब को़न्ज्योक् बेत्।
Valið núna:
लुका 3: LHM
Áherslumerki
Deildu
Afrita
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
