YOHAN 2
2
Kana Yimtak Kiyir Benjong
1Asemnübuba nung Galil nung aliba Kana yimtak kiyir benjong ka liasü, aser Yisu tetsü yangji liasü. 2Yisu aser pa nütsüngtema kiyir benjong jagi jaok. 3Kodang yi agima, Yisu tetsüi pa dang ashi. “Parnok yi maka.” 4Yisui la dang ashi, “Oh tetsür ne tebilemtsüji kü khu masü. Kü mapang ano matong.” 5Pa tetsüi anganürtem dang ashi, “Pai kechisa nenok dang shidir, aji inyakang.” 6Yihuda nunger temeshitetba yimsü ama, idakji lung mori trok, ka ka shia nung temok ana asem aiba amentaka liasü. 7Yisui parnok dang ashi, “Mori nungji tzü tebang medema shiokang.” Anungji parnoki itemji tebang medema shiok. 8Idangji pai parnok dang ashi, “Tang tera tatetang aser benjong ketdangbuba dangi bener oang.” Aser parnoki aji bener ao. 9Kodang benjong ketdangbubai tang tzü agi akümba yiji menakdang aser aji kong nungi-ar memetet, sakasa anganür shiri tzüji shiok parnokibo meteta liasü. 10Pai kiyimsangji aja aser pa dang asüngdang, “Nisung ajaki tamasa yi tajungbaji anganür aser nisungtemi aji jemshia jemer külenang tamajungbaji anganür; saka tang tashi nai yi tajungbaji ayu?” 11Yisui temaitsü mapatem tenzükba ya pai Galil nung aliba Kana yimtak mezüngbuba inyak aser pa sentsüwangshi jungkai adokdaktsü aser pa nütsüngtemi pa dak amang. 12#Mat. 4.13. Iba sülen pa tetsü, pa adianutem aser pa nütsüngtem Kapernaumi alu aser parnoki idakji anogo ishika amung.
Tenla Ki Meshitetba
(Mat. 21.12,13; Mar. 11.15-17; Luk. 19.45,46)
13Tang Yihuda nunger Kümtettsü Benjong anasa liasü aser Yisu Yirusalemi atu. 14Aser pai tenla kidang nashi, san aser guduru ayokertem aser sen melenertem mena angu. 15Aser pai tareptsü lisü yanglu, aser san o nashi den shiruru ajak tenla ki nungi aridok, aser pai sen melenertem sen toktoktsü aser parnok langbang meküptoktsü. 16Aser guduru ayokertem dang pai ashi, “Itemi yang nungi bener oang. Kü Bu ki shishidak tekümdaktsü.” 17#TKe. 69.9. “Ne ki asoshi ni tejangraba agi asüngtsü” ta zülua aliba pa nütsüngtemi bilemtet. 18Anungji Yihuda nungeri pa dang langzüa ashi, “Item mapa inyakba asoshi nai onok dang kechi temaitsü sayur?” 19Yisui parnok dang langzüa ashi, “Iba tenla ki ya raksa-ang aser asemnü nung ni ya mesotsü.” 20Idangji Yihuda nungeri ashi, “Iba tenla ki küm lir-trok agia yanglua liasü, aser nai aji asemnü nung mesotsü ama?” 21Saka Yisui pei mang tenla ki indang jembi. 22Anungji kodang pa tasü nungi shia aru, pai ya jembi ta pa nütsüngtemi bilemtet; aser parnoki Laishiba o, aser Yisui ashiba o amang.
23Tang Kümtettsü Benjong mapang nung Yisu Yirusalem nung alidang, pai inyakba temaitsütem ngua pa tenüng nung aikati amang. 24Saka Yisui temulung lema pei sasa parnok nem magütsü, 25Kechiaser pai nisung ajak metet, aser shingaia nisung atema kuli agütsütsü mali: kechiaser nisung dak kechi liasü pai pei sasa metet.
Valið núna:
YOHAN 2: ANSEBSI
Áherslumerki
Deildu
Afrita
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More